1 हति भेलाला गालिल प्रदेशयि आङकिङान हेरोदयि येशुयि भारेला थोइदु। 2 ख्युइ रेँ यक्पुवातेबाला नाइसोङ, "खो बप्तिस्मा तेराङान युहान्ना ना। खो स्यिस्यियाने सोम्बो लाँधु। हतिचाला शक्तिने धि लाइबा ख्युइ लाम्ला हुन्दु।" 3 चिचालानाना हेरोदयि रेँ भाइ, फिलिपयि केरमान हेरोदियासयि चाला युहान्ना ला सुङदे ताम्दे झ्याल्ला च्युच्युका होतो। 4 युहान्नायि हेरोदला जु नानाइबा होतो, "ख्युइ मोला केरमान सोइरे भोरयाप ठिमयि अनुसार ल मिहा।"✝ 5 हतिचाला हेरोदयि हतिला सोएयापयि धोप्पा क्याइसोङ, हिन्नाङ मितेबाला झिकिनलो, चिचालानाना हतिबे खोला ङोन्सेखिलङान मानि किनलो। 6 हिन्नाङ जब हेरोदयि क्येक्येबि ङिन लेप्ते, तेहि हेरोदियासयि पिजि हतिबे उइला छ्यामदे हेरोदला लेइराङ कारु च्युसोङ। 7 हति च्वरा च्युङदे ख्युइ हतिला च्हि लाँ नाङ तेरयापयि ना क्यालदे ङ्यानसोङ। 8 हिन्नाङ हति आमि लालाबा च्युच्युवाति हति नाइसोङ, "बप्तिस्मा तेराङान युहान्नायि घोबो ङाला धि तेरमायि नाङला नाङ।" 9 तेहि क्यालबो बैरा च्युङसोङ रेँ ना क्याक्याला राङ ढोम्बोतेबे चाला ख्युइ हति च्वरा कियापयि आदेश पिन्देलो। 10 ख्युइ झ्याल्ला मितेबाला चाँरे युहान्नायि घोबो तुप्तु च्युक्तेलो। 11 तेहि ख्युइ घोबो तेरमाला ख्योँरे हति पुमोला पिन्सोङ। मुइ हति रेँ अमायि तेहा ख्योसोङ। 12 हति च्येला युहान्नायि लोब्टुबा लेप्ते ख्युइ स्यिस्यियायि स्हु खेरते कुहुरेलो, तेहि हतिबा पुते येशुला लोन पिन्सोङ।

13 जब येशुयि धि थोइरे खो डुङगाला स्योन्दे हतिने कुरु च्हि च्याङ मेता खुसिमे साला पुतेलो। धि थारे भजारने मियि तुमतेबे काङबि पुते राङ ख्युइ च्येला लेप्तेलो। 14 छोयि नेमुला क्योपते हति मि झोम छेयातेला थोङदे ख्युइ हतिबाला ङिङच्येसोङ, राङ हतिबे नाप्पाबाला टाक्तु च्युसोङ। 15 कमु च्युङ छारते लोब्टुबा जु नेन राङ ख्युइ तेहा लेप्सोङ, "धि च्याङ मेते साना, राङ ङिन पुइ छारसोङ। मिझोमला क्यु नोइ। राङ धिबे युल-युल ला पुते रेँ चाला सायाप ङ्योयोङ।" 16 हिन्नाङ येशुयि हतिबाला नाइसोङ, "हतिबाला ढोकोइ मेता। खे राङ धिबाला सायाप पिन।" 17 हतिबे खोला नाइसोङ, "ङिहा ङेला लोटा ङा राङ ङ्या ङि अर्थात मेता।"

18 तेहि येशुयि नाइसोङ, "हतिबा पोरो ङाहि तेहा ख्याला।" 19 ख्युइ मिझोमला चाला त्योएयापयि आदेश पिन्सोङ, राङ हगति लोटा ङा राङ ङ्या ङि खेरते तेङला यहला ताइरे कजसुबाला कटिनक्या नाइसोङ, राङ लोटातेबा च्याक्ते लोब्टुबाला पिन्सोङ, राङ लोब्टुबे मितेबाला पिन्सोङ। 20 हतिबा पोरोयि साइरे ढासोदु, राङ लहालाका तुबुतेबा लोब्टुतेबे फुगो च्युनङिन काङ तुइरेलो। 21 पुमो राङ पिजा पुमोतेबा अर्थात साङानतेबा हालाम तोङ ङा पिजा धुलो।

22 ख्युइ मिझोमला बिदा क्याइ छारि पाल्ला लोब्टुबाला डुङगाला स्योनदु च्युक्ते खोले ताङला छोयि फारकानला ढोयापला ढिप्पि क्याइसोङ। 23 मिझोमला बिदा क्याइ छारते खो चिक्पा मोनलाम क्याक्तु रिला झिरे पुतेलो। नोमझ्यु रुबितुइना खो चिक्पा हतिया धुलो। 24 हिन्नाङ डुङगा हति भेला थु नेमुने छो छोम्मुवाला घ्याबोला पुइ छारसोङ। तेहि हुरबो छोम्मुवा घल ला क्याबाति डुङगा भाल्लापयि थोला पुइतुलो। 25 नामे तिन बजेने छ बजेयि उइला खो छो छोम्मुवायि थोला काङबि हतिबे तेहा लेप्सोङ। 26 जब लोब्टुबे खोला छो छोम्मुवायि थोला ढुन ताताता थोङदे, तेहि झिरे हतिबे नाइसोङ, "धिनि तुइना!" राङ हतिबा झिरे क्ये तोन्देलो। 27 हिन्नाङ येशुयि हतितुइना राङ हतिबाला जु नाइसोङ, "हिम्मत कि, ङा राङ ना, माझि।" 28 पत्रुसयि खोला नाइसोङ, "हे प्रभु, ख्योए राङ हिन्ना, ङाला ख्युइ तेहा छ्युयि थोला होङयापयि आदेश नाङ।" 29 ख्युइ नाइसोङ, "सअ।" पत्रुस डुङगाने पुप्ते येशुयि तेहा ढोयापयि चाला छुयि थोला ढुवाला छेलसोङ। 30 हिन्नाङ हुरबो छोम्मुवा स्यु छोम्मुवा क्याक्याइबा थोङदे खो झिरे, राङ जब नुबाला छेलसोङ तेहि ख्युइ क्ये तोन्दे नाइसोङ, "हे प्रभु, ङाला क्योप।" 31 तेहि येशुयि लाक्पा क्याङदे हतिला सुङ छारसोङ, राङ खोला नाइसोङ, "ए टिझि अर्थात हिछे टिझि किङान, चिला संका क्याइरे?" 32 जब हतिबा डुङगाला स्योनदे हतितुइना हुरबो छोम्मुवा छ्यासोङ। 33 डुङगाला होएतातेबे खोला छ्या पुलसोङ, राङ नाइसोङ, "तेम्बारे ख्योए कजसुबायि पिजा ना।"

34 येशु राङ ख्युइ लोब्टुबा फारकानला क्योपते हतिबा गनेसरेतयि साला क्योपसोङ। 35 जब हति सायि मितेबे येशुला ङोस्येरे तेहि हतिबे फाला छुलोयि सालातेबाला लोन चाँरेलो, राङ मितेबे नाप्पा पोरोला ख्युइ तेहा ख्योसोङ। 36 हतिबे ख्युइ कोहिलायि टुप्पु झि हिन्नाङ घुल्दु छ्यु नाइरे खोला स्युवा क्यापसोङ, राङ चोमयि घुल्दे हतिबा टाक्तेलो।