1 हतिबाने थोन्दे खो रेँ भजारला लक्ते पुतेलो। ख्युइ लोब्टुबा ख्युइ च्येला पुतेलो। 2 ङालसुइ ङिनला खो यहुदि झोमसि खिमला छोइ लोबाला छेलसोङ। ङ्यानङान लेइराङयि हा:लाइरे खोला नाइसोङ, "धि मिला धिबा पोरो काने खुँरे? धिला पिपिनि धि छोइ च्हिरु ना? धि लाने च्युच्युकि लाइतेबा चोम शक्तिशालि? 3 च्हि धि हति पाबुइ लाइ किङान मानाइ च्हि? च्हि धि ता मरियमयि पिजा तथा याकुब, योसेफ यहुदा राङ सिमोनयि आज्यो भाइ मानाइ च्हि? च्हि धि भैनिबा हाङ हु ङ्याबो मेता च्हि?" तेहि हतिबा खो ङ्याबो स्येताङ क्याइसोङ। 4 तेहि येशुयि हतिबाला नाइसोङ, "ङोन्सेखिलङानला रेँ देश राङ रेँ मितेबे उइला राङ रेँ खिमला अर्थात स्यान काँयाङ सम्मान मिहा।"✝ 5 राङ ख्युइ हतिया नाझा होएता रेन रेनयि थोला रेँ लाक्पा पोरते हतिला टाक्तु झ्युयापयि लाइ अर्थात स्यान च्याङ शक्तिशालि लाइ कि माङ्युइसोङ। 6 हतिबे हिमिछे थोङदे खो हा:लाइसोङ। तेहि खो युल युलला छोइ लोबिन राङ पुइसोङ।

7 ख्युइ च्युनङि गारला ख्युइ तेहा क्ये ताङसोङ, राङ हतिबाला ङि-ङि क्याइरे चाँसोङ। हतिबाला भाभा ढेयि थोला आङ याङ पिन्सोङ। 8 हतिबाला ख्युइ धि च्वरा आदेश पिन्सोङ "ढुलयि चाला ङ्याबो च्याङ माखेर, न त लोटा, न झोला, न खल्टिला न कारा, आलाइ, हिन्नाङ पेरका झि मात्रा खुर। 9 पोउला कोन, हिन्नाङ स्यान लेइ कोहिला माखेर।" 10 ख्युइ हतिबाला नाइसोङ, "जब खिम झिकि नाङला स्युयिन, नाम थु हति युलने मिथोना हति थु हतिया राङ त्योए। 11 तेम्बारे कहेँ सलाङ खि स्वागत मा च्युङना, राङ मितेबे खि वचन ङ्यानयाप खाला माङ्यान ना, हति साने खे थोन्दे हुइतुइना हतिबे विरोधला साछियि चाला रेँ काङबि साबे स्यु।"

12 तेहि हतिबा थोन्दे पुइसोङ मितेबे घ्योप्पा क्यायोङ नाइरे टाइक्ये क्याइसोङ। 13 हतिबे ढे लेइराङला तोन्सोङ, राङ नाझा होएता लेइराङला मोरकुयि अभिशेक क्याइरे टाक्तु च्युसोङ।✝

14 हेरोद क्यालबुइ येशुयि क्याक्याइबि लाइ थोइरेलो, चिचालानाना ख्युइ मिन काङ च्याला टाइक्ये च्युच्युङा धु। रेनयि नेन्दु, "बप्तिस्मा तेरङान युहान्ना स्यिस्यियाने सोम्बो च्युङदु, हतिचाला ता हतिबे लाम्ला धि च्वरा शक्तियि लाइ हुनले।"✝ 15 तेहि हिन्नाङ स्यानतेबे नाइसोङ, "धि ता एलिया ना।" राङ तरह स्यानतेबे नाइसोङ, "धि ता ताङबुइ ङोन्सेखिलङान च्वरा ङोन्सेखिलङान झि च्वरा ना।"* 16 हिन्नाङ जब हेरोदयि धि थोइरे तेहि ख्युइ नाइसोङ, "युहान्ना, सुइ घोबो ङाहि तुप्तु च्युक्ते, हति राङ स्यिरे लाँदुये।" 17 चिचालानाना हेरोदयि रेँ भाइ फिलिपयि केरमान हेरोदियासयि चाला युहान्नाला सुङदु च्युक्ते हतिला ताम्दे झ्याल्ला च्युच्युका होता, चिचालानाना ख्युइ हेरोदियासला मिजे क्याक्याइबा होतोलो।✝ 18 चिचालानाना युहान्नायि हेरोदला जु नानाइबा होतो, "रेँ भाइयि केरमान भोरयापला ख्योएला आङ मेता।"✝

