1 Yona tabulwa na lobo lɔlɔkɔ mpe aokaki lɔbɛli. 2 Abɔndɛlɛki onka Nkolo bɔnɛ: «O Nkolo, tembe nko lobo lɔnɛ lotepelaki mi o elaka eliki mi o bola bo mi? Lenda itina ibengelaki mi nolota o Talasisi. Naebaki mbɔ ole Nyambe e ndɔ mpe e molika, ilito inzoki lɔbɛli mpe ntondiama na boboto mpe oenzake bikaneno bi wɛ noyala nkoisia nokela bobe onka bato. 3 O elaka ɛnɛ, nakobɔndɔ Nkolo, ku bɔlɔti mi nowa na noyala na bɔmɔi.» 4 Nkolo aomoubola bɔnɛ: «Wɛ ɔbɔtɔ noyala na lɔbɛli?» 5 Yona abɛlɛki o inanga mpe ahaki nokiha o lokenge lɔbɛlɛ mɔnyɛnɛ. Mpiko, ayatongelaki ɛmbɛ mpe akihaki aiko, alambaki nwɛnɛ lioye nokelama o inanga. 6 Na boiko, Nkolo Nyambe atoiyaki mote mpe amouliaki noyala nkobalela mwane mpe nosuloya moloko monka Yona. Mote mɔlɔkɔ mobuloyaki Yona penda. 7 Na ntei e mpendu enka boina boiko bonkina, Nyambe atindaki mɔtɔ mɔle mote mpe mote mɔlɔkɔ momaki. 8 Oumbwaki boina, Nyambe atindaki ɛpɛli e twɛ nyaima o lokenge lɔbɛlɛ mɔnyɛnɛ. Mwane mobalelaki Yona o motu penda bɛlɛbɛlɛ nɔlɛkwa bionge. Yona aobeya iwa ntepela mbɔ: «Ku bɔlɔti mi nowa na noyala na bɔmɔi.» 9 Na boiko, Nyambe amoubola bɔnɛ: «Wɛ ɔbɔtɔ noyala na lɔbɛli na boili mote mɔnɛ?» Yona amobekwelaki ndɛmbɔ: «Oho, nabɔto noyala na lɔbɛli mpe nabulwa nowa.» 10 Nkolo ahangelaki Yona bɔnɛ: «Itina be likiɛtɛnɛ wɛ na mote mopa wɛ tohika mpe toulia. Moulaki nko o botio bɔmɔ mpe mowa o botio bɔnɛ bonkina. Lendaka bokiɛtɛnɛ wɛ na mɔlɔkɔ. 11 Mpe mi, tiokelake inanga i Ninɛwɛ molika, ile na bato penda nkoto monkama na ntuku ipe ipwebe nɔhɔlɔ bobe na bɔlɔti, mpe na nyama ipwebane motango?»