1 येशु रिने माला पापछारते च्येला मियि तुम छोम्मुवा झि ख्युइ क्यापला लेप्सोङ। 2 लाक्पा काकामि नाझा होएता मिझि ख्युइ तेहा लेप्सोङ, राङ ख्युइ धुनला पुइमु चुरे जु नाइसोङ, "हे प्रभु, ख्युइ धोप्पा चुङना ङाला टाक्तु जु ङ्युइकिनाइ?" 3 ख्युइ रेँ लाक्पा तेक्ते खोला छुइ क्याइसोङ, राङ नाइसोङ, "ङा धोप्पा किन होए, ख्योए टा सह।" हतितुइना राङ खुइ लाक्पा काकामि नाझा टा छारसोङ। 4 तेहि येशुयि हतिला नाइसोङ, "सुला हाङ माना। हिन्नाङ क्यु, राङ राङला पुजारितेबे तेहा तोन, राङ मोशायि आदेश पिपिनि भेटिते फुल, राङ मितेबाला साछि होङ।"✝

5 येशु कफर्नहुम भजारला स्युबितुइना कप्तान झि ख्युइ तेहा लेप्ते स्युवा क्याकाला छेलसोङ। ख्युइ नाइसोङ, 6 "हे प्रभु, ङाहि यक्पुवा लेइराङ स्हुयि चाराङ मि घुलङानयि नाझि तुइरे नाइरे खिमला मालसाला राङ ङ्याङ्याला धु।"

7 येशुयि हतिला नाइसोङ, "ङा लेप्ते हतिला टाक्तु झ्युकच्याइ।"

8 हिन्नाङ घोबायि नाइसोङ, "हे प्रभु," "ख्योएला ङाहि खिमला स्वगात कियापयि झ्योदायि ङा मेता। हिन्नाङ वचन मात्रा नोइ, राङ ङाहि यक्पुवा टाङान ना। 9 चिचालानाना ङा याङ आङकिङानबे हअला होए, राङ ङाहि हअला सिपाहितेबा होतो। ङा च्हि;ङा ‘क्यु’ नेन, तेहि हति ढुन, राङ स्यान झिला ‘सअ’ नेन, तेहि हति हुन। ङाहि यक्पुवाला ‘जु कि नेन, तेहि ख्युइ हति किन।’"

10 ख्युइ ताम थोहिरे येशु ह:लाइसोङ, राङ ख्युइ च्येला होङान मितेबाला नाइसोङ, "ङा तेम्बारे खेला नाज्याइ, इस्राएलला याङ ङाहि झिम छेया हिछे किङान माखुसोङ। 11 ङा खेला नाज्याइ, स्यार राङ नुपने लेइराङ मि होङान ना, राङ अब्राहाम, इसहाक राङ याकुब ङ्याबो तेङलायि राज्ययि भत्यारला त्योएङान ना।✝ 12 हिन्नाङ राज्ययि सन्तन फिला मुन्नाला ढिम्ङा ना। हतिया मितेबा ङुङान ना राङ सो च्हिरु झ्युङान ना।"✝ 13 तेहि येशुयि घोबाला नाइसोङ, "क्यु, च्हिरु क्याइरे ख्युइ हिछे क्याइरे, हति च्वरा ख्योएला होङ।" तेहि हति यक्पुवा हतितुइना राङ टासोङ।

14 पत्रुसयि खिमना लेप छारते च्येला येशुयि ख्युइ इबिला छ्याबा फोक्ते खाटाला ङेरे ताताता थोङदु। 15 ख्युइ हति लाक्पा सुङदेलो, राङ छयाबायि हतिला ताङदे। तेहि हति लाँरे, राङ ख्युइ रुवा क्याइसोङ। 16 जब कमु च्युङदे, हतितुइना हतिबे ख्युइ तेहा ढे काकाला लेइराङ मि ख्योसोङ। राङ ख्युइ वचनने राङ क्याइरे ढे तेबाला फिला तोन्सोङ, राङ चोम नाप्पा होतो, पोरोला टाक्तु च्युक्तेलो। 17 यशैया ङोन्सेखिलङानयि नानाइबि ङोन्सेखिखिला पुरा होङयापला धि च्युच्युवा हिना, "खो खुरि हुइ तुक्का तेबा खेरतेलो, राङ ङि नाझा तेबा खुरते खेरसोङ।"✝

