1 तेहि यरुश्लेमने लेलेबा रेन फरिसितेबा राङ शास्त्रितेबा येशुयि तेहा लेप्सोङ, राङ नाइसोङ। 2 "ख्युइ लोब्टुबे चिचिला ताङबुइ का:नाबे लुलाम तहतु झुकिन? चिचालानाना हतिबा सायापले ताङला रेँ लाक्पा मिठुता।" 3 ख्युइ हतिबाला नाइसोङ, "खे याङ चिचाला रेँ लुलामयि चाला कजसुबायि आदेश मिङ्याना? 4 चिचालानाना कजसुबायि नानाइबा होतो, ‘रेँ आके राङ आमायि सम्मान कि,’ राङ आके या आमायि विरोधला छारझुकिन, हति सिकोइ राङ हुन।✝ 5 हिन्नाङ खे नेन्दु, सु रेँ आमा या आकेला नेन, ‘ख्युइ ङाने च्हि खु ङ्युइकिन, सो कजसुबाला पुपुला होतो।’ 6 ख्युइ खुरि आकि सम्मान कि मिकोइबा, हति च्वरा क्याइरे खि याङ रेँ लुलामयि चाला कजसुबायि वचनला मासि सोइदु। 7 समनाँतेबा, यशैयायि खि भारेला थारे ङोन्सेखिखिला ना, 8 ‘धि मिबा ङाला खायि मात्रा सम्मान किन्दु, हिन्नाङ हतिबे सम ङाले घ्याबोला होतो।✝ 9 हतिबा फानमेताला ङाहि बर्त किन्दु, हिन्नाङ हतिबे छोइ मितेबे लालाबि ठिम मात्रा ना।’" 10 येशुयि लेइराङ मितेबाला रेँ चिना क्ये ताङसोङ, राङ हतिबाला नाइसोङ, "ङ्योन राङ हा:को। 11 काङ खायि नाङला स्युकिन, हति मिला भाभा मिसुवा। हिन्नाङ काङ मायि नाङने फिला थोनकिन, हति मिला भाभा सुन।" 12 तेहि हति च्येला लोब्टुबा लेप्ते खोला नाइसोङ, "च्हि ख्योएला छ्या होतोइ, फरिसिबा ख्युइ ताम थोइरे स्येताङ लाँदु?" 13 हिन्नाङ येशुयि नाइसोङ, "तेङला ना होएते ङाहि आकेयि मा चुबि तोङबोङ पोरो क्कते ढिमकिन।" 14 हतिबाला तोङ, हति काना लामतोन ङान ना। कानायि कानाला ठिते खेरना, हति ङि कार तोङला सोक्याङान ना।✝ 15 पत्रुसयि खोला नाइसोङ, "ङेला धि प्येयि खुँ नोइ।"

16 येशुयि नाइसोङ, "च्हि खे तरह याङ हा:मिकोङान होतोइ? 17 च्हि खेला छ्या मेताइ, काङ खायि नाङला स्युकिन हति टोपा नाङला स्युकिन, राङ स्हुने फिला थोन छारकिन। 18 हिन्नाङ काङ तामतेबा खाने फिला थोनकिन, हति समयि नाङने थोनकिन, राङ हति राङ मिला भाभा सुन। 19 चिचालानाना समने राङ, विचार अल, मिजे क्याइरे प्येयाप, पतार कियाप, स्यानयि केरमान वा ख्योबो ङ्याबो व्यभिचार कियाप, कुम्मा, चुन साछि, राङ कजसुबायि लामा सायाप फिला थोन्किन। 20 धि तामबे मिला भाभा सुन। हिन्नाङ लाक्पा मा टुइबा सासाइबा ति खोला भाभा मिसुवा।"

