ယာဣရုရဲ့ သမီးန ဝတ်လောင်တော်ဟှိုတို့ဟှူ မီးမကြောန်း
18 ယေရှုဟှာ အယ်မျိုး ပြောနေခီမာ ယုဒလူမျိုး ရာရှိတယော့-က်ဟှ ရော့-က်လာဘီးဟှာ ကိုယ်တော်ရှေ့မာ ပျပ်ဝပ်လေဟှယ်။ အယ်သူဟှလည်း "ကျွန်တော့်သမီးဟှာ သေဟှားဘီ။ အယ်ဘေမဲ့ ကိုယ်တော်ကြွဘီး သူ့ထတ်မာ လတ်တန်မယ် ဆိုဟှာ သတ်ရှင်ပါလေ့မယ်" ဆိုဘီး လျှော့-က်လေဟှယ်။
19 အယ်ကြောန့် ယေရှုဟှာ ထဘီးဟှာ တဗဲ့တော်လေနတူးဒူ အယ်သူနော့-က်ဟှို လိုက်ဟှားလေဟှယ်။
20 ဆယ့်နှေ့နှစ် လောင်းလောင်း သွီးသွန်နာစွဲနေဟှူ မီးမတယော့-က်ဟှာ ယေရှုနော့-က်ဟှို လိုက်ဘီး ဝတ်လောင်တော် ပန်းဗွားဟှို တို့ထိလေဟှယ်။ 21 အယ်မီးမဟှာ "ငါဟှာ သူ့ရဲ့ ဝတ်လောင်တော်ဟှို တို့ထိမယ် ဆိုဟှာ ငါကျန်းမာရလေ့မယ်" ဆိုဘီးဟှာ ကိုယ့်ကိုယ်ကိုယ် ပြောနေဟှယ်။
22 ယေရှုဟှ လှည့်ကေ့ခီမာ အယ်မီးမဟှို ဗြင်ဟှားဘီး "ငါ့သမီး၊ စိုးရိမ်န! နန့်ရဲ့ ယောင်ကြည်ရှင်းဟှာ နန့်ဟှို ကျန်းမာစေဘီ" ဆိုဘီး မိန့်တော်မူလေဟှယ်။ အယ်ခီမာဘဲ့ အယ်မီးမဟှာ ရောဂါပျော့-က်ဟှားလေဟှယ်။
23 အယ်ဘီးန ယေရှုဟှာ ရာရှိရဲ့အီဟှို ရော့-က်ဟှားလေဟှယ်။ ကိုယ်တော်ဟှာ တီးမှုမားလေန မသာအီဟှို လာဟှူသူလေ အောက်အောက်သဲသဲ ဖြစ်နေဂေ့ဇာဟှို ဗြင်တော်မူဟှူ ခီမာ 24 ကိုယ်တော်ဟှ "ဖယ်ဂေ့၊ မီးမငယ် သေနေဇာ မှုဟှ! အိမွိနေဇာဖြစ်ဟှယ်!" ဆိုဘီး မိန့်တော်မူလေဟှယ်။ လူလေ ဂူလောင်းဟှာ ကိုယ်တော့်ဟှို သရော်ဂေ့လေဟှယ်။ 25 လူအောက်ဂီးဟှာ ပ္လန်ဟှိုထွပ်ဟှားဘီးန ယေရှုဟှာ မီးမငယ်ရဲ့ အိခန်းထဲဟှို ဝမ်ဘီး မီးမငယ်ရဲ့လတ်ဟှို ဆွဲထူလိုက်ဟှူ ခီမာ မီးမငယ်ဟှာ ထလေဟှယ်။ 26 အယ်မူဒန်းဟှာ အယ်ဒေသ တခုလောင်းဟှို ပ္လံ့နှံ့ဟှားလေဟှယ်။
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)