1 ङालसुइ ङिनयि च्येला, हप्तायि ङिमा ताङसह च्याबो ताङमे तुइना मरियम मग्दलिनि राङ स्यान मरियम तुरसा तारु लेप्सोङ। 2 साघुल छेया झि लेप्सोङ, चिचालानाना कजसुबायि तेङलायि लोन-लोन खेरङान झि लायुने हअला लेप्सोङ, राङ लेप्ते टोउ फाला क्याइरे हति थोला त्येसोङ। 3 हति च्ये बत्ति च्वरा राङ कोहिला खा: च्वरा कारबो धुलो। 4 खोला झिरे हति कोराबातेबा थरथर धारतेलो, राङ स्यिस्यिया च्वरा च्युङसोङ। 5 हिन्नाङ तेङलायि लोन खेरङानति हति पुमोला नाइसोङ, "खे माझि, चिचालानाना ङाला छ्या होतो, खे क्रुसला ताताबि येशुला फातु लेलेबाना। 6 खो ङिहा मेता, चिचालानाना ख्युइ नानाइबा च्वरा खो सोम्बो च्युङदे लाँलाँबा होतो। सअ, ख्युइ स्यिस्यियायि स्हु पोपोरि साला तोइ। 7 तेहि घ्यबो पुते ख्युइ लोब्टुबाला लोन पिन, कि खो स्यिस्यियाने सोम्बो च्युङदे लाँ छारतु, राङ खो खेले ताङला गालिलला ढुनत्येतु। खि खोला हतिया थोङान ना। टाम्बा कि, ङाहि खेला नाइछारते।" 8 तेहि हतिबा झिटा राङ केनराङ होप्तेमेला तुरने थोन्दे पुइसोङ, राङ ख्युइ लोब्टुबाला लोन नारु स्युरतेलो। 9 हो:प्तामेला येशु हतिबाला ठाते नाइसोङ, "शान्ति!" हतिबा धुन्ना लेप्ते ख्युइ काङबा सुङदे छ्या पुलसोङ। 10 तेहि येशुयि खोला नाइसोङ, "माझि, पुते ङाहि भाइबाला गालिलला क्यु नोइ, राङ हतिया हतिबे ङाला थोङान ना।"

11 जब हति पुमोतेबा लामला ढुन ताताता होतो, रेन-रेन कोराबातेबा भजारला पुते घोबा पुजारिबाला हतिया च्युच्युङि घटनायि भारेला लोन पिन्सोङ। 12 जब घोबा पुजारिबा धर्म गुरुबा ङ्याबो झोम्दे त्येसोङ, हतिबे रुताम क्याइसोङ राङ सिपाहिबाला झु नेनगा लेइराङ आलाइ पिनसोङ, 13 "खे नोइ कि ‘ङे ङ्याङ्याला ला हति लोब्टुबा लेप्ते हतिला कुइरे खेरतु।’ 14 माचुङना रोमि आङकिङान यि नामज्योला धि ताम क्योपना, ङि खोला घोकोरते खेला क्ययोप च्याइ।"

15 तेहि कोराबातेबे आलाइ खेरसोङ, राङ लालाबा च्वरा क्याइरे लो, राङ यहुदिला थाल्लि ङिन थु धि ताम राङ टाइक्ये च्युच्युङा होतोलो।

16 हति लोब्टु च्युचि गार गालिलयि हति सुरकाला पुतेलो, क्हा येशुयि हतिबाला ढोयापयि लोन पिपिना होतोलो।✝ 17 हतिबे खोला थोङदे छ्या पुलसोङ, हिन्नाङ हतिबा रेनयि शङ्का क्याइसोङ। 18 तेहि येशु हतिबे तेहा पुते नाइसोङ, "तेङला राङ पिरथिवि पोरो आङ ङाला पिपिना होतो। 19 हतिचाला क्यु, राङ पोरो देशयि मितेबाला लोब्टु सोइ, आके पुत्र राङ पवित्र आत्मायि मिनला हतिबाला बप्तिस्मा पिन, ✝ 20 ङाहि खेला आदेश च्युच्युकि पोरो ताम पालना कियाप हतिबाला लोप। ङा काल्बा सिनसिन थु बारतै खे ङ्याबो होङान ना।"