1 निस्तार कालापसोलयि ङिन टुयि ताङला येशु बेथानियाला पुइसोङ। हतिया लाजारस तोकिनलो, सुला येशुयि स्यिस्यियाने सोम्बो सोइरसोङ। 2 हतिबे येशुयि चाला मुइ ङ्योपा तयार सोइसोङ। मार्था स्यापच्यि स्युनलो, तेहि लाजारस ते खो ङ्याबो ताते साङान झिकि नाङने च्यि। 3 तेहि मरियमयि लिटर फे कुना ङोलोयि उइयि टिमा होङान चाङमा पहझि ख्योँरे येशुयि काङबा ला कुइरेलो, तेहि ख्युइ काङबा रेँ स्येभुइ पिरेलो, राङ अत्तरयि टिमि खिम खाँसोङ।✝12:3 लुका ७:३७-३८ 4 हिन्नाङ येशुयि लोब्टुबे नाङने च्हि मदलब खोला धोका तेरङान यहुदा इस्करियोतयि नाइसोङ, 5 "धि अत्तर सुमला क्या ङुलयि सिक्काला चोँरे हति आलाइ टाङनाला पिन्ना मिहाइ?" 6 हिन्नाङ ख्युइ हति टाङनाला ताइरे नानाइबा माना, चिचालानाना हति कुम्मा ना, राङ आलाइयि किउ ख्युइ पोरते, तेहि हतिने कुनलो।

7 येशुयि नाइसोङ, "धिला च्याङ माना, ङाहि कुङयापयि ङिनयि चाला खोला पोरते सह। 8 चिचालानाना टाङनाबा बारतै खे ङ्याबो हुन।" ङा बारतै खे ङ्याबो मिहा।✝12:8 १५:११

9 यहुदितेबे तुम छेया झिकि खो हतिया होतो नाइरे हा:कोसोङ, राङ येशुयि चाला मात्रा माना, हिन्नाङ ख्युइ स्यिस्यियाने सोम्बो सोसोइबि लाजरसला याङ तायापयि चाला हतिबा लेप्तु लो। 10 हतिचाला घोबा पुजारितेबे लाजारस लायाङ सोएयापयि टोइ क्याइसोङ। 11 चिचालानाना हति क्याइरे यहुदिबे नाङने लेइराङ हतिबाने पेरे पुते येशुला हिछे क्याइसोङ।

12 ङिमा च्येमातेला निस्तार कालापसोङ होङान तुम छोम्मुवाति तेहि येशु यरुश्लेमला हुन्दु नाइरे थोइरेलो, 13 राङ मितेबा खजुरयि ढाला खुरते खोल स्वगत कितु क्ये धोनिन राङ थोन्सोङ, "होसन्ना! धन्य कजसुबयि मिनला होङान इस्राएलयि क्यालबो!" 14 तेहि टेयि टेटुझि ठाते येशुयि हति थोला स्योन्सोङ, नाइरे पवित्रशास्त्राला टिदु, 15 "सियोनयि पोमु माझि। तोइ ख्युइ क्यालबो टेयि टेटुयि थोला स्योन्दे हुन राङ धु।"✝12:15 जकरिया ९:९

16 धि ताम ताङला ख्युइ लोब्टुतेबे हा:माकोसोङ। हिन्नाङ येशुयि छे ते छारते धि ताम ख्युइ भारेला पवित्रशास्त्रला टिदुलो, राङ धि लाइ ख्युइ चाला हतिबे क्याक्याइबा ना नाइरे हतिबे हा:कोरेलो। 17 येशुयि लाजारसला तुरने क्ये ताङदे स्यिस्यियाने सोम्बो सुइतुइना खो ङ्याबो होएता मि तुमतेबे ख्युइ साछि तेरिन राङ तातेलो।

18 ख्युइ धि हा:लाइयापयि लाइ क्याइसोङ नाइरे थोथोइबातेबे याङ खोला ठातु पुइतु। 19 तेहि फरिसिबे खोरे नाङला नारे क्याइसोङ, "तेहि, खेने च्याङ मिहा। तेनराङ होए, संसार ख्युइ च्येला पुइसोङ!"

20 कालापसोङ ला आराधाना कितु ढोङान यि नाङने रेनरेन ग्रिक याङ धुलो। 21 हतिबा गालिलयि बेथसेदाला त्योएङान फिलिपयि तेहा लेप्ते जु नाइरे स्युवा क्यापसोङ, "हजुर, ङे येशुला ठेसोम होए।"

22 फिलिप पुते आन्द्रियासला नाइसोङ, अन्‍द्रियास राङ फिलिप हति ङिबो पुते येशुला नाइसोङ। 23 येशुयि हतिबाला जवाक पिन्सोङ, "मि पिजि छे धेयापयि भेला लेप्छारतु। 24 तेम्बारे, ङा खेला नाज्याइ, ढुयि घेरा साला छारते मासिना हति चिक्पा लुइयिन। हिन्नाङ हति स्यिना लेइराङ ढेबु क्येरु झ्युकिन। 25 रेँ उला करि किङानयि हति मेता सुन, हिन्नाङ रेँ उल धि संसारला अल नाङानते नामयाङ मिसिनयापयि मिजेयि चाला सुरछित भोरिन।✝12:25 मत्ति १०:३९; १६:२५; मर्कुस ८:३५; लुका ९:२४; १७:३३ 26 सुइ याङ ङाहि स्यापच्यि स्युना हति ङाहि च्येला सअ राङ ङा काँहा होए, ङाला स्यापच्यि स्युङानतेबा याङ हतिया हुन। सुइ याङ ङाहि स्यापच्यि स्युना आकि याङ हति सम्मान किन।

