1 येसुई जेँन चेलाकाङ्मोः झाम र्‌वाबो, "ङेन सम मछुप्पा नराःयो। ङेन परमेस्वरन लाह्ः बिस्वास खेनान, ङन लाह्ः यङ बिस्वास ख्या। 2 ङन पान यिम छ्युङ्पुव लै ङिह्पा। झाम मीम, ङा ङेनकाङ्मोः र्‌वानान तै, ङेन भिह्तु ठाउँ तयार खेमः ङा वैपाई ङिह्पा? 3 आलै वैवै ङै ङेन भिह्तु ठाउँ तयार खेमी ङा ह्‌याङ स्वानान ङिह्पा रे ङेनकाङ्मोः ङन ङ्याबो वन्नान ङिह्पा, रे ङा खाः ङिह्पा, स्याह्‌ ङेन यङ लुईनान ङ्याह्। 4 खाः ङा वैपाई ङिह्पा, ङेन स्याह्‌ वैनान्न लम स्योःनान।"

5 थोमाई नू र्‌वाबो, "हे प्रभु, ङेन खाः वैयङ ङिह्पा, ङि क्युई मराह्‌नान, तब ङ्योअजै लम कुजुई स्योःचे?" 6 येसुई नू र्‌वाबो, "लम, तेम्मा रे जिन्दगी ङाई जेङ्पा। ङन लम नङ्म सुई पान स्याह् स्वा मतैनान। 7 ङेनजै ङाः स्योपा राङिन, ङन पाः र्‌वार्‌वा स्योःनान ङ्याह्। तान धेरा नू स्योःनान, रे नू रङ्पा ङिह्पा" 8 फिलिपजै नू र्‌वाबो, "हे प्रभु, ङी पा थना। अकेः रान ङी ज्योनान।" 9 येसुई नू र्‌वाबो, "फिलिप, अकेःन बेर ङा ङेन ङ्याबो ङिह्पा, जेङ्नै नाई ङा मस्योनौ? सुई ङा रङ्पा ङिह्पा, नुई पा रङ्पा ङिह्पा। ना कुजुई र्‌वातैनान, ‘ङ्योअग पा थना?’ 10 फिलिप तै ना बिस्वास मखेनौ?" ङा पान ङ्याबो ङिह्पा, रे पा ङन ङ्याबो ङिह्पा कन बचन ङा ङेनकाङ्मोः र्‌वानान, अन ङै ङन जेँनै आङग र्‌वापा नङ्पा जेङ्नै ङन ङ्याबो छ्युङ्नान पाई जेँन धोन खेनान। 11 ङाः बिस्वास ख्या, कि ङा पान ङ्याबो ङिह्पा, रे पा ङन ङ्याबो ङिह्पा, मर्हाङिन अन धोनवनै भिह्तु बिस्वास ख्या। 12 तेम्माई, ङा ङेनकाङ्मोः र्‌वाचे, सुई ङा बिस्वास खेनान, नुई ङै खेपा धोन यङ खेनान ङ्याह्, रे मन खेरे किम धोन खेनान ङ्याह्, तैङर्‌वाङिन ङा पान स्याह्‌ वैपाई ङिह्पा। 13 ङेनजै ङन मिह्‌नग तै तोल्नै ङोह्जोन स्याह् पान महिमा रायो र्‌वार्‌वा ङा अन खेनान ङ्युँ। 14 ङेनजै ङन मिह्‌नग तयाः तोल्ङिन ङा खेनान ङ्युँ।

