1 नामजेन थरह, पोरो घोबा पुजारि राङ जनतायि केवाकिङान गुरुयि येशुला सोएयापयि ङेबा तेरयाप नाइरे खुइ विरोधला टोइ क्याइसोङ। 2 तेहि हतिबे खोला च्यालतायि ताम्दे खेरसोङ, राङ हाकिम पिलातसयि तेहा स्येसोङ।

3 तेहि खोला सुङदु झुङान यहुदायि ख्युइ थोला ङेबा पिपिना थोङदे घ्योप्पा क्याइसोङ, राङ घोबा पुजारि राङ केवाकिङान गुरुला ङुलयि सिक्का सुमच्यु लक्ते तेरयाप क्याइसोङ, ✝ 4 राङ नाइसोङ, "ङाहि च्याङ माक्याइबि मिला धोका पिन्दे तिक्पा क्याइदु।" हिन्नाङ हतिबे नाइसोङ, "ङेला च्हि मदलब? त खो राङ सेङान धु।"

5 तेहि हति ङुलयि सिक्का तेबा मोनलाम क्यासि खिमला टिम्दे यहुदा पुइसोङ, राङ हति झिङबाला थक्पा तारे रेँ राङला सेसोङ। 6 हिन्नाङ घोबा पुजारितेबे ङुलयि हति सिक्का तेबा खेरते नाइसोङ, "मोनलाम क्यासि खिमयि क्युनोर भोरसि बागासाला धि भोरयाप ल माना, चिचालानाना धि ठायि धोक्पो ना।" 7 हतिबे नाङला रुताम क्याइरे हति आलाइयि फिमितेबा कुङसा कुमालयि सा ङ्योइसोङ। 8 हतिचाला हति साला तिरिङ थु ठायि सा नेन। 9 तेहि यर्मिया ङोन्सेखिलङानयि नानाइबि वचन पुरा च्युङसोङ, "हतिबे ङुलयि सिक्का सुमच्यु खेरसोङ, हति घोङयि धला, काङ घोङ इस्राएलयि पिजाबे हति थोला तोकि क्याक्याइबा होतो, ✝ 10 राङ कजसुबायि ङाला आदेश च्युच्युका च्वरा कुमालयि सा ङ्योइरे।"

11 येशु रोमयि हाकिमयि पिलातसयि लाँसोङ, राङ हति येशुला टिसोङ, "च्हि ख्योए यहुदिबे क्याल:बो हिनाइ?" येशुयि नाइसोङ, "ख्योए राङ झु नेन धु।" 12 तेहि घोबा पुजारिबा राङ केवाकिङान गुरुतेबे ख्युइ थोला दोष लाइ क्याइसोङ, हिन्नाङ ख्युइ च्याङ जवाक मापिनसोङ। 13 तेहि पिलातसयि खोला नाइसोङ, "ख्युइ विरोधला हतिबा च्युच्युङ कुच्युङ तामतेबे साछि तेरिन्दु, च्हि ख्युइ मिथोइबा धोए?" 14 हिन्नाङ येशुयि हतिला दोष चियि याङ जवाक मा पिनसोङ। हाकिम याङ धि तामला लेइराङ हा:लाइसोङ।

15 निस्तार कालापसोङला मिझोमयि धोप्पा क्याक्याइबा च्वरा रोमयि हाकिमयि झ्याल ला तितिबा झिला तोङयापयि लुलाम होतोलो। 16 हति भेलाला बारब्बा मिन क्याक्याइबि च्हि टाइक्ये छ्योएछयोएति कैदि झि होतोलो। 17 जब मितेबा झोमदे, पिलातसयि हतिबाला टिरेलो, "खे च्हि धोप्पा किन? ङा खि चाला सुला तोङज्याइ? बारब्बा कि ख्रिष्ट नाङान येशुला?" 18 चिचालानाना यहुदिबे आङकिङानबे येशुला ठाधोयि राङ स्यास्याता ना नाइरे पिलातसला छ्या होतोलो।

