1 "च्याङबो क्याइरे त्योए, खे मितेबाला तोनयापयि चाला केवायि लाइ माके। स्यान अर्थात तेङलाला होएता खि आकेने खेला च्याङ इनाम खुङान माना ना।" 2 "हतिचाला जब खे दान तेरिन, हतितुइना रेँ धुनला केलिङ मा तुङ, च्हिरु क्याइरे चुन नाङान मितेबे यहुदि झोमसि खिमतेबा राङ लामतेबाला मितेबाने छे धेयाप खुयापला किन।" तेम्बारे, ङा खेला नाज्याइ, खि रेँ इनाम खु छाछारा होतो। 3 हिन्नाङ जब ख्योए दान तेरिन, ख्युइ लाक्पा याइबि च्हि किनदुइ सो लाक्पा योमबि हा:कोरु मा झ्यु। 4 ख्युइ दान फा:ला पोर, राङ फा:ला थोङान ख्युइ आकि ख्योएला इनाम तेराङान ना।

5 "जब ख्योए मोनलाम क्याकिन हतितुइना समनाँ च्वरा मायोङ, चिचालानाना हतिबा यहुदि झोमसि खिमतेबा राङ लामतेबे कुनाला मितेबे थोङोङ नाइरे लाँरे मोनलाम क्याक च्याइ करि किन।" तेम्बारे, ङा खेला नाज्याइ, खेला रेँ इनाम खुँ छाछारा होतो।✝ 6 हिन्नाङ जब ख्योए मोनलाम क्याकिन, रेँ नाङयि कोठाला क्यु, राङ को क्यापते रेँ हुइ फा:ला होएते तेङलायि कजसुबा आकेला मोनलाम क्योप, राङ फा:ला थोङान खि आकि ख्योएला इनाम तेराङान ना। 7 "राङ मोनलाम क्याकितुइना यहुदि मान्ते मि च्वरा फानमेते ताम सम नाङला माना। चिचालानाना छि लेइराङला नेतुइना खि ङ्यानयाप हुन नाङान हतिबा विचार किन्दु। 8 हतिचाला हतिबा च्वरा मायोङ। चिचालानाना खि खोला लोङाले केना ताङला राङ खेला काङ-काङ कोइबा होए, सो खि तेङलायि आकि हा:कुन। 9 हिन्नाङ खे धि च्वरा क्याइरे मोनलाम क्योप, ‘हे हुइ आके, काङते तेङलाला होतो, ख्युइ मिन पवित्र सह।✝ 10 ख्युइ राज्य सह। ख्युइ धोप्पा तेङलाला च्हिरु होए, हति च्वरा राङ धि पिरथिविला सह। 11 ङेला तिरिङ बारतैयि ङ्योपा नाङ। 12 ङि तिक्पा माप कि, च्हिरु क्याइरे ङि रेँ अभराधिला माप क्याइरे। 13 ङेला छोए तायापला परि होङदु मा झ्यु, हिन्नाङ अलतेबाने पेरे पोर चिचालानाना राज्य, पराक्रम राङ छे बारतैयि चाला ख्युरि ना, आमेन।’" 14 चिचालानाना ख्युइ मितेबे अपराध माप क्याइना खि तेङलाला होएता आकि याङ खेला माप किङान ना।✝ 15 हिन्नाङ खि मितेबे अबराध माप माक्याइना खि आकि खि अपराध माप किङान माना ना।

16 "जब खे वर्त तोकिन, हतितुइना समनाँतेबा च्वरा च्ये मुन्ना मातोन।" चिचालानाना मितेबाला वर्त ताताता तोनयापला हतिबा रेँ च्ये मुन्ना सुन। तेम्बारे, ङा खेला नाज्याइ खि रेँ इनाम खु छाछारा होतो। 17 हिन्नाङ खे वर्त तोतितुइना रेँ घोबोला मोरकु कुइ, राङ रेँ च्ये ठुइ। 18 राङ ख्युइ वर्त मितेबे माना, हिन्नाङ फा:ला होएते खि आकि थोङोङ, राङ फा:ला थोङानयि ख्युइ आकि ख्योएला इनाम तेरङान ना।

