1 आर डेरबे आर लुसतरा़ते होंए सेटेरेना, आर ञेलपे, ओंडे दो तिमोथि ञुतुमान मित्‌टेन चेलाए ताहेंकाना, मित्‌टेन पा़तिया़वाकान जिहुदि मायजिउरेन होपोनगे, मेनखान आपाततेत् दो जुना़नि होड़े ताहेंकाना। 2 उनि दो लुसतरा़ आर इकोनियोमरेन बोयहाको ठेन भागे ञुतुम ताहेंकानताया। 3 पावल दो उनि सोङगे इदि तोराये मेनवाना, आर उनि ञामकेदेतेये खातनाकेदेया, ओनाको टोठारेन जिहुदिको इया़ते एनते जोतोगेको बाडायकान ताहेंकाना उनि रेन आपात दो जुना़निये ताहेंकाना मेनते 4 आर नागराहा नागराहा सेन सेनते, ओनाको निटाक् दोहोय ला़गित्‌को जिमा़वात्‌कोवा, ओकाको जेरुसालेमरेन आपोसतोलको आर मुरुबिकोको गोटालेत्। 5 ओनाते का़लिसिया़रेनको दो बिसवा़सरेको केटेच्‌ इदियेना आर लेखारे दिना़मगेको साङगे इदियेना

6 आदो फुरुगिया़ आर गालातिया़ टोठा तालातेको पारोम चालावेना, आ़सिया़रे इसोराक् काथा ला़ला़इ दो सोनोत जिउ होतेतेको माना ओचोयेनते। 7 आर मुसिया़ हा़बिच्‌को सेटेरेन खान बेथानिया़ते चालाक्‌को कुरुमुटु लेगाकेदा, मेनखान जिसुरेन जिउ दो बाय आड़ाक्आत्‌कोवा। 8 आदो मुसिया़ आड़े आड़ेते पारोमेनते तरोआसतेको फेड हेच्एना। 9 आर पावल दो ञिंदा़ मित्‌टेच् दोरसोने ञेलकेदा, मित्‌टेच् मा़किदुनिया़ होड़े तेङगोवाकान, आर नेहोंरायकानतेये मेनेत्, देला मा़किदुनिया़ते पारोम हिजुक्‌पे गोड़ोंवालेमे। 10 आदो ओना दोरसोने ञेलकेत् खान उसा़राते मा़किदुनिया़ते चालाक्‌ले आँटआना, बुजहा़उकेदाले भागे सोमबात पोरचाराको ला़गित्‌ इसोरे होहो आकावात्‌लेया मेनते।

11 आदो तरोआस खोन जाहाज लाड़ावकेत्‌ते मित् मोहंडा सामोथराकेतेले चालावेना, आर दोसार हिलोक् दो निया़पोलिसते, 12 आर ओंडे खोन दो फिलिपिते, ओने ओना दो मा़किदुनिया़रे ओना टोठा रेयाक्‌ आसोल नागराहा कान, रोम रेयाक्‌ मित्‌टेच् आतोगे। आर ओना नागराहारे तिन उडि दिन चोङले ताहेंयेना। 13 आर जिरा़उक् माँहाँ हिलोक् दो फाटोक बाहरेते गाडा आड़ेतेले चालावेना, ओने ओकारे मित्‌टेच् कोयजोङ ठा़ँइ मेनाक्आ मेनतेले बुजहा़वेत् ताहेंकान आर दुड़ुप्‌काते हेच् जारवा आकान मायजिउकोले गालमारावात्‌कोवा। 14 आर लुदिया़ ञुतुमान मित्‌टेन मायजिउ दोए आँजोमकेत् तालेया। उनि दो थिया़टिरा़ नागराहारेन कुरसे बाहा रोङ किचरिच्‌ आ़खरिञेत्‌ आर इसोर सेवावायकान मित्‌टेन मायजिवे ताहेंकाना, उनियाक् मोन दो प्रोभुइ झिच्‌केत्‌ताया पावले रोड़ेत् ताहेंकानाक्‌को हेतावाक्आ मेनते। 15 आर उनि दो घारोंजरेनको सुदहा़इ बा़प्‌तिसेन खान नेहोंरात्‌लेतेये मेनकेदा, प्रोभुरे पा़तिया़उ आकानिच् पे बुजहा़उ आकादिञ खान देला इञाक् ओड़ाक्‌ते बोलोक्‌ते ओंडे बाड़े ताहेनताबोनपे। आरे जा़रिकेत्‌लेया।

