1 निस्तार-तेवरन ङू अन सन्सारलै भिदा राह्‌राह्‌ पान स्याह्‌ वैचेन नुन भेला स्वा ताप्पो र्‌वानान येसू क्युई रह्पा, आलै सन्चारग रह्पा जेँन सिमिकाङ्मोः मया खेखे नुई ख्युकाङ्मोः अन्त्यन बेर मया खेबो।

2 येसु रे नुन चेलाव छान्जे ङ्योप्पा झातौ सैतानजै सिमोन्न ङोह्जो यहूदा इस्करियोतन समग नू जुङ्फान्चेन नावा ङूलै कातपा ङ्याह्। 3 पाई सक्ति पुरू नुन लाह्‌ग बिम्पा ङ्याह् रे नु परमेस्वरन तर्फलम स्वापा जेङ्पा रे परमेस्वरन स्याह्‌ई वैपाई ङ्याह् र्‌वानान ल्होई येसू क्युई रह्पा। 4 आलै नु ङ्योप्पा झातामी च्याङ्बो। रे खोलोःन घोलाङ तीक्याँ नान्नान ताबेलदी हाङग च्योम्बो। 5 तब नुई लमग त्यु हाल्बो रे चेलावन ल्हे थुम जाबो, रे जेँजै च्योम्पान ताबेलजै ख्युन ल्हे फ्याम जाबो। 6 जब नु सिमोन पत्रुसन स्याह्‌ स्वाबो, तब नुई येसू र्‌वाबो, "प्रभु, तै नाई ङन लेह् थुचेऊ?"

7 येसुई नू झब बिम्बो, "ङा तै खेँ नाः चोँ क्युई मह्‌या, जेङ्नै ङिक हाकोनान ङ्याह्।" 8 पत्रुसजै नू र्‌वाबो, "ङेनजै ङन ल्हे हातौयै थुत्वानान मह्‌या।" येसुई नू झब बिम्बो, "ङै मथुङिन ता ना ङन चेला राचे देन्नान मह्‌या।" 9 सिमोन पत्रुसजै नू र्‌वाबो, "हे प्रभु, ङन लेह् मात्र नङ्पा, जेङ्नै ङन थोप्पालै लेह् थालै थुवा।" 10 येसुई नू र्‌वाबो, "थु तपान सिमी लेह् नङ्म घङ तये थुमत्वानान, मन पुरू छाङ्म ङ्याह्। आलै ङेन छाङ्म ङ्याह् जेङ्नै पुरू ता नङ्पा।" 11 तैङर्‌वाङिन नू बिस्वासघात खेनानग नुई स्योःतपा ङ्याह्, अन्नैकारन नुई र्‌वापा ङ्याह्, "ङेन पुरू छाङ्म मह्‌या।" 12 ख्युन लेह् थुतामी जेँन खोलोःन घोलाङ गोनगोन नु ह्‌याङ छ्युङ्बो। तब येसुई ख्युकाङ्मोः र्‌वाबो, "तै ङेनकाङ्मोः क्युई ङिह्पाऊ, ङै ङेन भिह्तु तै खेपा?"✝ 13 ङेन ङाः "गुरु रे प्रभु" र्‌वाङ, अन ङेन ल र्‌वाङ, तैङर्‌वाङिन ङा नुई जेङ्पा। 14 ङा ङेनकोन प्रभु रे गुरु राह्‌राह्‌ यङ ङै ङेनकोन लेह् थुपा ङिङिन ङेनजै र्‌वार्‌वा तीजै-घङ्न लेह् थुत्वानान, 15 तैङर्‌वाङिन ङै ङेनकाङ्मोः ती उदाहरन बिम्पा ङिह्पा, रे कत्याम ङै ङेन भिह्तु खेपा, ङेनजै अन च्योआलैम ख्या। 16 तेम्माई ङा ङेनकाङ्मोः र्‌वाचे, राङ्पा जेँन मालिकन खेरे किम मराह्‌नान, आलै ल्हो‌न वन्नान ल्हो‌न कोर्नान्न खेरे किम मराह्‌नान।✝ 17 यदि ङेनकोजै अन तेम्मा ल्होई क्युई रह्बो रे मन धोन खेङिन, ङेनको धन्न राह्‌नान ङ्याह्।

18 ङै ङेन पुरून भारेः र्‌वापाई नङ्पा, ङै सू दम्पा जेङ्पा, नू ङा स्योःनान। जेङ्नै पबित्रसास्त्र पुरा राःयो र्‌वार्‌वा अन रह्पा, कि "ङनै रोता झानानजै ङन लाह्ः जेँन लात्ती सोल्बो।"✝ 19 अन राचेन ङू चोँनै ङा ङेनकाङ्मोः र्‌वाचे, ताकि जब अन रामः स्वानान, ङा नुई जेङ्पा र्‌वार्‌वा ङेनकाङ्मोः बिस्वास रायो।✝ 20 तेम्माई ङा ङेनकाङ्मोः र्‌वाचे, "सू ङा फेन्नान, नू स्वीकारी खेनानजै ङाः स्वीकारी खेनान, आलै ङाः स्वीकारी खेनानजै ङाः फेन्ननग स्वीकारी खेनान।"✝

