1 हति ङिन येशु खिमने थोन्दे छो छोम्मुवायि नेमुला छोलि लोप्तु त्येसोङ। 2 तेहि होचोम मियि तुमछेया झि छो छोम्मुवायि नेमुला झोम्सोङ, "कि खो डुङगाला स्योनदे त्येसोङ, तेहि मि पोरो नेमुला लाँरे त्येसोङ।"✝ 3 ख्युइ हतिबाला प्येला लेइराङ ताम नाइसोङ। ख्युइ नाइसोङ, "ङिन झि सावोन झुङान मिझि सावोन झुतु पुइसोङ। 4 हति च्वरा क्याइरे सावोन झुबितुइना रेन सावोन लामला छारसोङ, राङ च्याचिउ लेप्ते हति साइसोङ। 5 रेन सावोन टोउ होएताला छारसोङ, काँहा लेइराङ टोउ मिधु, राङ सा तिङरिङमुवा मेताति हति घ्यबो राङ क्येसोङ। 6 हिन्नाङ जब ङिमा स्यारते हति रेछारसोङ, राङ प्हारा मेता ति हति कामछारसोङ। 7 रेन छेरमि उइला छारसोङ, हिन्नाङ छेरमातेबा छारिन लेप्ते हतिला लेसोङ। 8 सावोन रेन ल तेबा साला छारसोङ, राङ रेनयि क्या, राङ रेनयि खलसुम, रेनयि सुम च्यु गुणा ढेबु पिन्देलो।"

9 तेहि येशुयि नाइसोङ, "सुइ नामज्यो होए, हति ङ्योन।"

10 तेहि लोब्टुतेबा लेप्ते खोला नाइसोङ, "ख्योए चिला हतिबा ङ्याबो प्येला ताम नेन?" 11 ख्युइ हतिबाला जवाक पिन्सोङ, "खेला ता तेङलायि राज्ययि हा:मिकोङानबे तामयि छोइ पिपिना होतो, हिन्नाङ हतिबाला पिपिना मेता। 12 चिचालानाना सुला होतो, हतिला तरह लेइराङ तेरङान ना, राङ हतिला लेइराङ होङान ना। हिन्नाङ सुला मे, हतिला होएता तेयाङ हतिने ठङान ना।✝ 13 हतिचाला ङा खे ङ्याबो प्येला ताम नेन ‘चिचालानाना खे ताज्याइ ता तेन धु, हिन्नाङ मिथुवा, ङ्यान ज्याइता ङ्यानकिनदु, हिन्नाङ थोइरे हाङ हा:मिकुवा।’ 14 यशैयायि ङोन्सेखिखिला खेने पुरा च्युच्युवा होतो ङ्यानज्याइ ता खे ङ्यानकिनदु, हिन्नाङ जब याङ हा:मिकुवा, ताज्याइ ता तेनदु, हिन्नाङ जबयाङ मिथोङा। 15 चिचालानाना धि मितेबे सम लेम्बा च्युङदु राङ हतिबे नामज्यो होनदु, राङ हतिबे रेँ मि चुमदे त्येतु, स्यान अर्थात हतिबे मियि थोङान ना, नामज्योयि थोइङान ना, समयि हा:कोङान ना, राङ लक्ते होङान ना, राङ ङा खेला टाक्तु झ्युङान ना।" 16 हिन्नाङ खि सोरे ना, चिचालानाना हति थोङिन्दु। खि नामज्यो सोरे ना, चिचालानाना हति थोयिन।✝ 17 तेम्बारे ङा खेला नाज्याइ, खि थोथोङि ताम लेइराङ ङोन्सेखिलङानतेबे राङ केवाकिङानबे मितेबे तायाप लेइराङ धोप्पा क्याइसोङ, हिन्नाङ माथोङा, तेहि खि थोथोइबायि ताम ङ्यानयापयि धोप्पा क्याइसोङ, हिन्नाङ माङ्याना।

