1 हति ङिन ङि च्येला निस्तार राङ सोढा लोटायि कालापसोलयि ङिन हिना। घोबा पुजारिबा राङ शास्त्रिबा खोला च्हिरु क्याइरे छल क्याइरे सुङ ज्याइ नाङानयि च्युइला धु। ✝ 2 चिचालानाना हतिबे नानाइबा धु, "कालापसोलयि ङिनला माना, स्यान अर्थात मितेबे उइला ठुझि राङ नारे होङान ना।"

3 खो बेथानियाला सिमोन लाक्पा काकामि नाझा होएताते खिमला ङ्योपा स्येतुइना पुमो झि जटामसियि चाङमा घोङछेया अत्तर सिङ्गमरमरयि शिशाला ख्योरे लेप्सोङ, राङ हति शिशा च्याक्ते हति टिमा स्यिबो जटामसियि अत्तर ख्युइ घोबोला च्योसोङ। 4 हिन्नाङ रेन रेनयि स्येताङ क्याइरे रेँ नाङला नारे क्याइसोङ, "धि टिम स्यिबो अत्तर च्हिला मासि लुइ? 5 चिचालानाना धि अत्तर सम क्या दिनारयि सिक्काले माहाला चँहरे टाङनाबाला हति आलाइ तेरङ्युइकिन।" तेहि हतिबे हति पुमोला ङ्योइसोङ।

6 हिन्नाङ येशुयि नाइसोङ, "तोङ, चिला खे धिला ङ्युइन? मुइ ङाला ल क्याइसोङ। 7 चिचालानाना टाङनाबाता खे ङ्याबो बारतैला हुन, राङ जब सम च्युङ हति भेलाला खि हतिबाला ल कि ङ्युइकिन। हिन्नाङ ङा बारतैला खे ङ्याबो मिहा। ✝ 8 धि पोमुयि च्हि कि ङ्युइ हति क्याइसोङ। मुइ ता ङाहि स्हु कुङयापयि चाला ताङलाने राङ टिमा स्यिबो अत्तर कुइरे तयार सोसोइबा होतो। 9 तेम्बारे, ङा खेला नाज्याइ, संसार, मुलुला काँहा-काँहा धि लोन ल टाइक्ये किन, धि पोमुयि च्हि क्याइ हति याकि चाला धि लाइयि चर्च होङान ना।"

10 तेहि लोब्टु च्युनङियि नाङने च्हि यहुदा इस्करियोतते येशुला हतिबे लाला सुङदु झ्युयापयि चाला घोबा पुजारिबे तेहा पुइसोङ। 11 हतिबा धि थोइरे कासोङ, राङ हतिला आलाइ तेरयापला ङ्यानसोङ। तेहि खोला च्हिरु क्याइरे सुङ ज्याइ नाइरे हति लेइराङ मौका फाताला छेलसोङ।

12 सोढा लोटायि कालापसोलयि ङिन ताङस्युवातेला, जब हतिबे निस्तार कालापसोलयि लु भोल क्यापते भुलिन, ख्युइ लोब्टुतेबे खोला टिसोङ, "ख्युइ सम च्हि होतो? ङि तेहा पुते ख्युइ चाला निस्तार कालापसोलयि भत्यार तयार किते?"

13 तेहि ख्युइ रेँ लोब्टुबे नाङने ङेला जु नाइरे चाँसोङ, "भजारला क्यु, राङ घारिला छ्यु खुरते खेरङान मिझिकि ख्योएला ठेङान ना, ख्युइ च्येला क्यु। ✝ 14 हति मि काँहा स्युयिन ते हति-हति खिमयि ताक्पोला नाङान ना, ‘गुरुज्यु नेन्दु, ङाहि लोब्टुबा ङ्याबो निस्तार कालापसोलयि भत्यार साङानयि ङाहि ढोम्बोयि कोटा काँले?’ 15 तेहि ख्युइ हतिबाला सजाइ क्याइरे तयार सोसोइबि थोकि तलायि कोटा छेया झि तोनङान ना, राङ हतिया राङ खे ङि चाला भत्यार तयार कि।"

16 तेहि हति लोब्टुबा पुइसोङ, राङ भजारला स्युसोङ, तेहि ख्युइ हतिबाला नानाइबा च्वरा ठेसोङ, राङ हतिबे निस्तार कालापसोलयि भत्यार तयार सोइसोङ।

