1 खानगे माराङ नायकेये मेनकेदा, "चेत्‌ नोवाको दो नोनका कानगेया?"

2 आदो उनिये मेनकेदा, "ए बोयहा मिसराको आर बाबाको, आँजोमपे, ठोनोकरेन इसोर दो आबोरेन बाबा आबराहाम ठेने सोदोरेना, मेसोपोटामिया़रेये ताहेंकान, हारानरे आ़उरिये बेरेलोक्‌रेगे,"✝ 3 आरे मेतादेया, दु ओडोक चालाक्‌मे आमाक् दिसा़म खोन आर आमरेन पेड़ा पा़रभा़को खोन, आर देला इञिञ उदुक् आम दिसा़मते। 4 खानगे उनि दो का़लदिकोवाक् दिसा़म खोन ओडोक हेच्एनते हारानतेये बेरेलेना; आर ओंडे खोन दो आपाततेत्ए गोच्एन तायोम, इसोर दो नोवा दिसा़मतेये उचा़ड़केदेया, ओने ओकारे नितोक् आपेपे बेरेलाकान,✝ 5 आर नोवारे चेत् आ़इदा़रि हों बाय एमादेया, हें जाङगा लेबेदोक् ठा़ँइ इना़क् हों बाङ आरे गोक्‌आदेया, नोवा दिसा़म दो उनि आर उनिरेन बोंसे एमाकोवा मेनते, उनिरेन गिदरा़ बाको ताहेंकानतायरे हों।✝ 6 आर इसोर दो नोनकाए मेनकेदा, उनिरेन बोंस दो उपरिया़को होयोक्आ मित्‌टेन आ़ना़ड़ि दिसा़मरे आर ओनको दो गोलामको खाटावकोवा, आरको सानतावकोवा पोन साय बोछोर हा़बिच्।✝ 7 आर ओना जा़तरेनको; ओने ओनको ठेन गोलामको खाटावक्, ओनको दो इञगेञ बिचा़रकोवा, इसोरे मेनकेदा, आर ओना तायोम दो ओना दिसा़म खोनको ओडोक हिजुक्आ आर इञको सेवावाञा नोवा ठा़ँइरेगे।✝ 8 आर खातना रेयाक्‌ बोनदोबोसे एमादेया। इना़काते इसाहाके जानामेना, आर इरा़ल माँहाँ हिलोक्‌रेये खातनाकेदेया, आर इसाहाक दो, जाकोब जोनोमे एमादेया, आर जाकोब दो गेलबार आ़गिल हापड़ामकोगे।✝

9 आर आ़गिल हापड़ामको दो जोसेफको हिसका़वादेते मिसोरतेको आ़खरिञ गोत्‌कादेया; मेनखान इसोर दो उनि तुलुच्‌ए ताहेंकाना,✝ 10 आर उनियाक् सानाम दुकको खोने छाडावकेदेया, आर मिसोररेन राज फाराव सामाङरे दाया आर आकेले एमादेया, आर उनि दो चाक्‌लाविच् मेनकातेये दोहोकेदेया। मिसोर चेतानरे आर आयाक्‌ गोटा राज दोङगोल चेतानरेगे।✝ 11 आर गोटा मिसोर आर कानानरे आकाल आर कोसटो होयेना आर आबोरेन हापड़ामको दो जोमाक् बाको ञामलेत्‌आ।✝ 12 आर जाकोब दो मिसोररे जोमाक्‌ मेनाक्आ मेनतेये आँजोमकेत् खान आबोरेन हापड़ामको पा़हिल धावे कोलकेत्‌कोवा; 13 आर दोसार धावरे जोसेफ दो आच्‌रेन बोयहाको ठेने ओरोमेना आर जोसेफआक् घारोंजरेनको बाबोतते फाराव राज होंए बाडायकेदा।✝ 14 खानगे जोसेफ दो काथा कोलकेत्‌ते आपाततेत्‌ जाकोब आर सानाम पेड़ा पा़रभा़कोय होहो आ़गु ओचोकेत्‌कोवा, एयायगेल मोंड़ें होड़कोगे।✝ 15 आर जाकोब दो मिसोरतेये फेड चालावेना; आर उनि आच् होंए गोच्एना आर आबोरेन हापड़ामको हों।✝ 16 आर सिकेमतेको इदि ओचोयेना आर ओना तोपा दाँदेररेको बाय ओचोयेना ओकाटाक् आबराहाम दो हामोररेन होपोनको ठेन सिकेमरे चा़नि सिकि एमकातेये किरिञलेत्।✝

