1 अन्न ङिक चेलावन स्याह् तिबेरियास योह्‌न नाः येसुई ह्‌याङ जेँग थम्बो। नुई जेँग झामखेखे थम्बो, 2 सिमोन पत्रुस, दिदुमस र्‌वानान थोमा, गालीलन काना सहरन नथानेल, जब्दियान ङे ङोह्जोव रे नुन चेलावन बर्ग घङ ङेपा ङ्याबो ङ्याह्। 3 सिमोन पत्रुसजै ख्युकाङ्मोः र्‌वाबो, "ङा ङाह् जुङ्मः वैचे।" ख्युई नू र्‌वाबो, "ङ्योअ रे नान ङ्याबो स्वाचे।" ख्यु वैवै दोङा चप्पो, जेङ्नै अन छान ख्युई तये मजुङ्बो।✝21:3 लुक ५:५ 4 नाप राम जाःपा ङ्याह्, येसु ना च्याङ्बो। जेङ्नै चेलावजै नु येसुई जेङ्पा र्‌वार्‌वा मस्योःबो। 5 येसुई ख्युकाङ्मोः र्‌वाबो, "वैचा हो ङेन ङ्याबो तयाः ङाह् ङिह्पाऊ?" ख्युई नू झब बिम्बो, "मीपा।"

6 येसुई ख्युकाङ्मोः र्‌वाबो, "जाल दोङान याईपाक्याँ का, आलै देन्नान ङ्याह्।" तब ख्युई जाल कबो, रे ङाह् अकेः ह्‌याल्म थेप्पो कि ख्युई जाल कानै मतैबो।✝21:6 लुक ५:६

7 येसुई मया खेनान चेलाई पत्रुसग र्‌वाबो, "नु प्रभु जेअँ।" "नु प्रभु जेअँ" र्‌वानान ताह्ताह् सिमोन पत्रुसजै जेँन खोलोःन घोलाङ हाङग तिह्‌बो, तैङर्‌वाङिन नुई घोलाङ फुप्पा ङ्याह्, रे त्यू बोर्बो। 8 घङ चेलाव दोङागै छ्युङछ्युङ ङाह् थेप्पा जाल कानैकानै स्वाबो। ख्यु नाःलै ग्याङ्म नङ्पा, जेङ्नै क्वाईमाल्‌ला: मितर क्याम तीतौग ग्याङ्म ङ्याह्। 9 जब ख्यु नाः धुल्बो, तब ख्युई मेह्रोवान लाह्ः ङाह् नाम्पा रे रोता रङ्बो। 10 येसुई ख्युकाङ्मोः र्‌वाबो, "ङेनजै घोमाः जुङ्पा ङाह्‌लम ङाई क।" 11 तब सिमोन पत्रुसजै दोङाः चपचप नेथल रै च्युसुम किम किम ङाह्‌ई नाङ्पान जाल कानकान नाः सप्पो, जेङ्नै अकेः ह्‌याल्म रानै जाल मज्योम्बो। 12 येसुई ख्युकाङ्मोः र्‌वाबो, "स्वास्वा झा।" चेलावन बर्ग सुई यङ "ङेन सु जेङ्पा?" र्‌वार्‌वा लोच्‌चेन हिम्मत मखेबो, तैङर्‌वाङिन ख्युई नु प्रभु जेङ्पा र्‌वार्‌वा स्योःङ। 13 येसु स्वाबो रे रोता वव्वै ख्युकाङ्मोः बिम्बो, रे झामखेखे ङाह् यङ बिम्बो। 14 सिह्पालै सम्पु राह्‌राह्‌ च्याङ्मी येसु चेलावन स्याह् रङ्पा अन सुमरेप ङ्याह्।

15 जब ख्युई ङाह् रे रोता झातबो, तब येसुई सिमोन पत्रुसग र्‌वाबो, "यूहन्नान ङोह्जो सिमोन, तै ना ङाः अजोव खेरे ह्‌याल्म मया खेनौ?" नुई झब बिम्बो, "अँ प्रभु, नाः क्युई ङ्याह् न, ङा नाः मया खेनान।" येसुई नू र्‌वाबो, "ङन लूचाकाङ्मोः ख्वा।"

