1 यरुश्लेमने लेलेबि फरिसिबा राङ शास्त्रिबा येशुयि फाला छुलो पोरोला झोमदे त्येसोङ। 2 येशुयि चोम राङ लोब्टुयि लाक्पा भाभा, अर्थात लाक्पा माटुइबा सासाइबा हतिबे थोङसोङ। 3 फरिसिबा राङ यहुदिबा पोरो हतिबे ताङबुइ मितेबे पिपिनि लुलाम च्वरा लाक्पा माटुइबा ङ्योपा मिसा। 4 भजारने लेप्ते स्नान क्याइरे चाङमा माच्युवा हतिबा मिसा। झोम मात्रा माना, हतिबे धि च्वरा स्यान लेइराङ लुलाम मानि किन, अर्थात भोटोतेबा, खाटा, सुनातेबा राङ काँसि सुनातेबा ठुइयापयि लुलाम। 5 तेहि फरिसि राङ शास्त्रिबे खोला टिसोङ, "ख्युइ लोब्टुबा ताङबुइ का:नाबे पोपोरि लुलामला चिला मिढुवा, हिन्नाङ लाक्पा भाबि सेन्दु?"

6 तेहि ख्युइ हतिबाला नाइसोङ, "यशैयायि खे समनाँयि भारेला थारका क्याइरे ङोन्सेखिलदु, धि च्वरा टिदु, ‘धि मितेबायि ङाला खायि मात्रा सम्मान किन्दु, हिन्नाङ हतिबे सम ङाने लेइराङ घ्याबोला धु।✝ 7 हतिबाला हतिबा फान मेताला ङाहि उपासना किन्दु, हिन्नाङ हतिबे छोइ मितेबे लालाबि ठिम मात्रा ना।’ 8 खे कजसुबायि आदेशला ताङदे मितेबे लुलाम मानि किन्दु।" 9 ख्युइ हतिबाला नाइसोङ, "खे रेँ लुलाम मानि कियापला चोम अल क्याइरे कजसुबे आदेशला खाला मिङ्याना। 10 चिचालानाना मोशायि नानाइबा होतो, ‘रेँ आके आमाला सम्मान कि, राङ सुइ आके आमायि विरोधला ताम अल नेन हति स्यिकोइराङ हुन।’✝ 11 तेम्बारे मि रेनयि रेँ आके या आमा ‘ङाने चोम रुवा खेला खुयापना हति ते ताताङाना,’ अर्थात कजसुबाला पुपुला नाना, 12 खे हतिला रेँ आके आमायि चाला याङ च्याङ कितु मिझ्युका। 13 हति च्वरा क्याइरे रेँ मानि क्याइरे लेलेबि लुलाम कायम पोरते कजसुबायि वचनलाते मेता सुन्दु।"

14 ख्युइ याङ मितेबाला याङ रेँ तेहा क्ये ताङदे हतिबाला नाइसोङ, "के पोरोयि ङाहि ताम ङ्योन राङ हा:कुवा कि। 15 हति च्वरा च्याङ ताम मेता काङते फिने मियि नाङला स्युरे हतिला भाभा सो ङ्युइकिन, हिन्नाङ मिने फिला थोनयापयि तामने राङ मिला भाभा सुन। 16 सुला ङ्यानयापयि नामज्यो होए हति ङ्योन।"

17 मितेबाला ताङदे खिमयि नाङला स्यु छारते ख्युइ लोब्टुतेबे खोला धि प्येयि भारेला टिसोङ। 18 ख्युइ हतिबाला नाइसोङ, "च्हि खे तरह याङ हा:मिकोङान होतोइ? च्हि मि फिने नाङला स्युकिनाइ हति खोला भाभा सो मिङ्युइबा नाइरे खेला छ्यामेताइ?"

