1 धि ताम नाइ छारते येशुयि तेङला यहला मि केल्ला ताइरे नाइसोङ, "हे आके, भेला छारतु, ख्युइ पिजि छे धेयाप थोङान ना, राङ पिजि ख्युइ छे तेतेका थोङदु झ्युङान ना।" 2 चिचालानाना ख्युइ हतिला मि पोरोयि थोला आङ पिपिना होतो, तेहि ख्युइ खोला पिपिना पोरोला ख्युइ नामयाङ मिसिनयापयि मिजे पिनोङ। 3 ता नामयाङ मिसिनयापयि मिजे धि राङ ना, कि हतिबे ख्योएला, च्हि मात्रा तेम्बा कजसुबा ङोस्येयोङ, राङ ख्युइ चाँचाँबि येशु ख्रिष्टला ङोस्येयोङ। 4 काङ लाइ ख्युइ ङाला पिन्दे, हति पुरा क्याइरे ख्योएला पिरथिवि ङाहि छे तेतेका होतो। 5 ता हे आके, संसार सोयापले ताङला ख्युइ धुनला ङाहि काङ छे तेतेका होतो, हति ख्योए राङ ताताताला ङाला छे थे।

6 "संसारने काङ मितेबा ख्युइ ङाला पिन्दे हतिबाला ख्युइ मिन ङाहि थोङदु च्युच्युका होतो। हतिबा ख्युइ ना, तेहि ख्युइ हतिबा ङाला पिन्सोङ, राङ हतिबे ख्युइ वचन खाला ङ्याङ्याना होतो।" 7 ता हतिबाला ता छ्या होतो, कि ख्युइ ङाला पिपिना पोरो क्यु ख्योएने लेलेबाना। 8 चिचालानाना काङ वचन ख्युइ ङाला पिपिना होतो, ङाहि खेला पिन्दे, राङ खि याङ हति ङ्यान्दे। राङ ङा ख्योएने लेलेबा ना नाइरे हतिबे तेम्बारे हा:कोदु, तेहि ख्युइ ङाला चाँचाँबा ना नाइरे हतिबे हिछे क्याक्याइबा होतो।

9 ङा हतिबे चाला मोनलाम क्याकच्याइ, संसारयि चाला ङा मोन्लाम मिक्या, हिन्नाङ हतिबे चाला, सुला ख्युइ ङाला पिन्दे। चिचालानाना हतिबा ख्युइ राङ ना। 10 ङाला च्हि होतो हतिबा पोरो ख्युइ ना, ख्युइ च्हि होए ङाहि ना। ङाहि छे तेतेका खि तेहा थोथोङा होतो। 11 "ता ङा याङ संसारला मितोए, हिन्नाङ हतिबा ता संसारला तोकिन। ङा ख्युइ तेहा हुन होए। पवित्र आके, ख्युइ ङाला पिपिना ख्युइ मिनला ता क्याप्ते पोर, राङ हु च्वरा हतिबा हाङ च्हि ना।" 12 जब थु ङा खे ङ्याबो होतो, ख्युइ ङाला पिपिना ख्युइ मिनलाता क्याप्ते पोर। हतिबाला च्याङ होङदु माजु। तेहि हतिबाने मासि होङयाप ते अर्थात सुवाङ मासि मा च्युङसोङ चिचालानाना पवित्रशास्त्रा पुरा होङ कोहिि राङ होतो✝। 13 "ता ङा ख्युइ तेहा हुन होए। संसारला होतितुइना ङा धि ताम नेन, कि खेला ङाहि जब याङ मिसिनयापयि हतिबाला ङाहि कायाप पुरा होङ।" 14 ङाहि हतिबाला ख्युइ वचन पिन्दे हिन्नाङ संसारयि खेला अल क्याइसोङ चिचालानाना खे संसारयि माना, च्हिरु क्याइरे ङा संसारयि माना। 15 ख्युइ हतिबाला संसारने खेर नाइरे ङा मोनलाम मिका हिन्नाङ हतिबाला अलने क्याप। 16 हतिबा संसारयि माना, च्हिरु क्याइरे ङा धि संसारयि माना। 17 हतिबाला तेम्बाला पवित्र सोइ, ख्युइ वचन तेम्बा ना। 18 च्हिरु क्याइरे ख्युइ ङाला संसारला चाँरे, ङाहि याङ हतिबाला संसारला चाँरे। 19 हतिबे चाला ङा ङारि ङाराङला पवित्र स्युन होए, तेहि हतिबा हाङ तेम्बाला पवित्र होङ।

20 ङा हतिबे चाला मात्रा मोनलाम मिक्या, हिन्नाङ हतिबे लोनने ङाहि थोला हिछे किङानयि चाला हाङ मोनलाम क्याकच्याइ, 21 कि खे पोरो च्हि होङ हे आके, च्हिरु क्याइरे ख्योए ङाहि तेहा होतो, राङ ङा ख्योएला, हति च्वरा क्याइरे हुला होङ, राङ ख्युइ ङाला चाँरे नाइरे संसारयि हिछे क्यायोङ। 22 काङ छे ख्युइ ङाला पिपिना होतो, ङाहि हतिबाला पिन्दे, तेहि हु च्हि च्युच्युवा च्वरा हतिबा हाङ च्हि होङ। 23 ङा हतिबाला, तेहि ङा खेला, राङ खे पोरो काङ च्याने च्हि होङ, राङ ख्युइ ङाला चाँचाँबा ना, तेहि ङाला करि क्याक्याइबा च्वरा हतिबा लाङ क्यायोङ नाइरे संसारयि हा:कोहोङ।

24 "आके ङा धोप्पा कि च्याइ, कि ख्युइ ङा ला पिपिना तेबा ङा काँहा होए, ङा ङ्याबो त्येयोङ राङ ङाहि छे थोङङोङ, काङ छे, संसारयि सोयापले ताङला ङाला करि क्याक्याइबा ति ख्युइ ङाला पिपिना होतो।" 25 "तेम्बायि आके, संसारयि ख्योएला ङोमिस्येबा, हिन्नाङ ङाहि ख्योएला ङोस्येयिन तेहि ख्युइ ङाला चाँरे नाइरे धिबाला छ्या होतो। 26 ङाहि ख्युइ मिन धिबाला थोङदु च्युकते, तेहि ख्युइ मिन धिबाला थोङदु च्युच्युकि च्युच्युका कि च्याइ, तेहि काङ करि ख्युइ ङाला करि क्याइरे, धि हतिबाला त्येयोङ, राङ ङा खेला त्येयोङ।"