1 तब प्रधान पुजारीजै लोप्पो, "तै अन ल्होई तेम्मा जेङ्पौ?" 2 नुई र्‌वाबो, थिक्‌कोव रे पा हो, ङ्याना। महिमान परमेस्वरजै ङिन खेः अब्राहामग नु हारानग छ्युङ्चेन खेरे ङू मेसोपोतामियाग रातौ दर्सन बिम्पा ङ्याह्,✝7:2 उत १२:१ 3 नू र्‌वाबो, "ना जेँन देस रे जेँन सन्तानलम गेग्गे, कन देस ङा नाः थन्नान, स्या वया।"✝7:3 उत १२:१ 4 तब नु कन्दीवन देसलम गेग्गे हारानग स्वास्वा छ्युङ्बो, रे नुन पा सिमी परमेस्वरजै नू स्याह्‌लै अन ठाउँग साःबो, खाः चोँ ङेन छ्युङ्नान।✝7:4 उत ११:३१; १२:५ 5 आलै परमेस्वरजै नू क्यु तये मबिम्बो, जेङ्नै मनग लेह् नाम्पु यङ मबिम्बो। जेङ्नै मन्तौ नुन सन्तान सुई मया ह्‌याङ रेनरुबो कि, "ङा अन देस, नान सन्तान लाग बिन्चे।"✝7:5 उत १३:१५; १५:१८; १६:१; २४:७; कानुन २:५; ११:५ 6 परमेस्वरजै झामखेखे र्‌वाबो, "नान सन्तान क्याम लि परा थाल सिमिन देसग वैवै छ्युङ्नान ङ्याह्, रे नान सन्तानजै ख्युकाङ्मोः राङ्पा दोङदोङ जेँन अधिनग नान्नान ङ्याह्।"✝7:6 उत १५:१३-१४; प्रस २:२२ 7 परमेस्वरजै र्‌वाबो "जेङ्नै ख्यु कन जातिन राङ्पा राह्‌राह्‌ छ्युङ्नान ङ्याह् मन जातिन न्याय ङा खेनान ङ्युँ। आलै ख्यु गेग्गे स्वास्वा अनै ठाउँग ङन आराधना खेनान ङ्याह्।"✝7:7 उत १५:१४; प्रस ३:१२ 8 परमेस्वरजै नुन ङ्याबो खतनान पत रेनरुबो, रे अब्राहाम इसहाकन पा राह्‌राह्‌ केर्याग इसहाकन खतना खेबो। इसहाक याकूबन पा रह्पा, रे याकूब पत्ति च्योङेपानै पा रह्पा।✝7:8 उत १७:१०-११; २१:४

9 "याकूबन ङोह्जोवजै भाइ योसेफग थादोवा खेखे नू मिस्रदेसग र्‌युप्पो। जेङ्नै परमेस्वर नुन ङ्याबो ङ्याह्।✝7:9 उत ३७:११; ३७:२८; ३९:२-३; ४५:४ 10 परमेस्वरजै नुन तूरि पुरूलम फाफा मिस्रदेसन झली फारोन ङू नू दया खेबो, रे बुद्धि बिम्बो, आलै फारोई नू मिस्रदेस रे नुन यिम पुरून हाकिम दोङ्बो।"✝7:10 उत ३९:२१; ४१:४०; ४१:४३; ४१:४६; भजन १०५:२१

11 आलै मिस्रदेस पुरू रे कनानग अनिकाल राह्‌राह्‌ मिह्दा तूरि रह्पा, रे ङिन खेपुलवजै साई मदेप्पो।✝7:11 उत ४१:५४-५५; ४२:५ 12 जेङ्नै याकूबजै मिस्रदेसग साह्ई ङ्याह् र्‌वानान ल्होई ताह्ताह् ङिन खेपुलकाङ्मोः पहिली स्या फेप्पो। 13 ङेरेप दोदो योसेफजे नुन थिक्‌कोवकाङ्मोः जेँन परिचय बिम्बो, रे योसेफन पयार रे फारोन ङ्याबो स्वाबो। 14 योसेफजे जेँन पा याकूबग रे जेँन क्यालाकिप्पा पुरूग, सु फेराङलिथल रै ङापा ङ्याह्, नुन ङ्याबो घ्वाम फेप्पो।✝7:14 उत ४५:९-११; ४५:१८-१९; प्रस १:५; कानुन १०:२२ 15 याकूब मिस्रदेसग होई, रे नु स्याह्ई सिबो, रे स्या ङिन खेपुलव यङ सिबो।✝7:15 उत ४५:६-७; ४९:३३; प्रस १:६ 16 आलै ख्युन कुँह्‌म सकेमग वप्पो, रे सकेमग अब्राहामजै हमोरन ङोह्जोवलम मुलन सोङ बिमबिम र्‌युपान तुर्साः नाह्‌म्बो।✝7:16 उत २३:१६-१७; ३३:१९; ४९:३०; ५०:१३; यहो २४:३२ 17 "जेङ्नै जब परमेस्वरजै अब्राहाम ङ्याबो रेनरुपा पुरा राचेन भेला ङेमः स्वाबो तब मिस्रदेसग मन सिमिव पोह्‌न राम जाःबो, रे ख्युन ताँका ह्‌याल्म रह्पा।"✝7:17 प्रस १:७-८

