1 ယေရှုဟှာ တဗဲ့တော် ဆယ့်နှေ့ပါးဟှို ခေါ်ဘီး နတ်ဆိုးလေဟှို နှန်ထုဟှို့န ရောဂါလေ ပျော့-က်စေဟှို့ သူးနို့ဟှို တဂိုးန ခွမ့်အာဏာဟှို ပေးတော်မူဟှယ်။ 2 အယ်ဘီးန ကိုယ်တော်ဟှာ ဘုရားသခင်ရဲ့ နိုင်ငံတော်ကြောန်း ဟောပြောဟှို့န လူနာလေ ကျန်းမာစေဟှို့ သူးနို့ဟှို စေလွတ်တော်မူဘီးန၊ 3 ✝သူးနို့ဟှို "ခရီးသွားဟှို့တွပ် နန်းနို့နတူးဒူ ဖြားဇာလည်း ယူဟှားဂေ့န။ တောန်အူး၊ လွယ်အိ၊ စားဇာ၊ ကပ်လေန အန်းဂီပိုလည်း ယူဂေ့န။ 4 ဖယ်အီဘဲ့ဖြစ်ဖြစ် နန်းနို့ဟှို ဝမ်ခွမ့်ပြုဟှယ် ဆိုဟှာ အယ်ဗြို့ဟှ ထွပ်ခန်ထိ အယ်အီမာနေဘီး 5 ✝လူလေဟှ နန်းနို့ဟှို လတ်ခံဟှ ဆိုဟှာ အယ်ဗြို့ဟှ ထွပ်ဟှားဘီး သူးနို့ဟှာ လတ်ခံဂေ့ဟှ ဆိုဇာဟှို သတ်သေဖြစ်န နန်းနို့ခေဖွားဟှ မ္လေမုဟှို ခါခ္လလိုက်ဂေ့" ဆိုဘီး မိန့်တော်မူလေဟှယ်။

6 တဗဲ့တော်လေဟှာ ထွပ်ဟှားဘီး ဝါလေဂူလောင်းဟှို သွားဘီးန ရော့-က်ဟှူ နေရာတိုင်းမာ ဒန်းကောန်းဟောပြောဂေ့ဘီး ရောဂါလေဟှို ပျော့-က်စေဂေ့ဟှယ်။

7 ✝ဂါလိလဲပြည်ဟှို အောက်ချောက်ဟှူ ဟေရုဒ်ဟှာ ကိုယ်တော် ပြုတော်မူဟှူ ဇာလေ ဂူလောင်းဟှို ကြားဟှူ ခီမာ ရရာတိုင်း စိရှောက်ဟှားဟှယ်။ ဖြားဖြစ်ကြောန့်နူးဆိုဟှာ လူတချို့ဟှ ဗတ္တိဇံ ယောဟန်ဟှာ သေဘီးမှ ပ္လန်ရှင်လာဟှယ် ဆိုဘီး ပြောနေကြောန့် ဖြစ်ဟှယ်။ 8 တခြားလူလေဟှ ဧလိယ ပ္လန်ပေါ်လာဟှယ် ဆိုဇာဟှို ပြောဂေ့ဘီး တခြားလူလေဟှလည်း ရှေးပရောဖက်လေထဲဟှ တယော့-က် သေဘီးမှ ပ္လန်ရှင်လာဟှယ် ဆိုဘီး ပြောနေဂေ့ဟှယ်။ 9 ဟေရုဒ်ဟှ "ငါဟှာ ယောဟန်ရဲ့ ခေါန်းဟှို ဖြတ်လိုက်ပီးဘီ။ အယ်ဆိုဟှာ ငါဒန်းကြားနေရဟှူ အယ်လူဟှာ ဖယ်သူနူး" ဆိုဘီး ပြောလေဟှယ်။ အယ်ဘီးန သူဟှာ ယေရှုဟှို တွိရဟှို့ ရှာကြံလေဟှယ်။

