1 हति भेलाला येशु ङालसुइ ङिनला बालियि स्यिङबा च्युङदे ढुन त्येतु। ख्युइ लोब्टुबा टोपा ततबा धुलो राङ तोन भालियि ङिमा तुइरे साहाला छेलसोङ। 2 हिन्नाङ फरिसिबे धि थोङदे येशुला नाइसोङ, "तोइ, ख्युइ लोब्टुबा ङालसुइ ङिनला काङ कियाप ल माना, हति किनदु।" 3 हिन्नाङ येशुयि हतिबाला नाइसोङ, "दाउदयि, खो राङ खो ङ्याबो होएता च्हि क्याइरे, च्हि खि टटबा मेताइ?✝ 4 च्हिरु क्याइरे ख्युइ कजसुबायि खिमयि नाङला पुते पुपुलि लोटा साइरे? हति लोटा सायाप ता खोला न खो ङ्याबो होएताला, हिन्नाङ मात्रा पुजारिबाला मात्रा ल होतो।" 5 अर्थात च्हि मोशायि ठिमला टटबा मेताइ, च्हिरु क्याइरे ङालसुइ ङिनला पुजारिबे मोनलाम क्यासि खिमला ङालसुइ ङिनला भाभा सोइरे, राङ याङ दोषि मेता सोइरे?✝ 6 हिन्नाङ ङा खोला नाज्याइ, "मोनलाम क्यासि खिमले हा:छेया ङिहा सु याङ होतोइ। 7 हिन्नाङ पवित्रशास्त्रा नेन्दु, ‘ङा भोल क्यायाप माना, ङिङ्च्ये धोप्पा किन’ नानाइबि खुँ चिना सो खि हा:कोकुवा नाना खि दोषि मान्ताला ख्योङान दोषि मासोइबा ना।✝ 8 चिचालानाना मियि पिजा ङालसुइ ङिनयि प्रभु ना।"

9 हतिने थोन्दे येशु हतिबे यहुदि झोमसि खिमला पुतेलो। 10 हतिया लाक्पा काकामा मिझि धुलो। हतिबे येशुला दोष सोयापयि विचारयि खोला टिरेलो, "च्हि ङालसुइ ङिनला सुलाङ टाक्तु झ्युयाप ल हिनाइ?"

11 येशुयि हतिबाला नाइसोङ, "खि नाङने सुइ याङ लु झि होतो, राङ ङालसुइ ङिनला हति तोङला छार रच्चिया नाना, च्हि ख्योए हतिला सुङदे फिला मिधोनाइ? 12 लु ले मि चोमयि घोङ छेया ना? हतिचाला ङालसुइ ङिनला ठिमयि अनुसार ल कियाप ल ना।" 13 तेहि ख्युइ हति मिला नाइसोङ, "ख्युइ लाक्पा क्योङ।" हति लाक्पा क्याङसोङ, राङ हति लाक्पा स्यानति च्वरा थारका च्युङसोङ। 14 हिन्नाङ फरिसिबे फिला पुते खोला च्हिरु क्याइरे सोच्याइ नाइरे ख्युइ विरोधला टोइ किताला छेलसोङ।

15 तेहि हति ताम हा:कोरे येशु हतिने पुइ छारसोङ, राङ लेइराङ ख्युइ च्येला लेप्सोङ, राङ ख्युइ हतिबा पोरोला टाक्तु च्युसोङ, 16 राङ खो सु हिना सुला याङ मिनायापयि हतिबाला चेतावानि पिन्सोङ। 17 यशैया ङोन्सेखिलङानयि लाम्ला कजसुबायि नानाइबि वचन पुरा होङ नाइरे राङ धि नानाइबा ना, 18 "ङाहि यक्पुवा सुला ङाहि धाम्दे, ङाहि करि मि सु ङ्याबो ङा काका होतो, ङा ङाहि आत्मा हतिला भोर च्याइ, राङ हति यहुदि मान्ते मितेबाला न्याययि टाइक्ये किङान ना। 19 हति न क्याइरे च्येङान ना न लेइराङ क्ये धोनङान ना, न त सुइ याङ ख्युइ क्ये युलयि लाम्ना माला थोइङान ना। 20 छ्याछ्याकि ङ्युमा हति च्योङान माना ना, राङ स्ययाला छेलङान किङानयि छोएमे हति सोएङान मानाना। राङ च्येस्युवाला ल अल भेयापला क्यालदु झ्युङान ना। 21 ख्युइ मिनला रास्ट्र रास्ट्रयि मि पोरोयि आशा भोरङान ना।"

