1 "तेहि तेङलायि राज्य च्यु मिजे माक्याइबा ङ्याबो थु ङ्युइकिन। हतिबे राँ राँसि बत्ति खेरते ख्योबोतेबा ठातु पुतेलो।✝ 2 हतिबे नाङने ङाते रिक्पा मेता राङ ङाते रिक्पा होएता धुलो। 3 चिचालानाना जब रिक्पा मेतातेबे रेँ बत्ति खेरते, हतितुइना हतिबे ङ्याबो मोरकु माखेरालो। 4 हिन्नाङ रिक्पा होएतातेबे रेँ बत्ति ङ्याबो चुटिला मोरकु खेरतेलो। 5 तेहि ख्योबोति हुइतुइना पुला क्याइरे, हतिबा पोरो ङि सिरेलो राङ ङ्यालदेलो।"

6 "हिन्नाङ छान फेला ‘ख्योबो तोइ, खोला ठातु सअ,’ नाङानयि क्ये लेप्सोङ।"

7 "तेहि हति मिजे माक्याइबा पोरो पुमो लाँरेलो, राङ राँ राँसि बत्ति तयार सोइसोङ। 8 रिक्पा मेते मिजे माक्याइबि पुमोतेबे रिक्पा होएतातेबाला नाइसोङ, ‘खि मोरकुयि नाङने ङेला टिझि नाङ, चिचालानाना ङि बत्तिनि सिहाला छेलसोङ।’" 9 "हिन्नाङ रिक्पा होएतातेबे जु नेनगा जवाक पिनसोङ, ‘ङे राङ खे ङिकारला छाङयापयि होचोम मोरकु मेरो, बरु पसला तिया पुते राङ रेँ चाला ङ्योइ।’" 10 "हतिबा ङ्योरु ढुइतुइना ख्योबो लेप छारसोङ, राङ तयार होङानतेबा खो ङ्याबो मिजेयि भतयारला नाङला स्युसोङ, तेहि को रुपसोङ।" 11 "तेहि च्येला हति स्यान मिजे माक्याइबा पुमोतेबा हाङ लेप्सोङ राङ झु नाला छेलसोङ, ‘प्रभु-प्रभु, ङि चाला को फे!’"✝ 12 "हिन्नाङ ख्युइ जवाक पिन्दे नाइसोङ, ‘तेम्बारे, ङा ख्योएला नाज्याइ, ङाहि ख्योएला ङोमिस्येबा।’" 13 येशुयि जवाक पिन्सोङ, "हतिचाला लाँरे त्योए, चिचालानाना हति ङिन राङ हति भेला खेला छ्या मेता।"

14 "चिचालानाना हति भेलाते तेङलायि राज्य धि च्वरा धु, सु फियि देशला ढुइतुइना रेँ यक्पुवातेबाला रेँ क्यु सम्पत्ति हतिबाला जिम्मा टोते। 15 ख्युइ पोरोला रेँ झ्योदा होएता चोम चिला सेरयि सिक्का तोङ ङा, स्यानला सेरयि सिक्का तोङ ङि राङ स्यानला सेरयि सिक्का तोङ झि पिन्दे हति बाहिर देशला पुइ छारसोङ। 16 तेहि सेरयि सिक्का तोङ ङा खुङानति हतितुइना राङ पुते हति छोङला खोलदेलो राङ स्यान सेरयि सिक्का तोङ ङा कमाइ क्याइसोङ। 17 हति च्वरा क्याइरे सेरयि सिक्का तोङ ङि खुङानति याङ स्यान सेरयि सिक्का तोङ ङि कमाइ क्याइसोङ। 18 हिन्नाङ सेरयि सिक्का तोङ झि खुङानति पुते सा टुइरे रेँ ताक्पोयि क्यु भाइरे पोरसोङ।"

19 "लेइराङ भेलि च्येला हति यक्पुवातेबे ताक्पो लेप्तेलो, राङ ख्युइ हतिबाला च्हि लाँरेलो। 20 तेहि सेरयि सिक्का तोङ ङा खुङान यक्पुवाति स्यान सेरयि सिक्का तोङ ङा ख्योरे धुन्ना लेप्ते जु नाइसोङ, ‘हजुर, ख्युइ ङाला सिक्का ङाहि जिम्मा टोएसोङ। तोइया, ङाहि स्यान सेर सिक्का तोङ ङा कमाइ क्याइरे।’"

21 "ताक्पोयि हतिला नाइसोङ, ‘स्याबास, ल राङ हिछे होएते यक्पुवा! ख्योए टिजिला हिछे च्युङसोङ, ता ङा ख्योएला लेइराङयि जिम्मा टोच्याइ। ख्योए रेँ ताक्पोयि काकाला ढिक्ते त्योए।’"

22 "सेरयि सिक्का तोङ ङि खुङानति याङ लेप्ते नाइसोङ, ‘हजुर, ख्युइ ङाला सेरयि सिक्का तोङ ङि पिपिना होतो। तोइया, ङाहि स्यान सिक्का ङि कमाइ क्याक्याइबा होतो।’" 23 "हति ताक्पोयि हतिला नाइसोङ, ‘स्याबास, ल राङ हिछे होएते यक्पुवा, ख्योए टिझि क्युला हिछे क्याइसोङ, ता ङा ख्योएला लेइराङ तामला जिम्मा टोच्याइ। ख्योए रेँ ताक्पोयि काकाला ढिक्ते त्योए।’"

