1 हतिच्येला लोब्टुबे तेहा तिबेरियास छो छोम्मुवायि धुनला येशुयि याङ खो राङला तानसोङ। ख्युइ खो राङला धि च्वरा क्याइरे थोङदु च्युसोङ: 2 सिमोन पत्रुस, दिदुमास नाङ थोमा, गालिलयि काना भजारयि नथानेल, जब्दियायि पिजा ङिबो राङ ख्युइ लोब्टुबे नाङने स्यान ङिबो ङ्याबो धुलो। 3 सिमोन पत्रुसयि हतिबाला नाइसोङ, "ङा ङ्या सोतु ढुन होए।" हतिबे खोला नाइसोङ, "ङेला याङ ख्योए ङ्याबो होङज्याइ।" हतिबा पुते डुङगाला स्योसोङ हिन्नाङ हति छाम्मु हतिबे च्याङ मासुङा।✝21:3 लुका ५:५ 4 नामे हुवाला छेलसोङ, येशु छ्युइ नेमुला लाँरे तेतु। हिन्नाङ लोब्टुबे खो येशु राङ हिना नाइरे ङोमास्येबा। 5 येशुयि हतिबाला नाइसोङ, "च्हिटाबा, खेला ङ्या रेन होतोइ?" हतिबे खोला जवाक पिन्सोङ, "मेता।"

6 ख्युइ हतिबाला नाइसोङ, "झालि डुङगायि याइ यहला छ्यु, तेहि खुङान ना।" तेहि हतिबे झालि च्युसोङ, राङ ङ्या माहारा छेरे हतिबे धोन माङ्युइसोङ।✝21:6 लुका ५:६ 7 येशुला करि किङान लोब्टुति येशुला नाइसोङ, "खो प्रभु हिना ये।" "खो प्रभु हिना" नाङान थोइरे सिमोन पत्रुसयि रेँ फियि कोहिला केप्पाला तामसोङ, चिचालानाना ख्युइ कोहिला पुइतु राङ छुला फारसोङ। 8 स्यान लोब्टुतेबा डुङगाला राङ ताते ङ्या थेथेबि झालि ढुन किनराङ लेप्सोङ। हतिबा छोयि नेमुला घ्याबोला माना, हिन्नाङ हा:लाम मिटर क्या झि झोमयि घ्याबोला धु। 9 जब हतिबा नेमुला पुप्ते, हतितुइना हतिबे सोलायि थपुङला ङ्या पोपोरा लोटा थोङसोङ। 10 येशुयि हतिबाला नाइसोङ, "थाल्ला खि सुसुङायि ङ्याने रेन ख्याला।" 11 तेहि सिमोन पत्रुस पुते डुङगाला स्योन्दे क्या राङ ङोपच्यु राङ सुम थाबा ङ्या छोम्मुवायि खाँखाँबि झालि पाङला टुइसोङ, हिन्नाङ होचोम होएनाङ झालि मारालसोङ। 12 येशुयि हतिबाला नाइसोङ, "लेप्ते सो।" लोब्टुबे नाङने सुइ याङ "ख्योए सुना?" नाइरे ढि माङ्युइसोङ, चिचालानाना खो प्रभु हिना नाङान छ्या होतो। 13 येशु लेप्सोङ राङ हतिबाला लोटा पिन्सोङ। हति च्वरा क्याइरे ङ्यायाङ पिन्सोङ। 14 स्यिरे सोम्बो च्युङदे लाँरे लेलेबा येशु लोब्टुबे तेहा थोथोङा लाम्मा सुबा हिना।

15 जब हतिबे साइ छारसोङ, हतितुइना येशुयि सिमोन पत्रुसला नाइसोङ, "युहान्नायि पिजा सिमोन, च्हि ख्योए धिबाले म्हा ङाला करि किनाइ?" हति खोला नाइसोङ, "ज्यु प्रभु, ख्योएला छ्या होतो ङा ख्योएला करि किन।" ख्युइ हतिला नाइसोङ, "ङाहि लुतेबाला सायाप पिन।" 16 ख्युइ याङ लाम्मा सुबा हतिला नाइसोङ, "युहान्नायि पिजा सिमोन, च्हि ख्योए ङाला करि किनाइ?" ख्युइ खोला नाइसोङ, "ज्यु, प्रभु, ख्योएला छ्या होतो, ङा ख्योएला करि किन।" ख्युइ हतिला नाइसोङ, "ङाहि लुबाला ल क्याइरे तोइ।" 17 ख्युइ हतिला लाम्मा सुबा टिसोङ, "युहान्नायि पिजा सिमोन, च्हि ख्योए ङाला करि किनाइ?" पत्रुसयि सम तुसोङ, चिचालानाना ख्युइ लाम्मा सुबा खोला "च्हि ख्योए ङाला करि किनाइ?" नाइसोङ। ख्युइ हतिला नाइसोङ। "प्रभु, ख्योएला ताम पोरो छ्या होतो।" ङा ख्योएला करि किन नाइरे ख्योएला छ्या होतो येशुयि हतिला नाइरेलो, "ङाहि लुबाला तोइ।" 18 तेम्बारे, "ङा ख्योएला नाज्याइ, जब ख्योए स्यारा होतो ख्योए खुरि कारा ख्युरि किसोङ, राङ काँहा ढोसोम होए ढुन्दु। हिन्नाङ जब ख्योए काप्पो हुन, तेहि ख्योए खुरि लाक्पा क्योङान ना, राङ स्यानयि ख्युइ कारा छिङान ना, राङ काँहा ख्योए ढोसोम म्हे हतिया खेरङान ना।" 19 च्हिरु क्याइरे स्यिरे ख्युइ कजसुबे छे धेकिन, हति ता तोनिन राङ ख्युइ धि नानाइबा ना। झोम नाइरे येशुयि पत्रुसला नाइसोङ, "ङाहि च्येला सअ।"

20 पत्रुसयि क्यापला लक्ते तेतुइना येशुयि करि किङान लोब्टुला च्येला हुन ताताता थोङसोङ। ख्युइ राङ कमुइ ङ्योपि तुइना ख्युइ टाङला ङेरे, "प्रभु, ख्योएला सुङान सुना?" नाइरे टिसोङ।✝21:20 युहान्ना १३:२५ 21 खोला थोङदे पत्रुसयि येशुला नाइसोङ, "प्रभु, ख्युइते च्हि हुन?" 22 येशुयि पत्रुसला नाइसोङ, "ङा मालेप थु खो त्येना ङाहि धोप्पा ख्योएला च्हि? ख्योए ङाहि च्येला सअ।" 23 हतिचाला हति लोब्टु मिस्यिया नाङान भाइबे नाङला टाइक्ये च्युङसोङ। येशुयि खो मिस्यिया नानाइबा माना हिन्नाङ "ङा मालेप थु खो कहुरे सोम्बो त्येना ङाहि धोप्पा ख्योएला च्हि?" नानाइबा हिना। 24 धि हति लोब्टु राङ ना सुइ धि तामबे भारेला साछि तेरिन, राङ धि तामबा टिदु, तेहि ङेला छ्या होतो कि ख्युइ साछि तेम्बा ना।

25 येशुयि स्यान लाइ याङ लेइराङ क्याइसोङ। हतिबे नाङने च्यिच्यि क्याइरे ढीङान नाना, ङाला धि च्वरा लागि हुन्दु, कि ख्युइ टिटिबि किताब संसारला राङ मिस्युवा।