17 कमु हुइतुइना खो च्युनङि गार ङ्याबो लेप्सोङ। 18 हतिबा घो कुँरे स्येतुइना येशुयि नाइसोङ, "तेम्बारे ङा खेला नाज्याइ, खि नाङने साङान झिकि ङाला धोका तेरङान ना।"

19 हतिबा दुखि च्युङसोङ, तेहि पालि-पालि क्याइरे खोला "च्हि हति ङा हिना?" नाइरे ढियाला छेलसोङ।

20 ख्युइ हतिबाला नाइसोङ, "च्युनङियि नाङने च्हि, सुते ङा ङ्याबो तेरमाला लोटा पिलिन्दु। 21 चिचालानाना मयि पिजाला ख्युइ भारेला टिटिबा च्वरा हुन, हिन्नाङ धिक्कार हति मिला सुइ लाम्ला मियि पिजाला धोका हुन। हति मिता मिलुइ माथोबा झि नाना ल हुन।"

22 तेहि सेन ताताताला येशुयि लोटा खेरसोङ, च्यिनलाब पिन्सोङ राङ च्यासोङ राङ हतिबाला तेरिन राङ नाइसोङ, "खेर, धि ङाहि स्हुना।"

23 तेहि भोटो खेरते कटिनक्याँ नाइ छारते ख्युइ हतिबाला पिन्सोङ, राङ हतिबा पोरोयि हति तुँसोङ। 24 तेहि ख्युइ हतिबाला नाइसोङ, "धि सारबा वाचायि ङाहि ठा ना, काङते लेइराङयि चाला क्युतु झ्युङान ना। 25 तेम्बारे, ङा खेला नाज्याइ, ङा अंगुरयि खुवायि लाम्ला हति ङिन थु मि थुङ, जब थु कजसुबायि राज्यला हति सारबा क्याइरे मिथुवा।" 26 तेहि भजन झि लाँरे हतिबा थोन्दे जैतुन रि यहला पुइसोङ।

27 येशुयि हतिबाला नाइसोङ, "खे पोरो च्येला हटि च्युङदे ढोङान ना, चिचालानाना धि च्वरा टिदु, ‘ङा रच्चियाला क्याक च्याइ, राङ लुतेबा खा थोरते ढोङान ना।’ 28 हिन्नाङ ङा सोम्बो च्युङदे लाँ छारते ङा खेले ताङला गालिलला ढो ज्याइ।"

29 पत्रुसयि खोला नाइसोङ, "च्येला लक्ते पुइ नाङ ङा च्येला लक्ते मिढो।"

30 तेहि येशुयि हतिबाला नाइसोङ, "तेम्बारे, ङा खेला नाज्याइ, तिरिङयि छाम्मु लाम्मा ङि च्याबो भोएयापले ताङला ख्युइ ङाला लाम्मा सुम माना नाङान ना।"

31 हिन्नाङ ख्युइ झन क्ये छेया क्याइरे नाइसोङ, "ख्योए ङ्याबो ङा स्यिकोइ राङ च्युङ नाङ ङा ख्योएला माना मिना।" तेहि हतिबा पोरोयि हति च्वरा राङ नाइसोङ।

32 हति च्येला हतिबा गेतसमनि मिन क्याक्याइबि साला पुइसोङ, राङ ख्युइ रेँ लोब्टुबाला नाइसोङ, "ङा मोनलाम क्याक्या थु खे ङिहा राङ त्योए।" 33 तेहि ख्युइ पत्रुस, याकुब, राङ युहान्नाला ङ्याबो खेरसोङ, राङ तेहि खो लेइराङ समतुसोङ राङ लेइराङ सम अल होङाला छेलसोङ।✝ 34 ख्युइ हतिबाला नाइसोङ, "ङाहि आत्मा स्यिस्यि थु राङ शोकयि बैरा लाँलाँबा धु। खे ङिहा राङ त्योए, राङ लाँरे राङ त्योए।"