10 တမန်တော်လေဟှာ ပ္လန်ရော့-က်လာဘီးန ယေရှုဟှို သူးနို့ရဲ့ လောက်ဆောန်ချစ်လေ ဂူလောင်းဟှို လျှော့-က်ဂေ့ဟှယ်။ ကိုယ်တော်ဟှာ သူးနို့နတူးဒူ ဗက်ဇဲဒ ဆိုဘီး နာမယ်ရှိဟှူ ဗြို့ဟှို ကြွဟှားလေဟှယ်။ 11 လူအောက်ဂီးဟှာ အယ်မျိုးကြွဟှားဟှယ် ဆိုဇာဟှို ကြားရဟှူ ခီမာ ကိုယ်တော်နော့-က်ဟှို လိုက်ဂေ့ဟှယ်။ ကိုယ်တော်ဟှာ သူးနို့ဟှို ကြိုဆိုဘီး ဘုရားသခင်ရဲ့ နိုင်ငံတော်ကြောန်းဟှို ဟောပြောဘီးဟှာ ရောဂါရှိဟှူ သူလေဟှို နာပျော့-က်စေဟှယ်။

12 ညဉ့်မိုက်ခါနီးခီမာ တဗဲ့တော် ဆယ့်နှေ့ပါးဟှာ ကိုယ်တော့်နားဟှို လာဘီးန "လူလေဟှို နီးနားမာရှိနေဟှူ ဝါလေဟှို သွားစေဘီး အိဟှို့နေရာလေန စားဇာလေရှာဟှို ရှာစေတော်မူပါ။ ဖြားဖြစ်ကြောန့်နူးဆိုဟှာ အယ်နေရာဟှာ လူသူမှေ့ဘဲဟှူ နေရာဖြစ်ဟှူကြောန့် ဖြစ်ဟှယ်" ဆိုဘီး လျှော့-က်ဂေ့ဟှယ်။

13 အယ်ဘေမဲ့ ကိုယ်တော်ဟှာ သူးနို့ဟှို "နန်းနို့ကိုယ်တိုင် သူးနို့စားဟှို့ စားဇာတခုခုပေးဂေ့" ဆိုဘီး မိန့်တော်မူလေဟှယ်။

သူးနို့ဟှ "ကျွန်တော့်ဟှားလေ ဂူလောင်းမာ မုငါးလောင်းန ငါးနှေ့ကောန်ဘဲ့ ရှိဟှယ်။ ကိုယ်တော်ဟှ အယ်လူအောက်ဂီးတွပ် စားဇာဝယ်ဟှို့ ကျွန်တော့်ဟှားလေဟှို သွားစေရှင်လော" ဆိုဘီး ပ္လန်လျှော့က်ဂေ့ဟှယ်။ 14 (အယ်လူအောက်ဂီးထဲမာ ယော့-က်ကျား , လော့-က် ရှိဟှယ်။)

ယေရှုဟှာ တဗဲ့တော်လေဟှို "လူလေဟှို ငါးဆယ်စီစုဘီး ထိုင်ခိုင်းလိုက်" ဆိုဘီး မိန့်တော်မူလေဟှယ်။

15 တဗဲ့တော်လေဟှာ မိန့်တော်မူလိုက်ဟှူတိုင်း လောက်ဘီးန၊ 16 ယေရှုဟှာ မုငါးလောင်းန ငါးနှေ့ကောန်ဟှို ယူလေဟှယ်။ အယ်ဘီးန ကောန်းဂန်ဟှို မော့ကေ့ဘီး၊ မုန ငါးတွပ် ဘုရားသခင်ဟှို ချီးမွမ်းဘီး၊ မုဟှို ဖဲ့ဘီးန လူလေဟှို ဝီပေးဟှို့ တဗဲ့တော်လေဟှို ပေးလေဟှယ်။ 17 သူးနို့ ဂူလောင်းဟှာ ဗိုက်ပ္လဲ့အောန် စားဂေ့ဘီးန တဗဲ့တော်လေဟှာ ကြွင်းကျန်လေဟှို လိုက်ကော့-က်ဂေ့ဇာ ခြင်းဒေါန်းန ဆယ့်နှေ့တောန်းပ္လဲ့ ရဂေ့ဟှယ်။