16 येसुई ह्‌याङ ङेरेप नू र्‌वाबो, "यूहन्नान ङोह्जो सिमोन, तै ना ङा मया खेनौ?" यूहन्नाई नू झब बिम्बो, "अँ, प्रभु, नाः क्युई ङ्याह् न, ङा नाः मया खेनान।" येसुई नू र्‌वाबो, "ङन लूपावन सेन्चे ख्या।" 17 नुई सिमोनग सुमरेप र्‌वाबो, "यूहन्नान ङोह्जो सिमोन, तै ना ङा मया खेनौ?" पत्रुस तुँलाक्या रह्पा, तैङर्‌वाङिन येसुई सुमरेप नू, "तै ना ङा मया खेनौ?" र्‌वाबो। नुई नू र्‌वाबो, "प्रभु, ङेन ङ्याबो ल्होई पुरू क्युई ङिह्पा। ङा ङेन ङ्याबो मया खेनान र्‌वार्‌वा ङेन ङ्याबो क्युई ङिह्पा।" येसुई नू र्‌वाबो, "ङन लूपाकाङ्मोः ख्वा। 18 तेम्माई, ङा ना र्‌वाचे, जब ना छबा ङ्याह् नजै जेँन धप दम्म, रे खाः वैसुम दोङ्‌ङ स्याह् वैङ। जेङ्नै जब ना काप्पो राह्‌नान ङ्याह्, तब नाई जेँन लाह् क्याङ्नान ङ्याह्, रे घङजै नान धप दम्नान ङ्याह्, रे ना खाः वैसुम धोँ स्याह्‌ वन्नान ङ्याह्।" 19 कुजुई सितौ नुई परमेस्वरन महिमा खेनान ङ्याह्, अन्न लाःता खेईखेई येसुई अन र्‌वापा ङ्याह्। अकेः र्‌वार्‌वा नुई सिमोन पत्रुसग र्‌वाबो, "ङन ङिक जाः।"

20 पत्रुसजै ङिक होलहोल सेन्तौ येसुई मया खेनान चेला ङिङि स्वायङ खेपा रङ्बो। नुई ङ्याजेन ङ्योप्पा झानान्न भेला नुन घूँ रेमरेम, "प्रभु, ङेन ङ्याबो जुङ्फान्नान सु जेङ्पा?" र्‌वार्‌वा लोप्पा ङ्याह्।✝21:20 यूह १३:२५ 21 नू रङरङ पत्रुसजै येसु र्‌वाबो, "प्रभु, ता नू तै राह्‌नान?" 22 येसुई पत्रुसग र्‌वाबो, "ङा मस्वान बेर नु कुकु छ्योवाःयो र्‌वानान ङन इच्छ्या रानै ना तैन वास्ता? ना ङन ङिक जाः।" 23 अन्नैकारन मन चेला मसिनान्न र्‌वानान्न ल्होई भाइवन घूँ फेल्बो। येसुई नु मसिनान्न र्‌वापा मह्‌या, जेङ्नै "ङा मस्वान बेर नु कुकु छ्योवायो र्‌वानान ङन इच्छ्या रानै ना तै?" र्‌वापा ङ्याह्। 24 नु मनै चेला जेङ्पा, सुई अन ल्होईन भारेः बयान बिङ्‌ङ, रे अन ल्होई सर्पा ङ्याह्, आलै ङी क्युई ङिह्पा कि नुन साँचि तेम्मा ङिह्पा।

25 येसुई घङ यङ लै धोन खेबो। मन्न बर्ग पुरून भारेः ती ती खेखे सर्नान जेङ्न, ङा झाम लाई राँ, कि मन भारेः सर्पा किताबव सन्सारभरी यङ स्योङ्नान मह्‌या।