लुक 16

किसा़ँड़ होड़ आर लासार रेयाङ

19 "मित्‌टेन किसा़ँड़ होड़े ताहेंकाना आर कुरसे बाहा बोरोनाक् मिंहिं मुसना़ किचरिच्‌ए ओयो डेङगायेत् ताहेंकाना आर जाव हिलोक् हेसेच्‌सेकरेच्ए जोम ञुबाड़ाजोङ कान ताहेंकाना। 20 आर लासार ञुतुमान मित्‌टेन रेङगेच् होड़ गोटा होड़मो घाव आकान उनियाक् दुवा़र ठेने दोहो गिडि आकान ताहेंकाना। 21 आर उनि किसा़ँड़ होड़ाक् मेज खोन हिरिच् पा़सिराक्‌कोते जोम बिक्ए गागोजोक्‌कान ताहेंकाना आर सेताको हों हेच्‌काते उनियाक् घावकोको जालेत् ताहेंकाना। 22 आदो उनि रेङगेच् होड़े गोच्एना आर दुतको होतेते आबराहाम होबोरतेये इदि ओचोयेना आर उनि किसा़ँड़ होड़ होंए गोच्एना आरे तोपा ओचोयेना। 23 आर पातालरेये सासेतोक्‌कान ताहेंकानरे बेङगेत् राकाप्‌काते सा़ङगिञ खोन आबराहामे ञेल केदेया आर लासार दो उनि होबोररे। 24 खानगे होहोवातेये मेनकेदा, ए बाबा आबराहाम, माँयाँवा़ञमे बाड़े आर लासार कोलकायमे जेमोन आयाक्‌ चोट का़टुप् दाक्‌रे तोपोकाते आलाङे रेयाड़कातिञ, एनते नोवा जोलोक् सेङगेलरेञ जालजालावक्‌ काना। 25 मेनखान आबराहामे मेनकेदा, ए बा़बु, दिसा़यमे, आम दो जिवेत्एम ताहेंकानरे आमाक् जियोनरे भागेयाक्‌को दोम ञाम होराकेदा आर लासार दो ओनकागे बा़ड़िच्आक्‌को, एमानतेयाक्‌ खोन नितोक् उनि दो नोंडे जिवि राड़ेजोक्‌ कानताया आर आम दोम जालजालावक्‌ काना। 26 आर नोवाको जोतो छाडाकाते आले आर आपे तालारे दो मित्‌टेच् माराङ ओकोच् खानदड़ाङ दोहो काजाक आकाना, जेमोन नोते खोन आपे ठेन चालाक् सानाको होड़ आलोको पारोम दाड़ेयाक् आर ओनतेनको हों आले ठेन आलोको पारोम हिजुक्। 27 आदोए मेनकेदा, एनडेखान इञ नेहोंराम काना, बाबा, आ़पुञ ओड़ाक्‌ते लासार दो कोलेमे बाड़े। 28 एनते मोंड़ें बोयहा मेनाक्‌कोतिञा, जेमोन ओनको ठेन केटेच्‌काते गोहाय एम, जाहाँलेकाते ओनको हों नोवा सासेत जायगाते दो आलोको हिजुक्। 29 मेनखान आबराहामे मेनकेदा, मोसे आर ना़बिको रेयाक्‌ पुथिको मेनाक्‌ताकोवा, ओनकोवाक् बाड़ेको आँजोममा। 30 आदोए मेनकेदा बाङा, बाबा आबराहाम गोच्‌को खोन जाहाँय होड़ ओनको ठेने सेनलेन खान दोको कासतावक्‌आ। 31 खानगेये मेतादेया, मोसे रेयाक्‌ आर ना़बिको रेयाक्‌ बाको आँजोम खान, एनडेखान जाहाँय होड़ गोच्‌को खोने बेरेत्‌लेनरे हों बाको पा़तिया़उक्आ।"