18 တနေ့မာ ယေရှုတပါးဒဲ ဆုတောန်းနေဟှူ ခီမာ တဗဲ့တော်လေဟှာ ကိုယ်တော်နားဟှို လာဂေ့ဟှယ်။ ကိုယ်တော်ဟှ "လူအောက်ဂီးဟှ ငါဟှို ဖယ်သူ ဆိုဘီး ပြောနေဂေ့နူး" ဆိုဘီး သူးနို့ဟှို မေးတော်မူဟှယ်။

19 ✝ သူးနို့ဟှ "တချို့ဟှ ကိုယ်တော်ဟှာ ဗတ္တိဇံယောဟန် ဖြစ်ဟှယ်။ တခြားလူလေဟှ ကိုယ်တော်ဟှာ ဧလိယဖြစ်ဟှယ်။ တခြားလူလေဟှ သေဘီးမှ ပ္လန်ရှင်လာဟှူ ရှေးပရောဖက် တပါးပါး ဖြစ်ဟှယ် ဆိုဘီး ပြောဂေ့ဟှယ်" ဆိုဘီး လျှော့-က်လေဟှယ်။

20 ✝ကိုယ်တော်ဟှ "နန်းနို့လေဟှမား ငါ့ဟှို ဖယ်သူဖြစ်ဟှယ် ဆိုဘီး ပြောဂေ့နူး" ဆိုဘီး သူးနို့ဟှို မေးတော်မူလေဟှယ်။

ပေတရုဟှ "ကိုယ်တော်ဟှာ ဘုရားသခင်ရဲ့ မေရှိယ ဖြစ်ဟှယ်" ဆိုဘီး လျှော့-က်လေဟှယ်။

21 အယ်ဘီးန ယေရှုဟှာ အယ်ကြောန်းဟှို ဖယ်သူ့ဟှိုလည်း ပြောဘဲဟှို့တွပ် သူးနို့ဟှို မိန့်ပေးလေဟှယ်။ 22 ကိုယ်တော်ဟှလည်း "လူ့ရဲ့သားဟှာ ရရာတိုင်း နာကျင်ရှင်း ဝေဒနာဟှို ခံရဘီး ကြီးကဲလေ၊ ယဇ်ပုရောဟိတ်ဂီးလေန ကျမ်းတတ်ဆရာလေရဲ့ ငြင်းပယ်ရှင်းဟှို ခံရလေ့မယ်။ လူ့ရဲ့သားဟှာ သေသတ်ရှင်းဟှို ခံရမယ်။ အယ်ဘေမဲ့ သောင်းရစ် ပ္လဲ့ဟှူ နေ့မာ လူ့ရဲ့သားဟှာ ပ္လန်ရှင်လေ့မယ်" ဆိုဘီး သူးနို့ဟှို မိန့်တော်မူလေဟှယ်။

23 ✝ အယ်ဘီဟှာ ကိုယ်တော်ဟှာ သူးနို့ ဂူလောင်းဟှို "နန်းနို့ဟှ ငါ့တဗဲ့ ဖြစ်ရှင်ဟှယ် ဆိုဟှာ ကိုယ့်ကိုယ်ကိုယ် ငြင်းပယ်ဘီး နေ့တိုင်း နန်းနို့ရဲ့ လတ်ဝါးကပ်တိုင်ဟှို ထမ်းဘီးဟှာ ငါ့နော့-က်ဟှို လိုက်ရမယ်။ 24 ✝ ဖြားဖြစ်ကြောန့်နူဆိုဟှာ နန်းနို့ရဲ့ သတ်ဟှို ကယ်တန်ရှင်ဟှယ် ဆိုဟှာ နန်းနို့ဟှာ သတ်ရှောင်းလေ့မယ်။ အယ်ဘေမဲ့ ငါ့ကြောန့် နန်းနို့ရဲ့ သတ်ရှောင်းမယ် ဆိုဟှာ နန်းနို့ဟှာ နန်းနို့သတ်ဟှို ကယ်တန်လေ့မယ်။ 25 နန်းနို့ဟှာ လောက တခုလောင်းဟှို ပိုင်ဆိုင်ခွမ့် ရဘေမဲ့လည်း နန်းနို့ရဲ့ သတ်ရှောင်းမယ် ဆိုဟှာ ဖြားကျိုးရှိမယ်နူး။ ဖြားကျိုးလည်းမှေ့ဟှ! 26 နန်းနို့ဟှာ ငါ့န ငါ့ရဲ့ စကားလေတွပ် ယှစ်နေမယ် ဆိုဟှာ လူ့ရဲ့သားဟှာ သူ့ရဲ့ ဖောင်းသရေတော်၊ ဖရဲ့ ဖောင်းသရေတော်၊ သန့်ရှင်းဟှူ ကောန်းဂန်တမန်လေရဲ့ ဖောင်းသရေတော်န ကြွလာဟှူ ခီမာ အယ်လူတွပ် ယှစ်လေ့မယ်။ 27 နန်းနို့ဟှို ငါ မှန်တိုင်းပြောမယ်၊ အယ်နေရာမာ ရှိနေဟှူ လူတချို့ဟှာ ဘုရားသခင်ရဲ့ နိုင်ငံတော်ဟှို ဗြင်ရဘဲ့န သေရလေ့ဟှို့ မှုဟှ" ဆိုဘီး မိန့်တော်မူလေဟှယ်။

