1 ✝အယ်ခီမာ တဗဲ့တော်လေဟှ ယေရှုနားဟှို လာဂေ့ဘီးဟှာ "ကောန်းဂန်နိုင်ငံတော်မာ ဖယ်မျိုးသူဟှ ကီးမြတ်ဆောင်းနူး" ဆိုဘီး မေးလျှော့-က်ဂေ့လေဟှယ်။

2 ယေရှုဟှ သားဂန်းတယော့-က်ဟှို သူ့နားဟှိုခေါ်ဘီးဟှာ တဗဲ့တော်လေရှေ့မာ ရပ်ခိုင်းလေဟှယ်။ 3 ✝အယ်ဘီးန ကိုယ်တော်ဟှ "ငါ မှန်ပြောမယ်၊ နန်းနို့လေ ပ္လောန်းလဲဘီးဟှာ အယ်သားဂန်းဟှားမျိုး ဖြစ်ဘဲဟှ ဆိုဟှာ ကောန်းဂန်နိုင်ငံတော်ဟှို ရော့-က်ရဟှို့ မှုဟှ။ 4 အယ်ကြောန့် အယ်သားဂန်းမျိုး စိနှိခ္လဟှူသူဟှာ ကောန်းဂန်နိုင်ငံတော်မာ ကီးမြတ်ဆောင်း ဖြစ်ဟှယ်။ 5 ငါ့နာမဟှို ထော့-က်ဘီးဟှာ အယ်မျိုး သားဂန်းဟှား ယော့-က်ယော့-က်ဟှို လတ်ခံသူဟှာ ငါ့ဟှို လတ်ခံဇာဘဲ့ ဖြစ်လေဟှယ်။

6 "ငါ့ဟှို ယောင်ကြည်ဟှူ အယ်မူသားဂန်း ယော့-က်ယော့-က်ဟှို မှားယွင်းစေသူဟှာ လည်ဘန်းမာ က္လော့-က်က္လိဆောင်နခယ်ဘီး ပန်လယ်ထဲဟှို ပစ်ခ္လခံရဟှူဇာဟှ ပိုဘီး ကောန်းလေ့မယ်။ 7 မှားယွင်းတတ်ဟှူကြောန်းလေ ရှိဟှိကြောန့် လောကီသားလေဟှာ အမင်္ဂလာရှိဟှယ်! မှားယွင်းတတ်ဟှူကြောန်းလေ ရှိရမယ်။ အယ်ဘေမဲ့လည်း မှားယွင်းတတ်ဟှူ ကြောန်းရာလေဟှို ဖြစ်စေဟှူသူဟှာ အမင်္ဂလာရှိဟှယ်!

8 ✝"နန့်ရဲ့ခေ၊ နန့်ရဲ့လတ်ဟှာ နန့်ဟှို မှားယွင်းစေဟှယ် ဆိုဟှာ အယ်ခေ၊ အယ်လတ်ဟှို ခွတ်ဖြတ်ပစ်ပါ! ထာဝရငရဲမီးထဲဟှို ခေလတ်ဇောင်န ပစ်ခ္လခံရထတ် ခေလတ်မှေ့ဘဲန သတ်ရှင်ဇာဟှို ဝမ်စားရဟှူဇာဟှ ပိုကောန်းဟှယ်။ 9 ✝နန့်ရဲ့ မျစ်စိဟှလည်း နန်းနို့ဟှို မှားယွင်းစေဟှယ် ဆိုဟှာ မျစ်စိဟှို ဖော့-က်ပစ်ပါ! မျစ်စိနှေ့ဖတ်ဇောင်န ငရဲထဲဟှို ပစ်ခ္လခံရဟှူထတ် မျစ်စိတဖတ်န သတ်ရှင်ဇာဟှို ဝမ်စားရဟှူဇာဟှ ပိုကောန်းဟှယ်။

10 "နန်းနို့လေဟှာ ဖယ်မူသားဂန်းဟှိုမှလည်း ထီမဲ့မြင်လော့-က်မိဘဲ့နေအောန် ဒိထားဂေ့ပါ၊ နန်းနို့လေဟှို ငါပြောဟှယ်။ အယ်သားဂန်းလေရဲ့ ကောန်းဂန်တမန်လေဟှာ ကောန်းဂန်ဘောင်မာ ရှိတော်မူဟှူ ငါ့ဖရဲ့ မျစ်နှာတော်ဟှို မြဲဒမ်း ဖူးဗြင်ရဂေ့ဟှယ်။ 11 ✝ *