21 अन ल्होई र्‌वामी येसु आत्माग आत्ती रह्पा रे नुई साँचि बिमबिम र्‌वाबो, "तेम्माई ङा ङेनकाङ्मोः र्‌वाचे, ङेन बर्ग तीपाई ङा बैरीन लाह्‌ग जुङ्फान्नान ङ्याह्।" 22 येसुई सुन भारेः र्‌वापा जेङ्पा र्‌वार्‌वा क्युई मर्हारे चेलावजै तीपाई-घङग सेन्चे खेबो। 23 नुन चेलावन बर्ग येसुई मया खेनान चेला चन येसुन घूँ रेमरेम छ्युङ्पा ङ्याह्। 24 तब सिमोन पत्रुसजै नू लाःता खेखे लोप्पो, "नुई अन ल्होई सुन भारेः र्‌वापा जेङ्पा?" 25 येसुन घूँ उजुखेखे रेमरेम छ्युङ्पागै नुई नू लोप्पो, "प्रभु, नु सु जेङ्पा?" 26 येसुई झब बिम्बो, "सू ङा रोतान तुकरा सुपसुप बिन्नान, नु अनै जेङ्पा।" तब नुई रोतान तुकरा सुप्पो रे छ्युछ्यु अन सिमोन्न ङोह्जो यहूदा इस्करियोतग बिम्बो। 27 रोतान तुकरा वप्मी सैतान नुन झिङ जाःबो। तब येसुई नू र्‌वाबो, "ना तै खेचे ङ्याह्, अन खम्म ख्या।" 28 तब येसुई तैङ नू झाम र्‌वाबो र्‌वार्‌वा ङ्योप्पा झाम छ्युङ्पाव सुई यङ हामकोबो। 29 तैङर्‌वाङिन कान-कानजै अन सोचि खेबो, कि यहूदान ङ्याबो सोह्ङन खुन्चा ङ्याह्, अन्नकारनजै येसुई नू तेवरन भिह्तु त्वायाप र्‌युयाःयो, आथबा नुई बिखारीकाङ्मोः तयाः भिनाःयो र्‌वापा जेङ्पा। 30 तब रोतान तुकरा वप्मी यहूदा स्करियोत तुरुन्तै खोलोः गेप्पो। अन्न भेला छान्जे रह्पा ङ्याह्।

31 जब अन खोलोः होई तब येसुई र्‌वाबो, "ता सिमिन ङोह्जो महिमित रह्पा ङ्याह्, रे परमेस्वर नुन लाह्ः महिमित रह्पा ङ्याह्। 32 आलै यदि नुन लम परमेस्वरन महिमा थन्नान, तब परमेस्वर सिमिन ङोह्जोन महिमा ङन स्याह् थन्नान, रे नुई झाम तुरुन्तै खेनान ङ्याह्।" 33 "हे वैचा हो, ङाईन बेर ङा ङेन ङ्याबो ङिह्पा। ङेनजै ङा फान्नान ङ्याह्, रे कत्याम ङै यहूदी आङ खेनान्न सिमिकाङ्मोः र्‌वापा, ता ङेन ङ्याबो ङा र्‌वाचे, ‘खाः ङा वैपाई ङिह्पा, ङेन स्वा मतैनान।’"✝ 34 "ङा ङेनकाङ्मोः ती सार्बा आग्या बिन्चे: ङेन तीजै-घङग मया ख्या। ङेन ङ्याबो ङै कत्यामन मया खेपा ङिह्पा, ङेनजै र्‌वार्‌वा तीजै-घङग झामै मया ख्या।✝ 35 यदि ङेनजै तीजै-घङ्ग मया खेङिन, अनै लम पुरूजै स्योःनान ङ्याह्, कि ङेन ङन चेलाव जेङ्पा।"

36 सिमोन पत्रुसजै नू र्‌वाबो, "हे प्रभु, ङेन खाः वैपाई ङिह्पा?" येसुई झब बिम्बो, "ना चोँ ङन ङिक स्वा मतैनान, जेङ्नै ङिक ना ङन ङिक स्वानान ङ्याह्।" 37 पत्रुसजै नू र्‌वाबो, "प्रभु, ङा तैङ चोँनै ङेन ङिक स्वा मतैनान? ङेन भिह्तु ङा जेँन परान बिन्नान ङिह्पा।" 38 येसुई झब बिम्बो, "तै ना जेँन परान ङन भिह्तु बिन्नान ङ्याह्‌यौ? तेम्माई ङा ना र्‌वाचे, नाई ङाः सुमरेप अस्वीकार मखेनान्न बेर काःपा तर्नान मह्‌या।"