18 "सावोन झुङानयि प्ये खुँ ङ्योन। 19 जब सुइ मियि तेङलायि राज्ययि वचन ङ्यानकिन, राङ सो हा:मिकुवा, तेहि अल होङिनलो राङ हति समला काङ थोरतु च्युच्युका होतो सो ठरे खेरकिनलो। लामला चुचुबायि सावोनते हति राङ ना। 20 टोउ होएते साला चुचुबि सावोनते हति ना, सुइ वचन ङ्यानि पाल्ला केन राङ हति ङ्यानकिन। 21 हिन्नाङ हति रेँ प्हारा मेताति हति टिझि थु मात्रा तोकिनलो, राङ वचनयि चाला तुका या दशा घर लेबि पाल्ला हति मासि हुन। 22 छेरमाला सावोन चुचुबाते हतिना, सुइ वचन ङ्यानकिन, हिन्नाङ हति संसारयि समतु राङ क्युनोरयि छलति वचनला लेकिन, राङ हति ढेबु मितेरङान हुन। 23 हिन्नाङ ल साला चिचुबाते सावोनते हति ना, सुइ वचन ङ्यानकि न, राङ हा:कुनलो, राङ तेम्बारे ढेबु छ्यातु झ्युकिनलो। हतिने ताताबयि सावोनयि क्या गुणा, खलसुम गुणा राङ सुम च्यु गुणा ङिमा छ्याकिनलो।"

24 येशुयि याङ हतिला स्यान प्ये झि स्येसोङ तेङलायि राज्य मिझि च्वरा ना, सुइ रेँ स्यिङला ल सावोन धेपकिन। 25 हिन्नाङ मितेबा ङ्यालिन ताताताला ख्युइ टा लेप्सोङ, राङ ढुतेबे उइला युरमा सावोन धेपकिन-धेपकिन पुइसोङ। 26 जब भोटि थोन्दे हतिला छ्यारे, तेहि युरमा याङ थोङसोङ। 27 खिमयि ताक्पोयि यक्पुवातेबा लेप्ते खोला नाइसोङ, "‘हजुर, च्हि ख्युइ रेँ स्यिङला ल सावोन ताताबा मानाइ? ङिहा युरमा काने लेप्ते?’" 28 "खिमयि ताक्पोयि हतिबाला नाइसोङ, ‘सु टाझिकि धि च्वरा क्याक्याइबा ना।’ यक्पुवातेबे हतिला नाइसोङ, ‘च्हि ङे पुते हति घके?’" 29 "हिन्नाङ ख्युइ नाइसोङ, ‘हति च्वरा माके, स्यान अर्थात खि युरमा घोकितुइना ढु याङ ङ्याबो घङान ना।’ 30 तोनतुइयापयि भेला थु हति ङि कारला ङ्याबो-ङ्याबो छारतु छ्यु। तोनतुइयापयि भेलाला ङाङानतेबाला ङा नाज्याइ, ‘ताङला युरमा कोक्ते मेला क्यायापला छ्याक्पा-छ्याक्पा तोम, हिन्नाङ ढुते ङाहि कुटिला पोर।’"

31 येशुयि हतिला स्यान प्ये झि नाइसोङ, "तेङलायि राज्ययि रोयायि सावोन च्वरा ना, सुइ मिझिकि खेरते रेँ भारिला चुसोङ। 32 हति सावोन पोरोले छुवा हिना, हिन्नाङ जब छारकिन, तेहि हति पोरो सागले छेया हुन राङ तोङबोङ राङ हुन। पान्नाङयि च्याचिउतेबा लेप्ते हति ढालातेबाला छाङ सुनलो।" 33 ख्युइ हतिबाला स्यान झि प्ये नाइसोङ, "तेङलायि राज्य सोढा* च्वरा ना, काङते पुमो झिकि ङि स्यु राङ च्यु किलोग्राम फेला स्येरे, राङ हति पोरो सोढायि भोइरे ल माच्युङ थु हतिला सा झिला पोरते।" 34 येशुयि धि ताम पोरो प्येला नाइसोङ। प्ये मेताला ख्युइ हतिबाला च्याङ मानाइसोङ। 35 ङोन्सेखिलङानयि लाम्ला धि नानाइबा वचन पुरा च्युङसोङ, "ङा रेँ खा प्येतेबाला भेज्याइ, संसारके काल्बा छ्याने भाभाइबि ताम ङा नाज्याइ।"✝

36 तेहि खो मिझोमला ताङदे येशु खिमला पुइसोङ, राङ ख्युइ लोब्टुतेबा ख्युइ तेहा लेप्ते नाइसोङ, "स्यिङयि युरमायि भारेला प्येयि खुँ ङेला नोइ।"

