18 လူတချို့ဟှာ လေဖြတ်နေဟှူ လူတယော့-က်ဟှို ထမ်းစင်န သယ်လာဘီး အီထဲဟှို သယ်ဆောင်ဟှားဘီး ယေရှုရဲ့ ရှေ့တော်မာ ခ္လဟှားဟှို့ ကြိုးစားဂေ့ဟှယ်။ 19 ကြိုးစားဘေမဲ့လည်း လူလေဘောင်ဂီး ရှိနေကြောန့် သူးနို့ဟှာ လူနာဟှို သယ်သွမ်းဟှားဟှို့ လမ်းရှာတွိဘဲ ဖြစ်နေဟှယ်။ အယ်ကြောန့် သူးနို့ဟှာ အီးခေါန်မိုးထတ်ဟှို တတ်ဘီးဟှာ အီးခေါန်မိုးဟှို ဖော့-က်ဘီးမှ လူနာဟှို ထမ်းစင်န လူအောက်ဂီးရဲ့လယ် ယေရှုရဲ့ ရှေ့တော်ဟှို လျှောခ္လဂေ့ဟှယ်။ 20 ယေရှုဟှာ သူးနို့မာ ရရာတိုင်း ယောင်ကြည်ရှင်း ရှိဟှယ် ဆိုဇာဟှို ဗြင်တော်မူဟှားဘီး လူနာဟှို "မိဆွေ၊ နန်ဟှာ ပြစ်လေလွတ်ရှင်းခံရဘီ" ဆိုဘီး မိန့်တော်မူလေဟှယ်။
21 ကျမ်းတတ်ဆရာလေန ဖာရိရှဲလေဟှာ "ဘုရားဟှို စော်ဂါးဘီး ပြောနေဟှူ လူဟှ ဖယ်သူနူး! ဘုရားသခင် တပါးဒဲဘဲ့ ပြစ်လေဟှို ဖြေလွတ်ပေးနိုင်ဟှယ်!" ဆိုဘီး သူးနို့ရှင်းရှင်း ပြောနေဂေ့ဟှယ်။
22 ယေရှုဟှာ သူးနို့ရဲ့ စိဟှို သိကြောန့် သူးနို့ဟှို "နန်းနို့ဟှာ ဖြားဖြစ်ကြောန့် အယ်ဇာလေဟှို နန်းနို့ရဲ့ နှလောင်းထဲမာ စဉ်းစားနေဂေ့နူး။ 23 ‘နန်ဟှာ ပြစ်လွတ်ရှင်းခံရဘီ’ ဆိုဘီး ပြောဇာဟှ လွယ်လော။ ‘နန် ထဘီး လမ်းရှော့-က်’ ဆိုဘီး ပြောဇာဟှ လွယ်လော။ 24 လူ့ရဲ့သားဟှာ လောကမာ ပြစ်လွှတ်ပိုင်ဟှူ ခွမ့်အာဏာ ရှိဟှယ် ဆိုဇာ နန်းနို့ဟှို သတ်သေပြမယ်" ဆိုဘီး မိန့်တော်မူလေဟှယ်။ အယ်ကြောန့် ကိုယ်တော်ဟှာ လေဖြတ်နေဟှူ လူဟှို "ထဒန်၊ ထမ်းစင်ဟှို သီးဘီးဟှာ အီပ္လန်ဝေါ့!" ဆိုဘီး မိန့်တော်မူလေဟှယ်။
25 ရှစ်ရှင်းဘဲ့ အယ်လူဟှာ သူးနို့ ဂူလောင်းရှေ့မာ ထရပ်ဘီး။ သူအိဟှားဟှူ အိယာဟှို သီးဘီး၊ ဘုရားသခင်ဟှို ချီးမွမ်းဘီး အီဟှို ပ္လန်ဟှားဟှယ်။
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)