1 ख्युइ हतिबाला प्येला नाला छेलसोङ "मिझिकि अंगुरयि भारि सोइरे हति फाला छुलो भार क्यापसोङ, राङ छ्याङ लुयापयि चाला तोङ झि टुइसोङ। तेहि सो क्यासि खिमझि सोइरे ख्युइ अंगुरयि भारि कमाइ कितु च्युसोङ, राङ खो प्रदेशला पुइसोङ।"✝

2 ढेबु तुइयापयि भेलाला ख्युइ हति स्याइयि मितेबाला अंगुरयि ढेबु रेन ख्योङदु यक्पुवा रेनला चाँसोङ। 3 हिन्नाङ हतिबे हतिला क्यापते राङ लाक्पा तोङबा चाँसोङ। 4 याङ ख्युइ हतिबे तेहा स्यान यक्पुवा झि चाँसोङ, हिन्नाङ हतिबे हति घोबोला क्यापसोङ राङ हतिला ङो छाजे सोइसोङ। 5 ताक्पोयि याङ स्यान झिला चाँसोङ, हिन्नाङ हतिला हतिबे स्येसोङ, राङ स्यान लेइराङला चाँसोङ, हिन्नाङ हतिबे रेनला क्यापसोङ राङ रेनला स्येसोङ। 6 "ख्युइ ता च्हि होतो, हति करि पिजा। ‘हतिबे ङाहि पिजाला ता सम्मान क्यायोङ नाइरे’ पोरोले च्येला हति खोला हतिबे तेहा चाँसोङ।"

7 "हिन्नाङ हति स्याइयि मितेबे खोरे नाङला नाइसोङ, ‘धि ता होङानयि आङकिङान हिना। सअ, हुइ धिला सोता, राङ आङ हुइ राङ होङान ना।’" 8 तेहि हतिबे खोला सुङदे स्येसोङ, राङ अंगुरयि भारि फिला टिम्सोङ।

9 "तेहि अंगुरयि भारि ताक्पुइ च्हि क्यायोङङि? हति होङान ना, राङ हति स्याइयि मितेबाला मासि सोङान ना, राङ अंगुरयि भारि स्यानला तेरङान ना। 10 च्हि खि पवित्रशास्त्रयि धि वचन टटबा मेताइ? ‘काङ टोउला खिम सोङान खारबि टिम्दे हतिते खिम झ टोङ च्युङसोङ, ✝ 11 धि कजसुबाने च्युच्युङा ना, तेहि हुइ मिला धि हा:लाइयाप होतो।’"

12 हति च्येला हतिबे खोला सुङ च्युइ क्याइसोङ, चिचालानाना धि प्ये ख्युइ हतिबे विरोधला नानाइबा ना नाइरे हतिबे हा:कोरे। हिन्नाङ हतिबा मियि तुमला झ्यिझ्यिबाति खोला ताङदे पुइसोङ।

13 तेहि च्येला खोला तामला फसाइ किता नाइरे हतिबे फरिसितेबा राङ हेरोदियातेबे नाङने मि रेनला ख्युइ तेहा चाँ सोङ। 14 हतिबा लेप्ते खोला नाइसोङ, "गुरुज्यु, ङेला छ्या होतो, ख्योए तेम्बा ना, राङ सुइयाङ वास्ता मिकिता। चिचालानाना ख्योए मियि धो ताइरे लाइ मिकिता, हिन्नाङ कजसुबायि लाम ल क्याइरे लोबिन्दु। नोइ, कैसरला कर तेरयाल ल ना कि माना? 15 ङे कर च्योङ ज्याइ कि मिच्योङ?" येशुयि हतिबे सम अल हा:कोरे हतिबाला नाइसोङ, "खे ङाला चिला छोए तेन? दिनार झि ख्योरे तोन।" 16 हतिबे सिक्का झि ख्योसोङ। ख्युइ हतिबाला नाइसोङ, "धि फोटो राङ छाप सुइ ना?" हतिबे खोला नाइसोङ, "कैसरयि।"

17 तेहि येशुयि हतिबाला नाइसोङ, "कैसरयि क्युतेबा कैसरला पिन, राङ कजसुबायि क्यु कजसुबाला।" हतिबा खोला हा:लाइसोङ।

18 स्यिस्यियाने सोम्बो च्युङदे मिलाँबा नाङना सदुकितेबा ख्युइ तेहा लेप्सोङ, तेहि खोला टिसोङ, 19 "गुरुज्यु, मोशायि ङेला टिरे पिन्सोङ, कि रेनयटि आज्यो स्यिरे वा सन्तन मा च्युङा केरमानला पोरते पुइना, ख्युइ भाइयि हति पुमोला खेर कोयिन राङ रेँ आज्योयि चाला सन्तन सोकोइ हुन।"✝ 20 प्येरा झिला आज्यो भाइ तुन होतो। छेप्पो ति केरमान झि ख्योरे, तेहि हति च्यिटा माच्युङा स्यिरे।

21 तेहि भाइ पारबाति हतिला मिजे क्याइसोङ, राङ हति याङ च्यिटा माच्युङा स्यिसोङ। तेहि हतिला टिमाति याङ हतिबा च्वरा राङ क्याइसोङ। 22 हति भाइ तुन गारयि च्यिटा मा च्युङा स्यिसोङ। 23 तेहि स्यिस्यियाने सोम्बो च्युङदे हतिबे नाङने हति सुइ केरमान हुन? चिचालानाना तुन गारयि हतिला मिजे क्याइरे।