37 येशुयि हतिबाला जवाक पिन्सोङ, "ल सावोन धेपङानते मियि पिजा ना। 38 तेहि स्यिङ संसार ना। ल सावोनते राज्ययि सन्तन ना, राङ युरमा अलयि सन्तन ना। 39 युरमा झुङानते टा तुइते ना। भालि तुइयापयि भेलाते काल्बा सिनयापयि च्येस्युवाते ना। स्यिङयि लाइ किङानतेबा तेङलायि लोन खेरङानतेबाना।" 40 "च्हिरु क्याइरे युरमा कोक्ते मेला झुकिन, काल्बा तँबितुइना याङ हति च्वरा होङान ना। 41 मि पिजा रेँ तेङलायि लोन खेरङानबा चोङान ना, राङ तिक्पा कितु झ्युङान पोरो क्यु राङ लाइ अल कितु झ्युङान पोरोला हतिबाला हति राज्यने तुइङान ना, 42 राङ हतिबाला मेयि मेरतोला ढिमङान ना। हतिया मितेबा ङुङान ना राङ सो चेङान ना। 43 तेहि केवाकिङानतेबा रेँ तेङलायि आकि राज्यला ङिमा च्वरा होए क्याङान ना। सुइ नामज्यो होतो, हति ङ्योन।

44 "तेङलायि राज्य स्यिङ झिला कुँरे पोपोरि कुकुबि क्यु च्वरा ना, काङते मिझिला खुरे भाइरे भोरकिन, राङ आन्नद च्युङदे खो ढुन राङ राङला होएता पोरो छोङिनम राङ हति स्यिङ ङ्युन।

45 "याङ तेङलायि राज्य ल नोरबु फेङान छोङ क्याङान झि च्वरा ना। 46 हति घोङ छोम्मुवा नोरबु झि खु छारते पुते राङला होएता पोरो चोँरे हति नोरबु ङयोइसोङ।

47 "तेङलायि राज्य छो छोम्मुवाला चुचुबि झालि झि च्वरा ना, काङला कुरु-कुरु ङ्या पोरो थेपबिन। 48 तेहि झाल खाँ छारते मितेबे हतिला नेमुला टुते तोन्सोङ, राङ ताते ल तेबाला धाम्दे स्हभुला च्युसोङ राङ, अलतेबा पोरोला फिला टिम्सोङ, 49 काल्बा तँबितुइना हति च्वरा राङ होङान ना, तेङलायि लोन खेरङान लेप्ते अल तेबाला केवाकिङानतेबे उइने भेङान ना, 50 राङ हतिबाला मेयि मेरतोला ढिमङान ना। हतिया मितेबा ङुङान ना राङ सो च्येरु झ्युङान ना।"

51 येशुयि टिसोङ, "च्हि खि धि तामबा पोरो हा:कोसुइये?" हतिबे खोला जवाक पिन्सोङ, "हा:कोसोङ।"

52 तेहि येशुयि हतिबाला नाइसोङ, "हतिचाला तेङलायि राज्ययि छोइ खुखुबा पोरो शास्त्रि खिम झिकि ताक्पो च्वरा ना, सुइ रेँ झुप्पुने सारबा राङ ङिङबा घोङछेया सामानतेबा फिला धोनिन।"

53 धि प्येतेबा नाइछारते च्येला येशु हतिने पुइसोङ। 54 तेहि रेँ भजारला लेप्छारते ख्युइ हतिबे यहुदि झोमसि खिमला हतिबाला धि च्वरा छोइ पिन्देलो, कि हा:लइरे हतिबे नाइसोङ, "धिला धि बुद्धि राङ हा:लाइयापयि लाइ कियापयि शक्ति काने खरे? 55 च्हि हति स्यिझुवायि पिजा मानाइ? च्हि ख्युइ आमायि मिन मरियम, राङ ख्युइ भाइतेबा याकुब, योसेफ, सिमोन राङ यहुदा मानाइ? 56 च्हि ख्युइ इझि भैनिबा पोरो हु ङ्याबो मेताइ च्हि? हचु हिन्ना खोला धिबा पोरो काने खुरे?" 57 तेहि हतिबा खोला सेताङ क्याइसोङ। हिन्नाङ येशुयि हतिबाला नाइसोङ, "ङोन्सेखिलङानला रेँ अल मुलु राङ रेँ अल खिमला अर्थात स्यान पोरो साला सम्मान किन।" 58 तेहि हतिबे हिमिछेयि क्याइरे हतिया ख्युइ शक्तियि लाइ स्यान लेइ मा क्याइबालो।