1 ख्रिष्ट येशुयि कैदि पावल राङ हुइ भाइ तिमोथिने, हुला करि रुवा किङान फिलिमोन, 2 हुइ भैनि अप्फिया राङ हु ङ्याबो होएता सिपाहि अर्खिप्‍पस, राङ खि खिमयि चर्चला:✝ 3 खे ङिङच्ये राङ हुइ आके कजसुबा राङ प्रभु येशु ख्रिष्टने शान्ति!

4 ङाहि मोनलामला जब ङा खेला टानकिनहोए हतितुइना ङाहि कजसुबाला बारतै कटिनक्याँ नेन, 5 चिचालानाना प्रभु येशु ख्रिष्टयि थोला खि हिछेयि भारेला राङ कजसुबायि मियि थोला करि भरेला थोयिन्दु। 6 ङा मोनलाम क्याकच्याइ कि खि हिछेयि सभागितायि ख्रिष्टला होएता हुइ ताम ल पोरोयि छोइयि रिक्पा कि ङ्युइयोङ। 7 ङाहि भाइबा, ख्युइ करिने ङाला लेइराङ आन्नद राङ छिमा फिङान खुँखुँबा होए, चिचालानाना ख्युइ लाम्ला कजसुबायि मितेबे सम याङ सोमा च्युच्युङा धु।

8 ख्युइ च्हि कियाप ना, सो कियापला आदेश तेरयापला ख्रिष्टला ङाला हा:म होए नाङ, 9 करियि चाला ङा खेला बरु स्युवा क्यासोम किन होए, ङा कमजोर पावल, तेहि थाल्ला येशु ख्रिष्टयि कैदि 10 ङाहि पिजा ओनेसिमसयि चाला ङाह निवेदन किच्याइ, सुइ चाला ङाहि कैदि अवस्थाला ङा आके च्युच्युङा होतो।✝ 11 ख्होए धुनला ख्युइ चाला फान मेता च्युङसोङ, हिन्नाङ थाल्ला ख्युइ चाला राङ ङाहि चाला फान थोङान च्युच्युङा धु। 12 ङा ख्योएला, सुते ङारि समयि तुबु ना, ख्युइ तेहा लक्ते चोँज्याइ। 13 खोला ङा ङ्याबो भोरयाप ङा काका होतो ना, चिचालानाना लोन लयि चाला ङाहि बन्दि अवस्थाला ख्युइ छापला ख्युइ ङाला स्यापच्यि स्युङ्युइकिन, 14 हिन्नाङ ख्युइ आङयि विना ङा च्याङ किसोम मे, तेहि हचु क्याइरे ख्योएला ल करकापयि क्याक्याइबा मायोङ, हिन्नाङ ख्योए ख्युरि धोप्पि क्याक्याइबा सअ। 15 हा:लाम ख्योएने आरोङ भेलायि चाला खो कुरु च्युच्युङा होतो, तेहि हचु क्याइरे खो बारतैयि चाला ख्योए ङ्याबो त्योए ङ्युयोङ 16 ता हति यक्पुवा च्वरा माना, हिन्नाङ यक्पुवाले मा, करि भाइ च्वरा, खास क्याइरे ङाहि चाला, हिन्नाङ तरह लेइराङ स्हु राङ प्रभुला समेत, ख्युइ चाला।

17 हतिचाला तेम्बारे ख्युइ ङाला रेँ पिमा हिना नाइबा क्याइना ङाला च्वरा हतिला ग्रहण कि। 18 तेम्बारे ख्युइ ख्योएला चिगा अल क्याक्याइबा होए नामयाङ, अथवा चगे खोला रिन होएना याङ, हति ङाहि हिसाबला पोर। 19 ङा पावल, ङारि लाक्पि धि ढिज्याइ। हति ऋण ङा ङाराङ च्योङज्याइ। खेला नाकोइराङ मिहा, कि रेँ चाला याङ खे ङाहि ऋणी होतो। 20 करि भाइबा, ख्युइ चाने प्रभुला चिगा ल होङ नाङान ङा सम किन होए। ख्रिष्टला ङाहि समला याङ सोमा सोइ। 21 ख्युइ आदेश पालाना क्याक्याइबाला हिछे पोरते ङाहि लाँलाँबाले झन मा किच्याइ नाइबा क्याइरे ङा ख्योएला ढिन होए। 22 ङ्याबो ङाहि चाला ढोम्बो त्योएसा कोटा ल क्याइरे सोइरे पोर, चिचालानाना ख्युइ मोनलामयि लाम्ला ङा याङ ख्युइ तेहा होङ ङ्युइयोङ कि नाङान आशा किन होए।

23 येशु ख्रिष्टला ङ्याबोयि कैदि इपाफ्रासयि ख्योएला खाँमसाँ कुकुरा धु।✝ 24 हति च्वरा क्याइरे रुवा किङान मर्कुस, अरिस्‍तार्खस, डेमास राङ लुकायि याङ।✝ 25 प्रभु येशु ख्रिष्टयि ङिङच्ये खि आत्मा ङ्याबो त्येयोङ।