17 ओकाटाक् इसोर दो आबराहामे गोक्‌ आकावादे ताहेंकान, ओकते सोर इदियेना, तेमोन होड़को मिसोररेको ढेर इदियेना आरको साङगे इदियेना। 18 मिसोररे मित्‌टेच् एटाक् राज आ़उरिये तेङगोक्‌ हा़बिच् ओने उनि जोसेफ बाय बाडायलेदे।✝ 19 उनि दो छोलते आबो जा़तरेनको तुलुच्ए बेवहारकेत्‌ते आबोरेन हापड़ामकोय सानतावकेत्‌कोवा, ओनकोरेन बाले गिदरा़इ गोच् गिडि ओचोकेत्‌को, जेमोन जिवेत् आलोको ताहेन।✝ 20 ओना जोखेच्‌गे मोसेये जानाम एना आर इसोर नोजोररे मोजगेये ताहेंकाना; आर उनि दो आपातआक् ओड़ाक्‌रे पे चाँदोए आ़सुल ओचोयेना। 21 आर उनिये गिडि ओचोयेन खान फाराव होपोनेरात दो उनिये हा़र साँवहाँँकेदेया आर आच्‌रेन होपोन मेनकातेये आ़सुल हाराकेदेया।✝ 22 आर मोसे दो मिसरिको रेयाक्‌ सानाम आकेले चेत् ओचोयेना आर आयाक्‌ काथाको आर का़मिकोते दाड़ेयानगेये होयेना।

23 "मेनखान पोन गेल सेरमा उमेर पुरा़वेनताय खान मोने हेच् आदेया आच्‌रेन बोयहा इसराएल होपोनको हिरिको ला़गित्‌।✝ 24 आर मित्‌टेन होड़ बेहोक ओचोक्‌काने ञेलकेदे खान दोदोक्‌इच्ए तेङगोयेना आर उनि दाबाव ओचोक्‌इच् हालाहा़लि ला़गित्‌ उनि मिसरि होडे़ गोच्‌केदेया।✝ 25 आरे हुदिसेत्‌ ताहेंकान बाङमा उनिरेन बोयहाकोको बुजहा़वा, इसोर दो उनियाक् तितेगे बाञचावक्ए एमाकोवा मेनते; मेनखान ओनको दो बाको बुजहा़उलाक्आ। 26 आर दोसार हिलोक् बार होड़किन तापामकान ताहेंकानरे उनकिन ठेने हेच्‌ सोरेना, आर सामगेक् ला़गित्‌ सोलहा लेगावात्‌किनतेये मेनकेदा हेंदा हो, बोयहाकान चोङबेन, चेदाक् बेन बा़ड़िजोक् काना?" 27 मेनखान सोङगेतेनिच्ए बेहोके कान ताहेंकानिच् दो उनि ढाका पा़सिरकेदेतेये मेनकेदा, "ओकोय बाङ आ़लिञ तालारे मुखिया़ आर बिक्‌चा़रिच्ए दोहोकेत्‌मे? 28 होलानोक् मिसरि होड़ेम गोच्‌केदे लेका इञ हों गोजेञेम मेनजोङकाना?"✝ 29 खानगे मोसे दो ओना काथा इया़तेये दा़ड़केदा आर मिदिया़न दिसा़मरे उपरिया़इ होयेना, ओंडेगे बारयाय कोड़ा गिदरा़वाना।✝