22 तेहि ख्युइ तेहा ढे काकाला च्हि काना राङ लेम्बा मि ख्योरेलो। येशयि हतिला टाक्तु च्युसोङ, धि थु कि, हति लेम्बा मि ताम ना ङ्युङान राङ थोङान च्युङसोङ। 23 तेहि मिझोम पोरो हा:लाइरे नाइसोङ, "च्हि धि दाउदयि पिजा राङ हिन होएरोए?"

24 हिन्नाङ धि थोइरे फरिसिबे नाइसोङ, "धि मियि तुइतेबे ताक्पो बालजिबुलयि लाम्ला मात्र ढेतेबाला धेकिन?"

25 हिन्नाङ येशुयि हतिबे विचार हा:कोरे हतिबाला नाइसोङ, "ङ्याबो खा पेपेया पोरो राज्य मासि सोङान ना, राङ पोरो भजार अर्थात रेँ खिमयि प्येरा च्यिकि नाङला ठुझि च्युङना हति मिलुइबा। 26 तेम्बारे तुइयि तुइला धोन्ना ता, हति रेँ विरोधला खा पिन, राङ हचु हिन्ना च्हिरु क्याइरे हति राज्य लुइकिन? 27 तेम्बारे ङाहि बालजिबुलयि लाम्ला ढेतेबा धेना, खि पिजातेबे सुइ चाने हति धोनकिन? हतिचाला हतिबा राङ खि ल अल भेङान होङान ना। 28 हिन्नाङ तेम्बारे कजसुबायि आत्मायि लाम्ला ङा ढेतेबा धेकिन नाइना कजसुबायि राज्य खि तेहा लेप छारते।" 29 "ताङला स्युछेया मिला मातामना। हति खिमयि नाङला स्युरे सुइ हति क्यु सामान खेरते ढो ङ्युकिन? हति तोप छेयायि मितेला तामदे च्येला मात्रा हति खिमने कु ङ्युइकिन।" 30 "सु ङा ङ्याबो मेता, हति ङाहि विरोध्ला होतो, राङ सुइ ङा ङ्याबो मितुता, हति थोरतु झ्युकिन। 31 हतिचाला ङा खेला नाज्याइ, मियि क्याक्याइबि तिक्पा पोरो राङ कजसुबाला अल नानाइबा माप खुङान ना, हिन्नाङ पवित्र आत्मायि विरोधला अल नानाइबा माप मिहा। 32 सुइ याङ मियि पिजायि विरोधला चिगा नाइना हतिला माप खुकिन, हिन्नाङ सुइ याङ पवित्र आत्मायि विरोधला नाइना हतिला धि काल्बा राङ होङानयि कालबा लायाङ माप मिखुबा।"

33 "कि तोङबोङला ल सोइ राङ हति ढेबु ल होङान ना। कि तोङबोङला अल सोइ राङ हति ढेबु याङ अल होङान ना, चिचालानाना ढेबु ने राङ तोङबोङ ङोसेकिन।✝ 34 ए रुलयि च्यिटा च्वरा चुन नाङान मिबा! खे-खे राङ अल धु, ल ताम च्हिरु क्याइरे ना ङ्युइकिन? चिचालानाना समला ला खाँखाँबि ताम राङ खाने थोनकिन।✝ 35 ल मियि रेँ नाङला खाँखाँबि ल क्युने ल क्यु राङ धोनकिन, हिन्नाङ अल मियि राङला खाँखाँबि अलने अल क्यु धोनकिन।"

