1 "Ni miye mzabibu we kindedi, naho Tate yehe niye mkulima. 2 Tambi hedikweleka adihausa mwangu, naho ayahogowela vedi matambi yadya yakweleka vedi, vileke yande hang'aile yelekese. 3 Nyuwe msunt'higwa kale kwo ulosi udya niwek'heni. 4 Ikaleni mndani mwangu, name nenikale mndani mwenyu. Tambi hadikudaha kweleka dikanda dikedu, mna dyadaha dikeleka dinanda mwo mzabibu, enga iivo, nyuwe hamkudaha kweleka hamnekale mndani mwangu.

5 "Ni miye mzabibu nyuwe nanywe mwi matambi. Wadya wakwikala mndani mwangu, miye name mndani mwawe, nawelekese kwaviya hamkudaha kudamanya dyodyose hamnandile na miye. 6 Mnt'hu hanekale mndani mwangu naadulwe kuse enga tambi niyo dya nyala, matambi ayo nayaduganywe hamwenga nakugeligwa mwo moto vileke yahye. 7 Mnekala mndani mwangu niyo ulosi wangu wekala mndani mwenyu, lombezeni chochose mkuunga, nanywe nomwink'higwe. 8 Nyuwe mna damanya mbuli zedi Tate naatogolwe, naivo neimanyike kindedi kugamba mwi wanamp'hina wangu. 9 Miye nawaunga enga ivo Tate akuniunga miye. 10 Mnazumila miko yangu nomwikale mwo lukunde lwangu, enga ivo miye nizumile miko ya Tate nakwikala mwo lukunde lwakwe.

11 "Himigambilani ivi vileke kinyemi changu kinde mndani mwenyu kinyemi changu nacho kikint'he. 12 Sigilizi yangu ni ino. Muungane enga ivo miye niwaungile nyuwe. 13 Lukunde lutendese mnt'hu ananalo ni ludya lwo kuulava ugima wakwe kwajili ya wambuyaze. 14 Nyuwe mnde wambuya zangu mkadamanya yadya huwagambalani. 15 Miye hikuwetangani naho nyuwe watumwa, kwaviya mtumwa hamanyize yadya akudamanya Zumbe ywakwe, mna nawetanga wambuya kwaviya hiwagambilani kila kint'hu nikivile kulawa kwa Tate. 16 Nyuwe hamnisagule miye, mna miye hiwasagulani nyuwe na kuwasigiilani mwiite mkeleke matunda yakuunga yekale. Naho Tate naawenk'he kint'hu chochose kiya nomuunge kombokela dizina dyangu. 17 Ino nivo humigambilani, Muungane kila yumwenga na miyawe.

18 "Uneva want'hu wanawaihiyani mmanye kugamba nawakonga kuniihiwa miye. 19 Uneva nyuwe ni wa ino isi, want'hu we isi hegu nawawaungani kwaviya ni wa isi ino. Mna hiwasagulani nyuwe kulawa mwe ino isi, icho nicho kilekile want'hu wakawaihiyani. 20 Kumbukileni ivo niwagambileni, wandima hiyo wakulu kujink'ha Zumbe ywawe, uneva want'hu nawanisulumiza miye hata nyuwe nawawasulumizeni, uneva nawatimila mahinizo yangu nawatimile ya kwenyu. 21 Mna nawawadamanyizile mbuli zose izi kwaviya nyuwe mwi wangu, Kwaviya hawammanyize yudya anisigiile miye nize. 22 Uneva hezile na kulonga nawo hegu hawandile na wiihi enga ivi haluse kwaviya hawana dyodyose wakudaha kukegombela. 23 Mnt'hu akuunga aniihiye miye amwihiya Tate. 24 Uneva hidamanye mbuli izo niwadamanyileni, naho hahali mnt'hu yeyose akudaha kudamanya, nawande hawana masa yo wiihi, mna nawaona ivo miye nidamanye niyo wani ihiya miye hamwenga na Tate. 25 Mna ino ilaila vileke imbuli iwandikwe mwo Mwiko ukelavilize, ‘Nawaniihiya haheina chotoko chochose.’

26 "Mwambizi neeze, Muye akuunga alavilize ikindedi cha Mnungu, yehe akulawa kwa Tate. Muye ywe kindedi naalonge uwona mwa miye. 27 Naho hata nyuwe namlonge mbuli zangu kwaviya mwandaga na miye kukongela aho nk'hongo.