1 मियि तुमतेबाला थोङदे खो रिला झिसोङ, राङ खो च्येला त्ये छारते लोब्टुतेबा ख्युइ तेहा लेप्सोङ। 2 ख्युइ खा पेसोङ राङ हतिबाला खाइकोए झ्युकाला छेलसोङ:

3 "किप्पो आत्माला टाङना होएतातेबा, चिचालानाना तेङलायि राज्य हतिबे ना।" 4 किप्पो समतु किङानतेबा, चिचालानाना हतिबाला छिमा फिङान खुङान ना। 5 किप्पो टुङबोतेबा, चिचालानाना खेला पिरथिवि आङ खुङान ना। 6 किप्पो केवायि चाला टोपा तङान राङ खा कोकोमातेबा, चिचालानाना हतिबा खा ङोमङान ना। 7 किप्पो ङिङच्येङानतेबा, चिचालानाना खेला कजसुबाने ङिङ्च्ये खुङान ना। 8 किप्पो सम चाङमातेबा, चिचालानाना हतिबे कजसुबाला थोङान ना। 9 किप्पो ढिक्तु झ्युङानतेबा, चिचालानाना हतिबाला कजसुबायि सन्तन नाङान ना। 10 किप्पो केवायि चाला तुरि खुङानतेबा, चिचालानाना तेङलायि राज्य हतिबे ना।✝ 11 "किप्पो ना खे, जब मितेबे ङाहि चाला खि फाला ताम नेन राङ तुरि तेरिन, राङ चुन नाइरे खि विरोधला कुरकुरु अल तामतेबा नाङान ना।"✝ 12 हतितुइना सम को, राङ लेइराङ सम किप्पो कि, चिचालानाना तेङलाला खेला इनाम छेया खुङान ना। चिचालानाना धि च्वरा क्याइरे राङ खि ताङमे ङोन्सेखिलङानतेबाला हतिबे तुका पिपिना होतो।✝

13 "खे पिरथिवियि छा ना, हिन्नाङ छायि टोप्ला पुइना याङ च्हिरु क्याइरे याङ छायि क्युरमु टोप्ला सोज्याइ?" हति ता फिला ढिमयाप राङ मितेबे काङबि लेयाप अर्थात स्यान च्याङ फान मिहा। 14 "खे संसारयि होए ना। रिला छुछुबि भजार भाइरे भोर मिङ्युइबा।"✝ 15 मितेबे बत्ति च्येते फकटिन ता घा मिङ्युइबा, हिन्नाङ बत्ति भोरसाला भोरिन, राङ खिमला होएते पोरोयि चाला हति साल्बो सुन।✝ 16 हति च्वरा क्याइरे खि होए मितेबे धुनला होए भाभारा होङ वार सह, राङ हतिबे खि किप्पोयि मिजे थोङोङ, राङ तेङलाला होएता खि आकेयि छे तेयोङ।✝

17 "मोशायि ठिम अर्थात ङोन्सेखिलङानतेबाला माना नाङान ङा लेलेबा नाङान समला माटान।" ङा हति स्यिक्तु माना, हिन्नाङ पुरा कितु लेलेबा ना।✝ 18 चिचालानाना तेम्बारे ङा खेला नाज्याइ, जब थु तेङला राङ पिरथिवि सिन्दे मिढुवा हति थु ठिमयि ताम पोरो पुरा मा च्युङा च्हिरु क्याइरे याङ च्हि या हतिने थोपा झि मात्रा सिनङान माना ना।✝ 19 हतिचाला सुइ धि आदेशबे नाङने पोरोले छुवातेला खाला मिङ्याना, राङ मितेबाला हति च्वरा कियाप लोपङान ना, तेङलायि राज्यला हति पोरोले छुवा नाङान ना। हिन्नाङ सुइ हति आदेशतेबा ङ्यान किन राङ लोबिन, तेङलायि राज्यला हति छेया नाङान ना। 20 चिचालानाना ङा खेला नाज्याइ, खि केवायि शास्त्रि राङ फरिसिबाले मा माच्युङना खेला काङ च्याने तेङलायि राज्यला स्यु मिङ्युइबा।

21 "खि थोथोइबा होतो, ताङबुइ मितेबाला जु नानाइबा होतो, ‘ख्योए मि मास्योए, राङ सुइ स्योएयापयि लाइ किन हतिला ङेबा खुकिन।’"✝ 22 हिन्नाङ ङा खेला नाज्याइ, सुइ याङ रेँ भाइला स्येताङ किन, हति ङेबा खुयापयि झ्योदायि होङान ना, राङ सुइ रेँ भाइयि ना च्योकिन, हति मि झोमसा छेया तेहा जवाक तेर मिङ्युइङान होङान ना। हिन्नाङ सुइ रेँ भाइला ख्योए मुर्ख नेन हति ङ्यालबायि मेला परि होङयापयि जोखिमला हुन। 23 हतिचाला ख्युइ वेदिला रेँ भेटि भुलि तुइना ख्युइ भाइयि समला ख्युइ विरोधला चिगा नायाप होतो नाङान ख्योएला टाम्बा च्युङना। 24 ख्युइ भेटि हति वेदियि धुनला पोर, राङ क्यु। ताङला ख्युइ भाइ ङ्याबो ढिका कि, राङ तेहि हतिने लेप्ते रेँ भेटि फुल। 25 "ख्युइ विरोधि ङ्याबो अदालतला ढुइतुइना लामला राङ ढि च्युइ कि, स्यान अर्थात विरोधियि ख्योएला ल अल भेङानयि लाला टोएङान ना राङ ल अल भेङानयि आङकिङानयि लाला टोएङान ना, राङ ख्योए झ्यालला झ्युङान ना।" 26 तेम्बारे, ङा खेला नाज्याइ, ख्युइ आलाइ पोरो माच्या थु ख्योए हतिने थाराङान माना ना।

