1 आदो फेसतुस ओना टोठारेये सेटेरेन खान, पे माँहाँ तायोम का़इसा़रिया़ खोन जेरुसालेमतेये राकाप् चालावेना। 2 आर माराङ नायकेको आर जिहुदिकोरेन आसोल होड़को दो पावल उपा़रतेको दा़रसा़उकेदा, 3 आर उनि उपा़रते कोयानतेको नेहोंरेना, जेमोन जेरुसालेमते उनिये आ़गु ओचोये। ओनको दो एनते होररे उनि गोजेया मेनते ताँड़ाँक्आयको निट आकावान ताहेंकाना। 4 मेनखान फेसतुसे रोड़ रुवा़ड़केदा, बाङमा, पावल दो का़इसा़रिया़रेये हाजोतआकाना, आर आच् हों सोर दिन खानगे ओंडेये चालाक्आ। 5 ओना इया़ते मेनकेदाय, "आपे मोदरेन एकतिया़रियानको इञ सोङगेतेको चालाक्‌मा, आर उनि होड़रे जाहान बेठिकाक् मेनाक् खानको बोहोगेमा।"

6 आदो ओनको तालारे इरा़ल से गेल दिन गान ताहेंकाते का़इसा़रिया़तेये चालावेना। आर दोसार हिलोक् दो बिक्‌चा़र दुड़ुप्‌आक्‌रेये दुडुप्एनते पावल आ़गुये ला़गित्‌ए हुकुमकेदा। 7 आर उनिये हेच्एन खान, जेरुसालेम खोन हेच् आकान जिहुदिको उनि बेड़हायते तेङगो आ़चुरेनते आ़डि ओकोच् मुसकिल मुसकिलाक् का़सुरकोको बोहोक्‌केदेया, ओने ओनाको बाको सा़बुत दाड़ेयात्। 8 आर पावल दो रोड़ दोक्एनतेये मेनकेदा, बाङ दो जिहुदिकोवाक् आ़न रेयाक्‌, बाङ दो कोयजोङ ओड़ाक्‌ रेयाक्‌, आर बाङ दो का़इसा़र रेयाक्‌, चेत्‌गे बा़ञ का़सुरआकादा।

9 मेनखान फेसतुस दो जिहुदिको कुसि ओचोकोवा मेनकाते पावले रोड़ रुवा़ड़ादेया, जेरुसालेमते राकाप् सेनोक् सानायेत्‌मेया, ओंडे इञ सामाङरे नोवाको रेयाक्‌ बिचा़र ओचोक् ला़गित्‌?

10 मेनखान पावल दोए मेनकेदा, का़इसा़राक्‌ बिक्‌चा़र दुड़ुप्‌आक्‌ सामाङरेञ तेङगोवाकाना, नोंडेगेञ बिचा़र ओचोक्आ। जिहुदिको दो चेत् हों बा़ञ बेहोक आकात्‌कोवा, आर ओना दो आम हों बेस ओकोच्एम बाडाया। 11 आदो इञ बेहोक आकान खान, आर गोच्‌ ओचोक् लेक जाहानाक् इञ का़मिआकात् खान, आलोञ गोच्‌ ओचोक् दो बा़ञ खोजकाना, मेनखान नोकोको बेहोक एदिञकानाक्‌को दो चेत् हों बाङकान खान, एनडेखान ओकोय हों ओनको ठेन ओहोय जिमा़ दाड़ेलिञा। का़इसा़रगेञ दोहायाय काना।

12 खानगे फेसतुस दो बिचा़र गोक्‌ड़ोको तुलुच्‌ गालमारावकेत्‌तेये रोड़ रुवा़ड़ादेया, का़इसा़रेम दोहायाकावादेया; का़इसा़र ठेनगेम चालाक्आ।