30 "आर पोन गेल सेरमा पुरा़वेन खान मित्‌टेन दुत दो सिना़इ बुरु रेयाक्‌ हाहाङकाररे उनि ठेने ञेल ओचोयेना मित्‌टेन जा़नुम झा़वा़ रेयाक्‌ जोलोक् सेङगेलरे।✝ 31 आर मोसे दो ओना घोटना ञेलकातेये हाहाडा़येना; आर ञेल ला़गित्‌ए सेन सोरोक्‌कान ताहेंकानरे प्रोभु रेयाक्‌ आड़ाङ हेच्एना, 32 इञ दो आमरेन हापड़ामकोरेन इसोर आबराहाम आर इसाहाक आर जाकोबरेन इसोरगे।" आर मोसे दो थारथारावेनते ञेञेल बाय दिललेदा। 33 खानगे प्रोभु दोए मेतादेया, आमाक्‌ जाङगा खोन खारपा बोजताम; एनते आम ओकारेम तेङगोवाकान ओना जायगा दो सोनोत ओत काना। 34 मिसोररे मेनाक्‌कोतिञ इञरेन पोरजाकोवाक् दुक सासेत इञ ञेलआकात्‌गेया, आर ओनकोवाक् कुहरा़उ दोञ आँजोमाकात्‌गेया आर ओनको छाडावको ला़गित्‌ इञ फेड हेच् आकाना; आर नितोक् दो देला मिसोरतेञ कोलमेया।

35 उनि मोसे, ओकोयको बाङलेदे, ओनेको मेनलेत्‌, ओकोय बाङ आम दो मुखिया़ आर बिक्‌चा़रिच्ए दोहोकेत्‌मे? उनिगे इसोर दो मुखिया़ मेनकाते हों आर छाक्‌डाविच् मेनकाते होंए कोल केदेया, जा़नुम झा़वा़रे उनि ठेने ञेल ओचोयेन दुत रेयाक्‌ आ़क्‌युररे।✝ 36 उनिगे ओनकोय ओडोक आ़गुकेत्‌कोवा, मिसोर दिसा़मरे आर आराक् जालापुरिरे आर हाहाङकाररे पोनगेल सेरमा हाहाड़ावाक्‌को आर चिनहा़को का़मिकाते।✝ 37 नुयगे उनि मोसे दो, ओने उनि इसराएल होपोनकोय मेतात्‌को, इसोर दो आपेरेन बोयहाको मोद खोन मित्‌टेन ना़बिये तेङगोवापेया, इञ लेकानिच्‌गे।✝ 38 नुय दो उनि कानगेयाय, ओने उनि हाहाङकाररे का़लिसिया़रेये ताहेंकान उनि दुत, तुलुच्, ओकोय सिना़इ बुरुरे उनिये गालमारावादे। आर आबोरेन हापड़ामको तुलुच्‌ हों, उनिगे, ओकोय आबो एमाबोना मेनते जिवेत् काथाकोय आताङकेत्।✝

39 ओने उनियाक् बातावताय ला़गित्‌ आबोरेन हापड़ामको दो बाको रेबेन लेन, बिचकोम उनिको ढाका पा़सिरकेदे, आर आकोवाक् ओनतोरते दो मिसोरतेको आ़चुर रुवा़ड़ेन।✝ 40 आर आरोनको मेतादेया, आबो लाहा लाहाते सेनोक् ला़गित्‌ बोङगाको बेनाव आबोनमे, एनते उनि मोसे ओकोय मिसोर दिसा़म खोने ओडोक आ़गुकेत्‌बोन, उनि रेयाङ दो बाबोन बाडाया, चेत् चोङ होयेना।✝ 41 आदो ओनाको दिनरे मिहुँरेन मित्‌टेन मुरहुत्‌को बेनावाना आर ओना मुठा़नगे दाँड़ेंको सामाङादा, आर माराङ भोज सालाक्‌ आकोवाक् तितेयाक् का़मिकोरेको हेसेच्‌सेकरेच् एना,✝ 42 मेनखान इसोर दो आ़चुरेनते ओनकोय आलाय गिडिकात्‌कोवा सेरमारेन इपिलको सेवावाको ला़गित्‌, चेत्‌लेका ना़बिको रेयाक्‌ पुथिरे ओलआकान लेका,