12 "နန်းနို့လေဟှာ ဖယ်မျိုးထန်မှတ်ဂေ့နူး။ လူတယော့-က်မာ သိုးကောန် ရှိဘီး သိုးတကောန်ဟှာ ပျော့-က်ဟှားမယ် ဆိုဟှာ ကျန်နေဟှူ ကောန်ဟှို တောန်ထတ်မာ ထားရစ်ဘီးဟှာ ပျော့-က်နေဟှူ သိုးတကောန်ဟှို လိုက်ရှာတတ်ဟှယ် မှုဟှလော။ 13 ရှာဟှိတွိဟှူ ခီမာ လမ်းလွဲဘီး ပျော့-က်ဘဲနေဟှူ ကိုးဆယ်ကိုးကောန်ထတ် ပ္လန်တွိဟှူ သိုးတကောန်တွပ် ပိုဘီး ဟှာ ဝန်းသာဟှယ် ဆိုဘီး ငါ မှန်တိုင်းပြောဟှယ်။ 14 အယ်မျိုးဘဲ့ ကောန်းဂန်ဘောင်မာ ရှိတော်မူဟှူ နန်းနို့* ဖလည်း အယ်မူသားဂန်း တယော့-က်ဟှိုမှ ပျစ်စီးစေဟှို့တွပ် လိုတော်မှေ့ဟှ။

15 ✝"အယ်ကြောန့် ညီကို မောန်နှမဟှာ နန့်ဟှို ပြစ်မှားဟှယ် ဆိုဟှာ* သူ့ပြစ်ဟှို ဖော်ပြပေးဟှို့တွပ် သူ့နားဟှို သွားပါ။ အယ်ဘေမဲ့ နှေ့ယော့-က်ဒဲတွိဘီး သူ့ပြစ်ဟှို ဖော်ပြပါ။ နန့်စကားဟှို သူနားထောန်ဟှယ် ဆိုဟှာ နန်းနို့ဟှာ သူ့ဟှို ပ္လန်ရလေဘီ။ 16 အယ်ဘေမဲ့ နန့်ရဲ့ စကားဟှို နားထောန်ဟှ ဆိုဟှာ သူ့စကားဟှို တည်ဖြစ်စေဟှို့တွပ် ကျမ်းစာမာ ပြောဟှားဟှူတိုင်း သိသတ်သေ နှေ့ယော့-က်၊ သောင်းယော့-က်ဟှို ခေါ်ပါ။ 17 အယ်သူဟှာ နားထောန်ဟှို့ ငြင်းဆန်နေဟှယ် ဆိုဟှာ သင်းတော်ဟှို တန်ပြပါ။ သင်းတော်ရဲ့ စကားဟှိုလည်း သူနားထောန်ဟှ ဆိုဟှာ တခြားဘာသာဟှ လူတယော့-က်မျိုးဘဲ့ဖြစ်ဖြစ် အယ်မျိုးမှုဘဲနေဟှာ ခွန်ကော့-က်မား တယော့-က်မျိုးဘဲ့ အယ်သူဟှို သတ်မှတ်ဂေ့ပါ။

18 ✝"ငါ မှန်ပြောမယ်၊ နန်းနို့လေဟှာ မ္လေဂီးထတ်မာ ချည်နှောင်ဟှူမျှဟှာ ကောန်းဂန်ဘောင်မာ ချည်နှောင်လေ့မယ်။ မ္လေဂီးထတ်မာ ဖြေလွှတ်ဟှူမျှဟှာ ကောန်းဂန်ဘောင်မာ ဖြေလွှတ်လေ့မယ်။

19 "နော့-က်ထပ် ငါ မှန်ပြောမယ်။ မ္လေဂီးထတ်မာ လူနှေ့ယာ့-က် ဘောတူဘီး ဆုတောန်းဟှယ် ဆိုဟှာ နန်းနို့တောန်းဟှူမျှဟှို ကောန်းဂန်ဘောင်ဟှ ငါ့ဖဟှာ ပေးတော်မူလေ့မယ်။ 20 ဖြားဖြစ်ကြောန့်နူးဆိုဟှာ လူနှေ့ယော့-က်၊ သောင်းယော့-က်ဟှာ ငါ့ရဲ့ နာမဟှို အားကိုးဘီး စုဝေးနေဟှူ နေရာလေမာ ငါဟှာ သူးနို့နတူးဒူး ရှိနေမယ်။"

21 ✝အယ်မူခီမာ ပေတရုဟှ ယေရှုနားဟှို လာဘီး "သခင်၊ ညီကို မောန်နှမဟှ ကျွန်တော်ဟှို ပြစ်မှားဟှယ် ဆိုဟှာ သူ့ဟှို ဖယ်မျှခါလော့-က် ခွမ့်လွှတ်ရမယ်နူး၊ ခွန်နစ်ခါလော့-က်ထိ ခွမ့်လွှတ်ရဟှို့လော" ဆိုဘီး မေးလျှော့-က်လေဟှယ်။