28 ✝ယေရှုဟှာ အယ်မျိုးမိန့်တော်မူဘီး တဘတ်လော့-က် ကြာဟှူ ခီမာ ပေတရု၊ ယာကုပ်န ယောဟန်လေဟှို ခေါ်ဘီးန ဆုတောန်းဟှို့ တောန်ထတ်ဟှို တတ်ဟှားဂေ့ဟှယ်။ 29 ကိုယ်တော်ဟှာ ဆုတောန်းနေဟှူ ခီမာ ကိုယ်တော်ရဲ့ မျစ်နှာဟှာ ဆင်းသဏ္ဌာန် ပ္လောန်းလဲဟှားဘီး ဝတ်တော်ဟှာလည်း ဖ္လူဆွတ်ဆွတ် ဖြစ်လာဟှယ်။ 30 လူနှေ့ယော့-က်ဟှာ ရောက်တရစ် ပေါ်လာဘီး ကိုယ်တော်န စကားပြောနေဂေ့ဟှယ်။ သူးနို့ဟှာ မောရှေန ဧလိယဖြစ်ဘီး 31 သူးနို့ဟှာ ကောန်းဂန်ဖောင်းသရေတော်န ပေါ်လာဘီး ဘုရားသခင်ရဲ့ ရည်ရွယ်ချစ် ပ္လဲ့ဇောင်ဟှို့တွပ် ကြာခန်မာ ယေရုရှလင်ဗြို့မာ ကိုယ်တော် သေခံရဟှို့ကြောန်းဟှို ယေရှုန ပြောနေဂေ့ဟှယ်။ 32 ပေတရုန သူ့ရဲ့ လောက်ဖော်ဆောန်ဖတ်လေဟှာ အိမွိနေဂေ့ဟှယ်။ အယ်ဘေမဲ့ သူးနို့ဟှာ နိုးလာဘီးဟှာ ယေရှုရဲ့ ဖောင်းသရေတော်န ကိုယ်တော်နတူးဒူ ရပ်နေဟှူ လူနှေ့ယော့-က်ဟှို ဗြင်ရဟှယ်။ 33 အယ်လူနှေ့ယော့-က်ဟှာ ယေရှုနားဟှ ထွပ်ဟှားဟှူ ခီမာ ပေတရုဟှာ ကိုယ်တော့်ဟှို "သခင်၊ အယ်နေရာဟှာ နေရှင်ဘွယ်ကောန်းဟှယ်! ကျွန်တော့်ဟှားလေဟှာ ကိုယ်တော်တွပ် တဲတဆောန်၊ မောရှေတွပ် တဲတဆောန်န ဧလိယတွပ် တဲတဆောန်၊ တဲသောင်းဆောန်ဟှို ကျွန်တော်ဟှားလေ ဆော့-က်ပေးမယ်" ဆိုဘီး လျှော့-က်လေဟှယ်။ (သူပြောနေဇာဟှို သူတကယ် သိဂေ့ဟှ။)

