प्रेरित 20

पावल माकेदोनिया रे ग्रीसग

1 अन फाईरा छ्यामी पावलजै चेलाकाङ्मोः घ्वाम फेप्पो, रे ख्युकाङ्मोः खाईकोए बिम्बो, रे ख्युन ङ्याबो भिदा राह्‌राह्‌ माकेदोनियाक्याँ होई। 2 स्याह्‌न छेत्रवग वैवै बिस्वासी सिमिकाङ्मोः लै हौसला बिम्मी नु ग्रीस देसग होई। 3 स्याह्‌ नु लाह् सुमङीग छ्युङ्बो। नु सिरियाक्याँ त्युन जहाजलम वैतौ यहूदीवजै नुन बिरोधग सदेन्त्र खेपा राह्‌राह्‌ पावलजै माकेदोनिया राह्‌राह्‌ई होल्चेन पक्‌का खेबो। 4 तब बेरिया छ्युङ्नान पुरसन ङोह्जो सोपात्रोस, थेसलोनिकेलै अरिस्तार्खस रे सिकन्दस, दर्बीन गायस, आलै तिमोथी रे एसिया प्रदेसन तुखिकस रे त्रोफिमस नुन ङ्याबो होई। 5 अजोव ङूई ताप्‌ताप्‌ ङ्योअग त्रोआसग कूपाई छ्युङ्पा ङ्याह्। 6 ङि चन निस्तार तेवर मनाई खेतामी फिलिप्पी सहरलै त्युन जहाजग चपचप वैपा। आलै ङार्याग ख्युकाङ्मोः त्रोआस सहरग दोपा, रे स्याह् ङि नेर्यान बेर छ्युङ्पा।

त्रोआसग पावलन अन्त्यन यात्रा

7 नेर्यान ङूस्योवान लाह्ः जब ङ्योअ रोता क्युच्‌चेन भिह्तु जोम्पा, तब पावलजै चन नाप्चे वैसुम खेपा राह्‌राह्‌, ख्युन ङ्याबो छानफेथाल ल्होई खेपाई छ्युङ्बो। 8 ङ्योअ जोम्पान ङ्याल्क्यान तलान कोठाः लज्युङव लै छ्यापाई छ्युङ्पा ङ्याह्। 9 युतिकस मिह्‌न्न तीपा छबा झ्यालग छ्युङ्पा ङ्याह्। पावलजै लैःन बेर ल्होई र्‌वापाई छ्युङ्तौ नु मिबा किम्मः च्युबो रे मिबान ल्हाग थेप्थेप नु तला सुमलै घ्याबो रे नू ख्युई सिह्पान अबस्थाग सोल्बो। 10 तब पावल पोँ स्वाबो, रे खल्बु क्यापक्याप नू कुसुली क्याप्पो रे र्‌वाबो, "नङिना तैङर्‌वाङिन अन सम्पुई ङ्याह्।"✝20:10 १ झली १७:२१ 11 तब नु लाह्ः लिप्पो आलै रोता क्युक्यु झातामी नाप नम मनाङ्न बेर ल्होई खेखे छ्युङ्बो। आलै होई। 12 स्याह्‌न चेलावजै चन मन छबाः यिम साबो। मन छबा सोम्पान कारन पुरू स्याङ्बो।

त्रोआसलै मिलेतसथाल वैपा

13 ङ्योअ ङूलै त्युन जहाजग चपचप अस्सोस सहरग वैपा। ङ्योअ पावलग स्याह् त्युन जहाजग चप फानसुम ङ्याह्। पावलजै झामै जोरजाम खेखे नु अस्सोसथाल ल्हेनैल्हेनै वैपा ङ्याह्। 14 आलै जब नुई ङ्योअग अस्सोस सहरग धोबो, ङ्योअजै नू त्युन जहाजग चपफाम्पा, रे मितिलेने सहरग स्वापा। 15 स्याह्‌लै त्युन जहाजग वैवै नाप्चे खियस तापू स्वा ताप्पा। नुन सूनाप सामोस तापू स्वा ताप्पा। ह्‌याङ लीनाप मिलेतस सहरग स्वापा, 16 एसिया प्रदेसग छ्युङ्सुम मरह्पान कारन पावलजै एफिसस मजाःजाः वैचेन निर्नय पक्‌का खेबो। तैङर्‌वाङिन रातैङिन पेन्तिकोसन दिन यरूसलेमगै तैनबेर नुई तापसुम खेपा ङ्याह्।