19 चिचालानाना हति ख्युइ समला माना, हिन्नाङ टोपि नाङला स्युकिन, राङ स्हुने फिला थोन छारिन। हति च्वरा क्याइरे ख्युइ ङ्योपा पोरो चाङमा ना नाइरे स्येसोङ।

20 ख्युइ नाइसोङ, "मिने काङते फिला थोन हति राङ मिला भाभा सुन। 21 चिचालानाना नाङने अर्थात मि समने विचार अल, ताचाल पतार, कुम्मा, मिपसोए, पातार, 22 समना, सम अल, छल, च्युच्युङ कुच्युङ नायाप, ठाधो, फा:ला ताम नायाप, यिनधो, मुर्खाता थोनिन। 23 धिबा पोरो अल ताम नाङने थोन्दे हुन, राङ मिला भाभा सुन।"

24 हतिने लाँरे खो टुरोस राङ सिदोनयि साझाम यहला पुते खिम झिकि नाङला स्युसोङ। धि ताम सुइ याङ मा चोर नाङानयि सम खो किन्दु, हिन्नाङ खो फाला त्योए माङ्युइसोङ। 25 हति भेलाला राङ पुमो झिकि ख्युइ भारेला थोइसोङ राङ लेप्ते ख्युइ काङबाला छ्या चालसोङ हति पुमोयि पोमुला भाभा ढे काकाला धु। 26 हति सिरियायि फोनिकेला क्येक्येबा ग्रिकयि पुमो झि हिना। हति पोमोयि रेँ पोमुने ढे थोन नाइरे खोला स्युवा क्यापसोङ। 27 येशुयि हतिला नाइसोङ, "ताङला पिजा पोमुला ङ्योपा पिन, चिचालानाना पिजा पोमुइ लोटा खेरते किबोला तेरयाप ल माना।"

28 तेहि हति खोला नाइसोङ, "हिना प्रभु, हिन्नाङ किबोतेबे याङ-याङ च्यिटाके च्योकचेयि हअला छाछारि तुबुतेबा सेन।"

29 ख्युइ हतिला नाइसोङ, "ख्युइ धि च्वरा नानाइबा ति चाला राङ ख्योए खिमला क्यु। ख्युइ पोमुने ढे थोन्दे पुपुता धु।" 30 हति खिमला पुइसोङ राङ पोमुला खाटाला ङ्याङ्याला ठेसोङ राङ हतिने ढेते थोन छारतु।

31 टुरोसयि साने थोन्दे खो सिदोनयि लाम्ला डेकापोलिसयि सा जामयि उइने लाम्ला गालिलयि छो छोम्मुवाला पुइसोङ। 32 हतिया मितेबे नामज्यो मिथोङान झि राङ ताम न मिङ्युइङान मिला ख्युइ तेहा ख्योसोङ, राङ हति थोला लाक्पा पोर नाइरे खोला स्युवा क्यापसोङ। 33 हतिला मियि तुमने कुरु च्याङ मेते साला खेरते येशुयि रेँ झु हति नामज्योला च्युसोङ। हति च्येला छिमा ताप्ते हति च्येला चुइ क्याइसोङ। 34 तेहि तेङला यहला ताइरे उ तिङरिङमुवा झि खेरते हतिला नाइसोङ, "इफ्फाता," अर्थात "प्येरे क्यु।" 35 तेहि हति भेलाला राङ हति नामज्यो पेसोङ, राङ हति च्येयि घाघाबा प्येसोङ, राङ हति ल क्याइरे ताम ना ङ्युसोङ। 36 "धि सुलाङ माना," नाइरे ख्युइ हतिबाला आदेश पिन्सोङ। हिन्नाङ चोम-चोम ख्युइ मितेबाला आदेश पिन्दे, झन माहा केन राङ हतिबे हति घोषना क्याइसोङ। 37 मितेबा हा:लाइरे लेइराङ छक्का च्युङदु, राङ नाला छेलसोङ, "ख्युइ ताम पोरो ल क्याक्याइबा धु ख्युइ नामज्यो मिथोइङानला थोइङान राङ ताम ना मिङ्युइङानला ताम नाङ्युङान सोइसोङ।"