22 ယေရှုဟှ "ခွန်နစ်ခါတိုင်အောန် ခွမ့်လွှတ်ရမယ် ဆိုဘီး ငါပြောဟှ။ ခါခွန်နစ်ဆယ် ခွန်နစ်လီတိုင်အောန် (ခွန်နစ်ဆယ်ခွန်နစ်ခါ)* ခွမ့်လွှတ်ရမယ် ဆိုဘီး ငါပြောလေဟှယ်။ 23 အယ်ကြောန့် ကောန်းဂန်နိုင်ငံတော်ဟှာ သူ့ကျွန်လေရဲ့ စာရင်းဟှို စစ်ဆေးဟှူ မန်းဂီးတပါးန တူလေဟှယ်။ 24 စာရင်းယူဟှူ ခီမာ ကပ်သန်းပေါန်းများစွာ ကပ်ကွီးတန်နေဟှူ လူတယော့-က်ဟှို ခေါ်စေလေဟှယ်။ 25 အယ်သူဟှာ ကပ်ကွီးဆပ်နိုင်ဘဲဟှူကြောန့် သူ့သခင်ဟှ အယ်သူနတူးဒူ သားမယား၊ အောက်စာ ပစ်စီးလေ ရှိဟှူမျှဟှို ရောန်းဘီးဟှာ ကပ်ကွီးဆပ်စေဟှို့တွပ် မိန့်ခ္လမှတ်တော်မူဟှယ်။ 26 အယ်ကျွန်ဟှလည်း မန်းဂီးရှေ့မာ ပျပ်ဝပ်ဘီး ‘ကျွန်တော်ဟှို သီးခံတော်မူပါ။ ကပ်ကွီးရှိဟှူမျှဟှို ဆပ်ပါမယ်!’ ဆိုဘီး တောန်းဗန်လေဟှယ်။ 27 အယ်စေခံရဲ့ သခင်ဟှလည်း သူ့ဟှို သနားဟှိကြောန့် ကပ်ကွီးရှိဟှူမျှဟှို လွှတ်ပေးဘီး သွားခွမ့်ပေးလေဟှယ်။

28 "အယ်ဘေမဲ့ အယ်ကျွန်ထွပ်ဟှားခီမာ မိမိဒေနာရိတရာ ကပ်ကွီးတန်နေဟှူ ကျွန်တယော့-က်ဟှို တွိလေဟှယ်။ သူဟှာ အယ်ကျွန်ရဲ့ လည်ဗန်းဟှို ညှစ်ဘီး ငါ့ကပ်ကွီးဟှို ဆပ်ပေးပါ!" ဆိုဘီး တောန်းလေဟှယ်။ 29 "အယ်ကျွန်ရှင်းရှင်းဟှလည်း ဒူးထော့-က်ဘီးဟှာ ‘ကျွန်တော်ဟှို သီးခံပေးပါ။ ကပ်ကွီးလေ ဂူလောင်းဟှို ဆပ်ပေးပါမယ်!’ ဆိုဘီး တောန်းဗန်လေဟှယ်။ 30 အယ်ဘေမဲ့ သူဟှာ လတ်ခံဘဲန ကပ်ကွီးလေ ဆပ်ခန်ခီထိ ထောန်ထဲမာ ချောက်ဟှားလေဟှယ်။ 31 အယ်မူကြောန်းရာဟှို တခြားကျွန်လေ ဗြင်သိရဟှူ ခီမာ ရရာတိုင်း စိဆိုးဂေ့ဘီး သူးနို့သခင်နားဟှို သွားဘီးဟှာ ဖြစ်ပျစ်ဟှူ ကြောန်းရာလေဟှို လျှော့-က်ဂေ့လေဟှယ်။ 32 အယ်ကြောန့် သခင်ဟှ အယ်ကျွန်ဟှို ခေါ်ဘီးဟှာ ‘ဆိုးညစ်ဟှူကျွန်! နန်ဟှာ ငါ့ဟှို တောန်းဗန်ဟှိကြောန့် ကပ်ကွီးလေ ဂူလောင်းဟှို ခွမ့်လွှတ်ပေးဟှားဟှယ်။ 33 ငါဟှာ နန့်ဟှို သနားဟှူမျိုးဘဲ့ နန်ဟှာလည်း ကျွန်ရှင်းရှင်းဟှို သနားသင့်ဟှယ်’  34 အယ်ဘီးန သူ့သခင်ဟှ အယ်ကျွန်ဟှို စိဆိုးဘီးဟှာ ကပ်ကွီးလေ ဂူလောင်းဟှို ဆပ်ပေးခန်ခီထိ ထောန်ထဲမာ ချောက်ဟှားစေ" ဆိုဘီး ပြောလေဟှယ်။

35 အယ်ဘီးန ယေရှုဟှ "နန်းနို့လေလည်း နန်းနို့ရဲ့ ညီကို မောန်နှမလေဟှို စိနှလောင်းထဲဟှနေ ခွမ့်လွှတ်ဘဲဟှ ဆိုဟှာ ကောန်းဂန်ဘောင်ဟှ ငါ့ဖလည်း နန်းနို့လေဟှို ခွမ့်လွှတ်ပေးဟှို့ မှုဟှ" ဆိုဘီး မိန့်တော်မူလေဟှယ်။