18 तब मिस्रदेसग योसेफग मस्योनान घङ झली च्याङ्बो। 19 नुई ङ्योअन सिमिन ङ्याबो अलः खेबो, रे ङिन खेपुलकाङ्मोः नुन वैचाव खोलोः सस्सै नाम फाम्म धिपी खेँ, रे झामखेखे घोमाः केह्पा वैचा पुरूव सीँ।✝7:19 कानुन १:९-१०; १:१८; १:२२ 20 अन्नै भेला मोसा केह्बो। नु परमेस्वरन ङू ल ङ्याह्। नु ला सुमङीथाल जेँन पान यिम झाबो।✝7:20 कानुन २:२ 21 नु खोलोः पह्‌म्मी फारोन चमेःजै नू सोलसोल वप्पो, रे जेँनै ङोह्जो दोङदोङ झाबो।✝7:21 कानुन २:५; २:१० 22 मोसाः मिस्रीवन छोए पुरूग लम्बो, रे मोसा जेँन बचन रे धोनग सक्तिसाली रह्पा। 23 जब नु ङेथल परान रह्पा, तब जेँन इस्राएली थिक्‌कोवकाङ्मोः दोसुम नुन सम्म स्वाबो।✝7:23 प्रस २:११ 24 जेँन थिक्‌कोवन बर्ग तीपान लाह्ः अन्याय रह्पा रङरङ, मोसाई नू सेम्बो, रे मन अन्याय खेनान मिस्री सस्सै जेँन भाइन लाह्ः रह्पा अत्याचारन खूँ नाम्बो।✝7:24 प्रस २:१२ 25 परमेस्वरजै ङन ल्हालै ख्युकाङ्मोः बचाई खेनान र्‌वानान्न ल्होई ङन थिक्‌कोवजै हाकोदरा र्‌वानान नुई नावा खेपा ङ्याह्। जेङ्नै ख्युई अन हामकोबो। 26 नाप्चे इस्राएलीव यङ राह्ङराङ्साः याल खेपाई छ्युङ्पान भेलाः नु स्वाबो, रे झाःम र्‌वार्‌वा ख्युकाङ्मोः दीफान्चेन भिह्तु सम्झाई खेबो, हे चोलोङ्चाव, "ङेन ता थिक्‌कोव जेङ्पा, तीजै घङ्‌ग तैङ अन्याय खेनान?" 27 जेङ्नै जेँन खिम्जेन ङ्या अन्याय खेनानजै नू झाःम र्‌वार्‌वा फुल्चि खेबो, "ङिन ङ्या हाकिम रे न्यायकर्ता राम नाः सुई दम्बो? 28 थ्याँ मन मिस्री सह्प्पा लैम ना ङाः र्‌वार्‌वा सस्सुम खेनौ?"✝7:28 प्रस २:१३-१४ 29 झाम झब ताह्ताह् मोसा ज्यारज्यार मिद्‌यान देसग वैवै परदेसी रह्पा। स्या नुन ङोह्जो ङे केह्बो।✝7:29 प्रस २:१५-२२; प्रस १८:३-४

30 "ङेथल परा वैमी सीनै धुरन तये मीपान ठाउँग छ्याप्पाई छ्युङ्पा पोथ्रान मेह्ग ती स्वर्गदुत नुन रह्‌म्म रङ्बो। 31 जब मोसाई अन रङ्बो तब नु हालाईबो, रे अन सेम्म ङेह्‌मः वैतौ परमप्रभुन झाम केह्ः ङ्याम्बो, 32 ‘ङा नान खेपुलवन परमेस्वर जेङ्पा, अब्राहाम, इसहाक रे याकूबन परमेस्वर।’ मोसा दार्मः जाःबो, रे नुई स्याह्‌क्याँ सेन्चे यङ हिम्मत मखेबो।"