19 हतिचाला हेरोदियासयि ख्युइ थोला ठाधो पोपोरा होतो, राङ खोला सोए सोम होतोलो, हिन्नाङ माङ्युइबा। 20 चिचालानाना युहान्नाला केवाकिङान राङ पवित्र मि हिना नाइरे हेरोद झिकिनलो, राङ खोला च्याङ माक्याइबा पोरते। युहान्नायि छोइ ङ्यानि तुइना खो लेइराङ समतु किनलो, हचु हिन्नाङ केनराङ ङ्यानिनलो।

21 हिन्नाङ थारका मौका हति भेलाला लेप्सोङ, जब हेरोदयि ङा क्येक्येबि ङिनला छेया आङकिङानतेबे, अधिकृततेबा राङ गालिलयि घोबा मितेबाला भत्यार छेया झि पिन्देलो। 22 चिचालानाना जब हेरोदियासयि रेँ पोमु ङ्याबो नाङला लेप्ते छ्यामसोङ राङ ख्युइ ढोम्बोतेबाला सम कारु च्युसोङ। तेहि क्यालबोयि हति पोमुला नाइसोङ, "ख्युइ च्हि धोप्पा हति कि, राङ ङा ख्योएला पिनतोङ।" 23 ख्युइ ना क्यालदे हतिला नाइसोङ, "ख्युइ ङाल च्हि लाँ ङा फे राज्य थु याङ ख्योएला तेर च्याइ।"

24 तेहि हति फिला थोन्दे रेँ आमाला टिसोङ, "ङा काँहा लोङज्याइ?" हति नाइसोङ, "बप्तिस्मा तेरङान युहान्नि घोबो।" 25 हति आत्ति किङगा नाङला क्यालबुइ तेहा पुइसोङ, राङ जु नाइरे लाँसोङ, "ख्युइ थाल्ला ङाला बप्तिस्मा तेरङान युहान्ना यि घोबो तेरमाला नाङान ङा धोप्पा कि च्याइ।" 26 क्यालबो लेइराङ दुखि च्युङदेलो, हिन्नाङ ख्युइ रेँ ना क्याक्याला राङ भत्यारला ताताति ढोम्बोतेबे चाला हति पुमोला पिपिनि वचन तोरि किसोम माक्याइबालो। 27 क्यालबुइ हतितुइनाराङ गारदययि सिपाहि झिला चाँरे युहान्नायि घोबो ख्योङयापयि आदेश पिन्सोङ। तेहि हति झ्याल्ला पुते युहान्नायि घोबो तुपसोङ। 28 राङ ख्युइ घोबो तेरमाला ख्योरे पोमुवातेला पिन्सोङ, राङ पोमुवायि धि मुइ आमाला पिन्सोङ। 29 युहान्नायि लोब्टुतेबे जब धि ताम थोइरे हतितुइना हतिबा लेप्ते ख्युइ रो तेक्ते तुरसाला खेरते पोरसोङ।

30 तेहि लोब्टुतेबा येशुयि तेहा झोमसोङ, राङ हतिबे च्हि क्याइ राङ लालाबा होए, हतिबा पोरो खोला मनङि क्यापसोङ। 31 ख्युइ हतिबाला नाइसोङ, "खे राङ याङ ङा ङ्याबो च्याङ मेते साला सअ, राङ हतिया ङाल सोइ।" चिचालानाना ङिहा होङान ढोङान लेइराङ धु, राङ हतिबाला सायापयि फुरसद याङ मि धु।

32 तेहि हतिबा डुङगाला च्यामाना सुहुङ मिते साला पुइसोङ। 33 मि लेइराङयि खो ढुन ताताता थोङसोङ, राङ लेइराङयि खोला ङोस्येसोङ, तेहि पोरो भजारने काङबि राङ स्युरते जुला लेप्सोङ, राङ हतिबा पोरते ताङला क्योपसोङ। 34 जब खो नेमुला क्योपते हतितुइना ख्युइ हतिया तुम छोम्मुवा झि थोङसोङ, राङ ख्युइ हतिबाला ङिङच्येसोङ। चिचालानाना हतिबा रच्चिया मेते लुतेबा च्वरा धु। राङ ख्युइ हतिबाला लेइराङ ताम लोबाला छेलसोङ।✝ 35 तेहि न कुमु होङाला छेलाराङ तेहि ख्युइ लोब्टुबा ख्युइ तेहा लेप्ते नाइसोङ, "धि च्याङ मेते सा धु, राङ ता कमु हुवाला छेलदु। 36 मितेबाला बिदा पिन, राङ हतिबे फाला छुलुइ त्योएसातेबा राङ युलतेबाला पुते रेँ चाला सायाप चिगा ङ्योयोङ।"