21 तेहि येशु हतिने थोन्देलो, राङ टुरोस राङ सिदोनयि सातेबाला पुतेलो। 22 हति साने च्हि कनानि पुमो थोन्दे क्ये धोनिन राङ नाला छेलसोङ, "हे प्रभु, दाउदयि पिजा, ङाहि थोला ङिङ्च्ये। ङाहि पुमोला ढेयि लेइराङ तुका पिन्दु।" 23 येशयि हतिला च्याङ जवाक मापिनसोङ। ख्युइ लोब्टुबा लेप्ते खोला स्युवा क्यापसोङ, "धिला बिदा कि, चिचालानाना धि क्ये ङुन राङ हुइ च्येला हुन्दु।" 24 ख्युइ नाइसोङ, "ङा इस्राएल मितेबे क्युक्युरि लुतेबाला फेयापयि चाला मात्रा चाँचाँबा ना।" 25 हिन्नाङ हति पुमो ख्युइ धुनला पुइमु चुरे नाइसोङ, "हे प्रभु, ङाला रुवा कि।"

26 येशुयि नाइसोङ, "च्यिटाकायि लोटा खेरते किबोला ढिमयाप ल मिहा।" 27 यहुदि मान्ते पुमोति नाइसोङ, "हिना प्रभु, हिन्नाङ किबुइ याङ रेँ ताक्पोयि च्योकचेने छाछारि तुबुतेबा सेन।" 28 तेहि येशुयि हतिला जवाक पिन्सोङ, "ए पुमो, ख्युइ हिछे छेया धु। ख्युइ धोप्पा क्याक्याइबा च्वरा ख्योएला सअ।" मुइ पुमो हति भेलाला राङ टाक्तेलो।

29 येशु हतिने थोन्दे गालिलयि छो छोम्मुवायि नेमु ने पुतेलो, राङ रियि थोला त्येसोङ। 30 तेहि तुम छेया-छेया ख्युइ धुनला लेप्सोङ, राङ हतिबा ङ्याबो ख्योख्योबा ढुढिया, लेम्बा, काना, ताम ना मिङ्युइङान स्यान लेइराङला ख्युइ धुन्ना पोरते, तेहि ख्युइ हतिबाला टाक्तु च्युक्तेलो। 31 धि थु कि, ताम ना मिङ्युइङान ताम नाङान, लेम्बा बा टाटाका, ढुढीया काङबि पुपुता राङ कानाबे मि पेपेया थोङदे मितेबा हा:लाइरेलो, राङ हतिबे इस्राएलयि कजसुबायि छे तेक्तेलो।

32 तेहि येशुयि रेँ लोब्टुबाला रेँ चिना क्ये ताङदे नाइसोङ, "धि मितेबाला ङिङच्यिन धु, चिचालानाना धिबा ङा ङ्याबो ताताता तिरिङयि ङिन सुम च्युङसोङ, तेहि धिबाला सायापयि चाला च्याङ मेता। धिबाला तबा चोङयाबयि सम मेता। स्यान अर्थात हतिबा लम्मा विहोशला ढुन।" 33 लोब्टुबे खोला नाइसोङ, "धि च्वरा तुम छेयाला धि च्याङ मेते साला स्योमयापयि चाला काने झोम लोटा खुकिन?" 34 येशुयि हतिबाला नाइसोङ, "खेला लोटा चोम लोटा होतो?" हतिबे नाइसोङ, "लोटा तुन राङ रेन ङ्या टिमा होतो।" 35 ख्युइ तुमला साला त्योएयापयि आदेश पिन्सोङ। 36 ख्युइ हति लोटा तुन राङ ङ्या खेरते कजसुबाला कटिनक्या नाइछारते च्येला च्याक्ते लोब्टुबाला पिन्सोङ, तेहि लोब्टुबे मितेबाला पिन्सोङ। 37 हतिबा पोरोयि स्याइरे राङ ढारेलो। राङ लालाकि तुबुतेबा हतिबे फुगो तून काङ तुइरेलो। 38 पुमो राङ च्यिटाका माङोइबा साङानतेबा तोङ स्यि पिजा होतो। 39 तेहि मिझोमला बिदा क्याइ छारते खो डुङगाला स्योनदेलो, राङ मगादानयि सा यहला पुतेलो।