19 तेहि अदालत भेसाला तोतितुइना पिलातसयि केरमानयि झु नाइरे लोन कुरसोङ, "हति-हति केवाकिङान मिला च्याङ माके, चिचालानाना तेरिङ मिलामला ख्युइ चाला ङाहि लेइराङ तुक्का ङ्योङ्योङा होए।" 20 हिन्नाङ घोबा पुजारि राङ केवाकिङान गुरु बारब्बा तोङयाप राङ येशुला ङेबा तेरयापयि माग क्याइरे मितेबाला हुइ:स्युइ लाङसोङ। 21 रोमि पिलातस हाकिमयि याङ खोला टिरेलो, "धि ङि नाङने काङते ङा खि चाला तोङ ज्याइ नाइरे खे धोप्पा किन?" हतिबे नाइसोङ, "बारब्बाला।" 22 पिलातसयि हतिबाला नाइसोङ, "ता ङा ख्रिष्ट नाङान येशुला ङा च्हि किच्याइ?" हतिबा पोरोयि खोला जवाक पिन्दे नाइसोङ, "हतिला क्रुसला थह। 23 पिलातसयि नाइसोङ, चिला? ख्युइ च्हि नोनोबि लाइ क्याइदुइ?" हिन्नाङ हतिबा याङ धिले याङ क्ये छेया क्याइरे नाइसोङ, "हति क्रुसला थ्ह।" 24 हिन्नाङ च्याङ च्युइ माचुवा थोङदे, ठुझि हुन नाइरे झिरे पिलातसयि छ्यु खेरते मितेबे धुन्नला रेँ लाक्पा टुइरे नाइसोङ, "खे-खे राङ हा:कुवा कि, ङा धि मियि ठा: थोङ्दे निर्दोष होतो।" 25 मि पोरोयि जवाक पिनसोङ, "येशु सासाति ठा ङे राङ ङि सन्तनबे थोला फ।" 26 तेहि पिलातसयि हतिबे चाला बारब्बाला ताङदेलो, हिन्नाङ येशुला छेरमा क्यापते सिपाहिला क्रुसला धोयापला स्यातेलो।

27 तेहि पिलातस सिपाहितेबे येशुला क्याल:खाङला खेरतेलो, राङ सिपाहिबा पोरोला ख्युइ धुन्नला झोम्दु च्युक्तेलो। 28 हतिबे ख्युइ कोहिला पुते खोला मोरु कोहिला कापसोङ। 29 हतिबे छेरमि टोपो चेम्दे ख्युइ घोबोला कापसोङ, राङ ख्युइ लाक्पा याइबा यहला ङ्युमा पिन्देलो, राङ ख्युइ धुनला काङबा चुरे खोला जु नेन राङ नाचेसोङ, "हे यहुदियि क्यालबो, छेरिया त्योए।" 30 तेहि हतिबे खोला छिमा ताप्तेलो, राङ ङ्युमा खेरते खोला घोबोला क्यापसोङ। 31 ख्युइ नाचेछारते च्येला हतिबे हति कोहिला पुतेलो, राङ ख्युइ रेँ कोहिला काप्ते खोला क्रुसला धतु खेरसोङ।

32 ढुनढुन हतिबे सिमोन मिन क्याक्याइबि कुरेनि भजारयि मिझिला ठातेलो, राङ हतिबे खोला ख्युइ क्रुस खुरयापला कर क्याइसोङ। 33 जब हतिबा गलगथा नाङान साला क्योपतेलो, काङला कबलियि सा नेन लो, 34 तेहि हतिबे खोला खाडे स्येस्येबि छ्याङ थुङदु च्युसोङ, हिन्नाङ ख्युइ छोए ताइरे ख्युइ थुङयापयि धोप्पा क्याइसोङ।✝ 35 हतिबे येशुला क्रुसला तारे च्येला, चिट्टा क्यापते ख्युइ कोहिलातेबा रेँ नाङला कोहिरेलो। 36 तेहि हतिबा हतिया ताते खोला स्युङाला छेलसोङ। 37 "येशु, यहुदिबे क्याल:बो नाङान ख्युइ विरोधयि दोष पत्र ख्युइ घोबुइ थोला च्यारसोङ।" 38 खो ङ्याबो डाकु ङि क्रुसला ताताबा धुलो, च्हि ख्युइ याइ यहला राङ स्यानते योन यहला। 39 हतिने होङान ढोङानतेबे राँ राँसि झिङबा स्युरे ख्युइ ना च्येसोङ, ✝ 40 राङ नाइसोङ, "ए मोनलाम क्यासि खिम तिपङान राङ ङिन सुमला लोङान, राङला क्योप, राङ कजसुबायि पिजा हिन्ना, क्रुसने पुप्ते हअला सआ।"✝ 41 हति च्वरा क्याइरे घोबा पुजारितेबे याङ शास्त्रितेबे राङ केवा किङान गुरुबा ङ्याबो-ङ्याबो ख्युइ ना च्योकिन राङ नाइसोङ, 42 "हति स्यान ता क्योपसोङ, ‘खो राङला क्योप माङ्युइ सोङ। धि इस्राएलयि क्याल:बो हिनाइ। थाल्ला क्रुसने माला पाप्ते सअ, राङ ङे धिला हिछे किच्याइ। 43 धि कजसुबाला हिछे भोरकिन। कजसुबे धिला धोप्पा क्याइना ख्युइ धिला थाल्ला राङ तोङिन राङ, चिचालानाना धि ङा कजसुबे पिजा ना,’ नाइरे नेन्दु।"✝ 44 तेहि खो ङ्याबो क्रुसला ताताबि हति डाकुतेबे याङ हति च्वरा क्याइरे ख्युइ नाच्येसोङ।