33 "तब परमप्रभुई नू र्‌वाबो, ‘नान लेह्‌न पौला फोला, तैङर्‌वाङिन कन ठाउँग ना च्याङ्पा ङ्याह्, अन पबित्र थाउँ जेङ्पा।✝7:33 प्रस ३:५ 34 मिस्रग ङिह्पान ङन सिमिवन तूरि ङै रङ्पा, रे ख्युन समतूतू दापा यङ रङ्पा। ख्युकाङ्मोः अन तूरिलम फाम ङा लिपलिप स्वापा ङिह्पा। ता स्वा, ङा नाः मिस्रदेसग फेन्नान ङ्युँ।’"✝7:34 प्रस २:२४; प्रस ३:७-१०

35 "कन मोसाः ख्युई झाःम र्‌वार्‌वा अस्वीकार खेपा ङ्याह्, ‘सुई नाः ङिन ङ्या हाकिम रे न्यायधीस दोङ्बो’ नू परमेस्वरजै सासक रे उद्धारकर्ता दोङदोङ मन स्वर्गदुतलम सुई नू पोथ्राग दर्सन बिम्पा ङ्याह्, फेप्पो।✝7:35 प्रस २:१४; प्रस ३:२ 36 अनै सिमिजै मिस्रदेसग, लाल समुन्द्रग रे ङेथल पराभरी सुनसान ठाउँग ताईलुवान धोन रे हालाईचेन धोनव खेखे ख्युकाङ्मोः खोलोः सप्पो।✝7:36 कानुन ७:३; १८:१५-१८ 37 मन नुई मोसा जेङ्पा, सुई इस्राएलीकाङ्मोः र्‌वापा ङ्याह्, ‘परमेस्वरजै ङा सोल्पालैम ङेन थिक्‌कोवन बर्गलम ङेन पत तीपा भबिस्यबक्ता सोल्नान ङ्याह्।’✝7:37 कानुन १८:१५-१८ 38 अन नुई मोसा जेङ्पा, सु सुनसान ठाउँग रह्पा समुदायग मन स्वर्गदुत ङ्याबो ङ्याह्, कन स्वर्गदुतजै सीनै धुरग रे ङिन खेपुलवन ङ्याबो ल्होई र्‌वापा ङ्याह्, रे नुई र्‌वार्‌वा ङी बिन्चेन भिह्तु सम्पु बचनव देप्पा ङ्याह्,"✝7:38 प्रस १९:१; २०:१७; कानुन ५:१-३३

39 "जेङ्नै ङिन खेपुलवजै नुन र्‌वापा मङ्याम्बो। ख्युई नू ख्योवाख्योवा मिस्रदेसगै होलसुम खेबो।✝7:39 प्रस २३:२०-२१; गन्ती १४:३-४ 40 ख्युई हारूनग झाःम र्‌वाबो, ‘ङिन ङूह्ङूह् वैनान कान लाव ङिन पत धोँवा, तैङर्‌वाङिन ङ्योअग मिस्रदेसलै छ्युछ्यु सन्नान अन मोसाः तयाः रह्पा ङी क्युई मीपा।’ 41 मन्तौ ख्युई मिप्चादीन कु दोङ्बो, रे मनग भोका यङ फुल्बो, रे जेँन ल्हान धोनग स्याङ्बो।✝7:41 प्रस ३२:४-६ 42 मन्नकारन परमेस्वरजै ख्युकाङ्मोः ख्योवाबो, रे ख्युकाङ्मोः पान्नाङन घरवन आराधना खेमः ख्योवाबो, कताःम भबिस्यबक्तावन किताबग सर्पा ङ्याह्, इस्राएलन सिमि हो, तै ङेनकोजै ङेथल परान बेर सुनसान ठाउँग ङाः भोका रे भेतीव फुल्बो मन ता ङन भिह्तु मह्‌या।"✝7:42 यर ७:१८; ८:२; १९:१३

43 ङेनजै मोलोकन पाल रे ला रेफन्न घर, रे ङेनजै आराधना खेमः दोङ्पा कुव सोलसोल वप्पा। ता ङा ङेनकाङ्मोः बेबिलोनलै धेँ दान्नान ङ्युँ।✝7:43 आमो ५:२५-२६

