1 येशुयि याङ हतिबाला प्येला नाइसोङ, 2 "तेङलायि राज्य क्याल:बो झि ङ्याबो थु ङ्युइकिन, सुइ रेँ पिजायि मिजेयि भत्यार तयार क्याइरे। 3 राङ भत्यारला पोपोइबि मितेबाला क्ये तोङदु नाइरे रेँ यक्पुवाबाला चाँरेलो, हिन्नाङ हतिबे होङसोम माक्याइबालो।" 4 "याङ ख्युइ स्यान यक्पुवाबाला जु नाइरे चाँरेलो, पोपोइबि मिबाला नोइ, तोइ, ङाहि ङारि भत्यार तयार सोइरे, ङाहि लोङबा राङ छोम्बो-छोम्बो तुढोबा सासाता होतो, राङ पोरो क्यु तयार होतो। मिजेयि भत्यारला सअ।" 5 "हिन्नाङ हतिबे मदलब राङ म, आचेबा रेँ च्हि भारि राङ स्यिङ यहला, स्यानतेबा रेँ छोङ कितु पुतेलो। 6 स्यानतेबे ख्युइ यक्पुवातेबाला सुङदे क्यापसोङ राङ हतिबाला स्येसोङ।" 7 तेहि क्याल:बो सेताङ लाँदु, राङ रेँ कोराबातेबाला चाँरेलो हति मिपसोएतेबाला सातेलो, हतिबे भजारला मे क्यापतेलो। 8 "तेहि ख्युइ रेँ यक्पुवातेबाला नाइसोङ, ‘मिजेयि भत्यार तयार धु, हिन्नाङ पोपोइबातेबा झोदायि मिधु। 9 हतिचाला खे चोकतेबाला क्यु, राङ चोम ठे नाङ हतिबाला मिजेयि भत्यारयि चाला पोइ।’ 10 तेहि हति यक्पुवातेबा चोकतेबाला पुते ठाठाता पोरोला, अल राङ ल ङि कारला, जम्मा क्याइसोङ, राङ मिजेयि खिम ढोम्बोतेबे खाँसोङ।" 11 "हिन्नाङ जब क्याल:बो ढोम्बोबाला तारु नाइरे नाङला लेप्तेलो, तेहि हतितुइना ख्युइ मिजेयि कोहिला मकोनि मिझिला थोङदे। 12 क्यालबुइ हतिला टिसोङ, ‘रुवा, मिजेयि कोहिला माकोनि ख्योए च्हिरु क्याइरे धि नाङला लेप्ते?’ हति जवाक मेता च्युङसोङ।" 13 "तेहि क्यालबुइ स्यापच्यि स्युङानतेबाला नाइसोङ, ‘हति लाक्पा काङबा किरे फिला मुन्नाला टिम, काँहा मितेबा ङुङान ना राङ सो चेङान ना।’✝ 14 येशुयि धि ताम स्यालसोङ, चिचालानाना क्ये ताताङा लेइराङ होतो हिन्नाङ धाधामा टिझि।"

15 तेहि फरिसिबा पुते खुरि तामला खोला च्हिरु क्याइरे फसाइ किच्याइ नाइरे टोइ क्याइसोङ। 16 हतिबे रेँ लोब्टुबला हेरोदि तुमयि मितेबा ङ्याबो ख्युइ तेहा चाँरेलो। हतिबे नाइसोङ, "हे गुरुज्यु, ङेला छ्या होतो, ख्योए तेम्बा ना, राङ कजसुबायि लाम तेम्बा क्याइरे लोबिन्दु, राङ ख्योए सुलाङ मिझिबा, चिचालानाना ख्योए मितेबे च्ये ताइरे लाइ मिकिता। 17 ख्युइ विचार च्हि होतो ङेला नोइ, कैसरला* कर च्योङयाप ल हिना कि माना?" 18 हिन्नाङ येशुयि हतिबे सम ना हा:कोरे नाइसोङ, "समनाँबा हो, खे ङाला चिला छोएतेन? 19 कर च्योङयापयि सिक्का ङाला तोन।" राङ हतिबे ख्युइ तेहा सिक्का झि ख्योरेँलो। 20 ख्युइ हतिबाला नाइसोङ, "धि भुट्टा सुइना, तेहि सुइ मिन कोए क्यापतुइ?" 21 हतिबे खोला नाइसोङ, "कैसरयि।" तेहि ख्युइ हतिबाला नाइसोङ, "हतिचाला च्हि कैसरयि हिना, हति कैसरला पिन, राङ काङ कजसुबायि हिना हति कजसुबाला पिन।" 22 हति थोहिरे हतिबा हा:लाइरेलो, राङ खोला ताङदे रेँ लामला पुइसोङ।