34 သူဟှာ အယ်မျိုး လျှော့-က်နေဟှူ ခီမာဘဲ့ မိုးတီတခု ပေါ်လာဘီးဟှာ သူးနို့ဟှို ဖောင်းဟှားလိုက်ဟှူကြောန့် ကြော့-က်လန့်ဟှားဂေ့ဟှယ်။ 35 ✝ မိုးတီထဲဟှနေ "အယ်သူဟှာ ငါဝီးကော့-က်ဟှားဟှူ ငါ့ရဲ့ ရှစ်ဟှူသား ဖြစ်ဟှယ်။ သူ့စကားဟှို နားထောန်ဂေ့!" ဆိုဘီး သံတော် ထွပ်ပေါ်လာဟှယ်။

36 သံတော် ထွပ်ပေါ်လာဘီးန ယေရှုတပါးဒဲဟှိုဘဲ့ ဗြင်ရလေဟှယ်။ အယ်ခီမာ တဗဲ့တော်လေဟှာ ဗြင်ရဟှူဇာလေ ဂူလောင်းဟှို ဖယ်သူ့ဟှိုလည်း ပြောဘဲန တိတိဟှားနေဂေ့ဟှယ်။

37 နတ်ကီးဖတ်မာ ယေရှုန တဗဲ့တော် သောင်းပါးဟှာ တောန်ထတ်ဟှနေ ဆင်းလာဂေ့ဟှူ ခီမာ လူအောက်ဂီးဟှာ ယေရှုဟှို ကြိုဆိုဂေ့ဟှယ်။ 38 လူအောက်ဂီးထဲဟှနေ လူတယော့-က်ဟှ "ဆရာ! ကျွန်တော့်ရဲ့ သားဟှို ကေ့ရှုပေးဟှို့ ကျွန်တော်တောန်းဗန်ပါဟှယ်။ သူဟှာ ကျွန်တော့်ရဲ့ တယော့-က်ဒဲဟှူ သားဖြစ်ဟှယ်! 39 နတ်ဖမ်စားဟှားဟှူကြောန့် သူဟှာ ရောက်တရစ် ထအော်ဘီးဟှာ ဇတ်ပေါ့-က်ဟှ ဖြုတ်လေထွပ်ဘီး တော့-က်မာလာလေဟှယ်။ နတ်ဟှာ သူ့ဟှို နာကျင်အောန်လောက်ဘီးမှ ခတ်ခတ်ခဲခဲ ထွပ်ဟှားဟှယ်! 40 ကျွန်တော်ဟှာ ဆရာရဲ့ တဗဲ့လေဟှို အယ်နတ်ဟှို နှန်ထုခိုင်းဘေမဲ့ သူးနို့ဟှာ တတ်နိုင်ဂေ့ဟှ" ဆိုဘီး အော်ဟစ်ဘီး လျှော့-က်လေဟှယ်။

41 ယေရှုဟှ "ယောင်ကြည်ရှင်းလည်းမှေ့။ ဖော့-က်ပ္လန်ဟှူ လူလေ! ငါဟှာ နန်းနို့နတူးဒူ ဖယ်လော့-က်ကြာအောန် နေနေရနူး။ ငါဟှာ နန်းနို့ဟှို ဖယ်လော့-က်ကြာကြာ သီးခံရဟှို့နူး။" ဆိုဘီး မိန့်တော်မူလေဟှယ်။ အယ်ဘီးန ကိုယ်တော်ဟှာ အယ်လူဟှို "နန့်ရဲ့ သားဟှို ခေါ်လာပါ" ဆိုဘီး မိန့်တော်မူလေဟှယ်။

42 ကောန်သားဟှားဟှာ လာနေဒူးမာဘဲ့ နတ်ဆိုးဟှာ သူ့ဟှို မ္လေထတ်မာလှဲခ္လဘီး တော့-က်မာအောန် လောက်ဟှယ်။ ယေရှုဟှာ ညစ်ညူးဟှူနတ်ဟှို မိန့်ပေးလိုက်ဘီး ကောန်းသားဟှားဟှို ကျန်းမာစေဘီးန သူ့ရဲ့ဖဟှို ပ္လန်ပေးလေဟှယ်။ 43 လူလေ ဂူလောင်းဟှာ ဘုရားသခင်ရဲ့ မဟာတဂိုးတော်ဟှို အံ့ဩဟှားဂေ့ဟှယ်။