45 तेहि ङिमा फेयि बाह्र बजेने तिन बजे थु देश पोरोला राङ मुन्ना च्युङसोङ। 46 तिन बजे झोमला येशुयि जु नेन राङ क्ये तोनसोङ, "इलोइ, इलोइ, लामा सबखथनि?" मदलब, "हे ङाहि कजसुबा, हे ङाहि कजसुबा, ख्युइ ङाला चिला ताङदे?"✝ 47 हतिया लाँलाँबाबे नाङने चोमयि धि थोहिरे नाइसोङ, "धि मि एलियाला क्ये तोङिनदु।" 48 हतिबे नाङने च्हि होप्तामेला स्युइते पुइसोङ च्हि कपासला खेरते खाडे खुवाला पिल्दे ङ्युमाला पोरते खोला थङदु च्युसोङ।✝ 49 हिन्नाङ ल्हामातेबे नाइसोङ, "ता, अर्थात एलिया खोला क्योपतु लेबोङ कि?" 50 तेहि याङ येशु क्ये छ्येया क्याइरे क्ये तोन्सोङ राङ रेँ उ च्येसोङ। 51 हति भेलाला राङ मोनलाम क्यासि खिमयि तन्ना टुपुने स्याम थु भाग ङि च्युङदे रालसोङ, राङ सा धाराला छेलसोङ राङ टातेबा छ्यासोङ।✝ 52 तुरसातेबा लाँरे लेप्सोङ, राङ ङ्याङ्यालि लेइराङ कजसुबायि पवित्र मि स्यिस्यियायि स्हु सोम्बो च्युङदे लाँसोङ, 53 राङ हतिबा तुरसाने थोन्देलो राङ स्यिस्यियाने येशु सोम्बो ला छारते च्येला हतिबे पवित्र भजारला स्युरेलो राङ लेइराङयि तेहा थोङदे। 54 जब घोबा राङ खो ङ्याबो येशुला ताङान सिपाहितेबे साघुल राङ हतिया च्युच्युङि घटना थोङदे, तेहि लेइराङ झिटा च्युङदे हतिबे जु नाइसोङ, "तेम्बारे, धि कजसुबायि पिजा हिना।" 55 हतिया गालिलने लेलेबा लेइराङ पुमो याङ धुलो, हतिबा घ्याबोने धि पोरो तेन ताताता धुलो। हतिबा खोला स्यापच्यि स्युन राङ गालिलने राङ येशुयि च्येच्येला लेलेबा हिना।✝ 56 हतिबे नाङने मरियम मग्दलिनि, राङ याकुब राङ योसेफयि आमा मरियम, राङ जब्दियायि पिजायि आमाते याङ धुलो।

57 कमु च्युङ छारते अरिमाथिया भजारयि योसेफ मिन क्याक्याइबि मि छ्युक्पो झि लेप्सोङ। खो खोराङ येशुयि लोब्टु हिना। 58 ख्युइ पिलातसयि तेहा पुते येशुयि स्यिस्यियायि स्हु लाँसोङ, राङ पिलातसयि खोला तेरयापयि आदेश च्युसोङ। 59 योसेफयि स्यिस्यियायि स्हु खेरते मलमलयि चाङमा कोहिलायि ताम्देलो। 60 राङ ख्युइ टाला सारबा कोहिरे सोसोइबा तुरसातेला हति पोरते, राङ तुरसायि खाने टोउ छोम्मुवा झि कापसोङ, राङ खो पुइसोङ। 61 तुरसायि धुनला मरियम मग्दलिनि राङ स्यान मरियम याङ ताताता धुलो।

62 ङाइटोतेला, अर्थात छेलयापयि ङिनयि ङाहिटोतेला, घोबा पुजारि राङ फरिसिबा पिलातसयि तेहा पुतेलो। 63 राङ नाइसोङ, "हजुर, ङहेला टाम्बा होतो, कि फट्टियि सोम्बो होतोला, ङिन सुम च्येला ङा याङ लाँरे होङज्याइ नाइसोङ।✝ 64 हतिचाला ङिन सुम थु हति तुर च्याङ होङदु माच्युका भोरयापला आदेश पिन, स्यान मान्ना हति लोब्टुबा लेप्ते हति कुइरे खेरोङ, राङ ‘हतिता स्यिस्यियाने सोम्बो च्युङदे लाँदु’ नाइरे मितेबाला नाङान ना, राङ हति च्येमे धोका ताङमाले याङ अल होङान ना।"

65 पिलातसयि हतिबाला नाइसोङ, "खे खिरि कोराबा होएराङ धु। क्यु, खि चोम ङ्युइ हतिबाला च्याङ होङदु माझ्यु।" 66 तेहि हतिबा पुते टोउला छाप क्यापसोङ, राङ कोराबातेबा लाइ कोइरे तुरसा सुङदे पोरसोङ।