1 अन ल्होई र्‌वातामी येसुई स्वर्गक्याँ सेनसेन र्‌वाबो, "हे पा, भेला स्वातपा ङ्याह्, ङेन ङोह्जोन महिमा थना, रे ङोह्जोई ङेन महिमा थनाःयो। 2 तैङर्‌वाङिन ङेनजै नू सिमि पुरून लाह्ः आङ बिम्पा ङिह्पा, ताकि ङेनजै नू बिम्पा सिमि पुरूग नुई मताह्‌नान्न झुनी भिनाःयो। 3 ता मताह्‌नान्न जिन्दगीन धा अनै जेङ्पा, कि ख्युई ङेन, तीबाःदि तेम्मा परमेस्वरग स्योयाःयो, रे ङेनजै फेप्पा येसु मसिहग स्योयाःयो। 4 कन धोन ङेनजै ङा बिम्बो, अन पुरा खेखे ङेन ङ्याबो पिर्थीबी ङै महिमा खेपा ङिह्पा। 5 हे पा, ता ङाः जेँनै ङ्याबो नान्नान मनै महिमा क, कन महिमा सन्सार दोङ्चेन खेरे ङू नान ङ्याबो रातौ ङन ङ्याबो ङ्याह्।"

6 "सन्सारलै कन सिमिव ङेनजै ङा बिम्बो, ख्युकाङ्मोः ङेन मिह्‌न ङै थम्पा ङिह्पा। ख्यु ङेन ङ्याह्, आलै ङेनजै ख्यु ङा बिम्बो, रे ख्युई ङेन केह्ः ङ्याम्पा ङ्याह्। 7 ख्युकाङ्मोः ता क्युई ङ्याह्, कि ङेनजै ङाः बिम्पान ल्होई पुरू ङेन लम स्वापा जेङ्पा। 8 तैङर्‌वाङिन कन बचन ङेनजै ङा बिम्बो, ङै ख्युकाङ्मोः बिम्पा ङिह्पा, रे ख्युई अन स्वीकारी खेपा ङ्याह्। ङा ङेन लम स्वापा जेङ्पा र्‌वानान ख्युई तेम्माई क्युई रह्पा ङ्याह्, आलै ङेनजै ङा फेप्पा जेङ्पा र्‌वार्‌वा ख्युई बिस्वास खेपा ङ्याह्।"

9 ङा ख्युन भिह्तु सोअताप्चे, सन्सारन भिह्तु ङा सोअमताप, जेङ्नै ख्युन भिह्तु, सू ङेनजै ङाः बिम्पा ङिह्पा। तैङर्‌वाङिन ख्यु ङेनै जेङ्पा। 10 ङन पुरू तै ङिह्पा ङेन जेङ्पा, रे ङेन तै ङिह्पा ङन जेङ्पा। ङन महिमा ख्युन लम थम्पा ङ्याह्। 11 "ङा ह्‌याङ सन्सारग मलुईनान, जेङ्नै अजोव ता सन्सारग लुईनान। ङा चन ङेन स्याह् स्वायङ ङिह्पा। पबित्र पा, ङेनजै ङा बिम्पा ङेन मिह्‌नग ख्युकाङ्मोः ताह् खेखे नाह्‌ना, रे ङ्योअग च्योआलैम ख्यु रे ती रायो। 12 जब थाल ङा ख्युन ङ्याबो ङ्याह्, नाई ङाः बिम्पा ङेन सक्तिसाली मिह्‌नग ख्युकाङ्मोः ताह् खेखे नाम्पा। ख्युकाङ्मोः ताह् खेपा। आलै ख्युन बर्ग मीपा दोङ्नान्न ङोह्जो नङ्म घङ सुई मीपा मरह्पा, तैङर्‌वाङिन पबित्रसास्त्र पुरा मराखाईमे ङ्याह्।"✝17:12 भजन ४१:९; यूह १३:१८ 13 "जेङ्नै ता ङा ङेन स्याह् स्वायङ ङिह्पा। सन्सारग रातौ अन ल्होई ङा र्‌वानान, कि ख्युकाङ्मोः ङन सम किम्म पुरा रायो। 14 ङै ख्युकाङ्मोः ङेन बचन बिम्पा, जेङ्नै सन्सारजै ख्युकाङ्मोः ङान्ज्यान खेबो, तैङर्‌वाङिन ख्यु सन्सारन नङ्पा, कुजुई ङा सन्सारन नङ्पा। 15 ङेनजै ख्युकाङ्मोः सन्सारलै होरा र्‌वार्‌वा ङा सोअमताप, जेङ्नै ख्युकाङ्मोः अलः लम ताह्ः खेखे नाह्‌ना। 16 ख्यु सन्सारन नङ्पा, कुजुई ङा रे सन्सारन नङ्पा। 17 ख्युकाङ्मोः तेम्माई ङन स्याह्ई थोरा, ङेन बचन तेम्मा जेङ्पा। 18 कुजुई ङेनजै ङा सन्सारग फेप्पो, ङै यङ ख्युकाङ्मोः सन्सारग फेप्पा ङिह्पा। 19 ख्युन भिह्तु ङा जेँगै थोच्‌चे, ताकि ख्यु रे तेम्माई पबित्र रायो।"

20 "ङा अजोवन भिह्तु मात्र सोअमताप, जेङ्नै अजोवन ल्होन् लः लम ङन ङ्या बिस्वास खेनानवन भिह्तु सोअताप्चे, 21 कि ख्यु पुरू ती रायो। हे पा, कुजुई ङेन ङन ङ्याबो ङिह्पा, रे ङा ङेन ङ्याबो, झामखेखे ख्यु रे ङ्योअग रायो, रे ङेनजै ङा फेप्पो र्‌वार्‌वा सन्सारजै बिस्वास ख्याःयो। 22 कन महिमा नाई ङाः बिम्पा ङ्याह्, ङै ख्युकाङ्मोः बिम्पा ङिह्पा, ताकि ङ्योअग ती रह्पालैम ख्यु रे ती रायो। 23 ङा ख्युन ङ्याबो, आलै ङेन ङन ङ्याबो, कि ख्यु पुर्न रुपजै ती रायो, रे ङेनजै ङा फेप्पा जेङ्पा, आलै ङा मया खेपालैम ङेनजै ख्युकाङ्मोः यङ मया खेबो र्‌वार्‌वा सन्सारजै क्युई रायो।" 24 "पा, ङा इच्छ्या खेचे, कि ङेनजै ङा बिम्पा सिमिव ङा खाः ङिह्पा ङन ङ्याबो लुयाःयो, रे ङन महिमा रँयो, कन महिमा, सन्सार दोङ्चेन खेर ङू लै र्‌वार्‌वा ङा मया खेपा राह्‌राह्‌ ङेनजै ङा बिम्पा ङ्याह्।" 25 "तेम्मा न्याय खेनान्न पा, सन्सारजै नाः मस्योँ जेङ्नै ङा ङेन ङ्याबो स्योःनान, आलै ङेनजै ङा फेप्पा जेङ्पा र्‌वार्‌वा अजोवजै हाकोँ। 26 ङै नान मिह्‌न अजोवग थम्पा, आलै नान मिह्‌न अजोवग थम्पाई राह्‌नान ङ्युँ, ताकि कन मयाई ङाः नाई मया खेबो, अन ख्युकाङ्मोः लुयाःयो, रे ङा ख्युकाङ्मोः लुयाःयो।"