37 हिन्नाङ ख्युइ हतिबाला नाइसोङ, "खे राङ हतिबाला चिगा सायाप पिन।" हिन्नाङ हतिबे खोला नाइसोङ, "च्हि ङे पुते ङि क्या दिनारयि लोटा ङ्योइरे हतिबाला सायापला तेर च्ये च्हि?" 38 येशुयि हतिबाला नाइसोङ, "खेला लोटा चोम होतो? पुते तोइ।" तेहि हा:को छारते हतिबे नाइसोङ, "लोटा ङा राङ ङ्या ङि।"

39 तेहि ख्युइ मितेबाला टिरे थाङला तुम-तुम सोइरे ङोम्बो चायि त्योएयापयि आदेश पिन्सोङ। 40 हतिबा क्या-क्या राङ ङोपच्यु ङोपच्युयि तुम सोइरे त्येसोङ। 41 ख्युइ हति लोटा ङा राङ ङ्या ङि खेरते तेङला यहला ताइरे च्यिनलाब पिन्सोङ राङ हति लोटाबा च्यासोङ तेहि मितेबे धुनला पोरोङ नाइरे लोब्टुबाला पिन्सोङ, राङ हति ङ्या ङिबो याङ ख्युइ पोरोला कोइसोङ। 42 तेहि पोरोयि साइसोङ, राङ टोपा ढासोङ। 43 तेहि च्येला लोब्टुबे लोटा राङ ङ्या लुलुइबा फुगो च्युनङि तुइसोङ। 44 लोटा साङान पिजातेबा तोङ ङा धु।

45 तेहि ख्युइ हतितुइना राङ रेँ लोब्टुबाला डुङगाला स्योन्दु च्युक्ते फारकानयि बेथसेदाला खोला ताङला क्यु नाइरे लाइ कोइसोङ, राङ हति थु ख्युइ मियि तुमला बिदा पिन्सोङ। 46 हतिबाने बिदा च्युङ छारते खो रिला मोनलाम क्याक्तु पुइसोङ। 47 कमु च्युङदे डुङगा छो छोम्मुवायि उइला धु, राङ खो चिक्पा थाङला धु। 48 लोब्टुबाला डुङगा ख् चलाइ कियापला तुका च्युच्युङा ख्युइ थोङसोङ, चिचालानाना हुरबो छोम्मुवा हतिबे उलटो यहने हुन्दु। तिन बजे नामेना माला खो हतिबे तेहा छो छोम्मुवायि थोला काङबि हुन राङ लेप्तेलो, राङ हतिबाला पोरते ढुवाला छेला राङ। 49 हतिबे खोला छो छोम्मुवायि थोला ढुन ताताता थोङदे तुइ हिना नाइबा क्याइसोङ, राङ हतिबे क्ये तोन्देलो। 50 चिचालानाना खोला थोङदे पोरो झिदु। हिन नाङ हो:प्तामेला ख्युइ हतिबाला नाइसोङ। "हिम्मत कि, ङा ना, माझि।" 51 तेहि को हतिबे तेहा डुङगाला स्योनसोङ, राङ हुरबो छोम्मुवा घासोङ। तेहि हतिबा लेइराङ हा:लाइसोङ, 52 चिचालानाना हतिबे लोटायि भारि ताम हा:कोकुवा राङ मेता, हिन्नाङ हतिबे सम क्योङ च्युच्युङा धु।

53 छो छोम्मुवा काल छारते हतिबा गनेसरेतयि साला क्योप छारसोङ, राङ हतिबे डुङगा नेमुला पोरसोङ।

54 जब हतिबा डुङगाने थोन्दे हतितुइना मितेबे येशुला ङोस्ये छारते, 55 राङ धुनयि युल पोरोयि लाम्ला हतिबा स्युरे पुइसोङ, राङ काँहा येशु होतो नाइरे थोइरे हतिया नाप्पातेबाला मालसाला पोरते ख्युवाला छेलसोङ। 56 तेहि युल राङ भजारतेबाला वा मि त्योएसातेबाला कामाला खो स्युरे, मितेबे नाझा होएतातेबाला भजार भजारला पोरसोङ, राङ ख्युइ कोहिलायि नेमु मात्रा छुइ किच्याइ खुहोङ नाइरे हतिबे खोला स्युवा क्यापसोङ, राङ चोमयि छुइ क्याइ हतिबा पोरो टासोङ।