1 ख्हुइ रेँ च्युनङि लोब्टुबाला क्ये ताङदे भाभा ढेतेबाला धोनयापयि राङ च्हिरु नाझा च्युङ नाङ टाक्तु झुयापयि आङ हतिबाला पिन्सोङ। 2 च्युनङि लोब्टुतेबे मिन धिना, ताङस्युवा पत्रुस नाङान सिमोन राङ हति भाइ अन्द्रियास, जब्दियायि पिजा याकुब राङ हति भाइ युहान्ना, 3 फिलिप राङ बारथोलोमाइ, थोमा राङ कर तुइङान मत्ति, अल्फयसयि पिजा याकुब राङ थेदियस, 4 सिमोन कनानि राङ यहुदा इस्करियोत, सुइ येशुला सुङदु च्युकते।

5 येशुयि हति लोब्टु च्युनङिला जु नाइरे आदेश च्युक्ते चाँरेलो, "यहुदि मान्ते मितेबे उइला माढो, राङ सामरियायि भजारला मास्यु।✝ 6 हिन्नाङ इस्राएल मितेबायि तोतोरि लुतेबे चिना क्यु। 7 ‘तेङलायि राज्य धुनला होङलेके धु नाइरे,’ टाइक्ये कि। 8 नाप्पातेबाला टाक्तु छ्यु, स्यिस्यियातेबाला सोम्बो सोइ, लाक्पा काकामि नाझा होएतातेबाला चाङमा सोइ, ढेतेबाला थोन। खेला लाइला क्याइरे कुँरे, लाइला ला राङ पिन। 9 खे रेँ काराला सेर, ङुल राङ स्हायि सिक्का माखुर, 10 ढुल कियापयि चाला झोला, झोर ङि कोचिया, पौला, पेरका माखेर। चिचालानाना स्यिङयि लाइकिङानयि ख्युइ ङ्योप्पा खुकोइ हुन।"✝ 11 "काङ भजार कि युलाला खे स्युकिन, हतिया सु झ्योनबो धु नाइरे फोए, राङ हतिने छुट्टि मा च्युङथु हतिया राङ त्योए। 12 हति खिमयि नाङला स्युभि तुइना नमस्ते कि। 13 हति खिम ल होएना, खि शान्ति हति खिमला सअ। हिन्नाङ हति खिम ल मेना, खि शान्ति खेला राङ लक्ते सअ। 14 तेम्बारे सुइ याङ खेला माङ्यान ना वा खि ताम माङ्यान ना, हति खिम अर्थात भजारने थोतुनिइना रेँ काङबायि साबे स्यु।✝ 15 तेम्बारे ङा खेला नाज्याइ, ल अल भेयापयि ङिनला हति भजारयि दशाले बरु सदोम राङ गमोरायि हालत लेइराङ सहिकि ङ्युङान होङान ना।"✝

16 "तोइ, ङा खेला वाजेबे तुमयि उइला लु च्वरा क्याइरे चोँङिन होए, हतिचाला खे रुल च्वरा च्याङबो राङ ङोम्मु लेम्बा सअ।✝ 17 हिन्नाङ मितेबाने च्याङबो कि, चिचालानाना हतिबे खेला अदालतला स्योएङान ना राङ हतिबे यहुदि झोमसि खिमला खेला च्यायि छेरमा क्याङान ना। 18 खेला ङाहि चाला हाकिमतेबा राङ क्यालबोतेबे धुनला लाँतु झ्युङान ना राङ खे राङ यहुदि मान्ते मितेबे चाला साछि होङान ना। 19 हिन्नाङ जब हतिबे ख्योएला सुङदु झ्युकिन, तेहि च्हिरु क्याइरे राङ च्हि नाज्याइ नाइरे सम तु माके। चिचालानाना खि च्हि नायाप ना, हति भेलाला खेला नाङान ना। 20 चिचालानाना नाङान खे राङ होङान ना, हिन्नाङ खि आकि आत्मा खि लाम्ला नाङान ना।" 21 "भाइयि भाइला सोएयापयि चाला सुङदु झुङान ना राङ आकि पिजाला, पोमुला राङ पिजा राङ पोमु आके आमायि विरोधला लाँङान ना राङ हतिबाला सोतु झ्युङान ना। 22 ङाहि मिनयि चाला पोरोने खे अल होङान ना। हिन्नाङ सु सिनसिन थु तोकिन, हति थारथोनङान ना। 23 जब हतिबे खेला भजार झिला तुक्का तेरिन तेहि हतितुइना स्यान झिला टोइरे क्यु। चिचालानाना ङा तेम्बारे खेला नाज्याइ, मि पिजा होङयापले ताङला खे च्हि क्याइरे याङ इस्राएलयि भजार पोरो खि खिरि लाइ चाचारा होङान माना ना।"