"चेत् तेङगेनोक्‌को आर दाँड़ेंको पे सामाङादिञा

पोनगेल सेरमा हाहाङकाररे, ए इसराएल घारोंजरेनको?✝

43 मोलोक रेयाक्‌ ता़मबुपे गोच्‌केदा आर रोफान बोङगारेन इपिलगे।

ओनाको मुठा़न ओने ओनाकोपे बेनावान ओनाको

डोबोक्‌आक्‌ ला़गित्‌ बाबेल ओन पारोम इञ चालोन इदिपेया।"✝

44 गोहा रेयाक्‌ ता़मबु आबोरेन हापड़ामको ठेन हाहाङकाररे ताहेंकान ताकोवा, चेत्‌लेका मोसे गालमारावादेयिच्ए हुकुमलेत्‌ उनिये ञेललेत् ना़मुना लेकाय बेनावा मेनते।✝ 45 ओने ओकाटाक् आबोरेन हापड़ामको हों आको पा़रिको ञामकातेको आ़गुदाराकेत् जोसुवा़ साँवते, बोङगान होड़ जा़तकोवाक् दिसा़म दोखोलानरे, ओने ओनको इसोर दो आबोरेन हापड़ामकोवाक् मेंत्‌हाँ सामाङ खोने लागा ओडोककेत्‌को, दा़उद रेयाक्‌ ओकते हा़बिच्‌गे।✝ 46 नुय दो इसोर सामाङरे दायाय ञामकेदा आर जाकोबरेन इसोर ला़गित्‌ ताहेन ठा़ँइ ञामा मेनतेये कोयाना।✝ 47 मेनखान सुलेमानगे ओड़ाक् दोए बेनावादेया।✝ 48 एनरेहों चोट उता़रिच् दो तिते बेनावाक्‌कोरे बाय ताहेनकाना, चेत् लेका ना़बिये मेनेत्‌ काना,

49 सेरमा दो इञाक् सिङघा़सोन काना आर ओत दो इञाक् जाङगा लेबेदोक् गाँडो,

चेत् लेकान ओड़ाक्‌पे बेनावाञा, प्रोभुइ मेनेदा, ✝

से ओकाटाक् काना इञाक् जिरा़उक् ठा़ँइ दो?

50 इञाक् तिगे नोवाको सानाम बाङ दो बाय बेनाव आकात्? 51 ए आपे केटेच् मोनानको, ओनतोर आर लुतुर गोधड़ोवानको, आपे दो जावगे सोनोत जिउपे बिरुदायकाना; चेत् लेका आपेरेन हापड़ामकोको का़मिलेत्‌, आपे हों ओनकागे।✝ 52 ना़बिको मोदरेन ओकोयटाक् हाले आपेरेन हापड़ामको दो बाको सानतावलेदेया? हें, ओनको दो गोच् होंको गोच्‌केत्‌कोवा, ओकोय उनि भागेयिच् रेयाक्‌ हिजुक्‌को ला़इ लाहालेत् ताहेंकान, ओने उनि सोपरोतको आर खुखुनकोगे आपे नितपे होयाकान।✝ 53 आपे ओकोय दुतको रेयाक्‌ बाँधावाक् मेनकाते आ़नपे आताङाकात्, आर एनहों बापे दोहोआकादा।

54 आदो ओनाको आँजोमकेत् खान आकोवाक् मोनरेको सोबोक् ताप्एन आरको तोगोच् डाटावादेय।✝ 55 मेनखान उनि दो सोनोत जिउते पेरेच्आकान सेरमा सेच् कोयोक्‌केत्‌ते इसोराक् ठोनोके ञेलकेदा, इसोराक् एतोम सेच्‌रे जिसु तेङगोवाकान; 56 आरे मेनकेदा, "ञेलपे इञ दो सेरमा झिच्‌आकान आर मानवा होपोन दो इसोराक् एतोम सेच्‌रे तेङगोवाकान इञ ञेलेकाना।"

57 मेनखान ओनको दो आँट आड़ाङते होहोकेत्‌ते आकोवाक् लुतुरको तुबेत्‌केत्‌ताकोवा, आर मित् जुमते उनिको झापटावकेदेया; 58 आर नागराहा बाहरेते ओडोक इदिकेदेते धिरितेको तिञकेदेया। आर गोहाको दो सा़उल ञुतुमान मित्‌टेन जुवा़न होड़ाक् जाङगा ठेन आकोवाक्‌ किचरिच्‌को दोहोकेदा। 59 आर इस्टिफानको तिञेकान ताहेंकाना, आर उनि दोए कोयेत्‌कान ताहेंकान तुलुच्‌, "ए प्रोभु जिसु इञाक् जिवि आताङ तिञमे।"✝ 60 आर इखड़ुमेनते आँट आड़ाङतेये होहोकेदा, "ए प्रोभु नोवा का़इ दो आलो बाड़ेम लेखावाकोवा," आर ओनाय मेनकेत् खाने जा़पित् केदा।