1 Haluse, wandugu zetu, mwe mbuli yo kwiza kwa Zumbe ywetu Yesu Kilisito no kudugaywa kwetu hamwenga kikale naye chawalombezesani, 2 mse kusunguza kwingila kinyulu mwo moyo, naho mse kugeligwa kituletule na want'hu wakugamba dizuwa dyo kwiza kwakwe Zumbe dibula. Mafa yafanyanywa kugamba nivo kilongile mwo mulotezi wetu hegu kikabilikiza, hegu kwa baluwa ikufanyanywa kugamba ilawa kwetu. 3 Mnt'hu yeyose asekuwadant'hiliza kwa sila yoyose. Kwaviya dizuwa idyo hedize mpaka kudya Kusaguka kulaile, yudya Mwiihi naye akelavilize, uyo naheele kwo kubanangwa pele. 4 Yehe naahige kila icho want'hu wakukiona kugamba nicho mnungu, naho nicho wakukivika, naho naaketunye mwenye. Neengile mwe Nyumba ya Mnungu, no kukelagisa kugamba yehe niye Mnungu.

5 Togoleni, hamkukumbukila kugamba nehiwagambilani aya yose umwo chandanyaga? 6 Mna kwa ivi haluse diyuko dikumkindila, nanywe mdimanya. Uyo mnt'hu akwitangwa Mwiihi naalavilizwe aho lupisi lwakwe lukeza mpaka. 7 Hata ivo, yudya Mwiihi heekuoneka adamanya ndima kwa ivi haluse, mna naaonekele hadya yudya akumkindila akeza kuuswa. 8 Aho niho mnt'hu yudya akwitangwa Mwiihi naalaile, mna Zumbe Yesu naamkome kwa muye wakwe na kumbananga kwa ung'azi wakwe akeza kwiza kaidi. 9 Uyo mnt'hu akwitangwa Mwiihi neeze na ludole lwa Mwavu, naho naadamanye vilagiso vihengi na kweheela kwingi kwa udant'hi, 10 kwa kudant'hiliza kwose kwa wadya waku kubigwa mwo kwaganika. Awo nawage kwaviya hawazumile no kukiunga ikindedi vileke wayokolwe. 11 Nivo vilekile Mnungu kawaika hasi yo ludole lukwazaganya, vileke wauhuwile udant'hi. 12 Kwaivo want'hu wose hewehuwile ukindedi mna waonela kinyemi uwavu nawasengelwe kusulumizwa.

13 Chaungwa kimgambe nivedi kwa Mnunguma zuwa yose kwajili yenyu nyuwe mkuungiswa ni Zumbe, kwaviya Mnungu awasagulagani kunda want'hu wakwe myokolwe kwa ludole naho mtendigwe want'hu wakwe kwa kuhuwila kwenyu mwe kindedi. 14 Mnungu awetangilagani mbuli ino kwombokela Mbuli Yedi iyo kiwabilikizeni vileke nanywe mnde uumwo mwo ukulu utendese wa Zumbe ywetu Yesu Kilisito. 15 Ivo wandugu kimaleni mtogile na kuyatoza mahinizo yadya kiwahinizeni kwa mabilikizi yetu na kwa kuwawandikilani. 16 Chamlombeza Zumbe ywetu Yesu Kilisito mwenye na Mnungu Tati yetu, yudya akiungile na kwo uwedi wakwe kakigela ludole lwa mazuwa yose na kawiilo dyedi, 17 awagele ludole imioyo yenyu nakuwatendani mtoge vileke mdahe kudamanya na kulonga yadya ayedi mazuwa yose.