Lucas 5

တဗဲ့တော်လေဟှို ခေါ်ဟှူကြောန်း

1 ✝ ၅.၁ မ ၁၃.၁,၂; မာ ၃.၉,၁၀; ၄.၁ တနေ့မာ ယေရှုဟှာ ဂင်္နေသရက်အိုင်ရဲ့ ကမ်းနားမာ ရပ်နေဟှူ ခီမာ လူလေဟှာ ဘုရားသခင်ရဲ့ စကားတော်ဟှို နားထောန်ဟှို့ ကိုယ်တော်နားဟှို တိုးဝမ်ဂေ့ဟှယ်။ 2 ကိုယ်တော်ဟှာ ကမ်းနားမာ ကပ်ဟှားဟှူ လှေနှေ့စင်းဟှို ဗြင်တော်မူဟှယ်။ ငါးဖမ်းမားလေဟှာ လှေလေထတ်ဟှနေ ဆင်းဘီးန ငါးဖမ်းပိုက်လေဟှို ဆေးနေဂေ့ဟှယ်။ 3 ယေရှုဟှာ အယ်လှေနှေ့စီးထဲဟှ ရှိမုန်ရဲ့ လှေထတ်ဟှို တတ်တော်မူဘီးန လှေဟှို ကမ်းဟှနေ နဲနဲခွာဟှို့ သူ့ဟှို ခွမ့်တောန်းလေဟှယ်။ ယေရှုဟှာ လှေထတ်မာ ထိုင်ဘီးန လူအောက်ဂီးဟှို သွန်သန်ဟှယ်။

4 ကိုယ်တော်ဟှာ သွန်သန်ရှင်းလေ ပီးဟှားဟှူ ခီမာ ရှိမုန်ဟှို "ရေနတ်ထဲဟှို ထွပ်ဟှားဘီး ငါးလေဟှို ဖမ်းဟှို့တွပ် နန့်န နန့်ပေါန်းဖော်လေရဲ့ ငါးဖမ်းပိုက်လေဟှို ခ္လဂေ့" မိန့်တော်မူလေဟှယ်။

5 ✝ ၅.၅ ယော ၂၁.၃ ရှိမုန်ဟှ "ကျွန်တော့်ဟှားလေဟှာ တညဉ့်လောင်း ကြိုးစားဘီး ဖမ်းလည်း ဂေါန်လည်းရဂေ့ဟှ။ အယ်ဘေမဲ့ ကိုယ်တော်ရဲ့ မိန့်တော်တိုင်း ငါးဖမ်းပိုက်လေဟှို ခ္လလိုက်မယ်" ဆိုဘီး ပ္လန်ပြောတော်မူဟှယ်။ 6 ✝၅.၆ ယော ၂၁.၆သူးနို့ဟှာ ငါးဖမ်းပိုက်လေဟှို ခ္လလိုက်ဘီးန ငါးလေဘောင်ဂီး ဖမ်းမိကြောန့် ငါးဖမ်းပိုက်လေ စုပ္လဲခါနီး ဖြစ်ဟှားဟှယ်။ 7 အယ်ကြောန့် သူးနို့ဟှာ လာဘီး ကူညီပေးဟှို့ တခြားလှေထဲမာရှိနေဟှူ သူးနို့ရဲ့ ပေါန်းဖော်လေဟှို လတ်ပြဘီး ခေါ်လိုက်ဟှယ်။ သူးနို့ဟှာ လာဘီးန လှေနှေ့စင်းလောင်းဟှို ငါးလေပ္လဲ့ ဖ္လဲ့လိုက်ကြောန့် လှေလေဟှာ မ္လုပ်ခါနီး ဖြစ်ဟှားဟှယ်။ 8 အယ်မျိုးဖြစ်ဇာလေဟှို ရှိမုန်ပေတရု ဗြင်လိုက်ဟှူ ခီမာ ယေရှုရှေ့မာ ဒူးထော့-က်ဘီး "သခင်၊ ကျွန်တော့်နားဟှနေ ကြွဟှားတော်မူပါ! ကျွန်တော်ဟှာ ပြစ်သား ဖြစ်ဟှယ်!" ဆိုဘီး လျှော့-က်လေဟှယ်။

9 သူ့နတူးဒူရှိဟှူ လူလေ ဂူလောင်းဟှာ ဖမ်းမိဟှူ ငါးလေဟှာ ဘောင်ဂီး ဖြစ်နေကြောန့် အံ့ဩဟှားဂေ့ဟှယ်။ 10 ရှိမုန်ရဲ့ လောက်ဖော်ဆောန်ဖတ်လေဖြစ်ဘီး ဇေဗေဒဲရဲ့ သားလေဖြစ်ဟှူ ယာကုပ်န ယောဟန်လေဟှာလည်း အယ်မျိုးဘဲ့ အံ့ဩဟှားဂေ့ဟှယ်။ ယေရှုဟှာ ရှိမုန်ဟှို "ကြော့-က်ဂေ့န။ ခုဟှစဘီး နန်ဟှာ လူလေဟှို ဖမ်းရလေ့မယ်" ဆိုဘီး မိန့်တော်မူလေဟှယ်။

11 သူးနို့ဟှာ လှေလေဟှို ကမ်းနားမာ ကပ်လိုက်ဘီး ငါးလေ ဂူလောင်း ထားရစ်ဘီးန နော့-က်တော်ဟှို လိုက်ဂေ့ဟှယ်။