18 जब येशुयि रेँ फाला छ्युला मियि तुम छोम्मुवा झि थोङसोङ, ख्युइ रेँ लोब्टुबाला छोयि फारकानला ढोयापयि आदेश च्युसोङ। 19 शास्त्रि झि ख्युइ तेहा लेप्सोङ, राङ खोला नाइसोङ, "गुरुज्यु, ख्योए काँहा-काँहा डुन, ङा ख्युइ क्याप क्यापला होङज्याइ।"

20 येशुयि हतिला नाइसोङ, "स्यालयि फु राङ पान्नाङयि च्याचिउतेबे छाङ हुन, हिन्नाङ मि पिजायि चाला ता घोबो ङेयापयि सा याङ मिधु।" 21 ख्युइ लोब्टुबे नाङने स्यान चियि नाइसोङ, "प्रभु, ताङला पुते ङाला ङाहि आकेला कुङयापयि आङ नाङ।"✝ 22 हिन्नाङ येशुयि हतिला नाइसोङ, "ङाहि च्येला सअ स्यिस्यियायि राङ हतिबे रेँ स्यिस्यिया कुहोङ।"

23 येशु डुङगाला श्योन छारते ख्युइ लोब्टुतेबा ख्युइ च्येला लेप्सोङ। 24 अकस्मत छोला हुरबो छोम्मुवा-छोम्मुवा झि लेप्सोङ। राङ भाल्लापयि डुङगाला घेबाला छेलसोङ, हिन्नाङ येशु ङि टोटुवा राङ धु। 25 लोब्टुबा लेप्ते झु नेन राङ खोला लाङसोङ, "क्योप प्रभु! ङे स्यियाला छेलसोङ।" 26 येशुयि हतिबाला नाइसोङ, "हिछे टिझि किङान मिबा, खे चिला झिकिन?" तेहि खो लाँरे ख्युइ हुरबो छोम्मुवा राङ छो छोम्मुवाला ङारसोङ, राङ हुरबो छोम्मुवा च्यामाना त्येसोङ। 27 "धि च्हिरु मिने, चिचालानाना हुरबो छोम्मुवा राङ छो छोम्मुवा याङ धि आदेश ङ्यानकिन धु" नाइरे हति मिबा हा:लाइसोङ।

28 जब खो छोयि फारकान यहला गदरिनियि छेत्रला लेप्सोङ, हतितुइना ढे काकालि मि ङि तुरसाने हुइतुइना खोला ठेसोङ। हतिबा झोम झिझिरा धु, कि सु याङ हतिने होङयाप ढोयाप मिकितालो। 29 हतिबे जु नेन राङ क्ये तोनसोङ, "हे कजसुबायि पिजा, ख्युइ ङे ङ्याबो च्हि सरकार? ङि भेला माछाङि तुका तेरतु ख्योए ङिहा लेलेबा हिनाइ?" 30 हतिबेने आरोङ घ्याबोला फायि तुम छे्या झि छुन ताताता धुलो।✝ 31 ढेतेबे खोला जु नेनेगा स्युवा क्यापसोङ, "ख्योए ङेला धोन्ना, ङेला फायि तुमयि नाङला स्युतु छ्यु।" 32 तेहि ख्युइ हतिबाला नाइसोङ, "क्यु।" तेहि हतिबा थोन्दे फायि नाङला स्युसोङ, राङ फायि तुम पोरो टाने छो यहला छारसोङ राङ छ्युला नुपते स्यिसोङ। 33 फा छोङानतेबा टोइसोङ राङ भजारला पुते पोरो ताम राङ हति ढे काकालातेबाला च्हि च्युङ पोरो स्यातेलो। 34 तेहि भजारयि मि पोरो येशुला ठातु लेप्सोङ, राङ खोला थोङदे मितेबे हतिबे साने क्यु नाइरे खोला स्युवा क्यापतेलो।