1 हति ङिनला याङ तुम छोम्मुवा झि झोमसोङ, हिन्नाङ हतिबाला सायापला च्याङ मेतालो। तेहि येशुयि लोब्टुतेबाला रेँ तेहा क्ये ताङदे नाइसोङ। 2 "थि मियि तुमबाला ङिङच्यिन्दु, चिचालानाना धिबा ङा ङ्याबो ताताता तिरिङयि ङिन सुम ना, राङ धिबाला सायापयि चाला च्याङ मेता। 3 तेहि तेम्बारे ख्योएला टोपा तोङबा खिमला चाँना हतिबाला लामला राङ घो खोरङान ना। धिबे नाङने रेन-रेन घ्याबोने लेलेबा होतो।"

4 हति लोब्टुबे येशुला नाइसोङ "धिरिया सुहुङ मेता साला धिबाला च्हिरु क्याइरे लोटा स्योम ज्याइ?"

5 हति लोब्टुबाला टिसोङ, "खो ङ्याबो चोम लोटा होतो?" हतिबे नाइसोङ "लोटा तुन" 6 ख्युइ मियि तुमला साला त्योएयापयि आदेश पिन्दे, लोटा तुन लाक्पाला खेरते कटिनक्याँ नाइ छारते लोटा च्यासोङ, राङ मितेबे ताङला पोर नाइरे लोब्टुबाला पिन्सोङ, राङ हतिबे मितेबे धुनला पोरसोङ। 7 हतिबाला ङ्या टिमा रेन याङ धु, राङ ख्युइ च्यिनलाब पिन छारते हतिबे धुनला भोरतु च्युक्तेलो। 8 तेहि मितेबे साइरेलो, राङ टोपा ढारेलो। तेहि लाँमा तुबुतेबा हतिबे फुगो तुन तुइरेलो। 9 हतिया हा:लाम तोङ सि च्हि धूलो। 10 ख्युइ हतिबाला बिदा पिन्दे चाँरेलो, तेहि खो रेँ लोब्टुबा ङ्याबो हतितुइना राङ डुङगाला स्योनदे दलमनुथायि साला पुतेलो।

11 फरिसितेबे ख्युइ तेहा लेप्ते खो ङ्याबो नाइरे किताला छेलदु, राङ खोला छोए तायापला तेङलाने हा:लाइयापयि लाइ झि लाँसोङ। 12 रेँ समला उ रिङमुवा ताङदे ख्युइ नाइसोङ, "धि पालि मियि चिला हा:लाइयापयि लाइ फाकिन? तेम्बारे, ङा खेला नाज्याइ, धि पालि मिला च्याङ हा:लाइयापयि लाइ मितोना।" 13 तेहि ख्योएला ताङदे खो याङ डुङगाला स्योनदे फारकानला पुइसोङ।

14 लोब्टुबे लोटा खेरयाप टाम्बा च्येतु, राङ डुङगाला हतिबाला लोटा झि मात्रा धु। 15 येशुयि लोब्टुबाला जु नाइरे चेतावानि पिन्सोङ, "हतिबा फरिसिबे सोढा राङ हेरोदयि सोढाने घ्याबोला त्योए।"✝

16 हिन्नाङ हतिबा ङ्याबो लोटा मेताति येशुयि जु नानाइबा ना नाइरे हतिबा रेँ नाङला नारे क्याइसोङ।

17 येशुयि धि हा:कोरे हतिबाला नाइसोङ, "खेला लोटा मेता नाइरे चिला खे नाइरे किन? च्हि खे तरह मिथोङा धुये राङ हा:मिको धुये? च्हि खि सम क्योङबो च्युच्युङा होतोइ? 18 मि होएना याङ च्हि खि मिथो धुये? नामज्यो होए नाङ च्हि खि मि थोइबा धोए? च्हि खेला टाम्बा मेताइ, ✝ 19 जब लोटा ङा हति तोङ ङाहि उइला च्याक्ते, हतितुइना चोम फुगो काङ तुबुतेबा खे काकाङा होतो?" हतिबे जवाक पिन्सोङ, "च्युनङि।"

20 "तेहि हति लोटा तुन तोङ स्यियि धुनला च्याक्तेलो, फुगो चोम लोटायि तुबु खि तुतुइबा होतो?"