35 तेहि टिझि फाला पुते खो साला खोलबु क्यापसोङ, राङ च्युङना हति भेलाने थाररो कि नाइरे मोनलाम क्यापसोङ। 36 तेहि ख्युइ नाइसोङ, "अब्बा, आके, ख्युइ चाला ताम पोरो सम्भव होतो। धि भोटो ङाहि चाने हटाइ कि। हिन्नाङ ङाहि धोप्पा क्याक्याइबा च्वरा माना, ख्युइ धोप्पा क्याक्याइबा च्वरा होङवार सअ।"

37 खो याङ हुइतुइना हतिबा ङ्याङ्याला राङ ठेसोङ। ख्युइ पत्रुसला नाइसोङ, "सिमोन, च्हि ख्योए ङ्याङ्याला होतोइ? च्हि घण्टा झि याङ लाँरे त्योए माङ्युइ सुये? 38 लाँरे त्योए, तेहि मोनलाम क्योप, राङ खे छोएतायापला परि मा योङ। आत्मा ता तेम्बारे तयार धु, हिन्नाङ स्हु कमजोर धु।"

39 याङ पुते ख्युइ हति राङ मोनलाम क्यापसोङ। 40 याङ लेप्ते ख्युइ हतिबाला ङ्याङ्याला राङ ठेसोङ, चिचालानाना हतिबे मि ङि लेइराङ राराता धु, राङ ख्युइ च्हि जावाक तेरयाप ना सो हा:माकोसोङ।

41 खो लाम्मा सुबा लेप्सोङ, राङ हतिबाला नाइसोङ, "च्हि खे तरह ङ्याङ्याला होतोइ, राङ ङाल सोसोइबा राङ होतोइ? ता च्युङदे, भेला लेप्छारसोङ। तोइ, मियि पिजा तिक्पा किङानतेबे लाला थेपलेके च्युङ छारसोङ। 42 ल्हँ, क्यु, ङाला धोका तेरङान धुनला राङ धु।"

43 येशु ताम नेतुइना लोब्टु च्युनङियि नाङने च्हि यहुदा हो:प्तामेला हतिया थोङसोङ। घोबा पुजारिबा, शास्त्रिबा राङ केवाकिङान गुरुति चाँचाँबि तुम झि तोरबालि राङ पेरका ख्योरे हति ङ्याबो हतिया लेप्सोङ। 44 खोल धोका तेरङानति हतिबाला धि च्वरा ता झि पिपिना धु, "सुला ङा पा च्योर च्याइ हति मि हति राङ ना, हतिला सुङ राङ स्युँते खेर।"

45 तेहि थारका येशुयि तेहा लेप्ते नाइसोङ, "हे रब्बि" राङ खोला पा च्यारसोङ। 46 तेहि हतिबे येशुला सुङसोङ राङ झ्याल्ला खेरसोङ। 47 हतिया धुनला लाँङानबे नाङने मि झिकि तोरवालि ठरे घोबा पुजारि यक्पुवाला क्यापसोङ, राङ हति नामज्यो ठेबे तुपसोङ।

48 येशुयि हतिबाला नाइसोङ, "च्हि खे कुम्मा झिला च्वरा तोरवालि राङ पेरका ख्योरे ङाला सुङदु लेलेबा हिनाइ? 49 बारतै ङा मोनलाम क्यासि खिमला छि लोबिन राङ खे ङ्याबो राङ होए, राङ खि ङाला मा सुङसोङ। हिन्नाङ पवित्रशास्त्रा पुरा सअ।" ✝

50 तेहि लोब्टुबा पोरो खोल पोरते टोइरे पुइसोङ। ✝

51 रेँ स्हुला पुवायि कोहिला मात्रा कोकोना स्यारा झि ख्युइ च्येला लेप्सोङ। हतिबे हति स्याराला सुङसोङ। 52 हिन्नाङ कोहिला पोरते हति च्येपटाका राङ टोइरे पुइसोङ।

53 तेहि हतिबे येशुला घोबा पुजारि तेहा खेरसोङ, राङ हतिया घोबा पुजारिबा, केवाकिङान गुरुबा राङ शास्त्रिबा झोम्दे त्येतु। 54 पत्रुसते घ्याबोने राङ घोबा पुजारि क्ययि नाङला ख्युइ च्येच्येला लेप्सोङ, तेहि हति कोराबा ङ्याबो ताते खो मे धियाला छेलसोङ। 55 ता घोबा पुजारि राङ पोरो यहुदि झोमसि खिमयि मितेबे येशुला स्योएयापयि चाला ख्युइ विरोधला साछि पेसोङ, हिन्नाङ च्याङ माखुसोङ। 56 लेइराङयि ख्युइ विरोधला चुन साछि पिन्सोङ। हिन्नाङ हतिबे पिपिनि साछि माढिसोङ।