19 रेँ चाला पिरथिविला क्यु सम्पति मासाहा, काँहा भु राङ या क्यापते हति मासि सुन राङ काँहा कुम्मातेबे खिम तोल्दे हति कुन।✝ 20 हिन्नाङ रेँ चाला तेङलाला क्यु सम्पति सह, काँहा भु या-या क्याप्ते मासि मिसुवा, राङ कुम्मायि याङ मिकुवा। 21 चिचालानाना काँहा ख्युइ क्युनोर हुन, हतिया ख्युइ सम याङ हुन।

22 "मिइ स्हुयि होए ना। हतिचाला तेम्बारे ख्युइ मि ल होएना, ख्युइ स्हु पोरो साल्बो हुन। 23 हिन्नाङ ख्युइ मिइ नानाइबा होएना, ख्युइ स्हु पोरो मुन्ना हुन। हतिचाला ख्युइ नाङला होएता साल्बोते मुन्ना च्युङना, हति मुन्ना च्हिरु नाथुमे हुन।"

24 सुइयाङ ताक्पो ङियि स्यापच्यि स्यु मिङ्युइबा। चिचालानाना हति च्यिला मिका किन राङ स्यानतेला करि किन। अर्थात हति च्यिकि थोला भक्ति भोरिन राङ, स्यानतेला हति मिका किन। खि कजसुबा राङ क्यु ङिकारला स्यापच्यि स्यु मिङ्युइबा।

25 हतिचाला ङा खेला नाज्याइ, "च्हि साज्याइ, च्हि थुङ ज्याइ नाइरे रेँ उयि चाला राङ ‘च्हि कोन ज्याइ’ नाइरे रेँ स्हुयि चाला चिन्ता माके। च्हि मिजे सायापले राङ स्हुयि कोहिलाले हा:छेया मानाइ?" 26 पान्नाङयि च्याचिउतेबाला तोइ। हतिबे न सावोन जुकिन, न भालि तुकिन, न कामला रुरे भोरिन, हिन्नाङ खि तेङलायि आकि खेला स्योमकिन। च्हि खे हतिबाले घोङ छेया मानाइ च्हि? 27 खि नाङने सुइ रेँ लो छाङ छारते मिजेयि टिझि भेला याङ थपि कि ङ्युइकिन? 28 "तेहि कोहिलायि चाला खे चिला समतु किन? थाङयि लिलि मिधोला तोइ, हति च्हिरु क्याइरे छारिन धुइ। हति न तुक्का किन, न-न थोउ च्योकिन। 29 हिन्नाङ ङा खेला नाज्याइ, सोलोमन क्याल:बो याङ रेँ ङोमला खि नाङने च्हि चोम याङ छाछाइबा मेतालो। 30 तिरिङ होएता राङ ङाइटो भुबाला ढिमङानयि चा कजसुबायि धि च्वरा क्याइरे घेबिन नाना, ए हिछे टिझि किङान बा, च्हि ख्योएला ख्युइ धिले याङ मा मिघेबाइ च्हि? 31 हतिचाला ‘च्हि साजाइ?’ कि च्हि थुङजाइ? कि ‘च्हि कोनज्याइ?’ नाइरे समतु माके। 32 चिचालानाना यहुदि मान्ते मितेबे धि पोरो फाकिन, राङ खि तेङलाला होएता आकि खेला धि पोरोयि कोइबा होतो नाइरे हा:कुन।✝ 33 हिन्नाङ ताङला ख्युइ कजसुबायि राज्य राङ ख्युइ पवित्रता फोए, राङ धि पोरो क्यु खि चाला थपिकिङान ना। 34 हतिचाला ङाइटुइ चाला समतु माके, चिचालानाना ङाटुइ ङिनयि चाला ङाइटो राङ समतु किङान ना। तिरिङयि तुक्का तिरिङयि चाला थारे ना।"