24 येशुयि हतिबाला नाइसोङ, "खे घो ख्याख्यामा धि ला राङ मानाइ, कि न खेला पवित्रशास्त्रा छ्या होतो, न कजसुबायि शक्ति हा:कुन? 25 चिचालानाना जब हतिबा स्यिस्यियाने सोम्बो च्युङदे लाँकिन, हतिबे न मिजे किन, न हतिबे मिजे हुन, हिन्नाङ हतिबा तेङलाला होएता तेङलायि लोन खेरङान च्वरा हुन। 26 स्यिस्यियातेबा सोम्बो च्युङदे लाँयापयि ताम राङ छेरमि भोटि मेला छेकिन ताताति भारेला च्हि खि मोशायि किताबला टटबा मेताइ? कि च्हिरु क्याइरे पोथ्रोयि भारेला टिटिबि लाइनला कजसुबायि मोशाला नादुइ, ‘ङा अब्राहामयि कजसुबा, इसहाकयि कजसुबा राङ याकुबयि कजसुबा ना।’✝ 27 खो स्यिस्यियातेबे कजसुबा माना, हिन्नाङ सोम्बोतेबे कजसुबा ना। खे लेइराङ घो ख्याम्दे तेतु।"

28 शास्त्रिबे नाङने च्हि लेप्सोङ, राङ हतिबा रेँ नाङला नाइरे किन ताताता थोइसोङ। येशुयि मितेबाला थारका जवाक पिपिना थोङदे ख्युइ खोला टिसोङ, "आदेश पोरोयि नाङने छेस्युवाते काङ ना?" ✝

29 येशुयि जावक पिन्सोङ, "पोरोले छेस्युवाते धि ना ‘हे इस्राएल ङ्योन, कजसुबा हुइ कजसुबा च्हि मात्रा होतो। 30 ख्युइ कजसुबा रेँ कजसुबाला ख्युइ सम पोरोने, ख्युइ उ पोरोने, ख्युइ पोरो हा:कोयापने, राङ ख्युइ शक्ति पोरोने करि कि। 31 ङिबाते धिना, ख्युइ ख्युरि खिमजेला रेँ राङला च्वरा करि कि।’ धिले छेया आदेश स्यान च्याङ मेता।" ✝

32 हति शास्त्रि खोला नाइसोङ, "गुरुज्यु, ख्युइ तेम्बा नाइसोङ, कजसुबा च्हि अर्थात मेता, खो अर्थात स्यान सुयाङ मेता। ✝ 33 खोला सम पोरोने, पोरो हा:कोयापने, पोरो शक्तिने करि कि, राङ खिमजेला राङला च्वरा करि कि पोरो खिमयि होमबलि राङ भोल क्यापते भुलयापले ल ना।"✝

34 ख्युइ बुद्धिमानि राङ ङ्याबो जवाक पिपिना थोङदे येशुयि हतिला नाइसोङ, "ख्योए कजसुबायि राज्यने घ्याबोला मिदु।" हति भेलाने खोला ताम ढियाप सुला हा: माके सोङ।

35 तेहि मोनलाम क्यासि खिमला छोइ लोबितुइना येशुयि नाइसोङ, "च्हिरु क्याइरे ख्रिष्ट दाउदयि पिजा हिना नाइरे ठिमयि शास्त्रिबा नेन्दुइ? 36 चिचालानाना दाउद खुरि पवित्र आत्मि लाम्ला नानाइबा होतो, कजसुबायि ङाहि परमप्रभुला नाइसोङ, ‘ख्योए ङाहि लाक्पा याइबा यहला त्योए, जब थु ङा ख्युइ टाला ख्युइ काङबि तिङबि हअला मिभोरा।’✝ 37 जब दाउद खुरि खोला ‘प्रभु’ नेन, त काने खो ख्युइ पिजा च्युङदे?" तेहि हति तुम छोम्मुवाति ख्युइ वचन केन राङ ङ्यानसोङ।

38 तेहि छोइ लोबितुइना येशुयि नाइसोङ, "शास्त्रितेबाने च्याङबो क्याइरे त्योए। हतिबा कोहिला रिङमुवा कोन्दे फाला छुला युयाप राङ भजारला नामास्ते खुयाप, 39 तथा यहुदि झोमसि खिमला सा छेयाला राङ भत्यारतेबाला सम्मानयि सा खुसोम किन। 40 हतिबा राढितेबे खिम लुटि किन, हिन्नाङ मिला तोनयापयि चाला रिङमुवा-रिङमुवा मोनलाम क्याकिन।" धि च्वरा मिला तरह मा ङेबा खुँङान ना।

41 तेहि खो मोनलाम क्यासि खिमयि भेटि भुलसि सायि धुनला तोकिन, राङ मियि तुमयि भेटि स्युगुला भेटि पुपुला ताइसोङ। लेइराङ छुक्पोतेबे आलाइ लेइलेइ पुलसोङ। 42 तेहि टाङना राढि जि लेप्ते तामयि सिक्का ङि, अर्थात आलाइ झि पुलसोङ। 43 रेँ लोब्टुबाला रेँ तेहा क्ये ताङदे ख्युइ हतिबाला नाइसोङ, "तेम्बारे ङा ख्योएला नाज्याइ, भेटि पत्रला भुङानतेबे नाङने धि टाङना राढि पोरोले मा पुलसोङ। 44 चिचालाना पोरोयि राङला लेइराङ होएताने पुलसोङ, हिन्नाङ धि पुमोयि रेँ टाङनाने रेँ पोरो मिजे क्येलयापने पुलसोङ।"