လူလေဟှာ ယေရှု ပြုလောက်ဇာလေ ဂူလောင်းဟှို အံ့ဩနေခီမာဘဲ့ ကိုယ်တော်ဟှာ တဗဲ့တော်လေဟှို 44 "နန်းနို့ဟှို ငါမိန့်မှာဟှားဇာလေဟှို မေ့ဂေ့န! လူ့ရဲ့သားဟှာ လူလေရဲ့ လတ်ထဲဟှို အပ်ရှင်းဟှို ခံရလေ့မယ်" ဆိုဘီး မိန့်တော်မူလေဟှယ်။ 45 အယ်ဘေမဲ့ အယ်စကားဟှို တဗဲ့တော်လေ နားလည်နိုင်ဘဲအောန် ဓိပါယ်ဟှို ဖောင်းဟှားကြောန့် သူးနို့ဟှာ နားလည်ဂေ့ဟှ။ အယ်ဓိပါယ်န ပတ်သတ်ဘီး ကိုယ်တော့်ဟှို တောန်းလျှော့-က်ဟှို့လည်း သူးနို့ ကြော့-က်ဂေ့ဟှယ်။

46 ✝တဗဲ့တော်လေ ကြားထဲမာ ဖယ်သူဟှာ ကီးမြတ်ဆောင်း ဖြစ်ဟှယ် ဆိုဘီး ဂြင်းခူရှင်းလေ ဖြစ်လာဟှယ်။ 47 ယေရှုဟှာ သူးနို့ ဖြားဇာလေ ဂြင်းခူနေဟှယ် ဆိုဇာဟှို စိထဲမာ သိဟှူကြောန့် သားဂန်းဟှား တယော့-က်ဟှို ခေါ်ဘီးဟှာ ကိုယ်တော်ရဲ့ ဘေးနားမာ ရပ်စေဘီးန၊ 48 ✝ သူးနို့လေဟှို "အယ်မူသားဂန်းဟှားဟှို ငါ့နာမနှိုက် လတ်ခံဟှူသူဟှာ ငါ့ဟှို လတ်ခံဟှယ်။ ငါ့ဟှို လတ်ခံဟှူသူဟှာ ငါ့ဟှို စေလွှတ်လိုက်ဟှူ သူဟှိုလည်း လတ်ခံရှင်းဖြစ်ဟှယ်။ အယ်ကြောန့် နန်းနို့ထဲမာ ငယ်ဆောင်းဟှူလူဟှာ ကီးမြတ်ဆောင်း ဖြစ်ဟှယ်" ဆိုဘီး မိန့်တော်မူလေဟှယ်။

49 ယောဟန်ဟှ "သခင်၊ ကိုယ်တော်ရဲ့ နာမန နတ်ဆိုးလေဟှို နှန်ထုနေဟှူ လူတယော့-က်ဟှို ကျွန်တော့်ဟှားလေ တွိဟှားဟှယ်။ အယ်လူဟှာ ကျွန်တော့်ဟှားလေ အောက်စုထဲဟှမှုဘဲကြောန့် ကိုယ်တော်ရဲ့ နာမဟှို သောင်းန ဆိုဘီး တားမြစ်ဟှားဟှယ်" ဆိုဘီး လျှော့-က်လေဟှယ်။

50 ယေရှုဟှာ "အယ်လူဟှို တားမြစ်ဂေ့န။ ဖြားဖြစ်ကြောန်ဆိုဟှာ နန်းနို့ဟှို ဆန့်ကျင်ဘဲဟှူ လူဟှာ နန်းနို့ဖတ်မာရှိဟှယ်" ဆိုဘီး ယောဟန်န တခြားတဗဲ့တော်လေဟှို မိန့်တော်မူလေဟှယ်။