24 "हति मि सुला सेरयि सिक्का तोङ झि खुरे हति लेप्ते नाइसोङ, ‘हजुर, माचुबि साने भालि तुइङान राङ माचुभि साने तुइङान ख्योए क्योङबो हिना नाङान ङाला छ्या होतो। 25 हतिचाला ङा झिसोङ, राङ पुते ख्युइ सिक्का ङाहि सायि नाङला कुँरे पोरते। तोइ, धि ख्युइ सिक्का।’"

26 "हति ताक्पोयि हतिला जवाक पिन्देलो, ‘ए सम अल, अल्छि यक्पुवा, मा चुबि साने भालि तुकिन राङ मातोरि साने रुकिन नाङान ख्योएला छ्या होतो नाना, 27 ख्युइ ङाहि क्यु छुक्पोयि तेहा भोर च्याइ मान, तेहि लेप्ते ङाहि ङारि क्यु ब्याज समेत क्याइरे लक्ते खुङान माने। 28 हतिचाला हतिने हति सिक्का झिते ठह, राङ सुला सिक्का च्यु धुइ हतिला पिन। 29 चिचालानाना सुला होतो हतिला धिले याङ महा तेरिन, राङ हतिला लेइराङ होङान ना। हिन्नाङ सुला मेता हतिला होएताते याङ ठङान ना।✝ 30 हति भेला थु फान मेते यक्पुवाला फिला मुन्नाला टिम, काँहा मितेबा ङुङान ना राङ सो चेङान ना।’"✝

31 "जब मियि पिजा पोरो तेङलायि लोन खेरङान ङ्याबो रेँ छे धेकिन राङ होङान ना, तेहि खो रेँ छे तेतेकि क्याल ठिला त्योएङान ना।✝ 32 राङ ख्युइ धुनला पृथिवियि मितेबा पोरो झोमङान ना, राङ च्हिरु क्याइरे रच्चियायि लु राङ राला भिन, हति च्वरा क्याइरे ख्युइ हतिबाला चिला स्यानने कुरु क्याइरे भेङान ना। 33 ख्युइ लुतेबाला रेँ याइ यहला, राङ रोरुतेबा योन यहला भोरङान ना।"

34 "तेहि क्यालबुइ रेँ याइ यहला होएतातेबाला नाङान ना, ‘सअ, ङाहि आकि च्यिनलाब होएता सअ! मुलुयि काल्बा छ्याबितुइने राङ खि चाला सोसोइबि राज्यला आङ कि। 35 चिचालानाना ङा टोपा ततबा होतो, खि ङाला ङ्योप्पा पिनसोङ। ङा खा कोकोमा होतो, खि ङाला थुङयापयि चाला छ्यु पिन्सोङ। ङा फि देशयि मिना, खि ङाला ढोम्बोला पोरसोङ। 36 चेपटाका होतो, खि ङाला कोहिला कापसोङ। नाप्पा होतो, खे ङाला तारु लेप्सोङ। झ्यालला होतो, खे ङाहि तेहा लेप्सोङ।’" 37 "तेहि केवाकिङानतेबे खोला जवाक नाइसोङ, ‘हे प्रभु, जब ङि ख्योएला टोपा ततबा थोङदे, राङ सायाप पिन्दे? अर्थात खा कोकोमा थोङदे, राङ थुङयापयि चाका छ्यु थुङयापयि चाला पिन्दे? 38 जब ङि ख्योएला फियि मि थोङदे, राङ ख्योएला खिमला ढोम्बोला पोरते? अर्थात चेपटाका थोङदे राङ कोहिला कापते? 39 राङ जब ङि ख्योएला नाप्पा राङ झ्यालला थोङदे, राङ ख्युइ तेहा तारु लेप्ते?’" 40 "तेहि क्यालबुइ हतिबाला जवाक पिन्दे नाङान ना, ‘तेम्बारे, ङा खेला नाज्याइ, खि धि ङाहि भाइबे नाङने पोरोले छ्युवा च्यिला चोम क्याइ, हति खि ङाला राङ क्याक्याइबा ना।’"

41 "हति च्येला ख्युइ योन यहयि मिला नाङान ना, ‘छार चुचुबि मिबा! घ्याबोला क्यु, राङ तुइ राङ हति लोन खेरङानयि चाला तयार सोसोइबि नामयाङ मिस्यिङानयि मेला क्यु। 42 चिचालानाना ङा टोपा ततबा होतो, खि ङाला ङ्योप्पा मापिनसोङ। खा कोकोमा होतो, खि ङाला थुङयापयि चाला छ्यु मापिन्सोङ। 43 ङा फि मि हिना, खि ङाला खिमला ढोम्बोला मा पोरसोङ। चेपटाका होतो, राङ खि ङाला कोहिला माकापसोङ, नाप्पा राङ झ्याल्ला होतो, राङ खे ङाला तारु मालेप्सोङ।’"

44 "हतिबे याङ झु नेनगा जवाक तेराङन ना, ‘प्रभु, जब ङि ख्योएला टोपा ततबा वा खा कोकोमा थोङदे, फि मि या चेपटाका वा नाप्पा थोङदे, वा झ्याल्ला थोङदे, राङ ख्युइ स्यापच्यि मा स्युइबा?’" 45 "तेहि ख्युइ हतिबाला जवाक तेराङान ना, ‘तेम्बारे ङा खेला नाज्याइ, धिबा पोरोले टिमातेबे नाङने चिला चोम कियापना माक्याइ, हति खि ङाहि चाला माक्याइबा।’"

46 "तेहि हतिबा बारतैयि चाला ङेबायि भागेदार होङान ना, ‘हिन्नाङ केवाकिङानतेबा जबयाङ मिसिनयापयि किप्पोयि मिजेला स्युङान ✝ना।’"