36 "ङा खे ला नाज्याइ, पोरो छ्योमेतायि ताम काङ मितेबा नेन, ल अल भेयापयि ङिनला हतिबे हति टिरे तेरकोइहुन। 37 चिचालानाना ख्युइ वचनबाने ख्योए च्याङ माक्याइबि मि होङान ना, राङ ख्युइ वचनबने ख्योए दोषि होङान ना।"

38 तेहि शास्त्रिबा राङ फरिसितेबे नाङने रेन रेनयि खोला नाइसोङ, "गुरुज्यु, ङे ख्योएने हा:लाइयापयि लाइ झि ता सोम होए।"✝ 39 येशुयि हतिबाला जवाक पिन्सोङ, "अल राङ व्यभिचार यि पालियि हा:लाइयापयि लाइ फाकिन। हिन्नाङ धि पालि ला योना ङोन्सेखिलङानयि हा:लाइयापयि लाइ अर्थात स्यान हा:लाइयापयि लाइ तोनङान मानाना।✝ 40 चिचालानाना च्हिरु क्याइरे योना ङिन सुम छान सुम ङ्या छेया झिकि टोपायि नाङला ताते, हति च्वरा क्याइरे मियि पिजा याङ पिरथिवि टोपि नाङला ङिन सुम छान सुम त्योएङान ना।✝ 41 निनवेयि मितेबा कजसुबायि ल अल भेयापयि ङिनला धि पालि ङ्याबो लाँङान ना, राङ हतिला दोषि सोङान ना, चिचालानाना हतिबे योनायि टाइक्ये कितितुइना घ्योप्पा क्याइसोङ, हिन्नाङ तोइ, योनाले छेया ङिहा सु याङ होतोइ।✝ 42 लोयि क्यालमु ल अल भेयापयि ङिनला धि पालि ङ्याबो लाँङान ना, राङ हतिला दोषि सोङान ना, चिचालानाना हति पिरथिवियि मोइ धुन्ने सोलोमनयि बुद्दि तामबा ङ्यान दु लेप्तेलो। हिन्नाङ तोइ, सोलोमनले छेया ङिया सु याङ ङिहा होतोइ।✝

43 "जब अल आत्मा मियि नाङने फिला थोन्दे ढुन, हति ङालसो फाकिन राङ ओबानोयि सा यहला युकिन राङ ढुनलो, हिन्नाङ काँहा याङ मिखुबा। 44 तेहि हति नेन लो, काने ङा थोन्दे लेप्ते, हतिया राङ ङा रेँ खिमला ‘ङा लक्ते ढोज्याइ।’ लक्ते हुइतुइना हति खिम तोङबा चाङमा सोसोइबा, राङ पोरो राङ ठाकिनलो। 45 तेहि हति ढुन राङ राङले याङ लेइराङ अल स्यान तुन थाबा ढे राङ ङ्याबो ख्योङिन, राङ नाङला स्युरे हतिबा हतिया ढोम्बोला तोकिनलो, राङ हति मियि च्येमा दसा ताङलाने तरह अल हुन। धि अल पालि ला याङ हति च्वरा होङान ना।"

46 येशु मिझोमबा ङ्याबो ताम नेन तातताला, ख्युइ आमा राङ भाइबा फिला लाँरे त्येतु, राङ खो ङ्याबो ताम ना सोम धुलो नाइरे मिझिला लोन चाँधु। 47 तेहि चिकि येशुला नाइसोङ, "तोइ, ख्युइ आमा राङ ख्युइ भाइबा फिला लाँरे त्येतु, राङ ख्योए ङ्याबो ताम नासोम किन्दु।" 48 हिन्नाङ खो ङ्याबो ताम नाङानला येशुयि नाइसोङ, "ङाहि आमा सुना? ङाहि भाइबा सुना?" 49 तेहि ख्युइ रेँ लाक्पि तोनिन राङ लोब्टुबाला नाइसोङ, "तोइ ङाहि आमा राङ भाइबा। 50 चिचालानाना सुइ तेङलाना होएता ङाहि आकि धोप्पा ङ्यानकिन, हति राङ ङाहि भाइ, राङ भैनि, राङ ङाहि आमा ना।"