16 आर नोनका होयेना, कोयजोङ ठा़ँइतेले चालाक्‌कान ताहेंकानरे बा़ड़िच् जिवे ताहेंकानताय मित्‌टेन का़ड़मिये ञापामकेत्‌लेया, ओने उनि भाबाते आच्‌रेन किसा़ँड़को आ़डि ओकोच्ए रोजगाराको कान ताहेंकान। 17 उनि दो पावल आर आले पाँजा पाँजातेये होहोयेत् ताहेंकाना, नोको होड़ दो चोट उता़रिच् इसोररेन गोलामको कानाको, ओने ओनको बाञचावक् रेयाक्‌ होरको जा़हिरापेकान। 18 आर नोवा दो ढेर दिने ओनकायेत्‌ ताहेंकाना। खानगे पावल दो आ़डि बा़ड़िच्ए बुजहा़उकेत्‌ते आ़चुरकाते उनि जिवे मेतादेया, जिसु मा़सि ञुतुमतेञ हुकुमाम काना, उनि खोन चालाक्‌मे। आर इना़ घा़ड़िच्‌तेगेये ओडोक सेनएना। 19 मेनखान उनिरेन किसा़ँड़को दो आकोवाक् रोजगार रेयाक्‌ आस चाबायेनताकोवा मेनतेको ञेलकेत् खान पावल आर सिलासको साप्‌केत् किना, आर हा़टिया़ टा़न्‌डिते मुखिया़को ठेनको ओर इदिकेत्‌किना। 20 आर हा़किमको ठेनको इदिकेत्‌किनतेको मेनकेदा, नुकिन होड़ दो, ओनेकिन जिहुदिकान, आबोवाक् नागराहाकिन आ़उला़वेदा। 21 आर नोनकान आ़रि चा़लिकिन पोरचारेदा, ओने ओनाको बाक्‌ताव से दोक्‌हो बाङ गानोक् ताबोन, रोमिको कानतेबोन।

22 आर गादेल होड़ दो मित्‌ते उनकिन उपा़रतेको तेङगोयेना, आर हा़किमको दो किचरिच्‌को पोटोरकेत्‌किनते बेंतते दालकिनको हुकुमकेदा। 23 आर आ़डिको दालकेत् किन खान, हाजोतरेको भोरावकात्‌किना, काजाकते दोहोकिना मेनते का़द ओड़ाक् दोरोगाको हुकुमादेते। 24 ओनकान हुकुमे ञामकेत्‌ते हाजोत ओड़ाक्‌रेये भोरावकात्‌किना, आर उनकिनाक् जाङगा दो हा़ड़ि पाटारेये हुरा़ड़ काजाककेत् ता़किना।

