Marcos 5

Jairas Fanu le Jesuh ih Puan A Thamtu Nu

21 Cun Jesuh cu tili khatla ral ah lawng thawn a feh sal. Jesuh ih hram ah minung tamngai an hmuakkhawm fa, cule Jesuh cu tili kam ah a si. 22 Cun sinakok uktu pawl lakih pakhat, a hmin ah Jairas tihmi pa a tiangih Jesuh a hmuh tikah a ke hram ah a bok ih, 23 thungai thlakin thinfak a dil, "Ka fanu te a thi i ngaingai thok. A dam ih a nun theinak dingah kan sinah tiangin ka fanu ih tlun ah na kut suang hram," tiah a ti.

24 Cun Jesuh cu cuvai pa thawn an feh. Mipi tamngai nih an thlun ih Jesuh cu an pah pah deido.

25 Cuvai hmun ah kum hleinih sung thi-dok fahnak ih a faktu numi pakhat a um. 26 A neihmi hmahhmah ne kau in sibawi tamngai sinah a tuamhlawm fa cem naʼn dam hoi loʼn a bese deuhdeuh. 27 Cuvai nu cu Jesuh ih thuhla a thei ih mipi pawl lakin Jesuh cu a dung laʼn a thlun, cule Jesuh ih puan cu a tham. 28 Zangahtihle, "A puan tal ka tham ngah ahcun ka dam kau thok," tiah a ti.

29 Hmakhatte ah a thi dokmi cu a dam ih a fahnak in damter a i cem tih khaw a taksa nih a fiah. 30 Jesuh cu a sung in a huham a suak tih a fiahfa lohli, cule mipi la ah a herfa ih, "Hutu nih ka puan nan tham?" tiah a sut hnei.

31 Cun a dungthluntu pawl nih a sinah, "Mipi pawl nih ta pah eng deido cu na hmu kau, zangtin ‘Hutu nih ka puan nan tham?’ na ti thiam," tiah an let.

32 A puan thamtu fiah duh ah kiangkap pawl cu a zoh. 33 Asinain numi nu cu, a cung ih thil cangmi cu a fiah ih, ṭih le ṭhia pah in Jesuh ih ke hram ah a bok. Cule Jesuh sinah thudik zaten a sim colh. 34 Cun Jesuh nih a sinah, "Ka fanu, na zupnak nih ta damter cem, hnangamte in va feh la na fahnak in dam dah hram law," tiah a ti.

35 Jesuh cu a ṭon ngelngo lai ah, sinakok uktu pa ih inn in mi an tiang ih, "Na fanu cu a thi cem. Zangruangah Sayapa cu na hnaihnok rih ngelngo?" tiah an ti.

36 Asinain Jesuh nih an ṭonmi cu zanghrel lo in*5.36 zanghrel lo in; loleh thei lo mang in. sinakok uktu pa sinah, "Ṭih vai hlah, zum kau lai ci," tiah a ti. 37 Jesuh nih Peter, James, le James ih naupa Johan hrello hutukhaw a dung thlun a sian hnei lo. 38 Sinakok uktu pa ih inn an va bat tikah, mipi pawl ṭap le aihram in an buai deido cu a va hmu hnei. 39 Cun inn songah a lut ih an sinah, "Zangruangah ṭap le aihram in nan buai deido? Hi nappang nute hi a thi lo pi — a ihhmul mi a i!" tiah a ti hnei.

40 Cun mipi pawl nih Jesuh cu an hnihsan. Cun Jesuh nih an zaten lengah a suak ter hnei colh. Nappang nu ih nu le pa le a ṭhit tak hneimi pawl thawn nappang nu ih umnak ah cun an lut. 41 Cun a kut in nappang nu cu a tlai ih, "Talitha, koum!" tiah a ti. A sullam cu "Nute, hang tho ta ti!" tinak a i.

42 Hmakhatte ah nappang nu a hang tho lohli ih a feh. (Zangahtihle cuvai nu cu kum hleinih mi a i.) Cucu an mang a bang taktak. 43 Cun Jesuh nih hi thu hi hukhaw fiah ter lo dingin khoh ngaiin thu a pe hnei ih cuvai nu ih ei dingah thil pakhat khat pek a forh hnei.