24 "लोब्टु रेँ गुरुले राङ यक्पुवा रेँ ताक्पोले छेया मिहा। 25 लोब्टु रेँ गुरु च्वरा राङ यक्पुवा रेँ ताक्पो च्वरा होङयाप ढुक्क होतो तेम्बारे खि खिमयि ताक्पोला राङ बालजिबुल* नानाइबा होएना, हति प्येराला झन चोम नेन?"

26 "हतिचाला हतिबाला माझि। चिचालानाना कापते मिथोन याप राङ भाइरे हा:मिकोङान सुयाङ मिहा। 27 काङ ङा खेला मन्नाला नेन, हति खे साल्बोला नोइ, राङ काङ खि नामज्योला थोयिन, हति खिमयि खानाने टाइक्ये कि। 28 हतिबाला माझि सुइ स्हुते सोकिन, हिन्नाङ समला सयोए मिङ्युइबा। बरु सम राङ सु ङिकारला ङ्यालबाला मासि लोङ ङ्युइङान कजसुबाला झि। 29 च्हि आलाइ ङेला च्यिलपा ङि मि घ्युराइ? हति नाङने च्हि याङ खि आकि धोप्पा माक्याइना साला मिछारा। 30 खि घोबुइ स्येबु पोरो टाँगा चिरे च्हि क्याक्याइबा होतो। 31 हतिचाला खे माझि, खे लेइराङ च्यिलपाले याङ घोङछेया होतो।"

32 "हतिचाला पोरो सुइ ङाला मियि धुनला ङ्यानकिम, ङा याङ हतिला तेङला ना होएता ङाहि आकि धुनला ङ्यानज्याइ। 33 हिन्नाङ पोरो सुइ ङाला मितेबे धुनला ङोमिस्येबा नेन, ङा याङ हतिला तेङलाना होएता ङाहि आकि धुनला ङोमिस्येबा नाज्याइ।"

34 "ङा पिरथिविला शान्ति ख्योङदु लेलेबा ना नाइरे माटान। शान्ति ख्योङदु माना, हिन्नाङ तोरवालि चलाइ कितु लेलेबा ना। 35 चिचालानाना ङा मिला हति आकि विरोधला राङ पोमुला हति आमायि विरोधला राङ जबला हति इबियि विरोधला कितु लेलेबा ना।" 36 मियि टा रेँ खिमयि प्येरे नाङने राङ होङान ना। 37 "सुइ ङाले याङ मा रेँ आके राङ आमाला करि किन, हति ङाहि लोब्टुयि झोदायि मिहा। सुइ ङाले याङ मा रेँ पिजा याङ पोमुला किन, हति ङाहि लोब्टुयि झ्योदायि मिहा। 38 सु रेँ क्रुस खुरते ङाहि च्येला मिहा, हति ङाहि लोब्टुयि झ्योदायि मिहा। 39 सुइ रेँ उ क्योबिन, ख्युइ हति मासिलोङिन, राङ रेँ उ ङाहि चाला मासि लोङानति हतिला मिजे खुङान ना।

40 "खेला ङ्यानङानति ङाला ङ्यानकिन, राङ ङाला ङ्यानङानति ङाला चोँङानला ङ्यानकिन। 41 सुइ कजसुबायि ङोन्सेखिलङानला स्वागत किन चिचालानाना खो कजसुबायि ङोन्सेखिलङान ना, खोला ख्युइ इनाम खुङान ना। राङ सुइ केवाकिङान मिला स्वागत किन चिचालानाना हति केवा किङान मि ना, खोला ख्युइ इनाम खुङान ना। 42 सुइ धि टिमाबे नाङने चिला ङाहि लोब्टु मानि क्याइरे भोटो झि छ्यु टाङमु झि मात्रा याङ थुङयापला पिन्ना, तेम्बारे ङा खेला नाज्याइ, हति रेँ इनाम नामयाङ मासि मिलुँवा।"