1 हति च्येला येशु डुङगाला स्योन्दे छोयि फारकानला पुइसोङ, राङ खुरि भजारला लेप्सोङ। 2 मितेबे खाटाला ङ्याङ्यालि स्हु च्याङ मिघुङानयि मिझिला ख्युइ तेहा ख्योसोङ। येशुयि हतिबे हिछे थोङदे स्हु च्याङ मिघुलङानयि मिला नाइसोङ, "पिजा, हिम्मत कि। ख्युइ तिक्पा माप च्युङदे।" 3 शास्त्रिबे नाङने लेइराङयि खोरे नाङला नाला छेलसोङ, "धि मिता कजसुबाला अल नेन्दु।" 4 येशुयि हतिबे समयि विचार हा:कोरे नाइसोङ, "खे चिचाला रेँ समला अल विचार किन? 5 चिचालानाना काङ नायाप लाइला होतो, ‘ख्युइ तिक्पा माप च्युङसोङ,’ नायाप राङ ‘ल्हँ राङ क्यु’ नायाप? 6 हिन्नाङ मि पिजाला पिरथिविला तिक्पा माप कियापयि आङ होतो नाइरे खि हा:को।" तेहि ख्युइ हति स्हु च्याङ मिघुलङान मितेला नाइसोङ, "ल्हँ, ख्युइ खाटा खुर, राङ खिमला क्यु।" 7 तेहि हति लाँसोङ राङ, रेँ खिमला पुइसोङ। 8 जब मिझोमयि धि थोङदे, तेहि हतिबा झिसोङ, राङ मिला धि च्वरायि शक्ति तेराङानयि कजसुबायि छे त्येसोङ।

9 येशु हतिने ढुइतुइना मत्ति नाङान मिझि मिला कर तुइङानयि अड्डाला ताताता थोङदे, राङ हतिबाला नाइसोङ, "ङाहि च्येला सअ।" तेहि खो लाँरे ख्युइ च्येला लेप्सोङ।

10 येशु मत्ति खिमला सेन ताताति भेलाला, कर तुइङान लेइराङ राङ तिक्पा किङानबा लेप्ते येशु राङ ख्युइ लोब्टु ङ्याबो सारु त्येसोङ। 11 जब फरिसिबे धि थोङदे, तेहि ख्युइ लोब्टुबाला नाइसोङ, "चिला खि गुरु कर तुइङानबा राङ तिक्पा किङानबा ङ्याबो सारु तोकिन?"

12 धि थोइरे येशुयि नाइसोङ, "नाझा मेताला डक्टर कोइबा मिहा, हिन्नाङ नाझा होएताबाला हुन। 13 हिन्नाङ पुते ‘धि च्हि ना खे स्ये: ङा भोल माना, ङिङ्च्ये धोप्पा किन।’ चिचालानाना ङा केवाकिङानला माना, हिन्नाङ तिक्पा किङान बाला क्ये तोङदु लेलेबाना।"✝

14 तेहि युहान्नायि लोब्टुबा ख्युइ तेहा लेप्सोङ, राङ खोला टिसोङ, "चिला हु राङ फरिसिबा बर्त तोकिन, हिन्नाङ ख्युइ लोब्टुबा वर्त मितोता?" 15 येशुयि हतिबाला नाइसोङ, "जब थु ख्योबो लारकियाबा ङ्याबो तोकिन, च्हि हतिबा सम तु हुनाइ? हिन्नाङ हति ङिन होङान ना ख्योबो हतिबाने ख्योबोते खेराङान ना। तेहि हतिबा वर्त त्योएङान ना।

16 "सुइ याङ कोहिला ङिङबाला सारबा कोहिलायि ल्हामबा मिक्याका। चिचालानाना सारबा ल्हामा कोहिला रालदु झुकिन, राङ कोहिला हतिलेयाङ मा रालिन। 17 सुइ याङ ङिङबा पाबुइ किउला सारबा छ्याङ मिभोरा, स्यान अर्थात च्हुटि छाकिन, राङ छ्याङ पुन, राङ च्हुटि मासि हुन। हिन्नाङ सारबा छ्याङ सारबा किउला भोरिन, राङ ङिकारला च्याङ मिहा।"