27 खि जु नानाइबा थोथोइबा होतोइ, "ख्योए व्यभिचार माके।"✝ 28 हिन्नाङ ङा खेला नाज्याइ, सुइ पुमो रेनला व्यभिचारयि समयि तेन, हतिचाला ताङलाने राङ रेँ समला हति ङ्याबो व्यभिचार क्याइ छाछारा हुन। 29 तेम्बारे ख्युइ मि याइबि ख्योएला तिक्पा कितु झ्यु ना हतिला तोन्दे टिम, चिचालानाना ख्युइ स्हु पोरो ङ्यालबाला ढिमि पु बरु ख्युइ स्हु अंगतेबे नाङने च्हि मेता सोयाप ख्युइ चाला ल ना।✝ 30 ख्युइ लाक्पा याइबि ख्योएला तिक्पा कितु झ्युना हतिला तुप्ते टिम। चिचालानाना ख्युइ स्हु पोरो ङ्यालबाला ढुवाले बरु ख्युइ स्हुयि अंकतेबे नाङने च्हि मेता सोयाप ख्युइ चाला ल ना।✝

31 जु याङ नानाइबा धु, कि सुइ रेँ केरमानला तोङिन, हति तोङयापयि स्यु ला टि।✝ 32 हिन्नाङ ङा खेला नाज्याइ, सुइ रेँ केरमानला व्यभिचारयि चाला अर्थात स्यानयि चाला तोङिन नाइ, हति मोला व्यभिचार सुन, राङ सुइ ताताङि पोमुवा ङ्याबो मिजे किनाइ, हति व्यभिचार किन।✝

33 "याङ खि थोथोइबा होतो, कि यि ताङबुइ मितेबाला नानाइबा होतो, ‘ख्युइ चुन ना माक्येल, हिन्नाङ कजसुबायि चाला ना क्याक्यालाते ख्युइ पुरा कि।’✝ 34 हिन्नाङ ङा ख्योएला नाज्याइ, ना क्येल राङ मा क्येल। तेङलायि मिनला ना मा क्येल, चिचालानाना हति कजसुबायि क्याल ठि ना।✝ 35 न त पिरथिवियि, चिचालानाना हति ख्युइ तिङबा भोरसा ना, न त यरुश्लेम, चिचालानाना हति क्यालबोतेबे भजार ना।✝ 36 रेँ घोबुइ ना माकेल, चिचालानाना ख्युइ स्येबु झिला कारबो राङ नाक्पो सो मिङ्युइबा। 37 खि नानाइबि वचनते ‘हिना’ नाइना ‘हिना’ ‘माना’ नाइन ‘माना’ मात्र सह। धिले याङ माते अलतेबाने हुन।

38 "खि थोथोइबा होतो, जु नानाइबा धु, ‘मियि छापला मि, राङ सोयि छापला सो।’ 39 हिन्नाङ ङा ख्योएला नाज्याइ, अलयि माकुवाला माके। सुइ खि ढाबा याइबाला थालच्या क्याकिन, हतिला स्यान ढाबा याङ स्ये। 40 तेम्बारे मि सुइ याङ मद्दा च्युक्ते ख्युइ भनदि खेर च्युइ क्याइना, हतिला ख्युइ जकेर याङ पिन। 41 तेम्बारे सुइ याङ ख्योएला किलोमिटर झि ढोयपला बाध्य सोइना हति ङ्याबो किलोमिटर ङि क्यु। 42 ख्योएला लोङानला पिन, राङ ख्योएने पुलेन खेर सोम किङानला मितेर माना।

43 "ख्युइ जु नानाइबा थोथोइबा होतोइ, ‘ख्युइ खिमजेला करि कि, राङ ख्युइ टाहाला मिका कि।’✝ 44 हिन्नाङ ङा खेला नाज्याइ, रेँ टातेबाला याङ करि कि, राङ ख्योएला तुका तेराङानतेबे चाला मोनलाम क्योप, 45 राङ खे तेङलाला होएते आकेतेबे पिजा होङान ना। ख्युइ अल राङ ल ङिकारला ङिमायि टोए तेरिन, राङ केवाकिङान राङ तिक्पा किङान ङिकारला नाम तेरिन। 46 चिचालानाना तेम्बारे खे ङ्याबो करि किङानतेबा मात्र करि किना खेला च्हि इनाम होतो? च्हि कर तुइङानतेबे याङ धि च्वरा राङ मिकि ताइ च्हि? 47 खि रेँ आज्यो भाइला मात्र नमास्ते कि ना यहुदि मान्ते मितेबाले माहा च्हि क्याइरे? च्हि हिछे मिकिङान याङ जु राङ मिकि ताइ च्हि? 48 हतिचाला च्हिरु खि तेङलाला होएता आके कालो ताङताङ होतो, खे याङ हति च्वरा कालो ताङताङ होङ कोइ हुन।" ✝