44 सुनसान ठाउँग ङिन खेपुलवन साँचिन पाल ङ्याह्। मोसाई रङ्पा मीलुपलैम परमेस्वरन आदेस अन्सार अन रह्पा ङ्याह्।✝7:44 प्रस २५:१-४०; २७:२१; गन्ती १:५० 45 परमेस्वरजै अन देसग छ्युङ्नान्न यहूदीन खोलोःन सिमिकाङ्मोः ताल्बो रे यहोसुजै अन देस क्यालक्याल वत्तौ ख्युई मन पबित्र पाल अन देसग सप्पो। मन्न छाम्म झली दाऊदन पालिन बेर मन पबित्र पाल ख्युन ङ्याबोई लुईबो।✝7:45 यहो ३:१४-१७; १८:१; २३:९; २४:१८ 46 नुई परमेस्वरन दया देप्पो, रे याकूबन परमेस्वरन भिह्तु छ्युङ्पुदी दोङ्चेन आदेस तोल्बो।✝7:46 २ सामू ७:२-१६; १ झली ८:१७-१८; १ इति १७:१-१४; २ इति ६:७-८; भजन १३२:५ 47 जेङ्नै नुन पत यिम चन सोलोमनजै दोङ्बो।✝7:47 १ झली ६:१-२; ६:१४; ८:१९-२०; २ इति ३:१; ५:१; ६:२; ६:१० 48 "जेङ्नै लाह्जै दोङ्पा यिमवग पुरून खेरे किम परमेस्वर मछ्युङ्नान, झाम भबिस्यबक्ताजै र्‌वापा ङ्याह्, 49 ‘ङन सिङ्‌हासन स्वर्ग जेङ्पा, रे पिर्थीबी ङन ल्हे नाम्पु जेङ्पा, ङेनजै ङन पत कत्यामन यिम दोङ्चे? परमप्रभु र्‌वाङ, ङन नाह्‌न कन जेङ्पा?’"

50 तै अन तैस्याङ पुरू ङनै लाह्जै दोङ्पा नङ्पा तै?✝7:50 यसै ६६:१-२ 51 स्तीफनसजै र्‌वाबो, "हे राह्ङद्‌या सिमिव हो, सम क्योङ्म रे नाम्ज्योवा काना रह्पा हो, ङेन एकुरो पबित्र आत्मान बिरोध खेनान। ङेन खेपुलजै कत्याम खेबो ङेन रे झाम खेनान।✝7:51 प्रस ३२:९; लेवी २६:४१; गन्ती २७:१४; यसै ६३:१०; यर ९:२६ 52 भबिस्यबक्ताव बर्ग कनग ङेन खेपुलजै तेपमफाम्बो? ख्युई धर्मी सिमि स्वानान र्‌वार्‌वा ङूलै र्‌वानानव पुरूग सह्प्पो, नू ङेनजै बिस्वासघात खेबो, रे नू सह्प्पो। मन पुरूग सह्प्पो, सुई मन तेम्मा सिमिन स्वानान्न लोन ङूलै स्याप्पा ङ्याह्। ता ङेन चन नुनै बिस्वासघाति रे सिमि सन्नान रह्पा ङ्याह्।✝7:52 २ इति ३६:१६ 53 स्वर्गदुतवजै बिम्पा कानुन ङेनजै देप्पो, जेङ्नै मन मङ्याम्बो।"

54 जब यहूदी जोम्पुन सदस्यवजै अन ल्होई ताह्बो तब ख्यु सुतुबो रे सुतुतु सो चम्म जाःबो।✝7:54 अयू १६:९; भजन ३५:१६; ३७:१२; ११२:१० 55 जेङ्नै स्तिफनजै चन पबित्र आत्माई नाङनाङ स्वर्गक्याँ ती सेम्बो, रे परमेस्वरन महिमा रे येसू परमेस्वरन याईपाक्याँ थाङथाङ छ्युङ्पा रङबो। 56 नुई र्‌वाबो, "सेह्‌ना, स्वर्ग पोङ्पा ङा रँ, रे सिमिन ङोह्जोः परमेस्वरन याईपाक्याँ थाङथाङ छ्युङ्पा ङा रँ।"

57 जेङ्नै ख्यु केह्ः किमै फाईरा खेखे च्याङ्बो, रे जे-जेँन नाम्ज्योवा काःबो, रे ख्यु ङ्याबो फ्याङ्मः स्वाबो। 58 ख्युई नू सहरन खोलोः छ्यूछ्यू वप्पो, रे नू लुङजै फ्याङ्बो। रे साँचि छ्युङ्पान सिमिवजै जेँन घोलाङव साऊल मिह्‌न्न तीपा छबान लेह्‌न रह्‌म्म छ्युछ्यु नाह्‌म्बो। 59 कुजुई ख्युई स्तिफनसग लुङजै फ्याङ्पा ङ्याह्, नुई सोअताप्पो, "हे प्रभु येसु, ङन आत्माः स्वीकारी ख्या।"✝7:59 भजन ३१:५ 60 नुई पोह् जूजू केह्ः किमै पुकार खेबो, "हे प्रभु, अन तीपान दोस अजोवग नताह्ःयो।" अकेः र्‌वार्‌वा नुई परान पप्पो।