1 फरिसिबा राङ सदुकिबा लेप्सोङ, राङ खोला छोएतारु तेङलाने हा:लाइतु झ्युयापयि लाइ तोनयापयि खोला माग क्याइसोङ। 2 हिन्नाङ ख्युइ हतिबाला जवाक पिन्सोङ, "कमु च्युङदे खे नेन दु, ‘मोउसम ल होङान ना, चिचालानाना पान्नाङ मोरु धु।’ 3 जबेते नेन्दु, ‘पान्नाङ मोरु राङ मुक्पायि काकाबा धु, तिरिङ हुरबो छोम्मुवा होङयाप हिना’ खे पान्नाङयि अबस्था ताइरे ङिन च्हिरु हुन भेङ्युइकिन, हिन्नाङ भेलायि हा:लाइयापयि लाइयि खुँ भे मिङ्युइबा। 4 अल राङ व्यभिचारयि पालि हा:लाइयापयि लाइ फाकिन, हिन्नाङ योनायि हा:लाइयापयि लाइ अर्थात हतिला स्यान हा:लाइयापयि लाइ तोनङान माना ना।" तेहि हतिबाला ताङदे खो पुइसोङ।

5 लोब्टुबा छो फारकानला क्योबितुइना हतिबे लोटा ख्योङ ज्याइ टाम्बा च्येङान ना। 6 येशुयि हतिबाला नाइसोङ, "ल क्याइरे ङ्योन, फरिसि राङ सदुकितेबे हुरस्युइने लोङयापने च्याङबो क्याइरे त्योए।" 7 हतिबा ख्होरे नाङला नारे क्याइसोङ, "हुइ लोटा माख्योबाइ, राङ ख्युइ धि च्वरा नानाइबा हिना।" 8 येशुयि धि हा:कोरे नाइसोङ, "ए हिछे टिझि किङानबा! खेला लोटा मेता नाइरे चिला खिरि नाङला नारे किन? 9 च्हि खे तरह हा:मिकुवा धुये? तोङ ङाहि चाला लोटा ङाहि ताम खेला तरह टाम्बा मेताइ? खि फुगो चोम रुरुबा होतो?✝ 10 तेहि तोङ स्यियि चाला फुगो चोम खि रुरुबा होतो?✝ 11 तोङ स्यियि चाला लोटा तुन, राङ ङाहि खेला लोटायि भारेला नानाइबा माना नाइरे खे चिला हा:मिकुवा? हिन्नाङ फरिसि राङ सदुकितेबे हुरस्युइ लालाँने च्याङबो क्याइरे त्योए।" 12 तेहि हतिबे हा:कोरेलो, कि ख्युइ लोटायि हुइस्युइ लाँलाँङाने माना हिन्नाङ फरिसि राङ सदुकिबे सोढाने च्याङबो त्योए नानाइबा हिना।

13 येशु कैसरिया फिलिप्पियि छेत्रला लेप्छारते च्येला, ख्युइ रेँ लोब्टुबाला टिसोङ, "मि मियि पिजाला सुना नाइरे नेन धुइ?" 14 हतिबे जवाक पिन्सोङ, "रेन यि बप्तिस्मा तेराङान युहान्ना, रेनयि एलिया, राङ रेनयि यर्मिया वा ङोन्सेखिलङानबे नाङने च्हि हिना नाइरे नेन्दु।" 15 ख्युइ हतिबाला टिसोङ, "खे च्हि नेन, ङा सुना?" 16 सिमोन पत्रुसयि जवाक पिन्सोङ, "ख्योए ख्रिष्ट ना, सोम्बो कजसुबायि पिजा।" 17 येशुयि हतिला नाइसोङ, "योनायि पिजा सिमोन, ख्योए किप्पो ना। चिचालानाना स्यायि मिने ख्योएला धि लेलेबा माना, हिन्नाङ तेङलाला त्योएङानयि कजसुबे धि ताताना ना। 18 ङा ख्योएला नाज्याइ, कि ख्योए पत्रुस टा ना। ङा ङारि चर्च धि टायि थोला लोङ सोच्याइ, राङ हअलुयि कोतेबा धि थोला क्यालङान मानाना। 19 ङा खेला तेङलायि राज्ययि धिमितेबा तेर च्याइ। काङ खि पृथ्‍वीला तेमकिन, सो तेङला ना तेमङान ना, राङ काङ ख्युइ पिरथिविला ढोलिन, सो तेङला ना ढोलङान ना।"✝ 20 खो ख्रिष्ट हिना नाइरे सुला याङ माना नाइरे येशुयि लोब्टुबाला आदेश पिन्सोङ।

21 खो च्हिरु यरुश्लेमला च्हिरु क्याइरे ढोकोइ हुन, राङ केवाकिङान गुरु राङ घोबा पुजारि राङ शास्त्रितेबाने लेइराङ तुक्का ङ्योङकोइहुन, सिकोइ हुन राङ ङिन सुबाला सोम्बो च्युङदे लाँकोइ हुन नाङान येशुयि हति भेलाने ख्युइ लोब्टुबाला नाला छेलसोङ। 22 पत्रुसयि खोला यह चिला खेरते ङाराला छेलसोङ, "कजसुबे जु माके, प्रभु, ख्युइ थोला धि च्वरा जब याङ मिहा।" 23 हिन्नाङ लक्ते ख्युइ पत्रुसला नाइसोङ, "ए तुइ, ङाहि धुन्ने क्यु, ख्योए ङाहि चाला पारछे ना। चिचालानाना ख्योए कजसुबायि तामला माना, हिन्नाङ मियि तामला ध्यान तेरकिनदु।" 24 तेहि येशुयि ख्युइ लोब्टुबाला नाइसोङ, "सु याङ ङाहि च्येला होङसोम किना, ख्युइ राङला माना नोइ राङ रेँ क्रुस खुरते ङाहि च्येला सअ।✝ 25 चिचालानाना सुइ रेँ उ क्योपसोम किन, ख्युइ हति मासि हुन, हिन्नाङ सुइ रेँ उ ङाहि चाला मासि लुइ, हतिला हति खुङान ना।✝ 26 पोरो संसार खुँरे याङ रेँ उ मासि च्युङना, हति मिला च्हि ल हुन? अर्थात मियि रेँ उयि तोप्पोला च्हि तेर ङ्युकिन? 27 चिचालानाना मियि पिजा रेँ आकेयि छे रेँ तेङलायि लोन खेरङान ङ्याबो होङान ना, राङ हति भेलाला ख्युइ मि पोरोला हतियि लाइ च्वरा ढेबु तेराङान ना।✝ 28 तेम्बारे, ङा खे ला नाज्याइ, ङिहा लाँलाँबि नाङने चोमयि मियि पिजाला रेँ राज्यला लेलेबा माथोङ थु स्यियाप च्हि हिना हति टोप्ला मिङ्योङा।"