Atos 2

पत्रुसयि लोन

14 हिन्नाङ पत्रुसयि च्युच्यि ङ्याबो लाँरे क्ये छेया किङगा हतिबाला नाइसोङ, "यहुदियायि मितेबा, राङ यरुश्लेमला त्योएङान मितेबा पोरो, खेला धि ताम छ्या सअ, राङ ङाहि ताम ङ्योन। 15 चिचालानाना खि ठानि क्याक्याइबा च्वरा धिबा स्यिस्यिया मेता, चिचालानाना थाल्ला नामेयि नौ बजे मात्र च्युच्युङा होतो। 16 हिन्नाङ योएल ङोन्सेखिलङान यि लाम्ला नानाइबि ताम धि राङ ना, 17 ‘सिनि ङिनतेबाला धि च्वरा होङान ना नाइरे कजसुबा ने्न्दु, ङा मि पोरोयि थोला ङाहि आत्मा झ्योज्याइ, राङ खि पिजातेबा, राङ हतिबे पुमोतेबे ङोन्सेखिलङान ना, राङ हतिबे स्यारातेबे दर्शन थोङान ना, राङ हतिबे काप्पोतेबे मुलाम थोङान ना, 18 हिना, ङा ङारि यक्मुवा यक्पुवातेबे थोला हति ङिनतेबाला ङाहि आत्मा झ्योज्याइ, राङ हतिबे ङोन्सेखिलङान ना। 19 थोकि पान्नाङला ङा हा:लाइयापयि लाइ राङ हअ पिरथिविला हा:लाइयापयि लाइतेबा तोनङान ना, अर्थात ठा, मे, राङ तुप्पि मुस्लो। 20 कजसुबायि छेया राङ हा:लाइयापयि ङिन होङयापले ताङला ङिमा मुन्नाला राङ धा: ठाला परिनत होङान ना। 21 तेहि सुइ कजसुबायि मिन खेरकिन, हतिला थारथोनयाप खुङान ना।’"

22 "इस्राएलि मितेबा, धि तामतेबा ङ्योन, नासरतयि येशु धि च्वरा मिना, काङला कजसुबायि शक्तिशालि लाइतेबा, हा:लाइयापयि लाइतेबा राङ हा:लाइयापयि लाइतेबाने खि धुनला साछि पिपिना होतो। ख्योए छ्या होतो माने कि कजसुबायि खि उइला धि लाइतेबा ख्युइ लाम्ला क्याक्याइबा ना। 23 कजसुबायि थाकच्योए क्याक्याइबि थारका योजाना राङ ताङमे छोइ च्वरा थेथेबा धि येशुला राङ तिक्पा किङानयि मितेबे लाकि लाम्ला खि क्रुसला तारे स्येसोङ।✝2:23 मत्ति २७:३५; मर्कुस १५:२४; लुका २३:३३; युहान्ना १९:१८ 24 खोला कजसुबायि स्यियापयि तुकाने थारथोनदु च्युक्ते सोम्बो सोइसोङ। चिचालानाना कालयि हअला खो होङयाप असम्भव ना।✝2:24 मत्ति २८:५-६; मर्कुस १६:६; लुका २४:५ 25 चिचालानाना दाउदयि ख्युइ भारेला नेन्दु, ‘ङाहि प्रभुला बारतै ङाहि धुनला थोङसोङ, चिचालाना ङा खो माख्याम नाइरे खो ङाहि लाक्पा याइ यहला होतो। 26 हतिचाला ङाहि सम किप्पो राङ ङाहि च्ये कासोङ। हति अर्थात ङाहि स्हुयि याङ आशाला सोनङान ना। 27 चिचालानाना ख्युइ ङाहि उला हअलुला तोङान मानाना, न त ख्युइ रेँ पवित्र मियि स्हु रुलदु झ्युङान ना। 28 ख्युइ ङाला मिजेयि लाम स्येसोङ, ख्युइ ङाला रेँ उपस्थितियि लाम्ला आन्नद क्याइरे गदगद सोङान ना।’"

29 "भाइबा, हुइ ताङबुइ दाउदयि भारेला ङा ख्योएला थारका क्याइरे नाङ्युइकिन, कि खो स्यिरे राङ कुँरे, तेहि तिरिङयि ङिन थु ख्युइ तुर होए राङ होतो। 30 हतिचाला ङोन्सेखिलङान च्युच्युङाति, खोला छ्या होतो कि कजसुबायि ना क्याक्याला होतो कि ख्युइ छिमा पिपिबाने ख्युइ क्याल ठिला मिझिला कजसुबायि भोरङान ना। ✝2:30 भजनसंग्रह १३२:११; २ शमुएल ७:१२-१३ 31 ताङलाने राङ धि थोङदे ख्रिष्ट स्यिरे सोम्बो च्युङदे लाँलाबि भारेला नानाइबा नोम कि खो न हअलुला ताङोमका कि, न त ख्युइ स्हु राङ रुलदे।"

32 "हति येशुला राङ कजसुबायि सोम्बो सोइसोङ। धि तामयि ङे पोरो साछि होतो। 33 हतिचाला कजसुबायि लाक्पा याइ यहला खोला तेक्ते पोरसोङ, राङ आकेने पवित्र आत्मायि ना क्येलयाप खुँसोङ, राङ ख्युइ धि च्योच्युवा ना, काङ ख्योए ङ्यान किन राङ थोइकिन। 34 चिचालानाना दाउद ता तेङलाला माझिबा, हिन्नाङ खो खुरि नेन्दु, ‘कजसुबायि ङाहि प्रभुला नाइसोङ, ख्योए ङाहि लाक्पा याइ यहला त्योए 35 जब थु ङा ख्युइ टाला ख्युइ काङबि तिङबा मिसुवा।’"✝2:35 भजनसंग्रह ११०:१

36 "हतिचाला इस्राएलयि प्येरा पोरो धि पक्का क्याइरे हा:कुवा कि येशु सुला ख्युइ क्रुसला तारे, कजसुबायि खोला प्रभु राङ ख्रिष्ट सोइसोङ।"

37 धि ताम थोइरे हतिबे सम अल च्युङसोङ, तेहि पत्रुस राङ स्यान लोब्टुतेबाला हतिबे नाइसोङ, "ए भाइबा, ङे च्हि किच्याइ?" 38 पत्रुसयि हतिबाला नाइसोङ, "घ्योप्पा कि, राङ खि तिक्पा माप कियापयि चाला येशु ख्रिष्यि मिनला के पोरोयि बप्तिस्मा खेर, राङ खेला पवित्र आत्मायि बप्तिस्मा खुङान ना। 39 चिचालानाना ना क्याक्याला खि चाला, खि सन्तनयि चाला, घ्याबो घ्याबोला होएता पोरोयि चाला ना, पोरो सुला प्रभु हुइ कजसुबायि क्ये तोङिन।" 40 स्यान लेइराङ तामतेबे लाम्ला ख्युइ हतिबाला साछि पिन्सोङ, राङ जु नाइरे छोइ पिन्सोङ, "धि अल पालिने खे खिरि खेराङला क्योप।" ✝2:40 व्यवस्था ३२:५; भजनसंग्रह ७८:८ 41 तेहि सुगेसुगे ख्युइ ताम ङ्यान्दे हतिबे बप्तिसमा खेरसोङ, राङ हति ङिन हा:लाम तोङ सुम जोम मितेबा ख्होए टाँगाला थपि च्युङसोङ।