51 ယေရှုဟှာ ကောန်းဂန်ဘောင်ဟှို တတ်ကြွဟှို့ နီးလာဟှူ ခီမာ ယေရုရှလင်ဗြို့ဟှို ကြွဟှားတော်မူဟှို့ စိဆောင်းဖြတ်လေဟှယ်။ 52 ကိုယ်တော်ဟှာ စေတမန်လေဟှို ရှေ့ဟှနေ စေလွှတ်ဘီး သူးနို့ဟှာ ကိုယ်တော်တွပ် ပြင်ဆင်ဟှို့ ရှမာရိဝါထဲဟှို ဝမ်ဂေ့ဟှယ်။ 53 အယ်ဘေမဲ့ ကိုယ်တော်ဟှာ ယေရုရှလင်ဗြို့ဟှို ခရီးပြုနေဟှယ် ဖြစ်ဟှူကြောန့် အယ်နေရာမာရှိနေဟှူ လူလေဟှာ ကိုယ်တော့်ဟှို လတ်ခံဂေ့ဟှ။ 54 အယ်မူဇာဟှို တဗဲ့တော်လေဖြစ်ဟှူ ယာကုပ်န ယောဟန်လေ ဗြင်ဟှားဟှူ ခီမာ သူးနို့ဟှ "သခင်ဘုရား၊ ကျွန်တော့်ဟှားလေဟှာ ဧလိယလောက်ဟှူမျိုး ကောန်းဂန်ဟှနေ မီးက္လစေလိုက်ဘီး သူးနို့ဟှို လောန်ဟှားဟှို့ ကိုယ်တော် လိုရှင်လော။"* ဆိုဘီး မေးလျှော့-က်လေဟှယ်။

55 အယ်ဘေမဲ့ ယေရှုဟှာ လှည့်ကေ့ဘီးန သူးနို့ဟှို ဆောင်းမလေဟှယ်။* 56 အယ်ဘီးန ယေရှုဟှာ တဗဲ့တော်လေန တခြားဝါဟှို ဆစ်ဘီး ကြွဟှားတော်မူဟှယ်။

57 သူးနို့ဟှာ ခရီးဆစ်သွားနေကြောန့် လူတယော့-က်ဟှာ ယေရှုဟှို "ကိုယ်တော် ဖယ်နေရာသွားသွား ကျွန်တော် လိုက်ပါမယ်" ဆိုဘီး လျှော့-က်လေဟှယ်။

58 ယေရှုဟှလည်း "မ္လေခွီးမာ တွမ်းရှိဟှယ်။ ကောန်းဂန်ဟှ ငှတ်မာလည်း သိုက်ရှိဟှယ်။ အယ်ဘေမဲ့ လူ့ရဲ့သားမာဟှ ခေါန်းခ္လဟှို့တွပ် နေရာမှေ့ဟှ" ဆိုဘီး မိန့်တော်မူလေဟှယ်။

59 ကိုယ်တော်ဟှာ "ငါ့နော့-က်ဟှို လိုက်ပါ" ဆိုဘီး တခြား တယော့-က်ဟှို မိန့်တော်မူလေဟှယ်။

အယ်ဘေမဲ့ အယ်လူဟှ "သခင်၊ ကျွန်တော့်ဖဟှို ရင်ဦးဆောင်း သွားဘီး သင်္ဂြိုဟ်ဟှို့တွပ် ခွမ့်ပေးပါ" ဆိုဘီး လျှော့-က်လေဟှယ်။

60 ယေရှုဟှ "လူသေလေဟှို လူသေလေဘဲ့ သင်္ဂြိုဟ်ပါစေ။ နန်ဟှာ သွားဘီး ဘုရားသခင်ရဲ့ နိုင်ငံတော်ဟှို ဟောပြောပါ" ဆိုဘီး မိန့်တော်မူလေဟှယ်။

61 နော့-က်တယော့-က်ဟှလည်း "သခင်၊ ကျွန်တော်ဟှာ ကိုယ်တော့် နော့-က်တော်ဟှို လိုက်ရှင်ဟှယ်။ အယ်ဘေမဲ့ ကျွန်တော့်မိသားစုဟှို ရင်ဦးဆောင်း နှောက်ဆစ်ခွမ့်ပြုပါ" ဆိုဘီး လျှော့-က်လေဟှယ်။

62 ယေရှုဟှာ သူ့ဟှို "ထွန်ဂိုင်းဟှို ကိုင်ဘီး နော့-က်ဟှို ပ္လန်လှည့်ကေ့ဟှူ လူဟှာ ဘုရားသခင်ရဲ့ နိုင်ငံတော်တွပ် သောင်းဇာဟှိရဟှ" ဆိုဘီး မိန့်တော်မူလေဟှယ်။