1 ङिन सुबा तेला गालिलयि काना भजारला मिजे किन्दुलो। येशुयि आमा हतिया धुलो। 2 येशु राङ हति लोब्टुतेबाला याङ मिजेला पोइसोङ। 3 छ्याङ सिन येशुयि आमि खोला नाइसोङ, "हतिबे तेहा छ्याङ मिदु।" 4 येशुयि हतिबाला नाइसोङ, "हे पोमु ङाहि च्हि किकोइ होतो ङाला माना। ङाहि भेला तरह लेलेबा मेता।" 5 मुइ आमायि यक्पुवातेबाला ला नाइसोङ, "ख्युइ नानाइबा च्वरा खे कि।" 6 ता यहुदिबे चाङमा सोयापयि लुलामयि चाला हतिया हा:लाम लिटर क्या झि स्योङान टोउयि ट्हु थाबा क्याङबा पोरतुइ। 7 येशुयि हतिबाला नाइसोङ, "क्याङबा बा छ्युयि खोङ।" हतिबे काङभि खा थु छ्युयि काङदेलो। 8 ख्युइ हतिबाला नाइरेलो, "टिझि खापेरे भत्यारयि ङोधो मितेबाला खेर।" हतिबे नानाइबा च्वरा केन राङ खेरसोङ। 9 भत्यारयि ङोधो मितेबायि हति छ्यु तुरेलो, काङते ता छ्याङला घ्युरतुलो। हति ल काने लेलेबाना खोला छ्या मेतालो हिन्नाङ छ्यु घाङानयि यक्पुवातेबाला छ्या होतो। तेहि भत्यारयि ङिन हतिबे ख्योबोतेला क्ये ताङदे नाइरेलो। 10 "ताङस्युवा मि पोरोयि ल छ्याङ पोरते ढुनलो तेहि मि तेबे लेइ राङ त्हु मात्रा अल छ्याङ भोरिनलो। ख्युइनि थल्ला थु ल छ्याङते पोरतु।" 11 येशुयि ख्युइ ताङस्युवा हा:लाइतु झ्युयापयि लाइते गालिलयि काना भजारला क्याइसोङ। हतिच्वरा क्याइरे ख्युइ खुरि छे त्येसोङ, तेहि ख्युइ लोब्टुबे खोला हिछे क्याइसोङ। 12 हतिच्येला खो खुरि आमा, भाइतेबा राङ लोब्टुतेबा ङ्याबो कफर्नहुमला पुइसोङ। ङिन रेन हतिया तातेलो।

13 यहुदिबे निस्तार कालापसोल याङ धुनला हुन्दु, राङ येशु यरुश्लेमला पुइसोङ।✝2:13 प्रस्थान १२:१-२७ 14 ख्युइ मोनलाम क्यासि खिमला लोङ, लु, ङोम्मु छोङान राङ आलाइ च्येङानतेबा ङ्युन छोङिन ताताता ठेसोङ। 15 तेहि थाक्पि चापकि झि सोइरे ख्युइ हति पोरोला, हतिबे लु राङ लोङ हाङ मोनलाम क्यासि खिमने त्येसोङ, आलाइ च्येङानबे टेबुल खोलबु क्याप्ते हतिबे टेबुल लला क्याप्सोङ। 16 ङोम्मु छोङान तेबाला ख्युइ नाइसोङ, "धिने धिबा पोरो खेर। ङाहि आकि खिमला छोङ क्यायापयि खिम मासो।" 17 ख्युइ लोब्टुबे शास्त्रला नानाइबा हा:कोरेलो, "ख्युइ खिमयि जोश तरह ङाला झ्योपतु झ्युङान ना।" 18 यहुदि आङ किङानबा ख्युइ तेहा टिवा जि ख्योँरे लेप्सोङ, "ख्योए धि लाइ किन्दु, ख्योए धि चाला ङेला काङ हा:लाइयापयि लाइ तोन ज्याइ?" 19 येशुयि हतिबाला जवाक पिन्सोङ, "धि मोनलाम क्यासि खिम तिप, राङ ङा ङिन सुमला लोङ ज्याइ।"✝2:19 मत्ति २६:६१; २७:४०; मर्कुस १४:५८; १५:२९ 20 "तेहि यहुदिबे नाइसोङ, धि मोनलाम क्यासि खिम सोज्याइला लो खलङि राङ टु थसोङ, राङ ङिन सुमला ख्युइ धि मोनलाम क्यासि खिम लोङ ङ्युयि नाइ च्हि?" 21 हिन्नाङ काङ मोनलाम क्यासि खिम यि भारेला ख्युइ नानाइबा होतो, हति ख्युइ स्हु हिना; 22 जब खो स्यिरे लाँहिन, तेहि येशुयि नानाइबि धि ताम लोब्टुबाला टाम्बा सोइसोङ, राङ हतिबे पवित्रशास्त्रयि थोला राङ येशुयि नानाइबि वचनयि थोला हिछे क्याइसोङ।

23 जब येशु निस्तार कालापसोलयि तुना यरुश्लेमला होतो, हतितुइना ख्युइ क्याक्याइबि हा:लाइयापयितेबा थोङसोङ लेइ राङ यि ख्युइ मिनला हिछे क्याइसोङ। 24 हिन्नाङ येशुयि खोराङला हतिबे भरला मापोरसोङ, चिचालानाना ख्युइ पोरोला ङोस्येयिनलो। 25 चिचालानाना मि च्हिना नाइरे खोला छ्या होतो। खोला मि भारेला सुइ नाकोइ मेतालो चिचालानाना मि सम च्हिरु हुन खो खुरि हा:कुनलो।