13 आर थोड़ा दिन तायोमते आ़ग्रिप्‌पा राज आर बेरनिस दो का़इसा़रिया़रेकिन सेटेरेना फेसतुस ञापामे ला़गित्‌। 14 आर ढेर दिन ओंडेकिन ताहेंयेन खान फेसतुस दो पावल रेयाङ राज ला़इ तिया़क् आदेतेये मेनकेदा, मित्‌टेन होड़ मेनाया, फेलिक्‌स होतेते का़इदिये बा़गि ओटोआकान। 15 ओने उनि रेयाङ जेरुसालेमरेञ ताहेंकानरे जिहुदिकोरेन माराङ नायकेको आर मुरुबिकोको दा़रसा़उआदिञ आर उनि उपा़रते सा़जा़इ रेयाक्‌ हुकुमको कोयकेत्, 16 ओनको दोञ रोड़ रुवा़ड़ात्‌कोवा, जाहाँय होड़ सोपरोते रेयाक्‌ चा़लि दो रोमिकोवाक् बा़नुक् आनाङ बोहोक्एदियिच् आर बोहोक्‌को आ़उरिको सामकासा़टिक आर बोहोक्एदेयाक् रेयाङ रोड़ दोगोक्‌ ला़गित्‌ आ़त आ़उरिये ञाम हा़बिच्। 17 आर नोंडेको हेच्एन खान बेगोर दिन ठेलावते दोसार हिलोक्‌गे बिक्‌चा़र दुड़ुप्‌आक्‌रे दुड़ुप्‌एनतेञ हुकुमकेदा, पावल आ़गुये ला़गित्‌। 18 उनि रेयाङ दो बा़दिकोको तेङगोयेन खान, इञिञ ओहमालेत् लेकान बा़ड़िच्आक् दो चेत् हों बाको दुहमा़तलेदा, 19 मेनखान आकोवाक् देवा सेवा रेयाक्‌ उनि तुलुच्‌को रोपोड़कान ताहेंकाना। आर मित्‌टेन गोच्एन जिसु रेयाक्‌, ओने उनि रेयाङ पावल दो काजाकतेये मेनकेत्, जिवेत्‌गेयाय मेनते। 20 आदो नोवाको तोदारा़त रेयाक्‌ इञ आसबासावेन खानिञ कुलि केदेया, बाङ दो जेरुसालेमते सेनकाते ओंडे ओनाको रेयाङ बिचा़र ओचोया मेनते सानाको मेनाक्‌तापेया? 21 मेनखान पावल दो माहाराज ठेन बिचा़रोक् ला़गित्‌ होरहो दोहो ओचोक्ए दोहायकेत् खान, का़इसा़र ठेन आ़उरि कोले हा़बिच्‌ होरहो दोहोये इञ हुकुमकेदा।

22 खान आ़ग्रिप्‌पा दो फेसतुसे मेतादेया, "इञ हों उनि होड़ रेयाक्‌ दो आँजोम सानाएदिञा उनिये मेनकेदा, गापाम आँजोमताया।"

23 आदो दोसार हिलोक् आ़ग्रिप्‌पा आर बेरनिस दो आ़डि ठोसोक् साजकातेकिन हेच्एना, आर मुखिया़ सुबेदारको आर नागराहारेन आसोल होड़को तुलुच्‌ साभा ठा़ँइरेञ बोलोयेन खान फेसतुसे हुकुमकेत्‌ते पावलको आ़गु केदेया। 24 आर फेसतुसे मेनकेदा, ए आ़ग्रिप्‌पा राज आर नोंडे आले तुलुच्‌ मेनाक्‌पे सानाम होड़को उनि होड़को ञेले काना, नुय रेयाङ दो जोतो जिहुदिको जेरुसालेमरे आर नोंडे हों नोनका होहोवातेको आरदासआकात्आ, नुय आरदो जिवेत् ताहेन लेक दोए बाङ काना। 25 मेनखान इञ दोञ बुजहा़उ ञामकेदा, गोच्ओचोक्‌ लेक दो चेत् हों बाय का़मि आकादा मेनते, आर आच्‌गे माहाराजे दोहायायते कोल गोत्‌कायिञ निटकेदा। 26 नुय रेयाक्‌ आबोरेन मा़लिक ठेन ओल ला़गित्‌ खा़टियाक् दो चेत् हों बा़नुक्‌तिञा, ओना इया़ते आपे सामाङरेञ आ़गुवाकादा, आर आसोकायते आम सामाङरे ए आ़ग्रिप्‌पा राज, जेमोन कुलि बाड़ाकाते ओल ला़गित्‌ जाहानाक् इञ ञाम, 27 एनते का़इदि होड़ कोलकायरे उनि उपा़रते ला़लिस रेयाक्‌ कारोन बाङ उदुग दो इञ बुजहा़उरे बेबुजाक् काना।