1 धि तामबा नाइछारते येशु गालिल प्रदेशने यर्दन चाङबोयि फारकानला यहुदियायि छेत्र यहला पुइसोङ। 2 मि झोमयि तुम छेया झि ख्युइ च्येला लेप्सोङ राङ ख्युइ हतिया मितेबाला टाक्तु च्युसोङ। 3 फरिसि रेन ख्युइ तेहा लेप्ते खोला छोए ताज्याइ नाइरे खोला टिसोङ, "च्हि सुइयाङ तोन होएताला केरमान ङ्याबो पेयाप ठिम च्वरा क्याइना ल हिनाइ?" 4 हिन्नाङ ख्युइ नाइसोङ, "च्हि खि टटबा मेताइ, कि पोरो सोङानयि हतिबाला ताङला राङ पिजा राङ पुमो सोइरे, ✝ 5 राङ नाइसोङ, ‘हतिचाला मियि रेँ आके राङ आमाला पोरते रेँ केरमान ङ्याबो ढिकिन, राङ हति ङि कार स्हु च्हि होङान ना।’ 6 ता हति ङि माना, हिन्नाङ स्हु च्हि राङ होङान ना। हतिचाला कजसुबायि सुलाङ च्हि थुथुता होतो, हतिला सुइ याङ पेरु माझ्यु।"

7 फरिसिबे येशुला टिसोङ, "मोशायि चिला मिजे क्याइरे पेयापयि स्युगु पिन्दे केरमानला पेयापयि आदेश पिन्दे?" 8 येशुयि हतिबाला नाइसोङ, "खि सम क्योङबोयि क्याइरे राङ मोशायि केरमानला तोङयापयि स्युगु खेला पिपिना ना। हिन्नाङ ताङलाने धि च्वरा मेता। 9 ङा खेला नाज्याइ, सुइ याङ पातान्नि क्याक्याबि चाला अर्थात रेँ केरमानला ताङदे स्यान ङ्याबो मिजे किन, हति पतार किन, राङ सुइ ताताङा तेला मिजे किन, हति याङ व्यभिचार किन।" 10 लोब्टुबे खोला नाइसोङ, "ख्योबो केरमानयि च्वरा टाल हिन्ना ता, मिजे मिकियाप राङ ल ना।" 11 येशुयि हतिबाला जवाक पिन्दे नाइसोङ, "मि पोरोयि धि वचन ङ्यान मिङ्युइबा, मात्रा हति ङ्युइकिन सुला धि पिपिना होतो। 12 चिचालानाना रेन किये भेलाने राङ फोलोमोलो हुन राङ स्यान मितेबे भेला आरोङयि च्येला हति च्वरा क्याक्याइबा हुन। रेन रेँ राङला तेङलायि राज्ययि चाला मिजे माक्याइबा हुन सुइ धि ङ्यानकिन, हति-हति ङ्यानरो कि।"

13 येशुयि च्यिबातेबे थोला लाक्पा पोरते मोनलाम क्याबोङ नाइरे मितेबे हतिबाला ख्युइ तेहा ख्योसोङ। तेहि लोब्टुतेबे हति मिबाला ङ्योइसोङ। 14 हिन्नाङ येशुयि नाइसोङ, "टिमा च्यिबातेबाला ङाहि तेहा होङदु छ्यु, हतिबाला माघा। चिचालानाना तेङलायि राज्य धि टिमा च्यिबातेबे च्वरा मितेबे ना।" 15 तेहि येशुयि च्यिटातेबे थोला लाक्पा पोरते च्यिनलाब पिन्छारते येशु हतिने पुइसोङ।

16 येशुयि तेहा लेप्ते मिझिकि नाइसोङ, "हे गुरु, ङाहि नामयाङ किसिनयापयि किप्पो मिजेयि खुँयापयि चाला च्हि ल लाइ किकोइ हुन?" 17 येशुयि हतिला नाइसोङ, "ल काङना हति भारेला ख्योए ङाला चिला ढिन? ल ता च्हि मात्रा होतो। हिन्नाङ ख्योए मिजेला स्युसोम किना, आदेशतेबा ङ्योन।" 18 ख्युइ हतिला नाइसोङ, "काङ काङते खाइकोएतेबा?" येशुयि नाइसोङ, "ख्युइ च्याङ मासोए, ख्योए व्यभिचार माके, ख्योए कुम्मा माकु, ख्योए चुन साछि मातेर। 19 रेँ आके आमायि सम्मान कि, राङ रेँ खिमजेला राङ च्वरा करि कि।" 20 हति स्यारा मितेबे खोला नाइसोङ, "धिबा पोरो ता ङाहि ङ्यानकिन राङ लेलेबा होतो। ता ङाला च्हि कमि धुइ?"✝ 21 येशुयि हतिला नाइसोङ, "ख्योए कजसुबायि धुनला पवित्र होङसोम होएना, पुते ख्योएला होएता पोरो चोँरे टाङनाबाला पिन, राङ ख्युइ तेङलाला क्यु खुङान ना, तेहि लेप्ते ङाहि च्येला सह।" 22 जब हति स्यारा मितेबे धि ताम थोइरे, हति सम तुक्ते पुइ छारसोङ, चिचालानाना हतिला क्यु सम्पति लेइराङ धुलो। 23 तेहि येशुयि रेँ लोब्टु तेबाला नाइसोङ, "तेम्बारे, ङा खेला नाज्याइ, तेङलायि राज्य छ्युक्पो मिला स्युयाप काबो हुन। 24 याङ ङा खेला नाज्याइ, छ्युक्पो मिला कजसुबायि राज्य नाङला स्युयापले बरु उटला खापयि मिने नाङला झ्युयाप लाइला हुन।" 25 हति थोइरे लोब्टुबा हा:लाइरे टिरेलो, "हचु हिन्ना सुला मुक्ति खुकिन?" 26 येशुयि हतिबाला मि ताइरे नाइसोङ, "मितेबे चाला धि कि मिङ्युइयाप होतो, हिन्नाङ कजसुबायि चाला धि पोरो ङ्युइयाप हुन।" 27 तेहि पत्रुसयि खोला नाइसोङ, "तोइ ङि क्यु पोरो ताङदे ख्युइ क्यापला लेलेबा होए। ङेला ता च्हि खुकिन?" 28 येशुयि हतिबाला नाइसोङ, "तेम्बारे, ङा खेला नाज्याइ, खे सु ङाहि च्येला लेलेबा होए, सारबा पोरो सोसोइबाला जब मियि पिजा रेँ छे तेतेकायि क्याल: ठिला तोकिन, तेहि खे याङ च्युनङि क्याल ठिला त्योएङान ना, राङ इस्राएलयि च्युनङि क्युइयि थोला न्याय किङान ना।✝ 29 पोरो सुइ ङाहि मिनयि चाला खिम, आज्यो भाइ वा इझि भोइनि अर्थात आके आमा पिजा पोमु वा सा स्यिङ ताताङा हुन, हतिला क्याले याङ मा खुङान ना, राङ नामयाङ मिसिनङान मिजेयि आङ खुङान ना। 30 हिन्नाङ लेइराङ सु ताङला होतो हति च्येला होङान ना राङ, च्येला होएतातेबा ताङला होङान ना।" ✝