एफिससन ताङ्बोन अगुवावन आराधना

17 नुई मिलेतसलै एफिसस प्रदेसग सिमि फेप्पे मन्दलिन अगुवाकाङ्मोः घ्वाम फेप्पो। 18 जब ख्यु नुन ङ्याबो स्वाबो नुई ख्युकाङ्मोः र्‌वाबो, "एसिया प्रदेसग ताप्पान ङूस्योवान लाह्‌ःलै ङै भेला लै ङेन घूँ कत्याम खेखे छ्युङ्पा अन ङेनकाङ्मोः क्युई ङिह्पा। 19 पुरू नम्रताग छिमा पह्‌नैपह्‌नै, यहूदी सदेन्त्रन छोए सेन्चेग र्‌वार्‌वा ङै प्रभुन सेवा खेपा। 20 ङेनकोन फाईदा राह्‌नान्न ल्होई ङेनकोन ङू घोसना खेचेलै रे यिम-यिम पुरून ङू ङेनकाङ्मोः लह्‌म्मलम ङा ङिक मच्योल्पा। 21 यहूदीकाङ्मोः रे ग्रीककाङ्मोः घ्योप्पा खेखे परमेस्वरक्याँ होलाःयो रे ङ्योअन प्रभु येसू मसिहन लाह्ः बिस्वास नानायो र्‌वानान ल्होईन बयान ङै बिम्पा ङिह्पा।" 22 "ता सेह्‌ना, ङा पबित्र आत्माः बाध्य राह्‌राह्‌ यरूसलेमक्याँ वैयङ ङिह्पा, स्याह्‌ ङाः तयाः राम स्वानान जेम अन ङाः तये क्युई मीपा। 23 जेङ्नै अकेः मात्र क्युई ङिह्पा, कि सहर पुरूग तेपफाम्पा रे झ्यालखानान तूरि कुत्वानान ङ्याह् र्‌वार्‌वा पबित्र आत्माई ङाः स्याङ्‌ङ। 24 ङा ङन जेँन जिन्दगी ध्यान मबिन्नान। ङा अकेः मात्र चाहि खेनान, कि परमेस्वरजै सिमी दया खेपा ङ्याह् र्‌वानान्न ल्होन् लः फेल फान्चेन धोनग ङा पुरा खेतयाःयो, कन धोन चन प्रभु येसुई ङाः कोपा जेङ्पा।✝20:24 २ तिमो ४:७

25 "ता सेह्‌ना, ङाः क्युई ङिह्पा कि ङेनकोन बर्ग पुरू, सुवा-सुवाः ङै परमेस्वरन राज्यन ताह्फेरैफेरै लेम्बो, ङेनजै ङन ध्वा ह्‌याङ हातौयै रङ्नान मया। 26 अन्नैकारन त्या ङा ङेनकाङ्मोः साँचि भिनैभिनै र्‌वाचे, कि ङा पुरून कहलम निर्दोस ङिह्पा। 27 तैङर्‌वाङिन परमेस्वरन इच्छ्या पुरू ङेनकाङ्मोः र्‌वामः ङा ङिक मच्योल्पा। 28 ङेन जेँन भिह्तु रे जेँन मोह्ङ पुरून भिह्तु होस खेखे छ्योवा। पबित्र आत्माई ङेनकाङ्मोः मोङन जिम्मेवार दोङ्पा राह्‌राह्‌ नुई जेँनै कहजै र्‌युपा परमेस्वरन मन्दलिन सेन्चे ङेन ख्या।✝20:28 भजन ७४:२ 29 तैङर्‌वाङिन ङाः क्युई ङिह्पा, कि ङा वैमी ङिनङिन लैमन फाराव ङेनकोन घूँ जाःनान ङ्याह्, सुई मोह्ङग लाःमा नान्नान मह्‌या। 30 झामन भेला स्वानान ङ्याह्, ङेनकोनै घूँलै लबारन ल्होई र्‌वानान्न सिमिव च्याङ्नान ङ्याह्, सुई तेम्मा बिस्वासीकाङ्मोः जेँन चेला दोङदोङ घङ लम अलःग वन्नान ङ्याह्। 31 अन्नकारन जेर्म राह्‌राह्‌ छ्योवा, आलै ङै सुम परान बेर ङिम्मेछाम्मे छिमा पह्‌नैपह्‌नै सिमि पुरू ङै चेतावनी बिमबिम लम्पान ह्‌याका नलेया। 32 ता ङा ङेनकाङ्मोः परमेस्वरग रे नुन दयान बचनग थोच्‌चे, सुई ङेनकाङ्मोः पक्‌का दोङ तैनान, रे पबित्र दोङ्पा पुरूवन घूँ आङ बिन तैनान। 33 ङै सुई सिमिन मर, मुल, रे घोलाङन लोभ मखेपा।✝20:33 १ सामू १२:३ 34 ङेह् क्युई ङ्याह् कि ङन अनै लाह्जै ङन जेँनै रे ङन ङ्याबो ङिह्पावन आबस्यकता पुरा खेपा ङ्याह्। 35 झामखेखे ‘वन्नानव खेरे बिन्नानव धन्न जेङ्पा’ र्‌वार्‌वा प्रभु येसु जेँजै र्‌वापान ल्होईग चिनचिन छ्याप्पुवावन सेन्चे खेमः तैन बेर तूरि खेखे धोन खेत्वानान र्‌वार्‌वा ङै ल्होई पुरूग थम्पा ङिह्पा।" 36 अकेः र्‌वार्‌वा नुई पो जूबो रे ख्यु पुरून ङ्याबो सोअताप्पो। 37 ख्यु पुरू दाबो, रे पावलग कुसुली क्यापक्याप मोई खेबो। 38 ख्युई ह्‌याङ हातौयै नुन ध्वा रङ्नान मया र्‌वार्‌वा पावलजै र्‌वापा ल्होईग ख्युई मिह्दा समतू खेबो, आलै ख्युई नू त्युन जहाज थाल साबो।