23 स्यिस्यियाने सोम्बो मिलाबा नाङान सदुकिबा हति ङिन राङ ख्युइ तेहा लेप्सोङ, राङ हतिबे खोला धि टिवा टिसोङ✝, 24 "गुरुज्यु, मोशायि नाइदु, सु मि याङ च्यिबा माच्युङा स्यिना ख्युइ भाइयि आज्योयि केरमानला मिजे क्याइरे आज्योयि सन्तन लोङकोइ हुन। 25 ङि उइला आज्यो भाइ तुन होतो। छे सोयि मिजे क्याइरे खो स्यिसोङ, राङ सन्तन माच्युङाति ख्युइ भाइयि चाला केरमान पोरते पुइसोङ। 26 हति च्वरा क्याइरे पारकाति राङ पारकायि छाम्माति, राङ तुन गारयि हति च्वरा क्याइसोङ। 27 हतिबा पोरो सिरे हति पुमो याङ स्यिसोङ। 28 हतिचाला स्यिस्यियातेबा याङ सोम्बो च्युङदे लाँबितुइना हति तुन गारयि नाङने हति पुमो सुइ केरमान हुन? चिचालानाना हति पोरोयि केरमान च्युङ छारते।" 29 येशुयि हतिबाला जवाक पिनसोङ, "खे घो ख्यामदु, चिचालानाना खे पवित्रशास्त्रा राङ कजसुबायि शक्ति हा:मिकुवा। 30 चिचालानाना मि स्यिस्यियाने सोम्बो लाँलाँबा मितेबे मिजे मिकिता, न मिजे क्याइरे तेरिन, हिन्नाङ हतिबा तेङलायि-तेङलायि लोन खेरङान च्वरा हुन। 31 हिन्नाङ मि स्यिस्यियातेबा सोम्बो लाँलाँबि भारेला;ङा कजसुबायि खेला च्हि नाइदुइ, हति खि टटबा मेता? 32 ‘ङा अब्राहामयि कजसुबा, इसहाकयि कजसुबा राङ याकुबयि कजसुबा ना।’ कजसुबा स्यिस्यियातेबे कजसुबा माना, हिन्नाङ सोम्बोतेबे कजसुबा ना।"✝ 33 धि थोइरे मिझोमतेबा ख्युइ छोइला हा:लाइसोङ।

34 येशुयि सदुकिला च्यामाना सोइरसोङ नाङान थोइरे फरिसिबा ख्युइ तेहा झोम्देलो। 35 हतिबे नाङने च्हि शास्त्रियि खोला छोएतायापयि विचारयि खोला टिरेलो, 36 "गुरुज्यु, मोशायि ठिमला हा:छेस्युवा आदेश काते ना?" 37 ख्युइ हतिला नाइसोङ, "ख्युइ कजसुबा रेँ कजसुबाला रेँ सम पोरोने, राङ रेँ उ पोरोने, राङ रेँ पोरो हा:कोयाप पोरोने करि कि।✝ 38 छे स्युवा राङ ताङस्युवा आदेश धि राङ ना। 39 ङिबा आदेश तेयाङ धि च्वरा राङ होतो, ख्युइ रेँ खिमजेला राङ च्वरा करि कि।✝ 40 मोशायि ठिम पोरो राङ ङोन्सेखिलङानयि छोइयि हा:कोयाप राङ धि आदेश ङि तेना।"✝

41 जब फरिसिबा झोझोमा होतोलो, हतितुइना येशुयि हतिला टिवा झि क्याइसोङ, 42 "ख्रिष्टयि भारेला खे च्हि टानकिनधुइ? खो सुइ पिजा ना।" हतिबे खोला नाइसोङ, "दाउदयि पिजा।" 43 येशुने हतिबाला टिसोङ, "हति च्वरा हिन्ना दाउदला आत्मायि शक्तिने खुँरे खोला च्हिरु क्याइरे प्रभु नाइरे क्ये तोङकिन? खो नेन धु," 44 कजसुबायि ङाहि प्रभुला नाइसोङ, "ख्योए ङाहि याइ यहला त्योए, जब थु ङा ख्युइ टातेबाला ख्युइ काङबि तिङभि हअला मिभोरा।"✝ 45 तेम्बारे दाउदयि खोला प्रभु नाना, "खो च्हिरु क्याइरे ख्युइ पिजा हुन?" 46 तेहि सुइ याङ जवाकला तामझि याङ ना माङ्युइसोङ। हति ङिनने सुलाहाङ खोला ताम ढियापयि हाम माकेसोङ।