18 जब येशुयि हतिबाला धि ताम नेन ताताता होतो, तेहि यहुदि झोमसि खिमयि आङकिङान झि लेप्सोङ, राङ खोला छ्या चालदे नाइसोङ, "ङाहि पोमु थाल्लाका स्यिसोङ, हिन्नाङ लेप्ते मुइ थोला ख्युइ लाक्पा पोर, राङ हति सोम्बो होङान ना।" 19 येशु लाँरे राङ ख्युइ लोब्टु ङ्याबो आङकिङानयि च्येला पुइसोङ। 20 हति भेलाला राङ लो च्युनङिने ठा झाङानयि नाझा होएता पुमो झि क्यापने लेप्ते येशुयि कोहिलायि नेमु झिला घुलसोङ।✝ 21 चिचालानाना मुइ सम नाङ नाङला टान्दुलो कि, "ङाहि ख्युइ कोहिला झि छुइ क्याइनाङ ङा टाङान ना नाइरे।" 22 फरक्याला क्यापला लक्ते तेतुइना येशुयि हति पुमोला थोङसोङ, राङ नाइसोङ, "पोमु, हिम्मत कि, ख्युइ हिछेयि ख्योएला टाक्तु च्युसोङ।" हति पोमु हति भेलाला राङ टासोङ।

23 तेहि जब येशु आङकिङानयि खिमला क्योपते, ख्युइ लिउ भुङानतेबा राङ मिझोमयि क्ये लोङ कुइलोङ किङान थोङसोङ। 24 ख्युइ हतिबाला नाइसोङ, "फिला क्यु, चिचालानाना नोज्युङते स्यिस्यिया मि धु, हिन्नाङ ङ्याङ्याला धु।" हतिबे खोला कोतेलो। 25 मिझोमला फिला तोन्छारते खो नाङला स्युसोङ, राङ हति पुमोयि लाक्पा सुङसोङ, तेहि हति पुमो हो:प्तेमेला लाँसोङ। 26 हति लाइयि टाइक्ये छेत्र पोरोला टाइक्ये च्युङसोङ।

27 येशु हतिने ढुइतुइना मि काना ङि "हे दाउदयि पिजा, ङि थोला ङिङ्च्ये कि" नेन राङ ख्युइ च्येच्येला लेप्सोङ। 28 खो खिमयि नाङला स्युरे हति काना मितेबा ख्युइ तेहा लेप्सोङ। येशुयि हतिबाला नाइसोङ, "ङाहि टाक्तु झ्यु ङ्युकिन नाइरे च्हि खे हिछे किनाइ?" हतिबे खोला नाइसोङ, "ज्यु, प्रभु।"

29 तेहि येशुयि हतिबे मिला घुल्दे नाइसोङ, "खि हिछे क्याक्याइबा च्वरा खेला सअ।" 30 तेहि हतिबे मि पेसोङ। येशुयि हतिबाला जु नाइरे कडा चतावानि पिन्सोङ, "धि ताम सुला हा:कोरु माझ्यु।" 31 हिन्नाङ हतिबा पुइसोङ, राङ हति देश काङ ख्युइ क्याक्याइबि लाइयि टाइक्ये च्युङसोङ।

32 जब हतिबे थोन्दे ढुन ताताता होतो, हतितुइना ढे काकाला ताम ना मिङ्युइङान मिझि येशुयि तेहा ख्योसोङ। 33 ढे तोन्दे च्येला हति ताम ना मिङ्युइङान ताम नाइसोङ। तेहि "इस्राएलला जबयाङ माथोङालो" नाइरे मिझोम हा:लाइसोङ। 34 हिन्नाङ फरिसिबे नाला छेलसोङ, "ढेयि ताक्पोने क्याइरे हति ढे धोनकिन।"

35 येशु लेइराङ भजारतेबा राङ युल यला हतिबे यहुदि झोमसि खिमतेबाला छोइ तेकिन राङ, राज्ययि लोन ल टाइक्ये किनराङ राङ कुरुकुरु नाझा राङ नोप्पुवातेबा टाक्तु झुकिन राङ पुइसोङ।✝ 36 हिन्नाङ मिझोमतेबाला थोङदे ख्युइ सम हतिबे चाला ङिङच्येयि खाँसोङ। चिचालानाना हतिबा रच्चिया मेता लु च्वरा रुवा किङान मेता राङ घो ख्यख्यामा च्वरा धु।✝ 37 तेहि ख्युइ रेँ लोब्टुबाला नाइसोङ, "तोङगि ढेबु लेइराङ धु, हिन्नाङ स्यिङला लाइकिङानतेबा ङ्युवा धु। 38 हतिचाला भालियि प्रभुला मोनलाम क्योप, राङ खो खुरि तोङगि ढेबु तुप्यापला स्यिङयि लाइकिङान चाँहोङ।"