1 Niyo namuona Mwanangoto akabendula duha dimwenga mwe maduha yadya mfungate, niyo neva yumwenga mwe viya viumbwa ivine akalonga kwa izwi enga lukuwa kikagamba, "So!" 2 Naho nehikaula niyo naona falasi ing'aile, naho yudya aikaile nakatoza uta. Naho nakenk'higwa taji, andaga mhumi naho agendeela kunda mhumi.

3 Niyo Mwanangoto abendula duha dya kaidi, niyo neva yudya kiumbwa mta ugima wa kaidi akagamba, "So!" 4 Niyo falasi nt'huhu ink'hundu gu yafosa kuse. Yudya akuilongoza nakenk'higwa udahi kuusa utondowazi mwe isi vileke want'hu wachinjane. Niyo enk'higwa sime kulu.

5 Niyo Mwanangoto abendula duha dya katatu, niyo neva kiya kiumbwa cha katatu kino ugima kikanigamba, "So!" Nize nikaule niyo naona falasi nt'hitu, yudya akuilongoza atozaga kihimilo mwo mkono. 6 Niyo neva enga izwi dikulawa mwe viya viumbwa vine ivi ugima dikagamba, "mp'hishi ya ngano kwa maliho ya zuwa dimwenga, hamwenga na mp'hishi nt'hatu za shayili kwa dinali imwenga. Mna usekubananga mavuta ne divai!"

7 Niyo Mwanangoto abendula duha dya kane, niyo neva kiya kiumbwa cha kane kino ugima kiketanga, "So!" 8 Nakaulaga niyo naona falasi ya luivu, yudya akuilongoza etangagwa File, naho naakatimilwa ni isi ya wafile, niyo wenk'higwa udahi mwe lobo ya want'hu we isi vileke wawakome kwa nk'hondo na sala na maine hamwenga na makala ya kwe mbago.

9 Mwanangoto niyo abendula duha dya shano, hadya hasi he kilingo cha kumvika Mnungu naonaga miuye ya wadya wachinjigwe kwaviya nawakabilikiza Mbuli Yedi ya Mnungu, naho wandaga wahuwilwa mwo uwona wawe. 10 Nawakaila kwa usungu kwa izwi kulu wakagamba, "Zumbe, ukukile naho mkindedi. Nowize ini uwalahe want'hu wakwikala mwe isi na kuwalihiza kwa ivo wakikomile?" 11 Kila yumwenga ywawe enk'wagwa nk'hazu ing'aile, naho nawagambigwa wagojele lupisi ludodo mpaka aho ukuunga ukint'he uwazilo wa wandima weyawe hamwenga na wandugu zawe wakuunga wakomigwe enga ivo wakomigwe woho.

12 Niyo naona Mwanangoto akabendula duha dya mtandatu, niyo kwanda na kisingisa kikulu, zuwa niyo dyanda enga gunia titu, mnenge wose nao niyo wanda wink'hundu guu. 13 Nt'hondo za mwo ulanga nazo niyo zagwa mwe isi, enga nk'huyu zandile zikei kutoga zikugwa kulawa mwe diziti dyakwe dikasingiswa ni nk'hung'unt'ho. 14 Ulanga nao noutatuka haidi enga talatasi izingigwe na kuuswa, kila mnima na kisiwa neviusigwa aho wandaga. 15 Niho maseuta wa mwe isi na want'hu wakulu wa mwe isi na wakulu wa watowani na wagoli na wata ludole na kila mtumwa na walekelwa, nawakefise woho wenye mgati mwe maiwe ya kwo mnima. 16 Naho nawaigambe milima hamwenga na maiwe, "Kigweleni vileke mkifise kimnyilike yudya ekale mwe diya difumbi dyo useuta hamwenga na maya ya Mwanangoto. 17 Kwaviya zuwa dya mank'huto dibula naho ni ani naadahe kuhona?"