15 ङेनजै ङाः मया खेङिन ङन आग्याव ल्होई ङ्यान्नान ङ्याह्। 16 रे ङा पाः छ्याःफुल्नान ङ्युँ, रे नुई ङेनकाङ्मोः घङ सल्‌ला बिन्नान्न सिमि बिन्नान ङ्याह्, रे नु ङेन ङ्याबो एकुरोभरिन भिह्तु छ्युङ्नान ङ्याह्। 17 नु तेम्मान आत्मा जेङ्पा, सू सन्सारजै स्वीकार खे मतैनान, तैङर्‌वाङिन सन्सारजै नू न ता रँ न स्योङ। ङेन नू स्योःनान, तैङर्‌वाङिन नु ङेन ङ्याबो छ्युङ्नान, रे नु ङेन ङ्याबो छ्युङ्नान ङ्याह्। 18 ङा ङेनकाङ्मोः तोक्या ख्योवानान मीपा। ङा ङेन स्याह्‌ ह्‌याङ स्वानान ङिह्पा। 19 ता ङाई बेरन ङिक सन्सारजै ङाः हातौयै रङ्नान मह्‌या। जेङ्नै ङेनजै ङाः रङ्नान ङिह्पा। ङा सम्पु रह्पान कारन, ङेन यङ सम्पु लुईनान ङ्याह्। 20 अन्न लाह् ङेनकाङ्मोः क्युई राह्‌नान ङ्याह् कि ङा ङन पान ङ्याबो ङिह्पा, रे ङेन ङन ङ्याबो, रे ङा ङेन ङ्याबो ङिह्पा। 21 "ङाः मया खेनान नुई जेङ्पा सुन ङ्याबो ङन आग्या ङ्याह् रे मन ङ्याङ्‌ङ। आलै ङा मया खेनानग ङन पाई मह्‌या खेनान। ङा नू मया खेनान ङ्युँ। रे ङा जेँगै नुन स्याह्‌ रङ्नान ङ्युँ।"

22 यहूदाई (इस्करियोत चन नङ्पा) नू र्‌वाबो, "प्रभु, ङेनजै तै र्‌वापा, ङेन नगै ङ्योअग थन्नान रे सन्सारग चन नङ्पा?" 23 येसुई नू झब बिमबिम र्‌वाबो, "सुई ङा मया खेनान, नुई ङन बचन ङ्यान्नान ङ्याह्। रे पाई नू मया खेनान ङ्याह्। रे ङ्योअग नुन स्याह्‌ स्वानान ङिह्पा, रे नुन ङ्याबो छ्युङ्नान ङिह्पा। 24 ङा मया मखेनानजै ङन बचन मङ्यान्नान। कन बचन ङेन ताँ, अन ङन नङ्पा, जेङ्नै ङाः फेन्नान पान जेङ्पा। 25 अन ल्होई ङा ङेन ङ्याबो लुईतौ यङ ङै ङेनकाङ्मोः र्‌वापा जेङ्पा। 26 जेङ्नै सल्‌ला बिन्नान्न सिमिजै, आथबा पबित्र आत्मा, सू पाई ङन मिह्‌नग फेन्नान ङ्याह्, नुई ङेनकाङ्मोः ल्होई पुरू लन्नान ङ्याह्, रे ङै ङेनकाङ्मोः र्‌वापा ल्होई पुरू ङेनकाङ्मोः ह्‌याका बिन्नान ङ्याह्। 27 सान्ति ङा ङेनकोन ङ्याबो ख्योवाचे। ङा जेँन सान्ति ङेनकाङ्मोः बिन्चे। सन्सारजै बिम्पालैम ङा ङेनकाङ्मोः मबिन। ङेनकोन सम छरा खेनान नराःयो रे नङिना। 28 ङै ङेनकाङ्मोः ‘ङा वैपाई ङिह्पा, रे ङेन स्याह् स्वानान’ र्‌वापा ङेनजै ताह्बो। ङेनजै ङा मया खेपा राङिन ङा पान स्याह्‌ वैयङ ङिह्पा र्‌वापा ताह्ताह् ङेन स्याङ्नान ङ्याह्, तैङर्‌वाङिन पा ङन खेरे महान ङिह्पा। 29 ता अन राचेन खेरे ङूई ङै ङेनकाङ्मोः र्‌वापा ङिह्पा, रे जब अन रामः स्वानान ङेनजै बिस्वास खेतयाःयो। 30 ङा ङेन ङ्याबो ता ह्‌याल्म ल्होई र्‌वानान मीह्, तैङर्‌वाङिन अन सन्सारन हाकिम स्वायङ ङ्याह्। ङन लाह्ः नुन सक्ति तये मह्‌या। 31 जेङ्नै ङा पाः मया खेनान, रे कत्याम पाई ङाः आग्या खेपा ङ्याह् झामखेखे खेनान र्‌वार्‌वा सन्सारग क्युई रायो। च्याँ, ङ्योअ स्यीह्‌लै भै"