57 रेन रेनयि लाँरे ख्युइ विरोधला जु नेन राङ साछि पिन्सोङ, 58 "ख्युइ जु नानाइबा ङि थोइसोङ, ‘मयि लाक्पि सोसोबि धि मोनलाम क्यासि खिम ङा तिपच्याइ, राङ लाक्पि मासोइबा स्यान मोनलाम क्यासि खिम ङा ङिन सुमला सो ज्याइ।’"✝

59 हिन्नाङ हतिला याङ हतिबे साछि च्वरा मतयि मिधु।

60 तेहि घोबा पुजारि उइला लाँरे येशुला टिसोङ, "च्हि ख्योएला जवाक झि याङ मेताइ? धि मिबे ख्युइ विरोधला साछि पिपिना च्हि ना?"

61 हिन्नाङ येशु च्यामाना त्येसोङ, राङ च्याङ जावाक मापिन्सोङ। याङ घोबा पुजारि खोला टिसोङ, "च्हि ख्योए कजसुबायि पिजा ख्रिष्ट हिनाइ?"

62 येशुयि नाइसोङ, "ङ हिना, तेहि ख्युइ मियि पिजाला पोरोले शक्तिशालियि याइ यहला ताताता राङ पान्नाङयि मुक्पातेबा ङ्याबो होङान थोङान ना"✝

63 तेहि घोबा पुजारियि रेँ कोहिला रालदे नाइसोङ, "ङेला स्यान साछि च्हि कोइबा हुन ता? 64 खि कजसुबाला फा:ला अल नानाइबा ता थोइ छारसुइ। खि च्हि विचार होतो?" तेहि हतिबा पोरोयि खोला स्योएयापयि ङेबा तेरयाप सोइसोङ। ✝

65 तेहि रेन रेनयि खोला छिमा धेबाला छेलसोङ, राङ ख्युइ च्ये काप्ते खोला थालच्या क्यापते नाइसोङ, "ङोन्सेखिलदे नोइ।" तेहि हति च्येला कोराबि खोला रेँ जिम्मला खेरसोङ, राङ खोला भक्सिन क्यापसोङ।

66 पत्रुस हअला क्यला होतितुइना घोबा पुजारि यक्मुवायि नाङने च्हि हतिया लेप्सोङ, 67 राङ पत्रुसला मेधिन थोङाराङ हतिला ल क्याइरे ताइरे नाइसोङ, "ख्योए याङ येशु नासरि ङ्याबो धु ये?" 68 हिन्नाङ ख्युइ जु नेन राङ माना नाइसोङ, "ख्युइ च्हि नाइ न ङाहि हा:कोसोङ न छ्या च्युङसोङ।" तेहि खो फियि को यहला पुइसोङ राङ। तेहि च्याबो पोइसोङ।

69 यक्मुवायि याङ लाँरे त्योएङानतेबाला याङ नाइसोङ, "धि ता हतिबे नाङने च्हि ना।" 70 हिन्नाङ पत्रुसयि याङ माना नाइसोङ। हिन्नाङ टिझि च्येला फाला छुला लाँङानतेबे याङ पत्रुसला नाइसोङ, "तेम्बारे, ख्योए हतिबे नाङने च्हि ना, चिचालानाना ख्योए गालिलि ना।" 71 हिन्नाङ ख्युइ राङला धिक्कार किन राङ कसम साइरे नाला छेलसोङ, "सुइ भारेला खे नेन हति मिल ङाहि ङो मिस्येबा।"

72 तेहि हतितुइनाराङ राङ च्याबो पोइसोङ, राङ पत्रुसला येशुयि जु नानाइबि ताम याका क्याइसोङ, "च्याबो लाम्मा ङि भोएयापले ताङला ख्युइ ङाला लाम्मा सुम माना नाङान ना।" तेहि हति तामला टाम्बा क्याइरे खो लेइराङ ङुइसोङ।