21 येशुयी लोब्टुबे नाइसोङ, "ता याङ खि तरह हा:मिको धुये?"

22 हति च्येला खो बेथसेदा लेप्तु, राङ मितेबे मि काना झिला ख्युइ तेहा ख्योसोङ, राङ हुला घुल नाइरे खोला स्युवा क्यापसोङ। 23 ख्युइ हति मि काने लाक्पा सुङदे हतिला युलने फिला ख्योसोङ, राङ हति मिला छिमा ताप्ते हति थोला रेँ लाक्पा पोरते टिसोङ, "च्हि ख्युइ चिगा थुइ धुये?"

24 तेहि क्येल्ला ताइरे ख्युइ नाइसोङ, "मितेबाला तोङबोङ च्वरा क्याइरे ढुन ताताता थोङसोङ।" 25 तेहि याङ ख्युइ मिला लाक्पा पोरसोङ, राङ हतिला लाम्मा झि ताइसोङ। हतिला रेँ मि थोङयाप खुँसोङ राङ पोरो राङ ल क्याइरे थोङ ङ्युइसोङ। 26 तेहि ख्युइ हतिला युलला मास्यु नाइरे हति खिमला चाँसोङ।

27 येशु राङ ख्युइ लोब्टुतेबा कैसरिया फिलिप्पियि युलतेबाला लेप्सोङ। लामला ढुइतुइना रेँ लोब्टुतेबाला जु नाइरे टिसोङ, "मितेबे च्हि नेन्दुइ, ङ सु ना?"

28 हतिबे खोला टिसोङ, "रेनयि नेन्दु, ‘बप्तिस्मा तेरङान युहान्ना।’ स्यानतेबे ‘एलिया,’ स्यान चोमयि नेन्दु, ‘ङोन्सेखिलङानयि नाङने च्हि।’"✝ 29 तेहि ख्युइ हतिबाला टिसोङ, "हिन्नाङ खे च्हि नाज्याइ, ङा सुना?" पत्रुसयि जवाक पिन्दे खोला नाइसोङ, "ख्योए ख्रिष्ट ना।"✝

30 ख्युइ हतिबाला ख्युइ भारेला सुलाङ माना नाइरे आदेश पिन्सोङ

31 "मियि पिजायि लेइराङ तुका ङ्योङयाप, राङ केवाकिङान गुरु, घोबा पुजारिबा राङ शास्त्रितेबाने खाला इनकार कि राङ तेहि स्यियाप ङिन सुमयि च्येला सोम्बो च्युङदे लाँ कोइ हुन" नाइरे ख्युइ हतिबाला लोबाला छेलसोङ। 32 धि च्वरा क्याइरे ख्युइ ताम चाङमा क्याइरे नाइसोङ। हिन्नाङ धि थोइरे ख्युइ पत्रुसला खोला कुरु झिला खेरते ङाराला छेलसोङ। 33 हिन्नाङ लक्ते रेँ लोब्टुबाला ताइरे, पत्रुसला ख्युइ जु नाइरे ङारसोङ, "ए तुइ, ङाने क्यु, चिचालानाना ख्युइ सम कजसुबा यहला मिधु, हिन्नाङ मि यहला धु।"

34 तेहि क्युइ रेँ लोब्टुबा ङ्याबो मियि तुमला रेँ तेहा क्ये ताङदे हतिबाला नाइसोङ, "मि रेन ङाहि च्येला होङसोम किन्दु हति राङला माना नोइ, राङ रेँ क्रुस तेक्ते ङाहि च्येला सअ।✝ 35 चिचालानाना सुइ रेँ उ क्योप सोम क्याइ, हति-हति मासि लुइ, हिन्नाङ ङा राङ लोन लयि चाला रेँ उ मासि लोङान ति हति क्योबिन।✝ 36 चिचालानाना मितेबे संसार पोरो लाक्पाला ख्योरे रेँ उ मासि लाङना हतिला फाइदा च्हि होतो? 37 आथावा मितेबे रेँ उयि तोप्पोला च्हि तेर ङ्युइकिन? 38 तेहि धि पातार राङ तिक्पायि पालिला सु ङाने राङ ङाहि वचनने ङो छेन, मियि पिजा याङ रेँ आकि छे धेयापला पवित्र लोन खेरङानबा ङ्याबो हुइतुइना हतिने ङो छाङान ना।"