25 मेनखान ताला ञिंदा़ गान पावल आर सिलास दोकिन कोयजोङकान आर इसोरकिन सेरेञ सारहावायकान ताहेंकाना, आर का़इदिको दोको आतेनेत्‌किन ताहेंकाना। 26 खान आचकागे नुना़क् आँट ओत लाड़ावेना, जे का़द ओड़ाक् रेयाक्‌ नेवको लाड़ावेना, आर इना़ घा़ड़िच्‌तेगे सानाम सिलपिञको दो झिच् गोत्एना, आर सानामकोवाक् तोनोल दो राड़ा गोत्‌एनताकोवा। 27 आर का़द ओड़ाक् दोरोगा दो जा़पित्‌ खोने एबहेनेनते हाजोत रेयाक्‌ सिलपिञ झिच्‌गेये ञेलकेत् खान तारवाड़ि बोच्‌काते आच्‌तेगेये गुजुक् ला़गिदोक्‌कान ताहेंकाना, का़इदिकोको दा़ड़केदा मेनतेये बुजहा़उकेत्‌ते। 28 मेनखान पावल दो आँट आँड़ाङते होहोवातेये मेनकेदा, आपनारते दो आलोम बा़ड़िजोक्आ। एनते जोतो नोंडे मेनाक्‌लेगेया।

29 खानगे दिउहेको कोयकेत्‌तेये ञिर बोलोयेना, आर थारथारावाते पावल आर सिलास सामाङरेये ओमबाक्एना। 30 आर ओडोक आ़गुकेत्‌किनतेये मेनकेदा, हेंदा बाबा, बाञचावक् ला़गित्‌ चेत्‌चेका होयोक्‌तिञा?

31 आदोकिन मेनकेदा, प्रोभु जिसुरे पा़तिया़उक् मे आदोम बाञचावक्आ आम आर घारोंजरेनको हों। 32 आर उनकिन दो प्रोभुवाक् काथाकिन गालमारावादेया, उनि ओड़ाक्‌रेन सानामको सेलेत्। 33 आर उनि दो ञिंदा़ इना़ घा़ड़िच्‌गे इदिकेत्‌किनते दाल घावकोय आ़रुप्‌केत्‌ता़किना, आर इना़ तापतेगेको बा़प्‌तिसएना आच् आर आच् घारोंजरेन सानामको। 34 आदो आच् ओड़ाक्‌तेये राकाप् इदिकेत्‌किना, आर जोमाक्ए सामाङात्‌किना, गोटा घारोंजरेनको तुलुच्ए हुला़सेना, इसोररेये पा़तिया़वाकानते।

35 मेनखान सिञ मारसालेन खान हा़किमको सिपा़हि कोलकेत्‌कोतेको रोड़ गोत्‌कादा, उनकिन होड़ दो आड़ाक्‌ गोत्‌काकिनमे।

36 आर का़द ओड़ाक् दोरोगा दो ओनाको काथा पावले ला़इयादेया, बाङमा, हा़किमको दो आड़ाक्‌काबेना मेनते काथाको कोल आकादा, दे एनडेखान ओडोकोक्‌ते सुलुकते सेनजोङबेन।

37 मेनखान पावल दो ओनकोय मेतात्‌कोवा, दिसा़म होड़को सामाङरेको दाल उरकेत्‌लिञा बिन बिचा़र दुसिते, आ़लिञ ओनेलिञ रोमि पोरजाकान, आर हाजोतरेको खादलेकात् लिञा, आर नितोक् दो ओको ओकोतेको ओडोक गोत्‌कालिञ काना? ओहोगे होयलेना, बिचकोम हेच्‌कातेको ओडोक इदिलिञमा।

38 आर सिपा़हिको दो नोवाको काथा हा़किमकोको ला़इयात्‌कोवा, आर रोमि पोरजा कानाकिन मेनतेको आँजोमकेत् खान दोको बोतोरेना 39 आर हेच्‌काते इका़को कोयकेदा, आर उनकिन दो सोतोक् ओडोककातेको इदिकेत्‌किनतेको नेहोंरात्‌किना, जेमोन नागराहा खोन दोकिन सेनजोङ। 40 खान उनकिन दो हाजोत खोन ओडोकेनते लुदिया़ ठेनकिन बोलोयेना। आर बोयहाको तुलुच्‌ ञेपेल ञापामेनतेकिन उसकुरकेत्‌कोवा, आर ओंडे खोन किन चालावेना।