1 "स्यानला न्याय माके, राङ कजसुबायि याङ खेला न्याय मिकिता।" 2 चिचालानाना च्हिरु क्याइरे खे स्यानला न्याय किन, हति च्वरा क्याइरे खेला याङ न्याय किन। काङ नापि कियापयि खे छे क्याकिन, हति च्वरा क्याइरे खे चाला याङ नापि किन।✝ 3 चिला ख्योए रेँ भाइयि, मिला होएता साबियि धोक्पो थोङिन, हिन्नाङ ख्युइ रेँ मिला होएता ठोस्योते हा:मिकुवा। 4 "अर्थात ख्युइ रेँ मिला ठोस्यो होएना च्हिरु क्याइरे ख्योए ख्युरि भाइला नाङ्युइकिन। ‘ङाला ख्युइ मिने साबेयि धकपोते धोनदु छ्यु,’ 5 ए समनाँ, ताङला रेँ मिने ठोस्यो थोन, तेहि ख्युइ भाइयि मिने साबेयि धोक्पो धोनयापला साल्बो क्याइरे थोङ्युइकिन।" 6 "काङते पवित्र होतो हति किबोला मातेर। रेँ थाति क्युतेबा फायि धुनला माढिम, स्यान अर्थात हति रेँ काङबायि हतिला नोनयाप राङ लक्ते ख्योएला मुरे रोलदु लेबोङ।"

7 ल्हँ ख्योएला तेराङान ना, फोए ख्योएला खुङान ना, को तु ख्युइ चाला भेङान ना। 8 चिचालानाना सुइ लोङिन, हतिला खुकिन, सुइ फाकिन, हतिला खुकिन, सुइ को तुइ, हति चाला को भेङान ना। 9 खि नाङने काङ मिते ना, सुइ पिजायि लोटा लोङितुइना हतिला टोउ तेरिन? 10 कि ङ्या लोङितुइना हतिला रुल तेरिन? 11 हतिचाला खे अल च्युङदे रेँ च्यिटाकाला ल क्यु तेरयाप हा:कुन नाना, तेङलाला होएता खि आकि खोला लोङान ला चोम ल क्याइरे ल क्यु पिनोङङि।✝

12 मि खेला च्हिरु व्यवाहार कि नाइबा खि सम हुन धुइ, खि याङ हतिबाला हति च्वरा व्यवाहार कि, चिचालानाना धि राङ ठिम राङ मोशा ङोन्सेखिलङानयि छोइयि काक्पा ना।✝

13 "को तोकाने नाङला सु, चिचालानाना मासि लोङानयि को यहाबो राङ लाइला हुन, राङ हति नाङला सुङान लेइराङ मि हुन। 14 चिचालानाना मिजेला केलङानयि को तोका हुन राङ लाम काबो हुन, काङति मिजेला केलकिन, राङ हतिला क्योपङान ङ्युवा हुन।"

15 "चुन ङोन्सेखिलङानतेबाने च्याङबो क्याइरे त्योए, सु खि तिया लुला चुइरे हुन, हिन्नाङ नाङलाते झ्यिझ्यिरा वाजे च्वरा हुन।✝ 16 हतिबे ढेबुने खि हतिबाला ङोसेङान ना। च्हि छेरमि भोटिने अंगुर अर्थात सिउडिने भेलडु थुनाइ च्हि? 17 हति च्वरा क्याइरे पोरो ल तोङबोङयि ल ढेबु छ्यातुझुकिन। हिन्नाङ अल तोङबोङयि अल ढेबु छ्यातुझुकिन। 18 ल तोङबोङयि अल ढेबु छ्यातु झ्युमिङ्युइबा, न अल तोङबोङयि ढेबु ल छ्यातुझु ङ्युइकिन। 19 ढेबु ल छातु मिझुङान तोङबोङ पोरो तुप्ते गेलिन, राङ मेला ढिमिन।✝ 20 धि च्वरा क्याइरे ङोन्सेखिलङानबाला हतिबे लाइयि लाम्ला ङोसेङान ना।"✝

21 "ङाला ‘प्रभु, प्रभु’ नाङान पोरो तेङलायि राज्यला सु मिङ्युइबा। तेङलाला होएता ङाहि आकि धोप्पा ङ्यानङान मिते मात्रा तेङलायि राज्यला सु ङान ना। 22 हति ङिन लेइराङयि ङाला नाङान ना, ‘प्रभु, प्रभु, च्हि ङि ख्युइ मिनला ङोन्सेखिलखिला मानाइबाइ? ख्युइ मिनला ढे मातेता। राङ ख्युइ मिनला स्यान याङ लेइराङ हा:लाइयापयि लाइ माक्याइबाइ?’" 23 तेहि ङा खेला चाङमा क्याइरे नाज्याइ। "ङाहि ख्योएला नामयाङ ल क्याइरे ङोस्येस्येबा राङ मेता। ए लाइ अल किङानबा ङाने घ्याबोला त्योए।"✝

24 "हतिचाला सुइ ङाहि वचन ङ्यानकिन राङ पालाना किन, ङा हतिला मि बुद्दिमानि झि ङ्याबो थुकच्याइ, सुइ रेँ खिम ट्हायि थोला सोइरे। 25 तेहि जब क्यापते, राङ श्यलह लेप्ते, तेहि हुरबो छोम्मुवा क्यापते राङ हति खिमयि थोला फसोङ, राङ हति खिम मातिबा। चिचालानाना हति खिम टाहयि थोला सोसोइबाति ना। 26 सुइ ङाहि धि वचन ङ्यानदे याङ पालाना मिकिता, हति मि ङा मि मुर्ख झि ङ्याबो थुकच्याइ, सुइ रेँ खिम पेमायि थोला सोइरे। 27 जब क्यापसोङ, राङ श्यलह क्यापसोङ, तेहि हुरबो छोम्मुवा क्यापसोङ राङ हति खिमयि थोला थुसोङ राङ हति खिम तिपसोङ, तेहि हति छेया मासि च्युङसोङ।"

28 येशुयि धि तामबा नाइ छारते च्येला मयि तुम ख्युइ छोइ ङ्यानदे हा: लाइसोङ।✝ 29 चिचालानाना ख्युइ हतिबे शास्त्रिबा च्वरा माना, हिन्नाङ आङ होएते मियि च्वरा क्याइरे लोबिनलो।