प्रिरेरित 23

1 पावल नेतातेबा झोमसि नाङला लाम्मा झि ताइसोङ, राङ नाइसोङ, "भाइबा, तिरिङयि ङिन थु कजसुबायि मिला चाङमा रिक्पि मिज क्याक्याङा होतो।" 2 हति तामला घोबा पुजारि हननियायि ख्युइ धुनला लाँरे तातातातेबाला खाला थालच्या क्यापयि आदेश पिन्सोङ। 3 तेहि पावलयि हतिला नाइसोङ, "हे सागार कुकुइबि पे! ख्योएला याङ कजसुबे क्याङान ना। ख्योए ठिम च्वरा क्याइरे ङाहि इनसाफ कितु ताते च्हि ठियि विरोध ङाला क्यायापयि आदेश तेरिनाइ?"✝23:3 लेवि १९:१५; यहोशु १३:१०-१५

4 तेहि धुनला लाँरे तातातातेबे नाइसोङ, "च्हि ख्योए कजसुबायि घोबा पुजारि ना च्योकिनाइ?" 5 तेहि पावलयि नाइसोङ, "भाइबा, खो घोबा पुजारि हिना नाइरे ङाला छ्या मेता। चिचालानाना टिटिबा धु, ‘ख्युइ रेँ जनतायि शासकला अल माना।’" ✝23:5 प्रस्थान २२:२८ 6 हिन्नाङ हति नेता झोझोमि सायि तुमझि सदुकि राङ स्यान तुमते फरिसितेबा हिना नाइरे हा:कोरे पावलयि क्ये छेया क्याइरे नाइसोङ, "भाइबा, ङा ता फरिसियि पिजा फरिसि राङ ना। स्यिस्यियातेबे आशा राङ स्यिरे सोम्बो च्युङदे लाँङानतेबे चाला ङाहि मुद्दा चलिहुन राङ होतो।" ✝23:6 प्रेरित २६:५; फिलिप्पि ३:५

7 ख्युइ जु नाइ छारते च्येला फरिसितेबा राङ सदुकिला भेदभाब च्युङसोङ, राङ तुमते खा पियाला छेलसोङ। 8 चिचालानाना सदुकि नेन्दु कि स्यिरे सोम्बो च्युङदे लाँयाप, तेङलायि लोन खेरङान, आत्मा नाङान च्याङ मिहा। हिन्नाङ फरिसिबा हतिबा पोरो मानि किन।✝23:8 मत्ति २२:२३; मर्कुस १२:१८; लुका २०:२७ 9 हतिया हल्ला छेया च्युङसोङ, राङ फरिसि तुमयि रेन शास्त्रि लाँरे जु नेन राङ आन्दोलोन क्याइसोङ, "धि मिला ङि च्याङ अल मिथोङा। तेम्बारे आत्मा वा तेङलायि लोन खेरङान यि खोला जु नानाइबा हिन ना ता च्हि?"

10 हतियि भेदभाब छेया च्युङ छारते हतिबे लाने पावल च्योमतु लाङोङ नाइबि झिटाति सेनापतियि सिपाहितेबाला हअला पुते खोला हतिबे उइने स्यु किङगा ख्योरे अड्डायि नाङला खेरयापयि आदेश पिन्सोङ।

11 ङाइटोतेला प्रभुयि ख्युइ धुनला लाँरे नाइसोङ, "हिम्मत कि, पावल, चिचालानाना च्हिरु क्याइरे ख्युइ यरुश्लेमला ङाहि भारेला साछि पिन्दे, हति च्वरा क्याइरे ख्युइ रोमला याङ साछि तेरकोइ हुन।"

पावल स्योएयापयि छल क्याक्याइबा

12 नामे साल्बो च्युङ छारते च्येला यहुदिबे रेँ नाङला तुम च्योइरे पावल ला मासे थु च्याङ मिसायाप राङ च्याङ मिथुङयापयि ना क्यालसोङ। 13 हति छल किङान मितेबा मिरको खलङिले याङ मा धु। 14 हतिबे घोबा पुजारि राङ धर्म गुरुतेबे तेहा च्याङ मिसा नाइरे ङि क्योङबो ना क्याक्याला होतो। पावल मास्ये थुङे च्याङ मिसा नाइरे ङि क्योङबो ना क्याक्याला होतो। 15 हतिचाला खे राङ नेतातेबा ढिक्ते सेना पतिला अपिल कि, राङ हति मुद्दायि थाकच्योए तरह ल क्याइरे किकोइ हुन नाइरे बाहाना सोइरे हतिला थोन। तेहि हति लेबि पाल्ला हतिला स्योएयापयि चाला तयार तोकिन होए।