27 "ता ङाहि सम अल च्युङसोङ, राङ ङा च्हि नाज्याइ? हे आके, धि भेलाने क्योप? माना, धि चाला राङ ङा धि भेला थु कोप्सोङ। 28 हे आके ङा ख्युइ मिनला छे धेक च्याइ।" तेहि तेङलाने धि च्वरा क्ये झि लेप्सोङ, "ङाहि हति छे तेतेका होए याङ किच्याइ।"

29 हतिया लाँलाँबि मि झोमयि हति थोइरे नाइसोङ, "धि लोमार क्याक्याइबा ना!" स्यानतेबे नाइसोङ, "तेङलायि लोन खेरङानतेबा खो ङ्याबो ताम नानाइबाना!"

30 येशुयि हतिबाला जवाक पिन्सोङ, "धि वचन ङाहि चाला च्युच्युवा माना हिन्नाङ खि चाला ना। 31 ता धि संसारला ल अल भेयापयि लाइ हुन। धि संसारयि क्यालबो फिला ढिमङान ना। 32 तेहि जब पिरथिवि धेकिन, ङा मि पोरोला ङा यहला ढुच्याइ।" 33 खो च्हिरु क्याइरे स्यिन, सो ता तोनयापयि चाला जु नानाइबाना।

34 मि झोमयि खोला टिसोङ, "ख्रिष्ट बारतै सोम्बो तोकिन नाइरे ठिमने ङि थोथोइबा होतो। ख्योए च्हिरु क्याइरे नाङ्युकिन, मि पिजा धेराङ कोयिन नाइरे? धि मि पिजा ते सुना?"✝12:34 भजनसंग्रह ११०:४; यशैया ९:७

35 येशुयि हतिबाला नाइसोङ, "तरह टिझि थु होए खे ङ्याबो धु। होए खे ङ्याबो होएहोए थु फालाछुला कि, तेहि मुन्नायि खेला घाङान अर्थात। सुवाङ मुन्नाला फालाछुला किना, हति खो काँहा ढुन खो राङ ला छ्या मिहा। 36 जब थु होए खे ङ्याबो होए हति थु हिछे पोर, राङ खे होएयि सन्तन ना।" धि ताम नाइरे, येशु हतिने पुइसोङ, राङ हतिबाने हिप्ते त्येसोङ।

37 येशुयि हतिबे धुनला झोमयि हा:लाइयापयि क्याक्याइबा होतो, हचु हिन्नाङ हतिबे खोला हिछे माक्याइसोङ। 38 हति कोइबा होतो, यशैया ङोन्सेखिलङानयि वचन पुरा सह, "हे प्रभु, हुइ लोन सुइ हिछे क्याइ सुइ? तेहि कजसुबे शक्ति सुला तानसुइ?"✝12:38 यशैया ५३:१ 39 हतिचाला हतिबे हिछे कि माङ्युइ सोङ, चिचालानाना यशैयायि याङ जु नानाइबा होतो, 40 "ख्युइ हतिबे मि क्याकाका होतो, राङ हतिबे सम क्योङबो सोसोइबा होतो, हति च्वरा क्याइरे हतिबे मियि मि थोङयाप राङ समयि हा:मिकोयाप, स्यान अर्थात हतिबा लाँङान ना राङ ङाहि हतिबाला टाक्तु झ्युकोहि होङान ना।"✝12:40 यशैया ६:१० 41 यशैयायि धि ताम नाइरेलो, चिचालानाना ख्युइ हति छे तेतेका थोङसोङ, राङ ख्युइ भारेला नाइसोङ। 42 हिन्नाङ यहुदि आङकिङानबे नाङने लेइराङयि येशुला हिछे क्याइसोङ, हिन्नाङ फरिसिबे झिटायि, राङ हतिबाला यहुदि झोमसि खिमने धोनिन नाइरे झिटायि हति माङ्याना लो। 43 चिचालानाना कजसुबे छे धेयापले मा हतिबा मियि छे धेयाप करि किनलो।

44 येशुयि क्ये छेया क्याइरे नाइसोङ, "ङाला हिछे किङानयि ङाला माना, हिन्नाङ ङाला चोँङानयि हिछे किन। 45 सुइ याङ ङाला थोङान ना, हति ङाला चोङान ला थोङिन। 46 ङा संसारला होए च्युङदे लेलेबा होतो, तेहि ङाला हिछे किङान मुन्नाला मियोङ नाइरे।"

47 "सुइ ङाहि वचन ङ्यानकिन राङ हति खाला मिङ्यान ना, ङा हति ल अल भेयापयि लाइ मिके। चिचालानाना ङा संसारयि ल अल भेयापयि लाइ कितु लेलेबा माना, हिन्नाङ संसारला क्योपतु लेलेबा ना। 48 ङाला माना नाङन राङ ङाहि वचन मिङ्यानङानयि चाला च्हि ल अल भेङानयि लाइ किङान झि होतो। काङ वचन ङाहि सिनि ङिनला ल अल भेयापयि लाइ किङान ना। 49 चिचालानाना ङाहि चाने नानाइबा माना हिन्नाङ ङाहि च्हि नायाप हिना, ङाला चोँङानयि आके खोराङयि ङाला आदेश पिन्सोङ। 50 ङाला छ्या होतो, कि ख्युइ आदेश नामयाङ मिसिनयापयि मिजे ना। हतिचाला ङा च्हि नेन, आकि नानाइबा च्वरा नेन।"