23 सिपाहीवजै येसू क्रुसग चुनतामी नुन घोलाङ वव्वै काला ली कबो रे राह्ङराङ्साः परेःबो। नुन घोलाङ र्‌याङ्म चन ङ्यालै पोँथाल ब्योई मत्वानान खेखे दोङ्पा ङ्याह्। 24 अन्नकारन ख्युई राह्ङराङ्साः र्‌वाबो, "अन चन मछ्योम्मता, जेङ्नै अन सू थेप्नान जेङ्पा र्‌वार्‌वा चित्ता कामता।" पबित्रसास्त्र पुरा राःयो र्‌वार्‌वाई अन रह्पा ङ्याह् "ख्युई ङन घोलाङ राह्ङराङ्साः परेःबो, रे खोलोःन घोलाङ चन चित्ता कबो।"✝19:24 भजन २२:१८

25 अन्नकारन सिपाहीवजै अन धोन खेबो। आलै येसुन क्रुसन रह्‌म्म नुन मा, नुन मान बहिनी, क्लोपासन मिसा मरियम रे मरियम मग्दलिनी थाङथाङ छ्युङ्पा ङ्याह्। 26 जब येसुई जेँन मा रे नुई मया खेनान चेला रह्‌म्म थाङथाङ छ्युङ्पा रङ्बो, तब नुई जेँन मा र्‌वाबो, "चिमिचा, सेह्‌ना, ङेन ङोह्जो!" 27 तब मन चेलाः र्‌वार्‌वा नुई र्‌वाबो, "सेह्‌ना, नान मा!" मन्न भेलालै मन चेलाई नू जेँनै यिम वप्पो।