16 ता तेहि पावलयि भैनि धि छल हा:कोरे अड्डायि नाङला पुते पावलला स्येसोङ। 17 तेहि पावल घोबातेबे नाङने चिला क्ये ताङदे नाइसोङ, "धि स्याराला सेनापति तेहा खेर, चिचालानाना ख्युइ खोला चिगा नायापयि ताम होतोलो।" 18 "हतिचाला ख्युइ हतिला खेरते सेनापति तेहा खेरते नाइसोङ, बन्दि पावलयि ङालाक्ये ताङदे धि स्योर च्युङला ख्युइ तेहा खेर नानाइबा धु, ख्योएला नायापयि ताम रेन होतो, अरे।"

19 सेनापतियि हति लाक्पा सुङदे यह चिला खेरते सुहुङ मेते साला खेरते टिसोङ, "ख्युइ ङाला नायापयि ताम चिना?"

20 हति नाइसोङ, "यहुदिबे पावलयि भारेला तरह ल क्याइरे ढियापयि निहुँ क्याइरे ङाइटो खोला यहुदि नेताबा झोम्सि खिमला ख्याला नाइरे स्युवा क्यायापयि टोइ क्याइसोङ। 21 हिन्नाङ हतिबे ताम माङ्यान, चिचालानाना हतिबे नाङने मिरको खलङिले मा मितेबे हतिला मासे थु च्याङ मिसायापयि ना क्यालदे सोएयापयि चाला कुँरे त्येतु, राङ ता हतिबा ख्युइ वचनयि आशा क्याइरे छेलदे ताताता धु।"

22 हतिचाला सेनापतियि हति स्योरच्युङला जु नाइरे आदेश पिन्दे चाँसोङ, "ख्युइ ङाला धि लोन पिपिनि ताम सुलाङ माना।"

पावलला कैसरियाला चाँचाँबा

23 हति च्येला ख्युइ घोबातेबे नाङने मिरको ङेला क्ये ताङदे नाइसोङ, "तिरिङ छाम्मु नौ बजे झोमला सिपाहि ङि क्यातेबा, खलसुम राङ च्युझोम ताला स्योन्दे राङ ङिक्या च्यायि पेरका ङ्युङङ्युङ खुरते कैसरिया थु ढोयापला तयार सोइरे पोर। 24 तेहि पावलयि चाला याङ तायि व्यवस्था कि, राङ खोला स्युङिन राङ हाकिम फेलिक्सयि तेहा क्योल।" 25 ख्युइ धि च्वरा पत्र याङ टिसोङ: 26 "मान्निय हाकिम फेलिक्सला, क्‍लौडियस लुसियसयि खामसाँ! 27 धि मिला यहुदियि सुङदे स्योएच्युइ क्याइसोङ, हिन्नाङ धि रोमियि मि हिना नाइरे ङाहि हा:कोरे सिपाहितेबा ङ्याबो हतिया क्योपते खोला छुटाइ क्याइरे। 28 काङ दोष ला हतिबे खोला दोष लाइ क्याक्याइबा हिना नाइरे हा:कोयापयि सम क्याइरे ङाहि धिला हतिबे नेतातेबा झोम्सि खिमला ख्योरे। 29 हतिबे ठिमयि टिवायि भारेला धिला दोष लाइ क्याक्याइबा हिना। हिन्नाङ स्योएयापयि ङेबा अथावा कैद कियाप माफिकयि च्याङ दोष ङाला माठेसोङ। 30 धि मियि विरोधला छल हुन्दु नाङानयि तामयि लोन ङाला पिन्सोङ, राङ खोला हतितुइना राङ ख्युइ धुनला चाँचाँबा होए, राङ ख्युइ विरोधला दोष लाइ किङानतेबा याङ ख्युइ धुनला मनङि क्योप नाइरे आदेश क्याक्याइबा होए।"

31 हति चाला आदेश खुँखुँबा च्वरा सिपाहितेबे पावलला छाम्मु राङ एन्‍टिपाट्रिसला क्यालदे लसोङ। 32 ताला स्योनङानतेबाला खो ङ्याबो ढोरु हतिया राङ ताङदे ङिमा च्येमातेला हतिबा अड्डाला लसोङ। 33 कैसरियाला क्योप छारते हतिबे हाकिमला पत्र टोते पावलला याङ ख्युइ धुनला स्येसोङ। 34 ख्युइ पत्र ट छारते च्येला खो काङ जिल्लायि हिना नाइरे टिसोङ। खो किलिकियायि हिना नाइरे हा:को छारते च्येला ख्युइ नाइसोङ, 35 "खेला दोष लाइ किङानतेबा लेप्छारते च्येला खि मुद्दा ङ्यानज्याइ।" तेहि ख्युइ हतिला हेरोदयि सोसोइबि क्यालखाङला पोर नाइरे आदेश पिन्सोङ।