1 तेहि तुइयि लाम्ला छोए तायापला पवित्र आत्मायि लाम्ला येशुला च्याङ मेते साला खेरसोङ। 2 खो ङिन छान खलङि वर्तला ताते च्येला टोपा तसोङ।✝ 3 तेहि छोए ताङानति ख्युइ तेहा लेप्ते नाइसोङ, "ख्योए कजसुबायि पिजा हिन्ना टोउतेबाला लोटा होङवार सह नाइरे आदेश पिन।"

4 "हिन्नाङ येशुयि जवाक पिन्सोङ" "टिटिबा धु, ‘मि लोटायि मात्रा माना’ हिन्नाङ कजसुबायि खाने थोथोना वचन पोरोने सोम्बो लुइकिन।" 5 तेहि तुइयि खोला पवित्र भजारला खेरते मोनलाम क्यासि खिमयि टुपु लाङसोङ, 6 राङ खोला नाइसोङ, "ख्योए कजसुबायि पिजा हिन्ना, धिने हअला फोर, चिचालानाना धि च्वरा टिधु, ‘ख्युइ रेँ तेङलायि लोन खेरङानयि आदेश ख्योएला तेराङान ना राङ हतिबे खेला रेँ लाक्पाला राङ सुङान ना, स्यान अर्थात ख्युइ काङबा टोउला फोङान ना।’"✝ 7 येशुयि हतिला नाइसोङ, "टिटिबा धु, ‘ख्योए रेँ कजसुबाला छोए माता।’"✝ 8 याङ तुइयि खोला थो छेया रिला खेरते संसारयी राज्य पोरो राङ हति ङोम खोला तान्सोङ, 9 तेहि खोला नाइसोङ, "ख्युइ ङाला कुरकुर क्याइरे छ्या पुलना, ङा धिबा पोरो ख्योएला तेरच्याइ।" 10 तेहि येशुयी हतिला नाइसोङ, "तुइ ख्योए घ्याबोला त्योए! चिचालानाना टिटीबा धु, ‘ख्युइ परमप्रभु रेँ कजसुबाला छ्या फुल, राङ ख्युइ मात्रा स्यापच्यि स्युइ।’"✝ 11 तेहि तुइ येशुला पोरते पुइसोङ राङ तेङलायि लोन खेरङान लेप्ते खोला स्यापच्यि स्युइसोङ।

12 बप्तिस्मा तेरङान युहान्ना झ्यालला पुइतु ना थोइरे येशु गालिल प्रदेश यहला पुइसोङ। ✝ 13 नासरत ताङदे कफर्नहुम भजारला पुते हतिया तोताला छेलसोङ। धि भजार जबुलुन राङ नप्तालियि छेत्रला, छोयि नेमुला परि हुन। 14 यशैया ङोन्सेखिलङानयि नानाइबि वचन धि च्वरा क्याइरे पुरा च्युङसोङ: 15 "जबुलुनयी युल राङ नप्तालियि युल, यर्दन चाङबुइ फारकानला, छो छोम्मुवा यहला, यहुदि मान्ते मितेबे गालिल" 16 मुन्नाला त्योएङान मितेबे होए छोम्मुवा झि थोथोङा होतो। कालयि टिप्सोयि देशला त्योएङानतेबे थोला होए झि स्यारतु। 17 हति भेलाने टाइक्ये किन राङ येशु नाला छेलसोङ, "तिक्पाने सम लक्ते ख्याला कि, चिचालानाना तेङलायि राज्य धुनला लेलेबा धु।"

18 गालिल छोयि नेमुला ढुइतुइना ख्युइ पत्रुस नाङान सिमोन राङ हति भाइ अन्द्रियास, ङिकार भाइतेबाला छोयि जालि झुकिन ताताता थोङदे। हतिबा ङ्या सुङान हिना। 19 येशुयी हतीबाला नाइसोङ, "ङाहि च्येला सह, राङ ङा खेला मि सुङान सोज्याइ।" 20 तेहि हतितुइना राङ झालतेबा पोरते हतिबा येशुयी च्येला पुइसोङ। 21 हतिने ढुन-ढुन ख्युइ स्यान भाइ ङि, जब्दियायि पिजातेबा राङ याकुब राङ हति भाइ युहान्नाला हतिबे आके जब्दिया ङ्याबो डुङगाला रेँ झाल सुन ताताता थोङदे, राङ ख्युइ हतिबाला क्ये ताङदेलो। 22 तेहि हतितुइना राङ डुङगा राङ हतिबे आकेला ताङदे हतिबा ख्युइ च्येला लेप्सोङ।

23 तेहि येशु हतिबे यहुदि झोमसि खिमतेबाला लोबिन राङ, राज्ययि लोन ल टाइक्ये किन राङ, मितेबाला होएता कुरकुरु नाझा राङ स्हु कमजोर च्युच्युङा टाक्तु झ्युकिन राङ गालिल पोरोला युसोङ।✝ 24 ख्युइ क्याक्याइबि लाइ सिरिया काङ राङ टाइक्ये च्युङसोङ, राङ नाप्पातेबा, अर्थात कुरुकुरु नाझा राङ समतुयि खाँखाँबा, ढे ताताइबा, राङ स्हा फोफोकि नाझा, फफका, राङ स्हु मिघुलङनयि नाझा होएता पोरोला मितेबे ख्युइ तेहा ख्योसोङ। ख्युइ हतिबाला टाक्तु च्युसोङ। 25 तेहि गालिल प्रदेश, डेकापोलिस, यरुश्लेम भजार, यहुदिया राङ यर्दन चाङबुइ फारकानला थोङानयि मि तुम छोम्मुवातेबा ख्युइ च्येला लेप्सोङ।